Gõõl cĩ kalawini
11
Owobit niigia yelinit cannĩ kĩcĩ kowobi na yelinit cĩ Kiristo. 2 Kiriani na, nyatarka agiitia, nyatarka ahadanangũ niigia aneeta dõõkĩthĩ, ĩthõng uthuuttu liman wũ balna kalimanecung nana.3 Ĩthõng yoko kadiimnyung na agiit agaac ĩĩtõ ne, ẽẽn makayyioiti cĩ et cĩ maacĩ Kiristo, ĩthõng ẽẽn makayyioiti cĩ ngaawo et cĩ maacĩ, ĩthõng ẽẽn makayyioiti cĩ Kiristo Nyekuc. 4 Eeti cĩ maacĩ codoi codoi cĩ alayyie, kõdẽ õthõõth nẽ molook cĩ Nyekuco, ĩthõng ubung õõ cĩnnĩ, athii cĩ ongollie nẽ õõ cĩnnĩ. 5 Ĩthõng adiim ngaa codoi codoi ngĩ alayyie, kõdẽ õthõõth nẽ molook cĩ Nyekuco kubung õõ cĩnnĩ, ĩthõng mĩ athii nẽ cĩ abung õõ cĩnnĩ, aduwõy kĩ ngatĩ õdõõtanẽ nẽ õõ cĩnnĩ thõng. 6 Mĩ athii cĩ abung ngaa õõ cĩnnĩ, anycĩk ĩnõõnõ kõdõõta ĩm cĩgĩnĩk, ĩthõng mĩ gẽrtha ngatĩ õdõõtanẽ nẽ õõ cĩnnĩ, anycĩk ĩnõõnõ kubung õõ cĩnnĩ thõng. 7 Athii eeti cĩ maacĩ woccia cĩ abung õõ cĩnnĩ, nyatarka ẽẽn nẽ ririwac kĩ bulẽnĩt cĩ Nyekuco, ĩthõng thĩ, ĩthĩ ngaa bulẽnĩt cĩ et cĩ maacĩ. 8 Nyatarka athii balna cĩ aku eeti cĩ maacĩ ngaawa, ĩthõng thĩ, aku balna ngaa eta ĩcĩ maacĩ,a 9 ĩthõng balna athii cĩ ẽngẽnycai Nyekuci et cĩ maacĩ ngaa cĩ ngayyi, ẽngẽnycai balna nẽ ngaa cĩ ngayyi, et cĩ maacĩ. 10 Nyatarka thõõth coo, ĩthõng nyatarka anjĩlẽt, adiim ngaa cĩ ngayyi ngĩ abung õõ cĩnnĩ, kẽyẽla kĩthĩ ne, ayak nẽ yelinit cĩ makathĩto õõwa cĩnnĩ.
11 Eetĩnẽy ĩcĩk Makayyioktak, adiim woccia ngaay eet cĩk maacĩk, ĩthõng adiim woccia eeta cĩk maacĩk ngaay. 12 Nyatarka balna aku ngaa eta cĩ maacĩ, ĩthõng gõõla cĩ aduwõy thõng, arittia ngaa et cĩ maacĩ. Ĩthõng thĩ, aku gii vẽlẽk Nyekuca. 13 Etedit da niigia dõ thõõth coo. Abũnna woccia ngatĩ alawĩ ngaa Nyekuc, katĩ ngĩ athii cĩ abung nẽ õõ cĩnnĩ? 14 Athii wõnõ niigia cĩ agayyu ngatĩ ẽẽn ngawani katĩ ngĩ ayak eeti cĩ maacĩ ĩm cĩk wuuntik? 15 Ĩthõng thĩ, mĩ ayak ngaa ĩm cĩk wuuntik, ẽẽn woccia bulẽnĩt cĩnnĩ, nyatarka anyĩwothi balna ĩnõõnõ ĩmana cĩk wuuntik cĩk abung õõ cĩnnĩ. 16 Ĩthõng thĩ, mĩ ẽpẽkan eeti ĩmma thõõth coo, kathĩ na ne, athii cĩ kayak naaga ngiran ĩmma cĩ ijiar coo, ĩthõng athii cĩ ayak meelitini cĩ lemnyiok cĩk kelethianya cĩk Nyekucak cĩk loociok mĩn mĩn buu, vowoth cĩ ẽẽn nyẽgẽlẽ kĩ coo.
Tĩrĩthẽnĩt cĩ kaduwi ahat cĩ avaadiay cĩ Makayyiokto
17 Ĩthõng thĩ, tĩrĩthẽnta cĩ woccia athii cĩ kadihithung na agiitia, nyatarka mĩ arumonu niigia, adĩmannu niigia thoothonniok cĩk gerthek kijiar bũnnathĩt. 18 Ĩcĩ owu, kathĩrari na athĩ ne, mĩ avvu arumonu niigia ngatĩ odoi dõ kĩ meelitin cĩ lemnyiowu, aku aavĩ ngẽrõnĩtĩ kõrgẽna cunung, ĩthõng gõõla ĩmmanĩ, kamui na ẽẽn dĩdĩ. 19 Ĩthõng dĩdĩ, aavĩ woccia thẽk ngẽrõnĩtĩ kõrgẽna cunung, kĩĩ katĩ kedenyiay ngẽnẽ kõrgẽna cunung cĩ ẽlẽmĩ Nyekuci. 20 Mĩ arumenu niigia kõdõwẽ, athii cĩ ẽẽn nyatarka thõõth cĩ ahat cĩ avaadiay cĩ jiatinu cĩ Makayyiokto cĩ adukcu niigia wo, 21 nyatarka mĩ aduwenu niigia, athii cĩ ereyyu eet õõgĩ cĩk ngaanĩ attĩyya buu. Mĩ adak et ĩmma boobo, ĩbakci kẽnnẽ ĩmma thõng. 22 Athii niigia cĩ ayakcu korookjiok cĩk aduwenu kĩ cĩk awudeenu? Kõdẽ arannu niigia meelitin cĩ lemnyiok cĩk Nyekucak, ĩthõng anyciwu ngawani kagam eet cĩk athii gii cĩ adaĩ? Kethecung koccia katĩ na agiitia ne? Kadihithung koccia katĩ na agiitia, nyatarka thõõth coo? Athii tõ kũdũt!
Dainit cĩ jiatinu cĩ Makayyiokto cĩ aturna
(Bẽl Matewo 26:26-29; Marĩkõ 14:22-25; Luka 22:14-20)
23 Makayyioit balna cĩ anya aneeta thõõth cĩ kakunie na kaduwacung agiitia wo. Adĩma balna Makayyioiti Yesu ahat cĩ avaadiay, baalin wũ balna õvõlõngĩ eeti ĩnõõnõ, 24 ma balna ngĩ ethek nẽ Nyekuc ne, ibalallẽ, ĩthõng ikiyyia ẽngẽr ahat cĩ avaadiay nĩcẽ, ĩthõng ĩĩ ne, “Ẽlẽ cannĩ coo, cĩ anyĩwothicung agiitia, ĩdĩmanit thõõth coo, kĩĩ katĩ gõõ ahaddiahiangũ aneeta.” 25 Ĩthõng gõõla codoi dõ, ĩdĩma nẽ lõkũlkũl, ĩthõng ĩĩ ne, “Ẽẽn lõkũlkũlĩ coo cĩ Ngẽrẽmngẽrẽm cĩ Jõr cĩ biyyie cĩganĩk, ĩdĩmanit katĩ gõõ thõõth coo, katĩ ngĩ awuddu biyyie cĩkkõ, kĩĩ katĩ ahaddiahiangũ aneeta.” 26 Nyatarka mĩ katĩ gõõ ngĩ adukcu ahat cĩ avaadiay coo, ĩthõng uwuddu biyyie cĩkkõ, aduwuanu katĩ daaĩth cĩ Makayyiokto, kuumuc gii katĩ ngĩ õbõda nẽnẽ.
27 Ĩthõng thĩna, eeti cĩ aduk ahat cĩ avaadiay, kõdẽ awũdẽ lõkũlkũla cĩ Makayyiokto gõõla cĩ gerthe, ẽgẽrẽthan katĩ nẽ ẽlẽ kĩ biyyie cĩk Makayyioktak. 28 Adiim woccia ngĩ atũkũl eeti thĩnĩn cĩnnĩ, ma ngaanĩ nẽ kuduk ahat cĩ avaadiay, kõdẽ kũwũd biyyie cĩkkõ. 29 Nyatarka eeti cĩ aduk ahat cĩ avaadiay coo, kõdẽ awũd biyyie cĩkkõ, ĩthõng athii cĩ ahad athĩ ne, ẽẽn coo ẽlẽ cĩ Makayyiokto, etedĩk nẽ ẽlẽ cĩnnĩ thõõth cĩ gerthe. 30 Ĩnõõnõ thĩ cĩ apĩrnanẽ eeta cuguk gwuak cĩk meelĩk, ĩthõng ĩtĩmõõritõ, ĩthõng adaaitõ gwuak. 31 Ĩthõng mĩ ketedi naaga eleeti cĩgaac thõõth jurrung, athii katĩ Nyekuci cĩ uukceta. 32 Mĩ etedĩcet Makayyioiti ageeta thõõth, atĩrĩthet nẽ ageeta, kĩĩ katĩ athii thõõth cĩ gerthe cĩ etedothĩcet ageeta kõdõwẽ kĩ eeta cĩk looc coo.
33 Ĩthõng thĩna, gõtõõnõga kĩ ngõõnõga, abũnna ma ngĩ avvunnu aduwenu niigia ngatĩ odoi dõ, ereec goonogu vẽlẽk kivitia. 34 Mĩ adakcung boobo dĩdĩ, uduit gimma õlõõ ĩcunung, kĩĩ katĩ athii cĩ etedothicung thõõth katĩ ngĩ arumonu ngatĩ odoi dõ.
Kakuni katĩ kalimanecung na thoothonniok õõgĩ naboo katĩ ngĩ kikiyyia.