Marĩkõ 12

Iyiainit cĩ manu

(Bẽl Matewo 21:33-46; Luka 20:9-19)

Ma balna natẽ uduwak Yesu ĩnõõgõ thõõth cĩ owovothi cĩ alĩtanẽ eet cĩ athĩ ne, “Aavĩ balna eeti ĩmma cĩ ẽẽv mana cĩnnĩ cĩ kẽẽn cĩk vĩnõwak, ũlũk lũwat cĩnnĩ kõyõkõn, ĩthõng ĩdĩman look cĩ amacũwanĩ nyegerua. Ĩthõng arĩk lobele cĩ behinto, ĩthõng ũtũngẽẽĩ mana evyiok kĩĩ kẽhẽrõn nẽ. 2 Ma balna ngĩ õdõlanit wathinniowa cĩk teedintiak, ition baatĩ manu ticciannioit kũũk kayaha vĩnõ cĩnnĩ. 3 Õvvõ kẽggẽ agam evyiowa neekie ticciannioit thõng, ĩthõng uukitõ ĩnõõnõ õrrõt, ĩthõng itionitõ ĩnõõnõ kimiirie athĩnẽy kaganoko. 4 Ĩthõng itiona baatĩnnẽ ticciannioit ĩmma naboo, õvvõ kẽnnẽ uuk nẽẽgẽ ĩnõõnõ õõ, ĩthõng adaaccitõ õrrõt. 5 Ĩthõng balna ition baatĩnnẽ ticciannioit ĩmma naboo, õvvõ kẽnnẽ aruk ĩnõõnõ kadaak. Ĩthõng ition nẽ õõgĩ cĩk meelĩk, õvvõ kẽnnẽ uuk evyiowa neekie õõgĩ kĩĩ kuruit õõgĩ.

6 “Ayak balna baatĩ manu ngẽrĩnĩ codoi doo cĩ amĩnan õrrõt. Ma balna vurtia itionĩk nẽ ngẽrĩnĩ cĩnnĩ evyiok cĩk ẽbẽk mana a nẽ ne, ‘Ongollie katĩ nẽẽgẽ ngẽrnanĩ.’

7 “Avvu kẽnnẽ õvvõ õthõõth evyiowa neekie mĩn athĩ ne, ‘Logoo cĩnnĩ kir neccio, kivitia kuruit ĩnõõnõ, ĩthõng katĩ ĩĩtõ ijjio cĩgĩnnẽk koo cĩgaac.’ 8 Ngaatĩ thĩ balna agamĩ nẽẽgẽ ngẽrtĩ baatĩ manu, ĩthõng uruit ĩnõõnõ kĩĩ kutduktek ẽlẽ cĩnnĩ wo ngĩtĩvõrĩ manatõ.”

9 Ma balna thĩ natẽ ijin Yesu ĩnõõgõ ethek ne, “Ahaddu niigia adĩman woccia katĩ baatĩ manu nyia? Aku katĩ aruk nẽ evyiok nĩĩkẽ vẽlẽk, ĩthõng anyĩk mana nĩcẽ eet õõgĩ. 10 Dĩdĩ ebellu niigia thõõth wũ balna eheeddi Nyaragawa ĩcĩ Nyekuco athĩ ne,

“ ‘Ũtũbũrĩt balna tengenyiowa bĩĩ,

ĩthõng ikiyyia ĩthĩ bĩĩ coo tiir õrrõt ciitha,

11 gii cĩ balna adĩman Makayyioiti coo,

ĩthõng kĩcĩnta kẽbẽrẽnĩy ĩcĩgak,

ĩthõng ubulanet nẽ ageeta õrrõt kũdũt.’ ”

12 Ngaatĩ thĩ balna adiimi makayyiowa cĩk Yudei agamĩ ĩnõõnõ, nyatarka balna aga nẽẽgẽ ngatĩ õthõõthĩ Yesu ĩnõõgõ thõõtha cĩ owovothi ĩcoo. Ĩthõng thĩ, balna ongollie nẽẽgẽ meelitin cĩ eetu, ngaatĩ ũũngnĩcẽ ĩnõõnõ, ĩthõng anycĩk ĩnõõnõ kũũk.

Abũnna ma ngĩ kadũman mũcũrrũ, kõdẽ gẽrtha?

(Bẽl Matewo 22:15-22; Luka 20:20-26)

13 Ma balna thĩ vurtia, ivitia itionitõ makayyiowa cĩk Yudei Varithei õõgĩ kĩ eet õõgĩ cĩk alaan Ẽrõõd kõõt ĩcĩ Yesu, adiim nẽẽgẽ ngĩ ẽdẽta ĩnõõnõ thõõtha ĩcĩnnĩ. 14 Ivitia thĩ balna nẽẽgẽ kĩ ĩnõõnõ, ĩthõng ĩĩtõ ne, “Limannioit, kagayya naaga aduwa niia thõõth cĩ ẽẽn dĩdĩ, ĩthõng athii cĩ ongollie niia thoothonniok cĩk ahad eeta, nyatarka naboo athii cĩ alnai makathĩt cĩ eetu, ĩthõng thĩ, alimani eet thõõth cĩ Nyekuco cĩ ẽẽn dĩdĩ. Duwaet da, gẽrtha woccia ngatĩ kadũmanẽcĩ mũcũrrũ alaan cobbi cĩ Rũma? 15 Kadũman woccia thẽk, kõdẽ athii tõ?”

Ĩthõng thĩ, balna aga Yesu ngatĩ ẽẽn nẽẽgẽ volongnyiak, ĩthõng ẽdẽc nẽ ĩnõõgõ ethek ne, “Nyia idiimit niigia ĩtĩmantangũ aneeta wo?” Ĩthõng ma natẽ ijin Yesu ĩnõõgõ ethek ne, “Ayakta da nyarobiiac cĩ ẽẽn thiihit wo, kĩcĩn nana.” 16 Ngaatĩ thĩ baa anyĩcẽ nẽẽgẽ ĩnõõnõ nyarobiiac, ĩthõng ijin nẽ ĩnõõgõ ethek ne, “Nguum cĩ ngẽnẽ coo kĩ thar cĩkkõ?” Ẽdẽcĩ nẽẽgẽ athĩ ne, “Alaan cobbi cĩ Rũma.”

17 Ĩthõng thĩ, balna uduwak Yesu ĩnõõgõ ethek ne, “Anycĩk alaan cobbi cĩ Rũma kaal cĩgĩnĩk, ĩthõng anycĩk Nyekuc kaal cĩk Nyekucak.” Ĩthõng balna utubuan thõõth cĩ aduwa Yesu wo ĩnõõgõ.

Thõõth cĩ karũknanĩ daaĩtha

(Bẽl Matewo 22:23-33; Luka 20:27-40)

18 Aatĩ thĩ balna Thaduthei gwuak cĩk athĩ ne, athii cĩ arũkna eeta daaĩtha, ĩthõng õõt ijinit Yesu. 19 Ngaatĩ thĩ baa ẽthẽcĩ nẽẽgẽ ĩnõõnõ ne, “Limannioit, eheedĩcet balna ageeta Mutha thõõth cĩ athĩ ne, mĩ adaak eeti uungni ngaa kothii doolec, aku gotonia, ĩthõng agam ngaa cĩ bõyyĩ ẽẽ, kĩĩ katĩ kitirriak dõõlĩ cĩk katĩ ẽẽn cĩk gõtõnĩ cĩ adaak ẽẽ. 20 Aatĩ thĩ balna eeta gwuak cĩk ẽẽn gõtõõnõk cĩk ẽẽn tũrgẽrẽm. Ĩthõng ikiyyia itiwõõy cobbi, ĩthõng adaak kothii doolec. 21 Ĩthõng ikiyyia cĩ õwõba agam ngaa cĩ bõyyĩ ẽẽ, aku kẽnnẽ nẽ buu adaaĩ kothii dõõlĩ. Aku õwõbẽcĩ gotonia cĩ ẽẽn iyyio buu gõõl nĩcẽ dõ noko. 22 Adaaitõ balna eeta cĩk ẽẽn gõtõõnõk cĩk ẽẽn tũrgẽrẽm wo vẽlẽk kothii dõõlĩ. Ma vurtia cĩnnĩ, ikiyyia adaak ngaa neccie buu. 23 Ma katĩ thĩ kõr cĩ arũknanĩ eeta vẽlẽk cĩk adaaitõ, ẽẽn katĩ ngaa coo ngaa cĩ ngẽnẽ? Nyatarka balna agamit nẽẽgẽ vẽlẽk cĩk ẽẽn tũrgẽrẽm wo ĩnõõnõ.”

24 Ngaatĩ ẽthẽcĩ Yesu ĩnõõgõ ne, “Abaccu niigia! Athii cĩ agawu niigia thõõth cĩ eheeddi Nyaragawa ĩcĩ Nyekuco, kõdẽ tiirthẽt cĩnnĩ. 25 Mĩ ũrũkta eeta cĩk adaaitõ, athii nẽẽgẽ cĩ avvu atihi, aatĩ katĩ nẽẽgẽ kĩ anjĩlẽta cĩk aatĩ tammuatiddina. 26 Ĩthõng thĩ, nyatarka thõõth cĩ arũknanĩ daakciaha, nga ebelit niigia nyaraga cĩ Mutha ngatĩ eheedinie thõõth cĩ atũũthẽnẽ bõõnõ, thõõth cĩ aduwacĩ Nyekuci Mutha ẽthẽcĩ ne, ‘Keeni na Nyekuc cĩ Abrahamĩ, Nyekuc cĩ Aĩthaĩ kĩ Nyekuc cĩ Yokobĩ.’ 27 Ẽẽn nẽ Nyekuc cĩ ruguthiowu athii cĩ ẽẽn cĩ daakciawu. Abaccu niigia õrrõt.”

Tĩrĩthẽnĩt cĩ tiiri

(Bẽl Matewo 22:34-40; Luka 10:25-28)

28 Aavĩ balna limannioiti ĩmma cĩ Ngiran cĩ Mutha buu natẽ, athĩhĩ thõõth cĩ õthõõthõnẽ Yesu kĩ Thaduthei. Acĩn balna nẽ ngatĩ ẽdẽcĩ Yesu thõõth cĩnĩng ẽẽ, jurrung. Ngaatĩ aku ajini nẽ ĩnõõnõ ẽthẽcĩ ne, “Tĩrĩthẽnĩt jang cĩ tiiri õrrõt goonoginiy vẽlẽk?”

29 Ẽdẽc balna Yesu ĩnõõnõ ethek ne, “Tĩrĩthẽnĩt cĩ tiiri õrrõt goonoginiy vẽlẽk coo, cĩ athĩ ne, ‘Ĩthĩktõy niigia eeta cĩk Ĩthraĩlĩ! Ẽẽn Makayyioiti Nyekuc cĩnac codoi dõ doo. 30 Mĩnan Makayyioit Nyekuc cunni thĩnĩna cunni vẽlẽk, ririwaca cunni vẽlẽk, muwẽẽnta cunni vẽlẽk, ĩthõng kĩ tiirthẽta cunni vẽlẽk.’ 31 Ĩthõng tĩrĩthẽnĩt cĩ tiiri õrrõt cĩ ẽẽn ramma coo, ‘Mĩnan et cĩ abakanonu kaavu kĩcĩ amĩnani niia ẽlẽ cunni.’ Kothii tĩrĩthẽnĩt ĩmma cĩ tiiri cĩ ijiar cĩk ẽẽn ramma cĩkkõ.”

32 Ĩthõng ethek limannioiti cĩ Ngirano Yesu ne, “Limannioit, edeemiwu niia! Ẽẽn thõõth cĩ aduwa niia dĩdĩ cĩ athĩ ne, aavĩ Nyekuci codoi doo dõ, ĩthõng athii ĩmma naboo tõ. 33 Kĩ ngatĩ woccia amĩnanẽ niia Nyekuc thĩnĩna cunni vẽlẽk, muwẽẽnta cunni vẽlẽk, tiirthẽta cunni kĩ ngatĩ amĩnanẽ et cĩ abakanonu kaavu kĩcĩ amĩnanẽ niia ẽlẽ cunni. Tiir õrrõt ngatĩ ẽlẽmẽ niia tĩrĩthẽntiok cĩk ẽẽn ramma wo, kijiar ngatĩ anyĩcẽ niia kaal cĩk cavawu cĩk avaaddi kĩ anyintiok Nyekuc Ciitha cĩnnĩ.”

34 Ma balna ngĩ athĩrar Yesu ĩnõõnõ ngatĩ õthõõth thõõth cĩ ẽgẽẽnyĩ wo, ethek ĩnõõnõ ne, “Athii niia cĩ eeni rẽẽn kĩ kabicoc cĩ Nyekuco. Ma balna vurtia, ithii eeti ĩmma cĩ nganĩ ajin ĩnõõnõ jinẽnĩt ĩmma naboo tõ.”

Ẽẽn Kiristo Ngẽrtĩ ngẽnẽ?

(Bẽl Matewo 22:41-46; Luka 20:41-44)

35 Ma balna mĩ aliman Yesu eet reerunga cĩ Ciith cĩ Nyekuco ĩcĩtõ, ikiyyia ijinõy nẽ ĩthĩ ne, “Nyia kĩĩtõ limanniowa cĩk Ngiran cĩ Mutha ne, ‘Ẽẽn Kiristo ngẽrtĩ Davide?’ 36 Aduwaai baa Ririwacĩ cĩ Dĩhĩmĩ Davide kõthõõth kĩthĩ ne,

“ ‘Aduwaai balna Makayyioiti Makayyioit cannĩ ethei ne,

“Avvu niia attia cannĩ ĩcĩ athio,

kuumuc gii ngĩ kaarĩha mĩrõk cugunik

loota thoonĩy ĩcugunik.” ’

37 Avvũ Davide ĩnõõnõ ethei ne, ‘Makayyioit,’ ĩthõng ẽẽn woccia Kiristo ngẽrtĩ Davide kuu?” Athĩhĩ balna meelitini cĩ eetu ĩnõõnõ talintia.

Ĩtĩrĩth Yesu Varithei kĩ limanniok cĩk Ngiranak

(Bẽl Matewo 23:1-36; Luka 20:45-47)

38 Ma balna mĩ aliman Yesu eet, ikiyyia uduwak nẽ ĩnõõgõ ethek ne, “Egeenyit niigia limanniok cĩk Ngiran cĩ Mutha cĩk atarnanĩ ngatĩ ahimti ceremua cĩk wuuntik, ĩthõng adiim eet kĩthaacõ ĩnõõgõ tongolintia vatĩkẽy ĩcĩk tũwẽntak, 39 ĩthõng naboo adiim nẽẽgẽ ngĩ aatĩ loota taabĩtẽy cĩk ootinu Ciithẽnẽy cĩk Lawintiak kĩ ngatĩ aatẽ taabĩtẽy cĩk obbitik vatĩkẽy cĩk peyiano. 40 Ĩtdany nẽẽgẽ ngaay cĩk bõyyĩk agama ijjio korookjiowẽy cĩgĩk, ĩthõng ẽyẽla eleeti cĩgĩk ngatĩ anyi lawinit kĩĩ wuun. Maka katĩ ukwẽẽntĩ cĩnĩng õrrõt!”

Anyinit cĩ ngaa cĩ bõyyĩ

(Bẽl Luka 21:1-4)

41 Aavĩ balna Yesu loota ngatĩ anyĩcẽ eeta anyinit cĩnĩng, ẽbẽk thĩ baa Yesu eet ngatĩ aarĩcẽ nẽẽgẽ nyarobinya cĩgĩk nyethuduwoca cĩ nyarobinyawu Ciitha cĩ Nyekuco. Aari thĩ balna balliowa nyarobinya cĩk meelĩk õrrõt. 42 Ĩthõng thĩ, aavĩ thĩ balna ngaa ĩmma cĩ bõyyĩ cĩ apĩrna cĩ aku aari nuucunya cĩk ẽẽn ramma.

43 Ĩthõng, ũtũvvũ Yesu wobjiak cĩgĩnĩk, ĩthõng ethek ne, “Kaduwacung na agiitia dĩdĩ, arĩk ngaa cĩ bõyyĩ wo nuucunya cĩk meelĩk cĩk ijiar cĩk eet vẽlẽk. 44 Nyatarka aari balliowa nyarobinya cĩk kĩdĩk, ĩthõng itiang õõgĩ cĩk meelĩk. Ĩthõng thĩ, ngaa cĩ bõyyĩ coo, ẽdẽca nẽ kaal vẽlẽk cĩk woccia arũknĩ nẽ.”