Luka 4

Ĩtĩman Thĩttanĩ Yesu

(Bẽl Matewo 4:1-11; Marĩkõ 1:12-13)

Ma balna agam tiirthẽtĩ cĩ Ririwac cĩ Dĩhĩmĩ Yesu, ĩthõng ĩtĩnga nẽ ũtũngek Lĩĩl cĩ Yordanĩ, ĩthõng ũũwĩ Ririwacĩ ĩnõõnõ baatha ĩcĩ õdõõĩ kak. 2 Ngaatĩ õkkõ anũmnũmmanĩ alaanĩ cĩ ririwanĩn cĩk gerthek ĩnõõnõ natẽ wathinniok eet ramma. Ẽdẽẽth balna nẽ ẽlẽ cĩnnĩ daintia wathinniok nĩĩkẽ vẽlẽk, ngaatĩ aku adaĩ ĩnõõnõ boobo õrrõt.

3 Ma natẽ, ethek alaanĩ cĩ ririwanĩn cĩk gerthek ĩnõõnõ ne, “Ma ngĩ eeni niia Ngẽrtĩ Nyekuco dĩdĩ, tũwũ da bĩĩ coo kĩĩ dainit.”

4 Ĩthõng ẽdẽc Yesu ĩnõõnõ ethek ne, “Eheeddi Nyaragawa ĩcĩ Nyekuco athĩ ne, ‘Athii eeti cĩ arũgĩ ahata cĩ avaadiay dõ.’ ”

5 Ngaatĩ õkõyyĩ alaanĩ cĩ ririwanĩn cĩk gerthek ĩnõõnõ ngatĩ wuuni, ĩthõng eyelek ĩnõõnõ kẽdẽnya kabicõnĩnẽ vẽlẽk loota natẽ. 6 Ĩthõng ũnũmnũman alaanĩ cĩ ririwanĩn cĩk gerthek Yesu ethek ne, “Kaanyi katĩ na aniitia loociok cĩkkõ kĩ balinit cĩnĩng vẽlẽk, anycĩwothĩha balna aneeta vẽlẽk. Ĩthõng kaanyi woccia na et cĩ adiim thĩnĩn cannie. 7 Ĩthõng thĩ, mĩ alawa niia aneeta, ẽẽn katĩ kaala cĩkkõ vẽlẽk cugunik.”

8 Ẽdẽcĩ kẽnnẽ Yesu ethei ne, “Eheeddi Nyaragawa ĩcĩ Nyekuco athĩ ne, ‘Laa Makayyioit Nyekuc cunni, ĩthõng iticanothiwu ĩnõõnõ dõ.’ ”

9 Ma natẽ, ũũwĩ alaanĩ cĩ ririwanĩn cĩk gerthek ĩnõõnõ Yeruthalẽma, ĩthõng õtõdĩ nẽ ĩnõõnõ Ciith cĩ Nyekuco tiddina ngatĩ ẽẽn thilo, ĩthõng ĩtĩman ethek ne, “Mĩ eeni niia Ngẽrtĩ Nyekuco dĩdĩ, tduke da ngato! 10 Nyatarka eheeddi Nyaragawa ĩcĩ Nyekuco athĩ ne,

“Anyi katĩ Nyekuci anjĩlẽt cĩgĩnĩk kĩrĩcantai aniitia,

kebekti aniitia jurrung,

11 odongnyi katĩ nẽẽgẽ aniitia athĩnẽy cĩgĩk,

kĩĩ katĩ kithii cĩ ĩdda bĩĩ thoo cugunik.”

12 Ẽdẽcĩ kẽnnẽ Yesu ethei ne, “Athĩ Nyaraga cĩ Nyekuco ne, ‘Nyĩ atĩmani Makayyioit Nyekuc cunni.’ ”

13 Ma balna ngĩ ẽdẽcak alaanĩ cĩ ririwanĩn cĩk gerthek ngatĩ atĩmanĩ Yesu goolliowẽy vẽlẽk, ikiyyia nõõnõ ũtũngek nẽ ĩnõõnõ, ĩĩthõng kĩĩ kũrũba itin cĩ atĩmanĩ ĩnõõnõ naboo.

Ithianaĩ Yesu tiic cĩnnĩ

(Bẽl Matewo 4:12-17; Marĩkõ 1:14-15)

14 Ngaatĩ amiirẽnẽ Yesu õkõyyĩ looca ĩcĩ Galilea nganĩ agam ĩnõõnõ tiirthẽtĩ cĩ Ririwac cĩ Dĩhĩmĩ noko. Ĩthõng athanothĩk nyemut cĩ akuni nẽ wo looc nĩcẽ vẽlẽk. 15 Ngaatĩ õkkõ alimanĩ eet Ciithẽnẽy cĩk Lawintiak, ĩthõng ĩdĩhĩthĩt eeta vẽlẽk ĩnõõnõ.

Ũtũbũrĩt eeta Yesu Natharẽta

(Bẽl Matewo 13:53-58; Marĩkõ 6:1-6)

16 Ma natẽ, imiirie Yesu ũũk Natharẽta, õlõõ cĩ gaalawu wũ balna alĩnnanĩ nẽnẽ. Ma Kõrra cĩ Yuwuthono, ũũk iliman nẽ eet Ciitha cĩ Lawintio kĩ gõõ dõõkĩthĩ. Ngaatĩ ĩngannĩ ẽbẽlĩ Nyaraga cĩ Nyekuco. 17 Anyĩwothi balna Yesu Nyaraga cĩ Ĩthaia wũ ẽẽn et cĩ õthõõth molook cĩ Nyekuco. Ma baa ngĩ apuuk nẽ wo, ẽbẽl ngĩtĩ eheeddi athĩ ne,

18 “Anyĩwothĩha aneeta Ririwacĩ cĩ Makayyiokto,

nyatarka ẽbẽraha nẽ aneeta

kirionĩk eet cĩk apĩrna Nyemut cĩ Abũnna.

Itionana nẽ aneeta kikiyyia kuduwak eet

cĩk ecebjie nyemut cĩ ogianĩt cĩnĩng,

kĩ thõõth cĩ kaanyĩcẽ rubenniak kĩcĩntẽ,

ĩthõng kikiyyia kẽẽl eet cĩk ĩtdany eeta,

19 ĩthõng kuduwaha eet kethea ne,

õdõlan erkit cĩ bũnnathĩt cĩ Makayyiokto.”

20 Ngaatĩ anyũmmĩ nẽ Nyaraga, ĩthõng aanyĩk ticciannioit natẽ, ĩthõng ũũk aavu loota. Ma natẽ, akatti eeta vẽlẽk ĩnõõnõ kẽbẽrẽ Ciitha ĩcĩ Lawintio, 21 ĩthõng ithianaĩ nẽ uduwak ĩnõõgõ ethek ne, “Kaduwacunga, kõr coo, ikiyyia thõõth cĩ Nyaraga cĩ Nyekuco ĩthĩ dĩdĩ, kĩ viyyio ngĩ athĩknu niigia ngĩ kebeli nana.”

22 Ẽkẽb balna eeta vẽlẽk ĩnõõnõ, ĩthõng utubuan thõõth cĩ abũnna cĩ aduwa nẽ wo ĩnõõgõ. Ngaatĩ ajinõõnĩ nẽẽgẽ mĩn athĩ ne, “Uwuy lõgõth, athii wõnõ cĩ ẽẽn ngẽrtĩ Yothẽbõ coo?”

23 Ĩthõng uduwak Yesu ĩnõõgõ ethek ne, “Kagga na õthõõthangũ katĩ niigia aneeta, athinnu iyiainta ĩcĩ owovothi cĩ alĩta eet athĩ ne, ‘Akĩĩm, anyĩk da ẽlẽ cunni kũbũna! Dĩman da õlõõ cĩ gaalawu ĩcunni wo thoothonniok wũk balna kathĩkna naaga athĩ ne, adĩmani niia Kaparnauma.’

24 “Kaduwacung dĩdĩ, athii eeti cĩ õthõõth molook cĩ Nyekuco cĩ ẽlẽmĩ eeta õlõõ cĩnnĩ ĩcĩ gaalawu. 25 Mẽẽlĩ balna ngaay cĩk bõyyĩk looca cĩ Ĩthraĩlĩ, wathinniowẽy wũk balna aviyie Elija loota natẽ. Wathinniowẽy wũk balna athiinni tammu erkinya iyyio kĩ kõrgẽn, ĩthõng ikiyyia balna ĩĩ maka butuny looc vẽlẽk. 26 Ĩthõng athii balna cĩ itioniai Elija ngaay cĩk bõyyĩk nĩĩkẽ, ĩthõng thĩ, itioniay balna nẽ kũũk kẽẽl ngaa ĩmma cĩ bõyyĩ cĩ aavĩ õlõõ cĩ gaalawu cĩ athĩ Tharevath, joonui Thidona. 27 Ĩthõng balna mẽẽlĩ eeta cĩk adak nyataba looca cĩ Ĩthraĩlĩ wathinniowẽy wũk balna aavẽ Elitha eeti cĩ õthõõth molook cĩ Nyekuco, ĩthõng thĩ, balna kothii et ĩmma cĩ adĩmanni kũbũna. Adĩmanni balna Naamanĩ dõ kũbũna, et cĩ looc cĩ Thiiria.”

28 Ma balna ngĩ athĩrar eeta Ciitha cĩ Lawintio thõõth coo wo, ivitia avaracitõ õrrõt. 29 Ngaatĩ ĩngannĩ, ĩthõng utugurit Yesu ootti õlõõ cĩ gaalawu ngatĩvõrĩ, ĩthõng ootti ngatĩ wuuni ĩcĩ thiir cĩ engenycianĩ kõrõõgĩ cĩ gaalawu cĩnĩng, ĩthõng idiimitõ ngĩ utdukit ĩnõõnõ thĩĩla. 30 Ĩngathĩ kẽnnẽ Yesu eetĩnẽy, ngaatĩ õkõyyĩ gõõla cĩnnĩ.

Itingkawek Yesu ririwac cĩ gerthe tuu

(Bẽl Marĩkõ 1:21-28)

31 Ngaatĩ amiirẽnẽ Yesu õkõyyĩ Kaparnauma, õlõõ cĩ gaalawu cĩ aavĩ looca cĩ Galilea, ĩthõng ũũk iliman eet Kõrra cĩ Yuwuthono. 32 Atubuan balna limanĩ cĩnnẽ eet õrrõt, nyatarka ayak nyemut cĩnnẽ makathĩt.

33 Amũdaai balna kẽnnẽ aavĩ eeti ĩmma cĩ ayak ririwac cĩ gerthe Ciitha cĩ Lawintio, ngaatĩ ovocẽcĩ ririwacĩ cĩ gerthe ẽẽ, ulua athĩ ne, 34 “Uwuy! Yesu cĩ Natharẽtĩ, nyia cĩ adĩmanecet niia wo? Akuni niia adiimi arukcet thõng? Kagayyi na aniitia, eeni niia Et cĩ Callĩ cĩ Nyekuco!”

35 Ma natẽ, egerenyek Yesu ririwac cĩ gerthe ẽẽ, ethek ne, “Tivanẽ! Tẽẽha eta coo!” Ngaatĩ uuki ririwacĩ cĩ gerthe wo et nĩcẽ looc noko lir bẽrẽnĩy ĩcĩk eetu vẽlẽk, ĩthõng ẽtẽha ngatĩvõrĩ athii eeti cĩ ayak kaakuac.

36 Atubuan balna thõõth coo eet vẽlẽk, ngaatĩ ajinõõnĩ nyaguana athĩnnĩ ne, “Liman woccia gõõ jang coo? Othoothi eeti coo ririwanĩn cĩk gerthek makathĩta, ngaatĩ allibi ririwanĩna ngatĩvõrĩ eetĩnẽy.” 37 Ngaatĩ athanothĩcẽ nyemut cĩ Yesu wo korookjiok cĩk aatĩ looca nĩcẽ vẽlẽk.

Anyĩk Yesu eet cĩk meelĩk kũbũnta

(Bẽl Matewo 8:14-17; Marĩkõ 1:29-34)

38 Ma natẽ, ẽtẽha Yesu Ciitha cĩ Lawintio, ĩthõng ũũk õlõõ cĩ Thimõnẽ. Amũdothi kẽnnẽ aharĩ ẽlẽ cĩ kinyik cĩ Thimõnẽ aaburi ẽlẽ guo, ngaatĩ alawĩ nẽẽgẽ ĩnõõnõ kẽẽl. 39 Ngaatĩ õkkõ ululẽnĩ Yesu ngatĩ õõngẽ kinyik cĩ Thimõnẽ ẽẽ, ĩthõng egerenyek nẽ aburthẽt nĩcẽ kũtũngek ĩnõõnõ. Ngaatĩ abũnnanĩ nẽ, ĩthõng ĩdĩmanek nẽ ĩnõõgõ gii cĩ adaĩ.

40 Ma balna ngĩ okolothĩk kõr, ayaktak eeta Yesu eet cĩk ayak moorithiok cĩk aatĩ mĩn mĩn, ngaatĩ awumi nẽ ĩnõõgõ athĩnẽy cĩgĩnĩk, ĩthõng ũbũnta nẽẽgẽ vẽlẽk. 41 Ẽẽkta balna ririwanĩnẽ cĩk gerthek eletinẽy ĩcĩk eetu, ĩthõng utuluthõ ĩĩtõ ne, “Eeni niia Ngẽrtĩ Nyekuco!” Egerenyeei kẽnnẽ Yesu ĩnõõgõ kĩjaktõy tiv, nyatarka aga nẽẽgẽ athĩ ne, ẽẽn Yesu Kiristo.

42 Ma balna ngerenniet, ũtũngek Yesu kõrõõk cĩ gaalawu, ĩthõng ũũk avvu mĩn, ĩthõng idiimitõ eeta ĩnõõnõ õrrõt. Ĩthõng ma balna ngĩ amũda wo, ĩtĩmanit ngatĩ athii cĩ ẽlẽmacĩ nẽẽgẽ Yesu kũũk naboo. 43 Ethei kẽnnẽ nẽ eet ne, “Kadiimi na thẽk kõkkõ kirioni eet Nyemut cĩ Abũnna cĩ kabicoc cĩ Nyekuco korookjiowẽy ĩcĩk gaalawu, nyatarka thõõth cĩ balna kitionanẽ na wo coo.” 44 Ngaatĩ thĩ arki nẽ alimanĩ nẽ eet Ciithẽnẽy cĩk Lawintiak looca cĩ Yudea.