Ootti makayyiowa cĩk Yudei Yesu ĩcĩ Pĩlatõ
(Bẽl Marĩkõ 15:1; Luka 23:1-2; Yoanẽ 18:28-32)
27
Ma balna ngerenniet ngaanĩpĩny, uluttiay makayyiowa cĩk paadĩrnyawu kĩ eet cĩk obbitik vẽlẽk, ĩthõng ivitia ẽlẽmtõĩ thõõth cĩ adiim ngĩ arui nẽẽgẽ Yesu kadaak. 2 Ĩthõng balna ivitia ecebit nẽẽgẽ ĩnõõnõ, ĩthõng õõt aanycĩk gaalinit cobbi cĩ agam looc nĩcẽ cĩ athĩ Pĩlatõ.Ucud Yudathĩ ẽlẽ cĩnnĩ
(Bẽl Tiicanẽ cĩk Tionniawu 1:18-19)
3 Ma balna ngĩ acĩn Yudathĩ wũ balna õvõlõngĩ ĩnõõnõ, ngatĩ etedothĩcẽ Yesu daaĩthĩ wo, ikiyyia õmõthẽ nẽ õrrõt, nyatarka gii wũ balna aticaneei nẽ Yesu. Ngaatĩ õbõdẽcĩ nyarobinya cĩk ẽẽn thĩĩk wũk balna ẽẽn etĩmma kõmmõtõ, makayyiok cĩk paadĩrnyawu kĩ eet cĩk obbitik. 4 Ĩthõng ĩthĩ nẽ ne, “Kẽgẽrẽthana na ngatĩ kõvõlõngẽ et cĩ ngaanĩ kẽgẽrẽthan gimma kũdũt.”
Ẽdẽcĩ nẽẽgẽ athĩ ne, “Nyia naboo naaga? Ẽẽn neccie thõõth cunni nyiangũ.”
5 Ngaatĩ atdũkẽcĩ Yudathĩ nyarobinya nĩĩkẽ Ciitha ĩcĩ Nyekuco, ĩthõng ũũk ucud ẽlẽ cĩnnĩ.
6 Ma balna eberyia makayyiowa cĩk paadĩrnyawu nyarobinya nĩĩkẽ, ĩthõng ĩĩtõ ne, “Adũmanni balna nyarobinya cĩkkõ, kĩĩ katĩ kuruwue eeti thõng. Angiranni Ngirana, ngatĩ kiitiangĩ nyarobinya cĩkkõ Ciitha cĩ Nyekuco.” 7 Ngaatĩ balna alũtẽnĩ nẽẽgẽ, ĩthõng othoothitõ ĩĩtõ ne, “Kutuyyiaĩ nyarobinya cĩkkõ mana ĩcĩ et wũ gõõ ẽngẽnyẽt ijjionya, ĩthõng kaaritõ naaga kĩĩ ngĩtĩ adawini eeta cĩk loociok cĩk rẽẽng.” 8 Ĩnõõnõ thĩ cĩ ẽthẽcĩ eeta nginicẽ ne, “Ngĩtĩ biyyietu,” kĩĩ kõr coo. 9 Ngaatĩ thĩ balna aku edenyianẽ thõõth wũ balna aduwa Jeremia eeti cĩ õthõõth molook cĩ Nyekuco ngĩ ẽẽn dĩdĩ balna ngĩ athĩ ne, “Ootti balna nẽẽgẽ nyarobinya wũk ẽẽn thĩĩk cĩk ẽẽn etĩmma kõmmõtõ, wũk balna ẽlẽmĩ eeta cĩk Ĩthraĩlĩ ngatĩ ũũtanẽ ĩnõõnõ, 10 ĩthõng balna utuyyiaĩ nẽẽgẽ nyarobinya nĩĩkẽ, ngĩtĩ ẽngẽnycĩ eeti ijjionya, kĩ balna ngĩ aduwacca aneeta Makayyioiti.”a
Ijin Pĩlatõ Yesu
(Bẽl Marĩkõ 15:2-5; Luka 23:3-5; Yoanẽ 18:33-38)
11 Ma balna ngĩ ayakta nẽẽgẽ Yesu kĩbĩl ĩcĩ gaalinit cobbi, ikiyyia ijin Pĩlatõ ĩnõõnõ ethek ne, “Eeni niia alaan cĩ Yudei?”
Ẽdẽcĩ Yesu athĩ ne, “Ii õgõõn kĩ cĩ aduwa niia wo.”
12 Ma balna ngĩ õvõlõngtĩ makayyiowa cĩk paadĩrnyawu kĩ eet cĩk obbitik ĩnõõnõ wo, ĩthĩnga balna nẽ ẽdẽcĩ ĩnõõgõ kũdũt. 13 Ĩthõng ijin Pĩlatõ ĩnõõnõ ethek ne, “Athii niia cĩ athihi thõõth cĩ aduwa nẽẽgẽ athĩ ne, adĩmani niia wo?” 14 Ĩjakci balna Yesu athii cĩ ẽdẽcĩ thõõth ĩmma buu, ngaatĩ abulanĩ thõõth coo gaalinit cobbi wo.
Eteheedothĩk Yesu daaĩth
(Bẽl Marĩkõ 15:6-15; Luka 23:13-26; Yoanẽ 18:39-19:16)
15 Ẽẽn balna gõõ vowoth cĩ gaalinit cobbi cĩ õõganẽ nẽ et codoi erkita kĩjana, cĩ ẽbẽra meelitini cĩ eetu wathinniowẽy ĩcĩk obbitik ĩcĩk Kõr cĩ Ngothio. 16 Itina nĩcẽ aavĩ eeti ĩmma cĩ balna adĩman thoothonniok cĩk gerthek õrrõt cĩ aavĩ kĩjanatõ cĩ athĩ Barabath. 17 Ĩthõng thĩ, balna uluttiay meelitini cĩ eetu vẽlẽk kõdõwẽ ivitia ciitha cĩ Pĩlatõ, ikiyyia ijin nẽ ĩnõõgõ ethek ne, “Adiimnyu niigia kõõgawung na ngẽnẽ, Barabath, kõdẽ Yesu cĩ athĩ Kiristo wo?” 18 Aga balna nẽ õrrõt ngatĩ anyĩcẽ makayyiowa cĩk Yudei Yesu Pĩlatõ, nyatarka balna alĩlĩwei nẽẽgẽ ĩnõõnõ.
19 Ma balna nga aavĩ Pĩlatõ loota taabawa cĩnnĩ ĩcĩ alaantheto, ikiyyia itiona ngaa cĩnnẽ nyemut cĩ athĩ ne, “Nyĩ adĩmani et nĩcĩ amĩrĩ ẽẽ, buth, nyatarka ẽhẽcca aneeta ngonothinetĩ õrrõt, nyatarka ĩnõõnõ waabal.”
20 Ĩthõng thĩ, kẽnnẽ balna ĩlaleei makayyiowa cĩk paadĩrnyawu kĩ eet cĩk obbitik meelitin cĩ eetu kijinit Pĩlatõ, kõõga Barabath, ĩthõng uruk Yesu.
21 Ĩthõng ijin gaalinti cobbi ẽẽ, meelitin cĩ eetu ethek ne, “Ngẽnẽ eetĩnẽy ĩcĩk ẽẽn ramma wo, cĩ adiimnyu niigia kõõgawung na?”
Ẽdẽcĩ nẽẽgẽ athĩ ne, “Õgaẽt Barabath.”
22 Ngaatĩ ajini Pĩlatõ ĩnõõgõ ẽthẽcĩ ne, “Ĩthõng katĩ kadaẽ na Yesu cĩ athĩ Kiristo wo nyia?”
Ẽdẽcĩ nẽẽgẽ vẽlẽk athĩ ne, “Toddowek niia ĩnõõnõ kurucea!”
23 Ẽdẽcĩ Pĩlatõ athĩ ne, “Nyia? Nyia da cĩ ẽgẽrẽthan nẽ wo?”
Ẽgẽrẽny kẽggẽ nẽẽgẽ õrrõt athĩ ne, “Toddowek ĩnõõnõ kurucea!”
24 Ma balna ngĩ ĩcĩn Pĩlatõ ngatĩ athiinni gõõl cĩ õõganẽ nẽ Yesu tõ, nyatarka ẽtẽrẽktaĩ eeta acalcallit õrrõt. Ĩdĩma nẽ maam, ĩthõng ũtũũny athĩn cĩgĩnĩk kẽbẽrẽnĩy ĩcĩk eet cĩk meelĩk, ĩthõng ĩthĩ ne, “Kamiri na biyyietĩy ĩcĩk et coo, ẽẽn neccio thõõth cunung.”
25 Ẽdẽcĩ kẽnnẽ eeta vẽlẽk athĩ ne, “Anyĩk niia biyyie cĩgĩnĩk kaavutõ ĩcĩnang kĩ dõõlĩ cĩgaak!”
26 Ngaatĩ õõgacẽ Pĩlatõ ĩnõõgõ Barabath, ĩthõng thĩ, uduwak nyĩcẽkẽr cĩgĩnĩk kuukitõ Yesu, ĩthõng otoddoyyiek kurucea.
Ĩtdanyitõ nyĩcẽkẽrĩ Yesu atararyi
(Bẽl Marĩkõ 15:16-21; Yoanẽ 19:2-3)
27 Ngaatĩ õvõyyĩ nyĩcẽkẽrĩ cĩk gaalinit cobbi Yesu õlõõ ĩcĩ aavẽ gaalinti, ĩthõng uluttiay ivitia ĩlĩkta ĩnõõnõ. 28 Ma balna upuruccia nẽẽgẽ ceremua cĩk Yesu, ĩthõng itihimtẽẽĩ ĩnõõnõ cẽrẽm cĩ wuuni cĩ rẽgẽẽ,b 29 ĩthõng ẽtẽngẽnyca tĩĩ cĩ ẽẽn bĩlla,c ĩthõng aryihi õõwa cĩnnĩ, ĩthõng aryihi tẽlẽẽĩ attia cĩnnĩ ĩcĩ athio, ĩthõng akattiek ĩnõõnõ kuthungti, ĩthõng atararyi ĩnõõnõ entek ne, “Kĩthawõy alaan cĩ Yudei!” 30 Ma natẽ ivitia uturyik ĩnõõnõ amũta, ĩthõng agamta tẽlẽẽĩ, ĩthõng uukitõ ĩnõõnõ õõ ngõnana cĩk meelĩk. 31 Ma balna ngĩ atararyi, ĩthõng ĩtdanyitõ nẽẽgẽ ĩnõõnõ vẽlẽk, ivitia upuruccia cẽrẽm cĩ wuuni cĩ rẽgẽẽ, ĩthõng itihimtẽẽĩ ceremua wũgĩnĩk naboo, ngaatĩ õvvõ õdõddĩcẽ ĩnõõnõ kurucea.
Otodowothĩk Yesu kurucea
(Bẽl Marĩkõ 15:22-32; Luka 23:27-43; Yoanẽ 19:17-27)
32 Ma balna ngaanĩ õwõ nẽẽgẽ gõõla, ivitia urumtõy kĩ et ĩmma cĩ athĩ Thimõnẽ cĩ kõrõõk cĩ gaalawu cĩ Cirene, ngaatĩ atĩnganẽcĩ ĩnõõnõ kõdõng kuruce. 33 Ivitia õdõlanit nẽẽgẽ ngĩtĩ athĩ Gõlgõtha, ngĩtĩ athĩ ne, “Õõ cĩ et cĩ adaaha.” 34 Ma natẽ, ivitia aanycĩk nẽẽgẽ Yesu kũwũd mẽrtẽ cĩ vĩnõwo cĩ õngõtanothi gimma cĩ aakaatĩ kẽẽk cĩ alalĩthan wuciith, ma balna ngĩ atarĩ Yesu mẽrtẽ nĩcĩ vĩnõwo ẽẽ, ikiyyia ũtũbũr ngatĩ awũdĩ. 35 Ma balna ngĩ otoddoyyiek nẽẽgẽ ĩnõõnõ kurucea vẽlẽk, ivitia engerit nẽẽgẽ ceremua cĩgĩnĩk gõõla cĩ amĩnyĩ mĩcĩt cĩ ẽẽn lirlir keyeliay eeti cĩ õkõyyĩ ceremua cĩgĩnĩk mĩn mĩn.d 36 Ngaatĩ aatẽ nẽẽgẽ loota kĩĩ kebeit ĩnõõnõ natẽ. 37 Ĩthõng ivitia otoddoyyiek nẽẽgẽ thõõth cĩ etedothĩcẽ nẽ daaĩth õõwa cĩnnĩ tiddina cĩ athĩ ne, Yesu coo cĩ ẽẽn Alaan cĩ Yudei. 38 Õdõddĩ balna goryiaha cĩk ẽẽn ramma kĩ ĩnõõnõ, aavĩ codoi attia cĩnnĩ ĩcĩ athio, ĩthõng ĩmma attia cĩ angettio. 39 Adaac balna eeta cĩk abaakci natẽ vẽlẽk ĩnõõnõ, ĩthõng ĩlĩnglĩnganit ooti cĩgĩk, 40 ĩthõng ĩĩtõ ne, “Niia cĩ baa athĩ ne, õkkõ katĩ athaani Ciith cĩ Nyekuco, ĩthõng etengenyu naboo vurtia cĩ wathinniok iyyio wo, ẽẽla thĩ da yoko ẽlẽ cunni. Luciay kurucea, katĩ ngĩ eeni niia Ngẽrtĩ Nyekuco!”
41 Ma baa gõõla nĩĩcẽ dõ noko, ivitia atararyi makayyiowa cĩk paadĩrnyawu kĩ limanniok cĩk Ngiran cĩ Mutha kĩ eet cĩk obbitik ĩnõõnõ, 42 ĩthõng ĩĩtõ ne, “Cĩ gõõ ẽẽla nẽ eet õõgĩ, ĩthõng thĩ, yoko athii cĩ ẽẽla ẽlẽ cĩnnĩ nyia? Mĩ ẽẽn nẽ alaan cĩ Ĩthraĩlĩ, anyĩk kulucciay nẽ kurucea loota, ĩthõng thĩ, katĩ kelemit naaga ĩnõõnõ. 43 Ẽlẽmĩ nẽ Nyekuc. Anycĩk Nyekuc kẽẽl ĩnõõnõ yoko katĩ ma ngĩ adiimi, nyatarka athĩ nẽ ne, ‘Keeni Ngẽrtĩ Nyekuco.’ ” 44 Ĩthõng goryiaha wũk balna õdõddĩ kĩ ĩnõõnõ kõdõwẽ, ivitia adaaccitõ ĩnõõnõ.
Daaĩth cĩ Yesu
(Bẽl Marĩkõ 15:33-41; Luka 23:44-49; Yoanẽ 19:28-30)
45 Ma balna ngĩ aavu kõr tiddina, ikiyyia ĩĩ muwur lõõcĩ vẽlẽk kĩĩ itini iyyio cĩ yiomono. 46 Ĩthõng ma balna itin nĩcẽ noko, utulu Yesu ĩthĩ ne, “Eloi, Eloi, lama thabaththani?” Athĩ thõõth coo ne, “Nyekuc cannĩ, Nyekuc cannĩ, nyia tũngẽẽa wo?”e 47 Ma balna ngĩ athĩrar eeta gwuak cĩk balna abĩlĩ natẽ thõõth coo wo, othoothitõ ĩĩtõ ne, “Avvũ nẽ Elija.” 48 Ngaatĩ aviri eeti ĩmma natẽ tamanoko, ĩthõng ũũk ĩdĩma cẽrẽm, ĩthõng arĩk mẽrta ĩcĩ vĩnõwo cĩ aakaatĩ, ĩthõng arĩk kẽẽta, ĩthõng anyĩk Yesu kũwũd. 49 Ĩthõng ĩĩtõ eeta gwuak ne, “Kereyyiõy da nõõnõ! Kĩcĩnĩt da katĩ mĩ aku ẽẽla Elija ĩnõõnõ!” 50 Ma natẽ utulu Yesu moloowa cobbi naboo, ngaatĩ adaaknĩ.
51 Ma natẽ noko, apaaẽ cẽrẽm cĩ ẽngẽr Ciith cĩ Nyekuco kõrgẽnaf kĩĩ ramma, ẽtẽrẽhanĩ tiddina kõdõlan looc. Õmmõtĩ balna lõõcĩ, ĩthõng apaktẽ naarabẽta buu. 52 Ngaatĩ baa owine loowuana, ĩthõng ũrũkta eeta cĩk Nyekucak wũk balna adaaitõ wũk baa callĩk. 53 Ma balna ngĩ ũrũga Yesu daaĩtha, ivitia ẽtẽẽkta nẽẽgẽ loowuanĩy cĩgĩk, ĩthõng õõt ĩcĩ kõrõõk cĩ gaalawu cĩ dĩhĩmĩ cĩ Yeruthalẽmĩ, ngatĩ balna acĩnĩ eeta cĩk meelĩk ĩnõõgõ.
54 Ma balna ngĩ acĩn gaalinti kĩ nyĩcẽkẽr cĩgĩnĩk cĩk balna ẽbẽk Yesu ẽẽ, kirikirik kĩ kaal cĩk balna edenyiay vẽlẽk wo, ivitia otongollie nẽẽgẽ õrrõt, ĩthõng ĩĩtõ ne, “Monogo da balna ẽẽn eeti coo Ngẽrtĩ Nyekuco dĩdĩ!”
55 Mẽẽlĩ balna ngaay cĩk iriowa kĩ Yesu looca cĩ Galilea cĩk balna avvu ẽẽl ĩnõõnõ, aatĩ balna nẽẽgẽ natẽ, ẽdẽnya ĩnõõnõ rẽẽna. 56 Kõrgẽna cĩ ngaay nĩĩkẽ, aavĩ balna Maria Madalẽna, kĩ Maria yaatĩ Jemithi kĩ Yothẽbõ, kĩ yaatĩ lõgõõ cĩk Thebedeo.
Adawẽ Yesu
(Bẽl Marĩkõ 15:42-47; Luka 23:50-56; Yoanẽ 19:38-42)
57 Ma balna ngĩ õbõwẽ jiatĩnĩ neccie, ikiyyia iliba eeti ĩmma cĩ ẽẽn ballioit cĩ athĩ Yothẽbõ cĩ balna aku ĩcĩ kõrõõk cĩ gaalawu cĩ Arimathea, ikiyyia nẽ buu ĩthĩ wobjiait cĩ Yesu. 58 Ngaatĩ õkõyyĩ nẽ ĩcĩ Pĩlatõ, ĩthõng ũũk ijin ẽlẽ cĩ Yesu, ngaatĩ balna thĩ aduwacĩ Pĩlatõ nyĩcẽkẽr cĩgĩnĩk kõõt kaanycĩk ẽlẽ cĩ Yesu ĩnõõnõ kũũk kada. 59 Ĩthõng thĩ, balna ũũk ĩdĩma Yothẽbõ ẽlẽ cĩ Yesu, ĩthõng ũmmũrmũran cẽrẽma ĩcĩ dĩhĩmĩ, 60 ĩthõng arĩk loowag cĩnnĩ ĩcĩ jõr cĩ balna adawa nẽ laaraba. Ĩthõng ĩdĩma bĩĩ cobbi kĩĩ kũnyũgĩ katũk cĩ loowu, ngaatĩ õkõyyĩ. 61 Aavĩ balna Maria Madalẽna kĩ Maria ĩmma buu natẽ, aatĩ loota kabanyca loowa.
Bekciok cĩk Bĩĩyẽn cĩ Yesu
62 Ma ngerethietĩn cĩnnĩ, Kõrra cĩ Yuwuthono, ivitia õõt balna makayyiowa cĩk paadĩrnyawu kĩ eet cĩk ẽẽn Varithei kĩ Pĩlatõ, 63 ĩthõng entek ne, “Makayyioit, kahadana naaga thõõth wũ balna aduwa volongnyiaiti neccie, baa ngĩ athĩ ne, ‘Vurtia cĩ wathinniok iyyio, karũkna katĩ na daaĩtha naboo.’ 64 Ĩthõng yoko, duwak nyĩcẽkẽr kebeit katũk cĩ loowu jurrung, kuumuc kõdõlanit wathinniowa cĩk ẽẽn iyyio wo. Mĩ athii cĩ atirithi jurrung, anĩha katĩ wobjiaha cĩgĩnnẽk, ĩthõng ivitia ogorothit ẽlẽ cĩnnĩ, ĩthõng õõt uduktiak eet entek ne, ũrũga Yesu daaĩtha. Ĩthõng goollintia cĩnĩng cĩ aturna wo, gẽrtha katĩ õrrõt kijiar wũ balna owu.”