Luka 3

Ĩdĩmanek Yoanẽ Batithta gõõl cĩ Makayyiokto

(Bẽl Matewo 3:1-12; Marĩkõ 1:1-8; Yoanẽ 1:19-28)

Balna erkit cĩ ẽẽn õmmõtõ kĩ tur, cĩ ẽnnẽ Tiberia alaan cobbi cĩ Rũma vẽlẽk, ẽẽn balna Pontioth Pĩlatõ gaalinit cĩ Yudea, ĩthõng ĩthĩ Ẽrõõdĩ alaan cĩ Galilea, ĩthõng naboo ĩthĩ gotonia Pilipo alaan cĩ Iturea kĩ Tarakoniti, ĩthõng ĩthĩ Lĩthaniathi alaan cĩ Abilẽnĩ, 2 ẽẽn balna Anathĩ kĩ Kaĩvath makayyiok cĩk paadĩrnyawu erkinya nĩĩkẽ. Aduwaai balna Nyekuci Yoanẽ ngẽrtĩ Thakariya thõõth baatha cĩ õdõõĩ kak. 3 Ngaatĩ õwõyyĩ Yoanẽ vatĩkẽy cĩk Lĩĩl cĩ Yordanĩ vẽlẽk, alimaneei eet thõõth cĩ batithimowo, nyatarka ũtũngtek nẽẽgẽ thoothonniok cĩgĩk cĩk gerthek, ĩthõng ũtũngek Nyekuci thoothonniok cĩgĩk cĩk gerthek. 4 Adĩmanni kaala cĩkkõ kĩ balna ngĩ eheeddi Nyaragawa ĩcĩ Ĩthaia et cĩ õthõõth molook cĩ Nyekuco athĩ ne,

“Ẽgẽrẽny moloowĩ cĩ et ĩmma

baatha cĩ õdõõĩ kak athĩ ne,

‘Ĩdĩmantek niigia gõõl cĩ Makayyiokto,

anycĩk gõõl cĩnnĩ kĩĩ mũrra.

5 Adĩtanni katĩ loorieta,

ĩthõng oyokci thiiryiowa vẽlẽk.

Anycĩk goolliok cĩk mõrgõlĩk kĩĩ mũrrẽ,

ĩthõng ĩdĩmantek goolliok

cĩk ẽẽn tõwõdõm kũbũnta.

6 Ĩthõng acĩn katĩ eeta vẽlẽk

elinit cĩ Nyekuco wo.’ ”

7 Ennei balna Yoanẽ meelitin ne, ivitia agamit batithimo ĩcĩnnĩ, ĩthõng ethek ĩnõõgõ ne, “Niigia doolia cĩk kũwaanyawu wo, ngẽnẽ cĩ aduwaccung athĩ ne, ivirit uukuẽnĩt cĩ katĩ ẽyẽhacung Nyekuci wo? 8 Ĩdĩmanit thoothonniok cĩk abũnna cĩk ẽyẽla athĩ ne, ũtũngtewu niigia thoothonniok cuguk wũk gerthek. Ĩthõng thĩ, nyĩ nganĩ ahaddu athinnu ne, ‘Kayakca baai nẽnnẽ naaga Abraham baangiet cĩnang.’ Nyatarka kaduwacung na kethecung ne, ũũlĩ Nyekuci ngatĩ woccia ũũkcĩ bĩĩyẽn cĩkkõ kĩĩtõ dõõlĩ cĩk Abrahamĩ. 9 Ĩthõng yoko, atadothĩk mẽlẽẽĩ kẽgẽrõy ĩcĩk keenu vẽlẽk. Engedothii katĩ kẽẽna vẽlẽk cĩk athii cĩ aari dainit cĩ abũnna tuu, ĩthõng utdukothĩk guyyiatõ.”

10 Ngaatĩ ajini eeta ĩnõõnõ ẽthẽcĩ ne, “Kutuguthia yoko thẽk kuu?”

11 Ẽdẽcĩ Yoanẽ ĩnõõgõ ethei ne, “Eeti cĩ ayak ceremua ramma, anycĩk ĩnõõnõ kẽngẽrak gõõnĩ cĩ kothii cẽrẽm, ĩthõng eeti cĩ ayak dainit, anycĩk ĩnõõnõ kotholit kĩ gõõnĩ cĩ adak boobo.”

12 Avvu balna agam eeta cĩk alũt mũcũrrũ buu batithimo, ĩthõng ijinit Yoanẽ entek ne, “Limannioit, kutuguthia yoko naaga kuu?”

13 Ẽdẽcĩ nẽ ĩnõõgõ ethei ne, “Nyĩ alũtanu mũcũrrũ kĩĩ mẽẽlĩ õrrõt kijiar wũk aduwa gaalinti cĩ Rũma.”

14 Ngaatĩ avvu ajini nyĩcẽkẽrĩ gwuak buu ĩnõõnõ ẽthẽcĩ ne, “Ma naaga kutuguthia yoko kuu?”

Ẽdẽcĩ nẽ ĩnõõgõ ethei ne, “Nyĩ õmõmõthanu et ĩmma nyarobinya, kõdẽ nyĩ ovolongu et ĩmma kaganoko. Anycĩk kũwũpantung nyarobinya cĩk adakcu nyĩĩlõwẽĩ ẽẽ.”

15 Ẽrẽ balna eeta vẽlẽk Ellioit cĩ katĩ aku, ngaatĩ amui athĩ ne, “Ẽẽn koccia Yoanẽ Kiristo?” 16 Ngaatĩ aduwacĩ Yoanẽ ĩnõõgõ vẽlẽk ẽthẽcĩ ne, “Kagamecung na agiitia batithimo maamĩy kaganoko, aku katĩ eeti ĩmma cobbi cĩ tiiri cĩ ijiarya aneeta. Et cĩ athii cĩ kẽtẽmanona na ngatĩ kaaranẽ nakavacĩt cĩgĩnĩk thoonĩy. Aku katĩ nẽ anyung agiitia batithimo Ririwaca cĩ Dĩhĩmĩ kĩ guyyia. 17 Ayak nẽ dũwũc cĩ anyintio attia cĩnnĩ. Aany katĩ nẽ labĩ, ĩthõng ẽtẽẽgẽl kavirok kaavutõ mĩn, ĩthõng arĩk labĩ dehera, ĩthõng thĩ, ũtũũth kavirok guyyia cĩ alanyĩt cĩ athii cĩ adĩĩtĩ kũdũt.” 18 Ĩthõng balna irionĩk Yoanẽ eet thoothonniok cĩk meelĩk cĩk Nyemut cĩ Abũnna cĩ Nyekuco.

19 Ma balna ennek Yoanẽ alaan Ẽrõõd ne, gẽrtha ngatĩ atihi nẽ Ẽrõõdiath ngaa cĩ gõtõnõnĩ, kĩ thoothonniok vẽlẽk cĩk gerthek cĩk gõõ atican nẽ, 20 ĩthõng thĩ, kẽnnẽ arĩk Ẽrõõdĩ Yoanẽ kĩjana, gii cĩ balna ẽgẽrẽthan Ẽrõõdĩ naboo õrrõt neccie.

Agam Yesu Batithimo

(Bẽl Matewo 3:13-17; Marĩkõ 1:9-11)

21 Ma balna mĩ agameek Yoanẽ eet vẽlẽk batithimo, agam balna Yesu buu batithimo. Ma balna ngaanĩ alayyie nẽ, õwẽ tammutiddin, 22 ĩthõng uluciay Ririwacĩ cĩ Dĩhĩmĩ cĩ aavĩ kĩ ballo. Ngaatĩ õthõõthĩ moloowĩ tammuatiddina athĩnnĩ ne, “Eeni niia Ngẽrnanĩ cĩ kamĩnani na. Kebelbeli na õrrõt kĩ aniitia.”

Tatũgẽt cĩk Yesu

(Bẽl Matewo 1:1-17)

23 Arahaĩ balna Yesu tiic cĩnnĩ balna ngĩ ĩĩtõ ĩnõõnõ erkinya cĩgĩnnẽk et ĩmma kõmmõtõ. Ĩthõng balna ahad eeta athĩ ne, ẽẽn Yesu balna ngẽrtĩ Yothẽbõ.

Yothẽbõ ngẽrtĩ Heli.

24 Heli ngẽrtĩ Matthat,

Matthat ngẽrtĩ Levi,

Levi ngẽrtĩ Melki,

Melki ngẽrtĩ Jannai,

Jannai ngẽrtĩ Yothẽbõ,

25 Yothẽbõ ngẽrtĩ Mattathiathi,

Mattathiathi ngẽrtĩ Amothĩ,

Amothĩ ngẽrtĩ Nehumi,

Nehumi ngẽrtĩ Ethli,

Ethli ngẽrtĩ Nagaĩ,

26 Nagaĩ ngẽrtĩ Mathĩ,

Mathĩ ngẽrtĩ Mattathiathi,

Mattathiathi ngẽrtĩ Themeini,

Themeini ngẽrtĩ Jothekĩ,

Jothekĩ ngẽrtĩ Joda,

27 Joda ngẽrtĩ Jõananĩ,

Jõananĩ ngẽrtĩ Rẽẽtha,

Rẽẽtha ngẽrtĩ Therubbabelĩ,

Therubbabelĩ ngẽrtĩ Thealtielĩ,

Thealtielĩ ngẽrtĩ Neeri,

28 Neeri ngẽrtĩ Melki,

Melki ngẽrtĩ Adi,

Adi ngẽrtĩ Kõthamĩ,

Kõthamĩ ngẽrtĩ Elmadaamĩ,

Elmadaamĩ ngẽrtĩ Ẽrĩ,

29 Ẽrĩ ngẽrtĩ Jothua,

Jothua ngẽrtĩ Eliẽthẽrĩ,

Eliẽthẽrĩ ngẽrtĩ Jorimi,

Jorimi ngẽrtĩ Matthat,

Matthat ngẽrtĩ Levi,

30 Levi ngẽrtĩ Thimionĩ,

Thimionĩ ngẽrtĩ Yudaa,

Yudaa ngẽrtĩ Yothẽbõ,

Yothẽbõ ngẽrtĩ Yonamĩ,

Yonamĩ ngẽrtĩ Eliakimi,

31 Eliakimi ngẽrtĩ Mẽlẽẽa,

Mẽlẽẽa ngẽrtĩ Mẽnna,

Mẽnna ngẽrtĩ Mattatha,

Mattatha ngẽrtĩ Nathanĩ,

Nathanĩ ngẽrtĩ Davide,

32 Davide ngẽrtĩ Jethe,

Jethe ngẽrtĩ Obedĩ,

Obedĩ ngẽrtĩ Boathĩ,

Boathĩ ngẽrtĩ Thalmõnĩ,

Thalmõnĩ ngẽrtĩ Nathõnĩ,

33 Nathõnĩ ngẽrtĩ Amminadabĩ,

Amminadabĩ ngẽrtĩ Admini,

Admini ngẽrtĩ Arni,

Arni ngẽrtĩ Hethronĩ,

Hethronĩ ngẽrtĩ Pẽrẽthĩ,

Pẽrẽthĩ ngẽrtĩ Yudaa,

34 Yudaa ngẽrtĩ Yokobĩ,

Yokobĩ ngẽrtĩ Aĩthaĩ,

Aĩthaĩ ngẽrtĩ Abrahamĩ,

Abrahamĩ ngẽrtĩ Tẽra,

Tẽra ngẽrtĩ Nahõrĩ,

35 Nahõrĩ ngẽrtĩ Theruk,

Theruk ngẽrtĩ Reu,

Reu ngẽrtĩ Pẽlẽẽĩ,

Pẽlẽẽĩ ngẽrtĩ Ẽbẽrĩ,

Ẽbẽrĩ ngẽrtĩ Thẽẽla,

36 Thẽẽla ngẽrtĩ Kaĩnanĩ,

Kaĩnanĩ ngẽrtĩ Arpaththadĩ,

Arpaththadĩ ngẽrtĩ Thẽmĩ,

Thẽmĩ ngẽrtĩ Nõõwa,

Nõõwa ngẽrtĩ Lamẽĩ,

37 Lamẽĩ ngẽrtĩ Methuthẽla,

Methuthẽla ngẽrtĩ Ẽnõkĩ,

Ẽnõkĩ ngẽrtĩ Jarẽdĩ,

Jarẽdĩ ngẽrtĩ Mahalalẽlĩ,

Mahalalẽlĩ ngẽrtĩ Kẽnanĩ,

38 Kẽnanĩ ngẽrtĩ Ẽnõthĩ,

Ẽnõthĩ ngẽrtĩ Thẽthĩ,

Thẽthĩ ngẽrtĩ Adamĩ,

ĩthõng ẽẽn Adamĩ ngẽrtĩ Nyekuco.