Nyĩ eteddu thoothonniok cĩk eet õõgĩ
7
“Nyĩ etedicu eet thõõth, kõdẽ katĩ ngĩ etedothicung agiitia thõõth cunung buu. 2 Etedothicung katĩ thõõth agiitia buu kĩ yoko ngĩ etedicu niigia eet õõgĩ ẽẽ! Adĩmanecung katĩ nẽẽgẽ agiitia buu kĩ yoko ngĩ adĩmanecu niigia buu ĩnõõgõ ẽẽ.3 “Nyia cĩn niia taahac cĩ dĩcĩlĩm kebereca cĩ gotononu wo, ĩthõng athii cĩ acini muturunyẽnit cĩ aavĩ kebereca cunni wo? 4 Ennei woccia niia gotonu ne, ‘Nyẽ kĩdĩma taahac cĩ dĩcĩlĩm bereca cunni.’ Ĩthõng athii niia cĩ acĩnẽ muturunyẽnit cĩ aavĩ bereca cunni kuu? 5 Niia volongnyiaiti, dĩma nõõnõ niia muturunyẽnit cĩ ayahi niia bereca cunni wo, kĩĩ katĩ cĩnẽ jurrung, ĩthõng thĩ, ĩdĩma taahac cĩ dĩcĩlĩm bereca cĩ gotononu.
6 “Nyĩ anyiccu kũrthĩĩ gii cĩ angiranni cĩ Nyekuco. Nyĩ atdukeecu pẽalnyaa cuguk kibõrõngẽ, ma ngĩ utdukteewu, aath katĩ nẽẽgẽ ĩnõõgõ, ĩthõng utuwuyyie adaktung agiitia.
Jin Nyekuc gii cĩ adiimi niia
(Bẽl Luka 11:9-13)
7 “Ijinit niigia, ĩthõng anyĩwothicung katĩ agiitia, ẽrẽpanit, ĩthõng amũdanu katĩ niigia, uukit, ĩthõng oyyiwothicung katĩ katũga. 8 Eeti ĩmma cĩ ajin gimma anyĩwothi katĩna ĩnõõnõ, ĩthõng eeti cĩ ẽrẽpan gimma amũda katĩna nẽ. Ĩthõng oyyiwothi katĩ katũk et ĩmma cĩ uuki.
9 “Ngẽnẽ woccia kõrgẽna cunung cĩ mĩ ajin ngẽrĩnẽ ahat cĩ avaadiay anyi kẽnnẽ bĩĩ? 10 Kõdẽ mĩ ajin ngẽrĩnẽ kuluguac anyi kẽnnẽ kũwaat? 11 Kĩ yoko ngĩ eeginnu niigia gẽrthẽ wo, mĩ agayyu niigia ngatĩ anyiccu dõõlĩ cuguk anyinit cĩ abũnna, ẽẽn katĩ ijjio kuu cĩk anyi Baaba cunung cĩ aavĩ tammuatiddina eet wũk ajin ĩnõõnõ. 12 Ĩdĩmanit niigia eet jurrung kĩ cĩ adiimnyu niigia ĩnõõgõ buu kĩdĩmantung agiitia jurrung. Ĩnõõnõ thĩ cĩ õthõõth Ngiranĩ kĩ eet cĩk õthõõth molook cĩ Nyekuco vẽlẽk wo.
Lũdũc katũk cĩ rũgẽt cĩ aavĩ kũdũt
(Bẽl Luka 13:24)
13 “Itioth araana cĩ lũdũcĩ ẽẽ. Nyatarka ngabur araanĩ, ĩthõng patdac gõõl cĩ õkõyyĩ et ĩcĩ gẽrẽthaninto, ĩthõng mẽẽlĩ eeta cĩk ẽhẽẽt natẽ. 14 Ĩthõng thĩ, lũdũc araanĩ kĩ gõõl cĩ õkõyyĩ eeti rũgẽta õrrõt, ĩthõng eet cĩk kĩdĩk dõ cĩk ijiowa.
Kẽẽt kĩ nyegerua cĩgĩnĩk
(Bẽl Luka 6:43-45)
15 “Ĩrĩcanta volongnyiak wũk athĩ ne, ẽẽn nẽẽgẽ eet cĩk õthõõth molook cĩ Nyekuco jurrung! Avvuneccung nẽẽgẽ agiitia athimatĩth õgõõn kĩ athaa, ĩthõng thĩ, thinnetinẽy cĩgĩk õgõõn kĩ kudumuana cĩk avvu adakcunga. 16 Agayyu katĩ niigia ĩnõõgõ kaalĩy ĩcĩk adĩman nẽẽgẽ. Adũũca woccia eeta mangga kẽẽnĩy ĩcĩk ẽẽn bĩlla, kõdẽ paypay bõõnatõ ĩcĩtõ? 17 Gõõla ĩcĩ aduwõy thõng, aari kẽẽt cĩ abũnna nyegerua cĩk abũnna, ĩthõng aari kẽẽt cĩ gerthe nyegerua cĩk gerthek. 18 Athii kẽẽt cĩ abũnna cĩ aari nyegerua cĩk gerthek, ĩthõng kẽẽt cĩ gerthe, athii cĩ aari nyegerua cĩk abũnna. 19 Kẽẽna vẽlẽk cĩk aari nyegerua cĩk gerthek, engedothii katĩ looc, ĩthõng utduktothĩk guyyia. 20 Agayyu katĩ niigia volongnyiak tiicanẽy ĩcĩk adĩman nẽẽgẽ.
Wobjiak kir cĩk Yesu
(Bẽl Luka 13:26-27)
21 “Athii cĩ ẽẽn eet vẽlẽk cĩk avvũyya aneeta athĩ ne, ‘Makayyioit, Makayyioit,’ cĩk katĩ iithio kabicoc cĩ tammutiddino, ĩthõng thĩ, et codoi dõ wũ adĩman kaal cĩk adiim Baangĩ cannie cĩ aavĩ tammuatiddina. 22 Kõrra ĩcĩ katĩ etedinie thoothiowa, etheca katĩ eeta cĩk meelĩk aneeta ne, ‘Makayyioit, Makayyioit, athii wõnõ balna naaga cĩ kirionĩca eet thõõth cĩ Nyekuco thaarĩy ĩcugunik, ĩthõng thaarĩy cugunik kitingkayyia ririwanĩn cĩk gerthek, ĩthõng kĩdĩmanta thoothonniok cĩk meelĩk cĩk anaat eeta?’ 23 Ĩthõng kaduwai katĩ thĩna ĩnõõgõ jurrung ketheei ne, ‘Athii baa na cĩ kagawung agiitia. Niigia eeta cĩk adĩmannu thõõth cĩ gerthe, ũtũngteangũ aneeta!’b
Tengenyiok ramma cĩ ẽgẽẽnyĩ kĩ cĩ agiithi
(Bẽl Luka 6:47-49)
24 “Ĩthõng thĩna, eeti cĩ athĩrar thoothonniok cĩganĩk, ĩthõng ĩdĩman ĩnõõgõ, õgõõn nẽ kĩ eeti cĩ ẽgẽẽnyĩ cĩ ẽngẽnyẽt ciith cĩnnĩ ngatĩ õkõmĩ. 25 Ma baa ngĩ ĩtĩĩl tammu cobbi kirik tõwõnĩ, ĩthõng uvungan ngõõtĩ cobbi kĩdda ciith õrrõt, athii baa ciith neccie cĩ oyokci, nyatarka ẽngẽnycẽ ngatĩ õkõmĩ. 26 Ĩthõng eeti cĩ athĩrar thoothonniok cĩganĩk, ĩthõng athii cĩ aticanini, õgõõn nẽ kĩ giitheeiti cĩ ẽngẽnyẽt ciith kathacĩnta. 27 Ma balna ngĩ ĩtĩĩl tammu cobbi kirik tõwõnĩ, ĩthõng uvungan ngõõtĩ ĩdda ciith kõyõwẽ kathaanẽ õrrõt.”