Athanni katĩ Ciith cĩ Nyekuco
(Bẽl Matewo 24:1-2; Luka 21:5-6)
13
Ma balna ngĩ ẽtẽha Yesu ngĩtĩvõrĩ Ciitha cĩ Nyekuco,
ikiyyia wobjiaiti cĩnnẽ ĩmma uduwak ĩnõõnõ ethek ne,
“Limannioit,
cĩn da bĩĩyẽn cĩk obbitik kĩ ciithi cĩk dĩhĩmĩk cĩkkõ!”
2 Ẽdẽcĩ kẽnnẽ Yesu ĩnõõnõ ethei ne,
“Acini niia ciithi cĩk obbitik õrrõt wo?
Alibie katĩ nẽẽgẽ, ĩthõng athii katĩ cĩ uungnothi tõ.”
Tĩrĩthẽnĩt cĩ hecinto
3 Aavĩ balna Yesu Thiira ĩcĩ Olivnya cĩ abakanõy kĩ Ciith cĩ Nyekuco.
Ivitia balna ijinit Pẽtũrũ kĩ Jemith kĩ Yoanẽ kĩ Anderiya ĩnõõnõ burkia, ĩthõng entek nẽẽgẽ ĩnõõnõ ne,
4 “Duwaet da ageeta,
adĩmanni katĩ kaala cĩkkõ tĩngan?
Ĩthõng yelinit jang cĩ katĩ ẽyẽla ngatĩ õjõõntĩ kaala cĩkkõ wo?”
5 Ẽdẽcĩ Yesu ĩnõõgõ ethei ne,
“Egeenyit,
nyĩ anyiccu et ĩmma kĩgoolung agiitia,
6 nyatarka avvu katĩ eeta cĩk meelĩk avvũ thar cĩganĩk,
ĩthõng avvu katĩ nẽẽgẽ vẽlẽk codoi codoi athĩ ne,
‘Keeni Kiristo,’ ĩthõng ĩgõõl katĩ eet cĩk meelĩk kithiicõ.
7 Ma ithiktu niigia jõrẽnĩn,
kõdẽ ngĩ õthõõth eeta thoothonniok cĩk joreeninu,
nyĩ omothinu,
nyatarka avvu thẽk katĩ kaala cĩkkõ edenyiay, ĩthõng thĩ, athii cĩ athĩ ne, ikiyyia ditianẽtĩ.
8 Uukõy katĩ loociowa kĩ loociok,
ĩthõng uuktõy kabicõnĩnẽ kĩ kabicõnĩnẽ.
Ĩthõng naboo aatĩ katĩ kirikiriknya loociowẽy ĩcĩk meelĩk,
ĩthõng aavĩ katĩ butuny cobbi õrrõt vatĩkẽy ĩcĩk meelĩk.
Õgõõn katĩ kaala cĩkkõ kĩ wuciithi cĩ ngaa cĩ adiim ngĩ uukciay.
9 “Ĩthõng niigia,
ĩrĩcanta eleeti cuguk jurrung.
Agaminu katĩ,
ĩthõng oottu lokika.
Uukenu katĩ niigia Ciithẽnẽy ĩcĩk Lawintiak.
Abilnu katĩ niigia nguumtẽnẽy ĩcĩk gaalawu kĩ ĩcĩk alaanetu thõõtha cannĩ, kĩĩ katĩ udukta niigia nyemut cannĩ.
10 Ĩthõng thĩ,
ĩcowu iriontĩk thẽk niigia eet Nyemut cĩ Abũnna loociok vẽlẽk.
11 Ĩthõng mĩ agamtewu niigia,
ĩthõng oottu lokika,
nyĩ omothinu thõõth cĩ woccia katĩ õvvõ othooththu katĩ mĩ arawak kõr neccie.
Udukta niigia thõõth cĩ woccia anyĩwothicung agiitia kõr nĩcẽ,
nyatarka anyung Ririwacĩ cĩ Dĩhĩmĩ agiitia thoothonniok cĩk othooththu.
12 “Ĩthõng anyi katĩ gotonia gõtõnĩ kuruwue,
ĩthõng katĩ adĩman baatĩnnẽ doolec cĩnnĩ buu kĩyokowẽ.
Ĩthõng adĩman katĩ doolia baajigi kĩ ngaagĩ buth,
ĩthõng anycĩk ĩnõõgõ kuruktie.
13 Aaburneccung katĩ agiitia eeta vẽlẽk,
nyatarka aneeta.
Ĩthõng thĩ, eeti cĩ õmõgĩ hecinit kuumuc kõdõlan ditianẽtĩ, eliay katĩ nẽ.
Gii cĩ Gerthe cĩ ayak girianẽt
(Bẽl Matewo 24:15-21; Luka 21:20-24)
14 “Ĩthõng thĩ,
mĩ icintu niigia ‘Gii cĩ Gerthe cĩ ẽgẽrẽthan ijjio vẽlẽk looca coo,’a
ĩthõng abĩlĩ ngatĩ woccia athii cĩ abĩlnĩ.
Niigia eeta cĩk ebellu thõõth coo wo,
agaac jurrung,
adiim thẽk ngĩ avir eeta cĩk Yudea õvvõ thiiryiowẽy tiddina.b
15 Eeti ĩmma cĩ aavĩ ciitha cĩnnĩ tiddina,c
nyĩ aluciay akuni loota, ĩthõng ikiyyia ĩdĩma kaal cĩk aatĩ ciitha.
16 Eeti ĩmma cĩ aavĩ manatõ cĩnnĩ,
nyĩ õkkõ adĩma cẽrẽm õlõõ.
17 Gẽrtha thẽk katĩ õrrõt wathinniowẽy nĩĩkẽ kĩ ngaay cĩk anyakcie kĩ cĩk õrõõktĩ doolia!
18 Alaac Nyekuc, kĩĩ katĩ athii kaala cĩkkõ cĩ avvu edenyiay attiey,d
19 nyatarka gẽrtha katĩ hecinti coo õrrõt,
ĩthõng kothii balna pĩrnanẽt cĩ õgõõn kĩyokowẽ,
itina wũ balna ẽngẽnycanĩ Nyekuci looc,
kõdẽ kothii katĩ pĩrnanẽt cĩ õgõõn kĩ neccie naboo.
20 Ĩthõng thĩ,
mĩ athii Makayyioiti cĩ anyi wathinniok cĩkkõ kĩĩ turẽ,
athii woccia eeti ĩmma cĩ arũgĩ. Ĩthõng anyi katĩ Nyekuci wathinniok nĩĩkẽ kĩĩ turẽ, kĩĩ katĩ kẽẽl eet wũk ẽbẽra nẽ.
21 “Ĩthõng ma ngĩ ethecung eeti ĩmma agiitia ne,
‘Ĩcĩnĩt,
aavĩ Kiristo ngato,’
kõdẽ athĩ ne,
‘Ĩcĩnĩt,
Kiristo neccie!’ Nyĩ athĩknu ĩnõõnõ, ĩthõng elemtu thõõth cĩnnĩ.
22 Nyatarka avvu katĩ aliba kirithtõnya kĩ eet cĩk ẽẽn volongnyiak cĩk athĩ ne,
kõthõõththa molook cĩ Nyekuco cĩk avvu adĩman yelintiok cĩk obbitik kĩ thoothonniok cĩk anaat eeta, kĩĩ katĩ kĩgoolitõ eet wũk balna ẽbẽra Nyekuci, katĩ ngĩ ũũlĩ ngatĩ ĩgõõlĩ ĩnõõgõ.
23 Egeenyit, kuduwawung na agiitia thõõth vẽlẽk õõwa ĩcĩ ngaanĩ kikiyyiaĩ thõõth neccie.”
Kõr cĩ katĩ akuni Ngẽrtĩ Eeto
(Bẽl Matewo 24:29-31; Luka 21:25-28)
24 “Ma katĩ vurtia cĩ wathinniok nĩĩkĩ gerthek ẽẽ,
“ ‘Adaaĩ katĩ kõr,
ĩthõng ĩthĩnga alanyĩt nyĩĩloĩ,
25 ĩthõng katĩ utduktiay mũnyũnya tammuatiddina,
ĩthõng katĩ õtõmõthõ kaala vẽlẽk cĩk aatĩ tammuatiddina.’e
26 “Ĩthõng thĩ, acĩn katĩ eeta Ngẽrtĩ Eeto ngatĩ akuni diithiowẽyf ĩcĩtõ makathĩta cobbi kĩ bulẽnta cobbi.g
27 Ĩthõng itiona katĩ nẽ anjĩlẽt cĩgĩnĩk tonniok vẽlẽk looca kĩ tammuatiddina,
kõõt kuluttia eet wũk balna ẽbẽra Nyekuci loociowẽy vẽlẽk.
Liman cĩ kurutoco
(Bẽl Matewo 24:32-35; Luka 21:29-33)
28 “Anycĩk da thõõth cĩ kurutoco kilimanung agiitia,
ĩthõng umuktu thõõth cĩnnĩ.
Ma ngĩ utururyiay ballõwa, ĩthõng itilithia cĩk jõr, agayyu thĩ katĩ niigia iittu ne, õbõwẽ lõõlõ.
29 Gõõla thĩ nĩcẽ mĩ icintu niigia thoothonniok cĩkkõ edenyciay,
agaac ĩĩtõ ne, õbõwẽ kõr neccie.
30 Kaduwacung na agiitia dĩdĩ,
ummuit ĩĩtõ ne,
athii katĩ cĩ adaaĩ eeta vẽlẽk aatĩ katĩ cĩk ẽdẽnya thoothonniok cĩkkõ vẽlẽk.
31 Athii katĩ tammutiddin kĩ looc, ĩthõng thĩ, aavĩ katĩ thõõth cannie wo kũdũt.
Athii cĩ agayyu kõr cĩ akuni Makayyioiti
(Bẽl Matewo 24:36-44)
32 “Ĩthõng thĩ,
athii katĩ eeti cĩ aga itin nĩcẽ tõ,
kõdẽ anjĩlẽta cĩk tammutiddin,
kõdẽ Ngẽrĩnẽ, Baang cĩ aavĩ tammuatiddina dõ cĩ aga.”
33 Aavut vĩrĩngĩng,
ĩthõng ĩdĩmantothiwu, nyatarka athii cĩ agayyu niigia ngatĩ akuni kõr neccie tĩngan.
34 Õgõõn kõr neccie kĩ eeti cĩ õkkõ hẽẽrõna,
uungni nyakapanak cĩgĩnĩk kebeit kõrõõk,
ĩthõng engereek ĩnõõgõ vẽlẽk tiic codoi codoi,
ĩthõng uduwak et cĩ ẽbẽk araan kaavu vĩrĩngĩng.
35 “Ĩthõng,
aavut thĩ vĩrĩngĩng!
Nyatarka athii cĩ agayyu niigia kõr cĩ katĩ akuni baatĩ olu.
Aku katĩ nẽ jiat,
kõdẽ baal,
kõdẽ katĩ ngaal lõõcĩ,
kõdẽ anyama ketee itin cĩ õrõknĩ lotikõkõrĩ,
kõdẽ katĩ ngĩ iliba kõrra.
36 Kõdẽ amũdaccung katĩ nẽ agiitia nga oginnu,
katĩ ngĩ aku nẽ tamanoko.
37 Ĩthõng thõõth cĩ kaduwacung na agiitia wo,
ẽẽn thõõth cĩ kaduwai na eet vẽlẽk.
‘Ĩdĩmantothĩk aavut vĩrĩngĩng!’ ”