Leminit cĩ gaalinit cĩ nyĩcẽkẽru
(Bẽl Matewo 8:5-13; Yoanẽ 4:43-54)
7
Ma balna ngĩ ẽdẽcak Yesu ngatĩ alimanĩ eet,
ĩtĩnga nẽ ũũk õlõõ cĩ gaalawu cĩ Kaparnaumi.
2 Ĩmmõrĩ balna nyakapanaiti ĩmma cĩ balna amĩnan gaalinti cĩ nyĩcẽkẽrua õrrõt,
cĩ õbõwẽ idiim ngĩ adaaha.
3 Ma balna ngĩ ĩthĩrar gaalinti cĩ nyĩcẽkẽru thõõth cĩ Yesu wo,
ition nẽ eet õõgĩ cĩk obbitik cĩk Yudei kõõt kĩlalliek Yesu, kikiyyia kaanyĩk nyakapanait cĩnnĩ wo kũbũna.
4 Ĩthõng balna ivitia õõt makayyiowa ĩcĩ Yesu,
ĩthõng ĩlalliek ĩnõõnõ entek ne, “Ẽẽn eeti coo et cĩ abũnna õrrõt, ẽẽl niia ĩnõõnõ.
5 Nyatarka amĩnan nẽ looc cĩnang õrrõt,
ĩthõng etengenyehet nẽ ageeta Ciith cĩ Lawintio.”
6 Ngaatĩ ĩngannĩ Yesu,
ĩthõng irioit kĩ ĩnõõgõ.
Athii balna cĩ rẽẽn Yesu ciitha cĩ itionanẽ gaalinti gõõnõgĩ kõõt kuduktiak ĩnõõnõ kentek ne,
“Makayyioit,
nyĩ acanani ẽlẽ cunni kaganoko, nyatarka athii na cĩ kẽtẽmanonia ngatĩ woccia akuunie niia kõrõõk cannĩ.
7 Ĩnõõnõ thĩ cĩ athii woccia na cĩ kẽtẽmanonia ngatĩ kakunie ĩcunni.
Ĩthõng thĩ,
duwaha niia thõõth, ĩthõng ũbũna katĩ ticciannioiti cannie wo.
8 Keeni na et cĩ kayai makayyiok cĩganĩk,
ĩthõng keeni na et cĩ kagami nyĩcẽkẽr.
Ma kaduwai coo kennei ne,
‘Bĩtõ,’
atican thẽk kĩcĩ kaduwai na ẽẽ.
Ĩthõng ma kaduwai nĩcẽ kennei ne,
‘Ijjia,’
aku thẽk kĩcĩ kaduwai na ẽẽ.
Ma kaduwai nyakapanait cannĩ kennei ne,
‘Dĩman tiic coo,’ Adĩman thẽk gõõla nĩcẽ.”
9 Ma balna ngĩ athĩrar Yesu thõõth coo wo,
ikiyyia utubuanẽ nẽ,
ĩthõng ennek eet cĩk meelĩk cĩk õwõb ĩnõõnõ ẽẽ,
ne,
“Kaduwacunga, ngaanie na kijiowa et cĩ ayak leminit cĩ makĩ cĩ õgõõn ketee Ĩthraĩla.”
10 Ma natẽ,
oboddia goonogua wũk balna itionni kõõt ciitha cĩ gaalĩnto, õõt umuddiothĩk nyakapanait nĩcẽ ũbũna.
Ũrũgũtha Yesu doolec cĩ ngaa cĩ bõyyĩ
11 Ngaatĩ ĩngannĩ Yesu kĩ wobjiak cĩgĩnĩk tamanoko õvõyyĩ õlõõ cĩ gaalawu ĩcĩ athĩ Naiin,
iriok kĩ meelitin cobbi õrrõt.
12 Ĩthõng ma balna ngĩĩ õjõõntĩ nẽẽgẽ kĩ araan cĩ kõrõõk cĩ gaalawu,
acĩn kẽnnẽ nẽẽgẽ eet õõgĩ cĩk õdõnga logoo codoi doo cĩ adaak vẽlẽk cĩ ngaa cĩ bõyyĩ.
Ĩthõng balna mẽẽlĩ eeta cĩk iriok kĩ ĩnõõnõ.
13 Ma balna mĩ acĩn Makayyioiti ngaa cĩ bõyyĩ ẽẽ,
atamatĩk nẽ ĩnõõnõ õrrõt,
ĩthõng ethek ne, “Nyĩ alu.”
14 Ma natẽ,
ĩbĩlĩt eeta cĩk õdõng logoo cĩ adaak ẽẽ,
ngaatĩ õkõyyĩ awumi Yesu ĩnõõnõ,
ĩthõng õthõõth ĩthĩ ne,
“Logoo cio, ketheci na aniitia ne, tĩnga jiena.”
15 Ma natẽ,
ĩtĩnga logoo cĩ adaak wo,
ĩthõng arahaĩ õthõõth jurrung ngaatĩ anyĩcẽ Yesu ĩnõõnõ yaatĩnnĩ.
16 Ngaatĩ thĩ balna abulanĩ thõõth coo eet vẽlẽk cĩk aatĩ natẽ,
ĩthõng ivitia ĩdĩhĩthĩt Nyekuc õrrõt ĩĩtõ ne,
“Upuanaheet wanĩco eeti cĩ õthõõth molook cĩ Nyekuco cobbi õrrõt.
Ikiyyia Nyekuci ẽẽl eet cĩgĩnĩk.”
17 Ngaatĩ athanothĩcẽ nyemut cĩ Yesu wo, Yudea vẽlẽk kĩ looc cĩ õjõõn natẽ.
Yesu kĩ Yoanẽ Batithta
(Bẽl Matewo 11:1-19)
18 Aduwaai balna wobjiaha cĩk Yoanẽ ĩnõõnõ thoothonniok cĩk adĩman Yesu wo vẽlẽk.
Ma natẽ,
ũtũvvũ nẽ wobjiak cĩgĩnĩk cĩk ẽẽn ramma,
19 ĩthõng ition nẽ ĩnõõgõ kõõt kijinit Makayyioit Yesu kentek ne,
“Aniitia wũ balna athĩ ne,
akuni tĩna, kõdẽ woccia ngaanĩ kẽrẽyya et ĩmma cĩ aku?”
20 Ma balna ngĩ õdõlanit wobjiaha neekie Yesu,
ĩthõng uduktiak ĩnõõnõ entek ne,
“Itionanet ageeta Yoanẽ Batithta kivitiaha kijinti aniitia kentei ne,
‘Aniitia wũ balna athĩ ne,
akuni tĩna, kõdẽ woccia ngaanĩ kẽrẽyya et ĩmma cĩ aku?’ ”
21 Ĩthõng kõr nĩcẽ,
balna adĩman Yesu eet cĩk ĩmmõrĩ moorithiok cĩk meelĩk kĩ cĩk ayak ririwanĩnẽ cĩk gerthek,
kĩ cĩk rubentĩk vẽlẽk kũbũnta.
22 Ngaatĩ ẽdẽcĩ Yesu wobjiak cĩk Yoanẽ wo ẽthẽcĩ ne,
“Imiiryi õõt uduktiak Yoanẽ thoothonniok cĩk acĩnnu niigia wo,
ĩthõng ithiktu wo.
Ĩcĩntẽ eeta cĩk rubentĩk jurrung,
õtõõthõ cĩk ngõõltĩk,
ũbũnta cĩk adak nyataba,
ĩthĩktõy cĩk adĩĩtĩ kĩĩna,
ũrũkta cĩk adaaĩ,
ĩthõng irionothĩk Nyemut cĩ Abũnna eet cĩk apĩrna vẽlẽk.
23 Agatanẽ eeti cĩ athii cĩ abũrna aneeta, nyatarka thoothonniok cĩk katicani na wo.”
24 Ma balna ngĩ imiiryie wobjiaha cĩk Yoanẽ,
ithianaĩ Yesu ijin meelitin thõõth cĩ Yoanẽ ethei ne,
“Et da balna cĩ õgõõn kuu cĩ õvvõ acĩnnu niigia baatha cĩ õdõõĩ kak ẽẽ?
Õgõõn da nẽ kĩ kartienti cĩ wuuni cĩ avungan ngõõtĩ?
25 Ma ngĩ athii tõ,
et da jang thẽk kir cĩ õvvõ acĩnnu niigia wo?
Ahimit da thẽk nẽ ceremua cĩk dĩhĩmĩk?
Abaak eeta cĩk ahimit ceremua cĩk dĩhĩmĩk kĩ eet cĩk aatĩ jurrung, õlõõ cĩ alaano.
26 Ĩthõng thĩ,
da nyia cĩ balna ovvoyyu acĩnnu niigia ẽẽ,
kir?
Ẽẽn da nẽ et cĩ õthõõth molook cĩ Nyekuco? Kaduwacung kennecung ne, ẽẽn balna nẽ et cĩ tiiri cĩ ijiar et cĩ õthõõth molook cĩ Nyekuco kir dĩdĩ.
27 Ĩnõõnõ thĩ balna cĩ eheedinie Nyaragawa cĩ Nyekuco athĩ ne,
“ ‘Kitiona katĩ na et cĩ ẽẽn thooc cannĩ kutuwuanei aniitia,
kĩĩ katĩ kũũk kĩdĩmanek gõõl cunni.’b
28 Kaduwacung dĩdĩ,
athii eeti ĩmma cĩ arittia ngaa cĩ ijiar Yoanẽ tõ.
Ĩthõng thĩ,
eeti cĩ aturna kabicoca cĩ Nyekuco, ijiar nẽ Yoanẽ.”
29 Ma balna ngĩ athĩrar eeta vẽlẽk kĩ eet cĩk alũt mũcũrrũ buu thõõth cĩ Yesu wo,
ivitia elemit nẽẽgẽ ngatĩ ẽnnẽ gõõl cĩ Nyekuco dĩdĩ,
nyatarka agameek Yoanẽ ĩnõõgõ batithimo.
30 Ĩthõng thĩ,
kẽnnẽ abũrĩ Varithei kĩ limanniok cĩk Ngiran cĩ Mutha thõõth cĩ Nyekuco, nyatarka athii balna cĩ agameei Yoanẽ ĩnõõgõ batithimo.
31 Arki balna Yesu õthõõth noko athĩ ne,
“Keyehethei woccia thẽk na eet cĩk erkinya cĩkkõ kĩ nyia? Õgõõn nẽẽgẽ kĩ niin?
32 Aatĩ nẽẽgẽ kĩ doolia cĩk õthõõthõy ngatĩ tũwẽnto nyaguana dõ.
“ ‘Kabueccung naaga agiitia nyalomoru,
athii niigia cĩ arugumnyu buu,
kebeleccung tegelua cĩk lõngaanak,
ĩthõng athii niigia cĩ aluyyu buu.’
33 Ẽdẽẽth Yoanẽ Batithta ẽlẽ cĩnnĩ daintia kĩ mẽrta,
athinnu kẽnnẽ niigia ne, ‘Ayak nẽ ririwac cĩ gerthe.’
34 Ma ngĩ aku Ngẽrtĩ Eeto aduwue,
ĩthõng ũwũd mẽrtẽ,
athinnu kẽnnẽ niigia ne,
‘Aduwue nẽ õrrõt,
ĩthõng ũwũdẽ õrrõt, ĩthõng ẽẽn nẽ gõõnĩ eet cĩk alũt mũcũrrũ kĩ eet cĩk adĩman thoothonniok cĩk gerthek.’
35 Ĩthõng thĩ, eyeliay gẽẽnyĩthĩ kĩĩ dĩdĩ eetĩnẽy ĩcĩk õwõb thõõth cĩnnĩ.”
Uvuud ngaa cĩ ẽẽn gẽrẽthannioit Yesu
36 Ma natẽ,
ũtũvvũwa eeti ĩmma cĩ ẽẽn Varithenit Yesu kũũk kuduwõy õlõõ cĩnnĩ.
Ngaatĩ thĩna õkõyyĩ Yesu õlõõ cĩ et cĩ ẽẽn Varithenit, ĩthõng ũũk ẽrẽẽwõy, kĩĩ katĩ kuduwõy.
37 Ma balna ngĩ athĩrar ngaa ĩmma cĩ adĩman thoothonniok cĩk gerthek nginiwa nĩcẽ,
ngĩ athĩ ne,
aavĩ Yesu natẽ ẽẽ,
ayaha nẽ ngooroc cĩ õngõlĩ medi logora,c
38 ĩthõng ikiyyia ũũk ĩbĩl ngaa neccie bowuca cĩ Yesu.
Ma natẽ utulu kuumuc,
ĩthõng upucan nẽ thoo cĩk Yesu tulalõy,
ĩthõng upũccan thoo cĩgĩnĩk ĩmanẽy cĩgĩnĩk kĩĩ kũcũcũ thoo cĩgĩnĩk, ĩthõng utduutik ngooroc thoonĩy cĩgĩnĩk.
39 Ma balna ngĩ acĩn Varitheniti wũ balna avvũ Yesu ẽẽ,
umuk thĩnĩna ĩthĩ ne,
“Yoko kĩĩ eeti coo et cĩ õthõõth molook cĩ Nyekuco dĩdĩ,
aga woyyia nẽ ngatĩ ẽnnẽ ngaa cĩ awum ĩnõõnõ wo,
gẽrẽthannioit.”
40 Ngaatĩ ẽnnẽcĩ Yesu ĩnõõnõ nẽ,
“Thimõnẽ,
kadiimi na kaduwaci aniitia thõõth ĩmma.”
Ĩthõng ẽdẽc nẽ ĩthĩ ne,
“Limannioit, duwahanĩ.”
41 Ma natẽ,
uduwak Yesu ĩnõõnõ ethek ne,
“Aatĩ balna eeta cĩk ẽẽn ramma cĩk acuwana nyarobinya cĩk et ĩmma.
Acuwana ĩmma nyarobinya cĩk ẽẽn thĩĩkd cĩk ẽẽn eet etĩmma kĩ eet tur (500),
ĩthõng ucuwana eeti ĩmma cĩk ẽẽn eet ramma kõmmõtõ.
42 Ĩthõng thĩ,
balna athii nẽẽgẽ cĩ ayak nyarobinya,
ngaatĩ ũũngnĩcẽ baatĩ nyarobinyawu ĩnõõgõ,
ĩthõng athii cĩ adũmanĩ nẽẽgẽ. Yoko eetĩnẽy ĩcĩk ẽẽn ramma wo, et woccia jang cĩ amĩnan baatĩ nyarobinyawu õrrõt?”
43 Ẽdẽcĩ Thimõnẽ athĩ ne,
“Kamui woccia et wũ balna acuwana nyarobinya cĩk meelĩk õrrõt,
ĩthõng athii katĩ cĩ adũman ĩnõõnõ.”
Ĩthõng ẽdẽc Yesu ethek ne,
“Edeemiwu.”
44 Ngaatĩ ũũkcẽnẽ Yesu kẽdẽnya tõõn cĩ aavẽ ngaa neccie,
ĩthõng ethek Thimõnẽ ne,
“Acini niia ngaa coo?
Balna thẽk ngĩ kakuni na õlõõ cunni wo,
ngaanĩ anya niia aneeta maam cĩk kũũnyẽ thoo. Ĩthõng thĩ, ũtũũny ngaa coo thoo cĩganĩk tulalõy ĩcĩgĩnĩk, ĩthõng upucan ĩmmanẽy cĩgĩnĩk.
45 Balna ngĩ kakuni na,
ngaanie niia thawaa aneeta cũcũwẽnta.
Ĩthõng thĩ,
balna ĩthaawa ngaa coo aneeta, nga kũtũng ngĩ acũcũyya aneeta thoo cĩganĩk.
46 Ĩthõng ngaanĩ niia tduutiha aneeta ngooroc õõwa,
ĩthõng thĩ, utduutiha ngaa coo aneeta ngooroc cĩ ayak tongoli cĩ õngõlĩ medi õrrõt thoonĩy ĩcĩganĩk.
47 Ĩthõng thĩna,
kaduwaci na aniitia,
ũtũngtothĩk thoothonniowa cĩgĩnnẽk cĩk meelĩk cĩk gerthek,
nyatarka mĩnan cĩnnĩ cĩ obbi.
Ĩthõng thĩ, ĩnõõnõ cĩ ẽyẽlanĩ nẽ mĩnan cĩnnĩ wo. Ĩthõng thĩ, eeti ĩmma cĩ ũtũngtothĩk thoothonniowa cĩgĩnnẽk cĩk kĩdĩk cĩk gerthek, eyeleei katĩ nẽ eet mĩnan cĩ dĩcĩ.”
48 Ĩthõng uduwak Yesu ngaa nĩcẽ ethek ne,
“Ũtũngtothĩk aniitia thoothonniowa cĩk gerthek cugunniek.”
49 Ma balna ngĩ athĩrar kerenniowa gwuak cĩk balna arũmẽ kĩ ĩnõõnõ thõõth coo wo,
avaracitõ othoothitõ nyaguana ĩĩtõ ne,
“Et jang coo,
cĩ uungni eet thoothonniok cĩk gerthek wo?”
50 Ĩthõng uduwak Yesu ngaa nĩcẽ ethek ne,
“Ẽẽlai leminiti cunnie aniitia.
Bĩt jurrung.”