Anyinit cĩ ngaa cĩ bõyyĩ
(Bẽl Matewo 12:41-44)
21
Ma balna ma ngĩ õdõng Yesu õõ cĩnnĩ tiddina,
acĩn kẽnnẽ balliok õõgĩ atdukeei anyintiok locibirowa ĩcĩ aarĩcẽ eeta nyarobinya Ciitha cĩ Nyekuco.
2 Acĩn naboo ngaa cĩ bõyyĩ cĩ ẽẽn piryiait, cĩ atdukeei nyarobinya ramma cĩk kĩdĩk kaganoko.
3 Ngaatĩ ẽthẽcĩ eet ne,
“Kaduwacung dĩdĩ,
atdukeei ngaa cĩ bõyyĩ cĩ ẽẽn piryiait coo, nyarobinya cĩk ijiar cĩk eet vẽlẽk.
4 Ẽngẽra eeta cĩkkõ vẽlẽk anyintiok cĩk atdukeei wo,
nyarobinyay ĩcĩgĩk thõng,
ĩthõng thĩ, pĩrnanta cĩnnĩ, utdukeek nẽ gii vẽlẽk cĩ woccia arũknĩ nẽnẽ.”
Thaniniet cĩ Ciith cĩ Nyekuco
(Bẽl Matewo 24:1-2; Marĩkõ 13:1-2)
5 Ẽkẽb balna wobjiaha gwuak gõõl cĩ engenycini Ciith cĩ Nyekuco bĩĩyẽnĩy ĩcĩk dĩhĩmĩk õrrõt,
ĩthõng adĩmanni naboo jurrung anyintiowẽy ĩcĩk anyĩwothi Nyekuc.
Ĩthõng ẽdẽcĩ kẽnnẽ Yesu ĩnõõgõ ethei ne,
6 “Acĩnnu niigia bĩĩyẽn cĩkkõ?
Aku katĩ kõr cĩ athaaninie nẽẽgẽ vẽlẽk,
kithii bĩĩ ĩmma cĩ atadothi gõõnĩ tõ. Athanni katĩ nẽẽgẽ vẽlẽk kĩĩ lõõcĩ ĩĩr.”
Tĩrĩthẽnĩt cĩ pĩrnanẽt cĩ katĩ aku
(Bẽl Matewo 24:3-14; Marĩkõ 13:3-13)
7 Ngaatĩ ajini nẽẽgẽ ĩnõõnõ ẽthẽcĩ ne,
“Limannioit,
kavvunna woccia katĩ kagayya kõr cĩ adĩmanini thoothonniowa cĩkkõ katĩngan?
Aku katĩ edenyiay yeliniti cĩ katĩ adĩmanini kaala cĩkkõ katĩngan?”
8 Ẽdẽcĩ Yesu ethei ne,
“Uthuutti eleeti cuguk kithii katĩ cĩ ĩgoollung eeta.
Avvu katĩ eeta cĩk meelĩk thaarĩy ĩcĩganĩk athĩ ne,
‘Keeni na Kiristo,’
ĩthõng ‘Õbõwẽ kõrra.’
Nyĩ owobju ĩnõõgõ.
9 Ma ngĩ ithiktu jõrẽnĩn,
cĩk uukõnẽ lõõcĩ ĩmma kĩ looc ĩmma,
kĩ eet cĩk uukõy nyaguana looca ĩcĩnĩng,
nyĩ ongolinu.
Avvu nõõnõ katĩ thẽk edenyiay kaala cĩkkõ ĩcĩ owu, ĩthõng thĩ, athii cĩ aku edenyiay deciantĩ cĩ loocu nĩĩco noko.”
10 Ĩthõng ethek nẽ ĩnõõgõ ne,
“Uukõy katĩ loociowa kĩ loociok õõgĩ, ĩthõng uuktõy kabicõnĩnẽ kĩ kabicõnĩnẽ õõgĩ.
11 Avvu katĩ kirikiriknya cĩk obbitik,
kĩ butuny vatĩkẽy ĩcĩk meelĩk,
kĩ moorithiok cĩk gerthek wak,
kĩ kaal cĩk eyeliay cĩk obbitik tammuatiddina.
12 “Ĩthõng thĩ,
õõwa ĩcĩ ngaanĩ kedengciai kaala cĩkkõ vẽlẽk,
agamnyung katĩ nẽẽgẽ agiitia,
ĩthõng ogorgorrantunga.
Ovoyyung katĩ bĩlnẽta Ciithẽnẽy ĩcĩk Lawintiak,
ĩthõng aryiwung kĩjana, ĩthõng ayaktawung kẽbẽrẽnĩy ĩcĩk alaanetu kĩ gaala cĩk obbitik, nyatarka thar cĩganĩk.
13 Ĩthõng katĩ ẽẽn thõõth coo avuthit cunung cĩ aduwaccu niigia ĩnõõgõ leminit cunung ĩcannĩ.
14 Ĩthõng thĩ,
nyĩ omothinu thõõth cĩ katĩ õvvõ aduwuanu lokika,
kĩĩ katĩ eliay niigia.
15 Nyatarka,
kaanyung katĩ na gẽẽnyĩth cĩ athii cĩ ũũlĩ eeta cĩk abilnung agiitia wo, lokika cĩ abũrĩ ngatĩ athĩknĩ, thõõth cĩ aduwuanu niigia.
16 Ovolongung katĩ baajigu,
gotoonogu,
tionniowa kĩ goonogu kir,
ĩthõng katĩ uruktung agiitia õõgĩ adaait.
17 Aaburneccung katĩ eeta vẽlẽk, nyatarka aneeta.
18 Ĩthõng thĩ,
athii nẽnnẽ katĩ ĩmatot kaganoko cĩ ooti cuguk cĩ athii.
19 Ĩbĩlĩt niigia tiirthẽta, kĩĩ katĩ umuddia rũgẽt.
Thaniniet cĩ Yeruthalẽmĩ
(Bẽl Matewo 24:15-21; Marĩkõ 13:14-19)
20 “Mĩ icintu ngĩ ĩlĩkta nyĩcẽkẽrĩ Yeruthalẽm,
agaac thẽk ngatĩ ĩthĩ õjõõn oyointi cĩ Yeruthalẽmĩ.
21 Anycĩk eet cĩk aatĩ Yudea kivirit kotodit thiiryiok,
ĩthõng anyciwu eet cĩk aatĩ õlõõ cĩ gaalawu cobbi kõõt ngatĩvõrĩ.
Anycĩk cĩk attĩyya ngatĩvõrĩ kithii cĩ avvu ẽhẽẽt kõrõõk cĩ gaalawu cobbi.
22 Nyatarka, ẽẽn coo kõr cĩ ukwẽẽnĩt cĩ katĩ akua kĩ balna ngĩ eheeddi Nyaragawa ĩcĩ Nyekuco baa lõõla.
23 Gẽrtha thẽk katĩ õrrõt wathinniowẽy nĩĩkẽ kĩ ngaay cĩk anyakcie,
kõdẽ cĩk õrõõktĩ doolia! Aavĩ katĩ pĩrnanẽtĩ kĩ ukwẽẽnĩt cobbi õrrõt kĩ eet cĩkkõ.
24 Aruwue katĩ eeta gwuak nyetubanyay,
ĩthõng katĩ õõt gwuak kĩjana loociowẽy ĩcĩk rẽẽng.
Avvu katĩ agam eeta cĩk athii cĩ ẽẽn Yudei Yeruthalẽm,
kuumuc kedeciay itini cĩnĩng.
Katĩ ngĩ iliba Ngẽrtĩ Eeto
(Bẽl Matewo 24:29-31; Marĩkõ 13:24-27)
25 “Eyeliay katĩ kaala cĩk gerthek kõrra kĩ nyĩĩlowa,
ĩthõng kĩ mũnyũnyẽy.
Ĩthõng loota ngato,
ongollie katĩ loociowa gerenyi kĩ rowi cĩ ĩnganna bulucuanĩy kuumuc kẽrẽk gii cĩ woccia adĩmanni.
26 Avaalĩth katĩ eeta, nyatarka tongolinit kĩ ngatĩ ongolini kaal cĩk avvu looc vẽlẽk, ĩthõng õmmõtĩ katĩ kaala vẽlẽk cĩk aatĩ tammuatiddina.
27 Ma katĩ wathinniowẽy nĩĩkẽ,
acĩn katĩ eeta Ngẽrtĩ Eeto ngatĩ akuni diitha,
tiirthẽta kĩ bulẽnta cobbi õrrõt.b
28 Mĩ icintu ẽtẽrẽktaĩ kaala cĩkkõ edenyciay,
ĩtĩngath aavut vĩrĩngĩng, nyatarka õbõwẽ kõr cĩ katĩ elianu niigia.”
Liman cĩ mũũneco
(Bẽl Matewo 24:32-35; Marĩkõ 13:28-31)
29 Ngaatĩ aduwacĩ nẽ ĩnõõgõ thõõth cĩ owovothi cĩ alĩta eet ethei ne,
“Ahadit da mũũnec kĩ kẽẽn nĩĩko vẽlẽk.
30 Mĩ icintu õõt ukullia ballõwa,
agayyu iittu, ne, õbõwẽ lõõlõ.
31 Kĩ yoko wo buu,
mĩ icintu edenyciay kaala cĩkkõ,
agaac ngatĩ ĩthĩ õjõõn kabicocĩ cĩ Nyekuco.
32 “Kaduwacung dĩdĩ,
athii katĩ cĩ adaaĩ eeta cĩk erkinya cĩkkõ wo vẽlẽk kuumuc kivitia kedenyciay kaala cĩkkõ.
33 Athii katĩ tammutiddin kĩ looc cĩ aatĩ kũdũt,
ĩthõng thĩ,
aatĩ katĩ thoothonniowa cĩganniek kũdũt.
34 “Nyĩ atumaninu gõõla ĩcĩ aduwenu kĩ cĩ awudeenu õrrõt,
kõdẽ ahaddu thõõth cĩ rũgẽt cunung, nyatarka alibacung katĩ kõr cĩ decianto nĩĩco noko õgõõn kĩ nyeritiewa.
35 Nyatarka alibai katĩ thẽk eet vẽlẽk cĩk aatĩ loota ngato vẽlẽk.
36 Aavut dõõkĩthĩ vĩrĩngĩng,
ĩthõng alayyiowu,
kĩĩ katĩ woccia ilittia kaal cĩk avvu, ĩthõng kĩĩ katĩ, ivitia woccia uuluõy ngatĩ abilnu nguuma cĩ Ngẽrtĩ Eeto.”