Ẽlẽm Yudathĩ ngatĩ õvõlõngĩ Yesu
22
Ma balna ngĩ õbõwẽ kõr cĩ Peyian cĩ Ahat cĩ Avaadiay cĩ Kothii Nyĩgĩt,a
cĩ athĩ thar Kõr cobbi cĩ Ngothio,
2 Ivitia idiimitõ makayyiowa cĩk paadĩrnyawu kĩ limanniok cĩk Ngiranak gõõl cĩ woccia arui nẽẽgẽ Yesu,
nyatarka balna ongollie nẽẽgẽ eeta.
3 Ngaatĩ ẽẽktĩ Thĩttanĩ Yudath cĩ athĩ Ĩthkariot tionniaĩ ĩcĩk ẽẽn õmmõtõ kĩ ramma ẽẽ.
4 Ma natẽ,
ũũk ũrũbothĩk Yudathĩ makayyiok cĩk paadĩrnyawu kĩ gaala cĩk nyĩcẽkẽru cĩk ẽbẽk Ciith cĩ Nyekuco,
ngaatĩ atukwuanĩ nẽẽgẽ gõõl cĩ katĩ õvõlõngĩ nẽ Yesu.
5 Ma balna ngĩ athĩrar nẽẽgẽ thõõth cĩ Yudathĩ wo,
ebelbelit õrrõt ngaatĩ ẽlẽmĩ ngatĩ anyĩcẽ ĩnõõnõ nyarobinya.
6 Ngaatĩ ẽlẽmĩ Yudathĩ nyarobinya,
ĩthõng ẽrẽpan gõõl cĩ woccia anyĩcẽ Yesu kagamẽ gõõla cĩ athii cĩ aga eeta vẽlẽk.
Dainit cĩ jiatinu cĩ Makayyiokto cĩ aturna
(Bẽl Matewo 26:17-25; Marĩkõ 14:12-21; Yoanẽ 13:21-30)
7 Ma balna ngĩ arawak kõr cĩ Peyian cĩ Ahat cĩ Avaadiay cĩ Kothii Nyĩgĩt, ĩthõng thĩ, apait nẽẽgẽ nyionb cĩ ẽẽn gii cĩ cavĩto cĩ Kõr cobbi cĩ Ngothio,
8 ikiyyia ition Yesu Pẽtũrũ kĩ Yoanẽ ethek ne,
“Õõt ĩdĩmantek Kõr cobbi cĩ Ngothio, kĩĩ katĩ kadait kõdõwẽ.”
9 Ngaatĩ ajini nẽẽgẽ ĩnõõnõ ẽthẽcĩ ne,
“Adiimnyet yoko niia ageeta koottia kĩdĩmanteea ngatdang?”
10 Ẽdẽcĩ nẽ ĩnõõgõ ethei ne,
“Mĩ iithioyyu kõrõõk cĩ gaalawu cobbi,
arumonu katĩ kĩ et ĩmma cĩ õdõng deere cĩ maamu.
Owobit ĩnõõnõ kuumuc karawothĩk kõrõõk cĩ õkkõ iithio nẽ,
11 ĩthõng oottu entewu baatĩ olu ne,
‘Athĩ Limannioiti ne,
aavĩ ciith cĩ kerenniowu ngatdang, cĩ katĩ kadaẽ na dainit cĩ Kõr cobbi cĩ Ngothio kĩ wobjiak cĩganĩk?’
12 Õkkõ katĩ eyelecung nẽ ciith cobbi tiddina cĩ ĩdĩmanothĩk vẽlẽk.
Õõt ĩdĩmantek niigia dainit natẽ.”
13 Ngaatĩ õvõyyĩ Pẽtũrũ kĩ Yoanẽ,
ĩthõng umuddiothĩk kaal vẽlẽk aatĩ kĩ viyyio ngĩ aduwaai Yesu ĩnõõgõ,
ĩthõng ĩdĩmantek dainit cĩ Kõr cobbi cĩ Ngothio natẽ.
Ahat cĩ Makayyiokto cĩ jiatinu
14 Ma balna ngĩ arawak itini,
õõt uduktõy Yesu kĩ tionniak cĩgĩnĩk.
15 Ngaatĩ ẽthẽcĩ Yesu ĩnõõgõ ne,
“Kadiimi thẽk na kadak Kõr cobbi cĩ Ngothio wo,
kõdõwẽ kĩ agiitia nga kacananẽ na.
16 Nyatarka kaduwacung dĩdĩ,
athii katĩ na cĩ kadai Peyian ĩmma naboo kũdũt gii ngĩ ikiyyia edenyiay kabicocĩ cĩ Nyekuco.”
17 Ma natẽ,
ĩdĩma lõkũlkũl cĩ ayak vĩnõ,
ĩthõng agatan,
ĩthõng ethek wobjiak ne, “Irõt lõkũlkũl coo ũwũdĩt niigia vẽlẽk.
18 Nyatarka kaduwacung dĩdĩ,
athii katĩ na cĩ kawudi vĩnõ naboo kũdũt gii ngĩ ikiyyia kabicocĩ cĩ Nyekuco.”
19 Ĩthõng ĩdĩma naboo ahat cĩ avaadiay,
ĩthõng agatana.
Ma natẽ,
ẽngẽr,
ĩthõng aanyĩk ĩnõõgõ ethek ne, “Ẽlẽ cannĩ coo cĩ anyĩwothicung agiitia, uduit, kĩĩ katĩ gõõ ahaddiahiangũ aneeta.”
20 Ma vurtia cĩ edecciaĩ dainti,
ĩdĩma lõkũlkũl,
ĩthõng ĩthĩ ne, “Ẽẽn lõkũlkũlĩ coo Ngẽrẽmngẽrẽm cĩ Jõr cĩ biyyie cĩganĩkc cĩk katĩ ẽrẽnna, nyatarka agiitia.
21 Ĩthõng yoko,
karũmẽna na kĩ et cĩ katĩ ovolongia aneeta wo lobela cĩ kaduwẽnĩ wo.
22 Ĩthõng dĩdĩ,
adaaĩ nẽnnẽ katĩ Ngẽrtĩ Eeto kĩ balna thẽk mĩ aduwuay,
ĩthõng thĩ, atdukai thĩ katĩ pĩrnanẽtĩ cobbi õrrõt et cĩ õvõlõngĩ ĩnõõnõ wo.”
23 Ngaatĩ arahanĩ wobjiaha ajinõõnĩ nyaguana athĩ ne, ngẽnẽ woccia katĩ kõrgẽna cĩnĩng cĩ atican thõõth coo wo.
Ẽpẽkantõõĩ wobjiaha makathĩt
24 Ma naboo natẽ noko,
ẽpẽkantõy wobjiaha mĩn, nyatarka thõõth cĩ et cĩ woccia makĩ kõrgẽna cĩnĩng.
25 Ngaatĩ ẽdẽcĩ Yesu ĩnõõgõ ẽthẽcĩ ne,
“Alaanẽta cĩk eet cĩk athii cĩ ẽẽn Yudei atĩnganei eet cĩk agam nẽẽgẽ kĩdĩmanit thõõth cĩnĩng,
ĩthõng makayyiowa cĩk tiirtik,
avvũ eleeti cĩgĩk athĩ ne, ẽẽn nẽẽgẽ gõõnõgĩ eet vẽlẽk.
26 Ĩthõng thĩ,
nyĩ attiyyu niigia buu kĩ nẽẽgẽ.
Anycĩk niigia et cĩ makĩ kõrgẽna cunung kaavu kĩ logoo cĩ dĩcĩ,
ĩthõng anycĩk et cĩ ẽẽn makayyioit kõrgẽna cunung,
kĩĩ ticciannioit cunung.
27 Et cĩ makĩ woccia yoko jang,
cĩ aavĩ lobela,
kõdẽ et cĩ aticanothi eeta?
Athii woccia cĩ ẽẽn et cĩ aavĩ lobela?
Ĩthõng thĩ, kaavẽ na buu kĩ agiitia kĩ eeti cĩ aticanothi eeta.
28 “Eeginnu niigia eet cĩk karũmẽ kĩ aneeta pĩrnanta cannĩ vẽlẽk.
29 Ĩthõng yoko,
kaanyung na agiitia kabicoc,
kĩ balna mĩ anya aneeta Baangĩ kabicoc,
30 kĩĩ katĩ ivitia woccia niigia uduktõy,
ĩthõng uwuddiewu lobela kabicoca cannĩ,
ĩthõng aavuttu taabĩtẽy ĩcĩk engeru thõõth cĩ tatũgẽt cĩk Ĩthraĩlĩ cĩk ẽẽn õmmõtõ kĩ ramma.”
Atĩmanni katĩ wobjiaha cĩk Yesu
(Bẽl Matewo 26:31-35; Marĩkõ 14:27-31; Yoanẽ 13:36-38)
31 Ma natẽ,
ĩthĩ Yesu ne,
“Thimõnẽ,
Thimõnẽ,
adiim Thĩttanĩ ngĩ ĩgoollung agiitia codoi codoi kĩ gõõ ma ngĩ egeeli teddioiti kavirok cĩk labinu tuu.
32 Ĩthõng thĩ,
kalawowi balna na aniitia Thimõnẽ,
kĩĩ katĩ kõkõm woccia leminiti cunnie.
Ĩthõng mĩ õbõda kĩ aneeta, ẽẽl gotoonogu buu.”
33 Ẽdẽcĩ kẽnnẽ Pẽtũrũ athĩ ne,
“Makayyioit,
kadĩmanothi na ngatĩ kiirioĩ kõvvõyyĩ kĩ aniitia kĩjana, kõdẽ kadaait kõdõwẽ.”
34 Ĩthõng ẽdẽc Yesu ethek ne,
“Kaduwaci dĩdĩ,
Pẽtũrũ õõwa cĩ ngaanĩ kõrõõĩ lotikõkõrĩ cĩ owu lootha ngerenniet,
ẽpẽkanna katĩ niia aneeta ngõnana iyyio,
athĩ katĩ ne, athii cĩ agayyanĩ.”
35 Ngaatĩ ajini Yesu ĩnõõgõ ẽthẽcĩ ne,
“Balna ngĩ kitionnung na agiitia,
athii cĩ ayakcu locibironya cĩk nyarobinyawu,
kõdẽ dongokua cĩk ceremuanu kaganoko,
kõdẽ nakavacĩt. Adiimnyu da niigia gimma?”
Ẽdẽcĩ nẽẽgẽ athĩ ne, “Athii tõ, athii cĩ kadiimnya gimma.”
36 Ĩthõng ethek nẽ ĩnõõgõ ne,
“Ĩthõng thĩ,
yoko,
mĩ ayai niia locibiro cĩ nyarobinyawu,
bĩtĩ,
dongok cĩ ceremuanu bĩtĩ, ĩthõng mĩ athii cĩ ayai nyetubat, tũũwõĩ ceremua cugunik õõgĩ, ĩthõng ũtũwa nyetubat codoi.
37 Ĩdĩmanit ketee,
nyatarka eheeddi balna Nyaragawa cĩ Nyekuco athĩ ne,
‘Ekebothi balna nẽ eet cĩk adĩman thoothonniok cĩk gerthek.’d
Kaduwacung na agiitia õthõõththa balna thõõth coo aneeta, ĩthõng aku thẽk katĩ edenyiay kĩĩ dĩdĩ tamanoko.”
38 Ẽdẽcĩ wobjiaha ĩnõõnõ ethei ne,
“Makayyioit,
cĩn nõõnõ,
nyetubanya ramma cĩkkõ.”
Ẽdẽcĩ Yesu ethei ne,
“Ũwũpana.”
Alawõy Yesu Thiira ĩcĩ Olivnyawu
(Bẽl Matewo 26:36-46; Marĩkõ 14:32-42)
39 Ma natẽ,
ũũk alawõy Yesu kĩ gõõ dõõkĩthĩ Thiira cĩ Olivnyawu.
Õwõb balna wobjiaha cĩgĩnnẽk buu ĩnõõnõ.
40 Ma balna ngĩ õdõlanit nẽẽgẽ nginicẽ,
ethek nẽ ĩnõõgõ ne,
“Alayyiõy niigia, kĩĩ katĩ athii cĩ atĩmaninu.”
41 Ngaatĩ avĩjaĩ Yesu õkõyyĩ kabanyca kĩdĩĩc,
ĩthõng akat kuthungti alawõy ĩthĩ ne,
42 “Baang,
mĩ adiimi,
dĩm lõkũlkũl cĩ pĩrnanẽt cooe wo,
ngatĩvõrĩ ĩcannĩ,
ĩthõng thĩ, nẽnnẽ, dĩman kĩcĩ adiimi niia athii cĩ ẽẽn kĩcĩ kadiimi nana.”
43 Ma natẽ,
ilibak ĩnõõnõ anjĩlõ cĩ aku tammuatiddina,
ĩthõng ikiyyia aanyĩk ĩnõõnõ tiirthẽt.
44 Ẽcẽrẽt ẽlẽ cĩ Yesu, ĩthõng alawõy õrrõt kuumuc, ĩthõng ĩtĩlantiak mũlũwa cĩgĩnnẽk cĩk õgõõn kĩ biyyieta looc.
45 Ma balna ngĩ ĩtĩnga nẽ ngatĩ alawini natẽ ẽẽ,
ĩthõng ũũk ĩcĩ aatẽ wobjiaha,
arubothi kẽnnẽ ĩnõõgõ agamta kĩnyaha, nyatarka ipiryia mothinit.
46 Ngaatĩ ẽthẽcĩ nẽ ĩnõõgõ ne,
“Oginnu niigia nyia? Ĩtĩngath alayyiõy, kĩĩ katĩ athii cĩ atĩmaninu.”
Agamẽ Yesu
(Bẽl Matewo 26:47-56; Marĩkõ 14:43-50; Yoanẽ 18:3-11)
47 Ma balna nganĩ õthõõth Yesu,
alibiai kẽnnẽ meelitini cĩ ayaha Yudathĩ wũ balna ẽẽn wobjiait ĩmma wobjiaĩ wũk ẽẽn õmmõtõ kĩ ramma.
Kĩĩ kedeccek Yudathĩ kũũk kũcũcũ Yesu, ĩthõng ĩthaa ĩnõõnõ.
48 Ĩthõng thĩ,
ijin Yesu ĩnõõnõ ethek ne,
“Yudath,
õvõlõngẽ niia Ngẽrtĩ Eeto thawintia ĩcĩ cũcũwẽntõ?”
49 Ma balna mĩ acĩn wobjiaha ngatĩ katĩ akuni thõõth ĩmma natẽ wo,
ijinit nẽẽgẽ ĩnõõnõ entek ne,
“Makayyioit,
kẽtẽrẽktiaha thẽk naaga jore nyetubanyay ĩcĩgak wo?”
50 Ngaatĩ ẽtẽdanẽ wobjiaiti ĩmma kĩtat cĩ athiit cĩ athio cĩ ticciannioitf cĩ paadĩr cobbig noko pacak.
51 Ma natẽ,
ethek Yesu ne,
“Ũũdũta!”
Ngaatĩ awumi nẽ kĩtat cĩ et nĩcẽ kũbũna.
52 Ma natẽ,
ijin Yesu makayyiok cĩk paadĩrnyawu kĩ gaala cĩk nyĩcẽkẽru cĩk ẽbẽk Ciith cĩ Nyekuco kĩ eet cĩk obbitik ethei ne,
“Nyia ivitia kĩ aneeta nyetubanyay kĩ tẽlẽẽĩtẽy kĩcĩ keeni et cĩ ẽẽn makayyioit cĩ joro wo?
53 Ma kĩĩ gõõ karũmẽ na kĩ agiitia dõõkĩthĩ reerunga cĩ Ciith cĩ Nyekuco,
ĩthõng athii eeti cĩ awumnya buu tõ.
Ĩthõng thĩ, yoko ẽẽn coo itin cunung cĩ agamĩ muwuri looc wo.”
Ẽpẽkan Pẽtũrũ Yesu
54 Ngaatĩ agamĩ nẽẽgẽ Yesu,
ĩthõng ootti ĩcĩ kõrõõk cĩ paadĩr cobbi.
Õwõb balna Pẽtũrũ ĩnõõnõ rẽẽna.
55 Ma balna ngĩ õõt avaaddia eeta guo kõrgẽna cĩ reerung nĩcẽ,
ũũk Pẽtũrũ buu, ĩthõng aavutõ kĩ ĩnõõgõ kõdõwẽ loota natẽ.
56 Ma natẽ,
ĩcĩn bũwẽẽcĩ ĩmma cĩ ẽẽn ticciannioit ĩnõõnõ ngatĩ guyyio natẽ.
Ma banna mĩ acĩn bũwẽẽcĩ neccie ĩnõõnõ jurrung ẽẽ,
ĩthĩ ne,
“Arũmẽ balna eeti coo kĩ Yesu.”
57 Ẽpẽkan kẽnnẽ Pẽtũrũ athĩ ne,
“Ngaa coo,
athii na cĩ kagga ĩnõõnõ.”
58 Ma vurtia kĩdĩĩc,
annõnĩ eeti ĩmma kĩ ĩnõõnõ kẽbẽrẽ noko kurukumuk ngaatĩ athĩnnĩ ne,
“Iriokcu baa gõõ niia buu kĩ ĩnõõgõ.”
Ẽpẽkan Pẽtũrũ noko athĩ ne,
“Laang kamiri nana.”
59 Ma vurtia cĩ itin codoi,
õbõdẽcĩ eeti ĩmma naboo athĩ ne,
“Lõgõth,
iriok baa gõõ eeti coo kĩ Yesu kõdõwẽ dĩdĩ, nyatarka ẽẽn nẽ et cĩ looc cĩ Galilea.”
60 Õbõdẽcĩ Pẽtũrũ athĩ ne,
“Laang,
ẽrẽkca thõõth cĩ othoothi niia wo.”
Ma balna nganĩ aduwa nẽ thõõth coo,
õrõk lotikõkõrĩ.
61 Ma natẽ,
ummudie Makayyioiti,
ĩthõng ẽdẽnya Pẽtũrũ,
ngaatĩ ahadanĩ Pẽtũrũ thõõth wũ balna aduwaai Yesu ĩnõõnõ ethei ne,
“Katĩ ngaanĩ kõrõõk lotikõkõrĩ cĩ owu lootha ngerenniet,
ẽpẽkanna katĩ niia aneeta ngõnana iyyio.”
62 Ma natẽ,
ũũk Pẽtũrũ ngatĩvõrĩ,
ĩthõng ũũk utulu õrrõt.
Atararyi nyĩcẽkẽrĩ Yesu
63 Ngaatĩ arahanĩ nyĩcẽkẽrĩ uuki Yesu, ĩthõng atararyi ĩnõõnõ.
64 Ammũt balna nẽẽgẽ kẽbẽrẽ cĩgĩnĩk,
ĩthõng entek ne,
“Duwaet da ngẽnẽ cĩ uukci aniitia wo?”
65 Ngaatĩ adaacĩ ĩnõõnõ thoothiowẽy ĩcĩk meelĩk õrrõt.
Ijinit Pĩlatõ kĩ Ẽrõõd Yesu
(Bẽl Matewo 26:59-66; Marĩkõ 14:55-64; Yoanẽ 18:19-24)
66 Ma balna ngĩ iliba kõr ngerenniet,
uluttiay eeta cĩk obbitik kĩ makayyiok cĩk paadĩrnyawu kĩ limanniok cĩk Ngiranak ngatĩ odoi doo,
ngaatĩ ayahacĩ eeta Yesu ĩnõõgõ,
67 ĩthõng ijinit ĩnõõnõ entek ne,
“Mĩ eeni niia Kiristo dĩdĩ duwaeta.”
Ẽdẽcĩ Yesu ĩnõõgõ ethei ne,
“Mĩ yoko kuduwawung na,
athii woccia cĩ elemnyu,
68 ĩthõng yoko mĩ kijinung na agiitia,
athii woccia cĩ ẽdẽccangũ.
69 Ĩthõng thĩ,
ithianaĩ kõr coo, aavĩ katĩ Ngẽrtĩ Eeto attia ĩcĩ athioh ĩcĩ Nyekuc cĩ Tiiri.”
70 Ngaatĩ ajini nẽẽgẽ ĩnõõnõ ẽthẽcĩ ne,
“Eeni niia Ngẽrtĩ Nyekuco?”