Tuwuanẽt cĩ Yesu
(Bẽl Matewo 1:18-25)
2
Ma wathinniok nĩĩkẽ,
aduwaai balna alaanĩ cobbi cĩ Rũmaa cĩ athĩ Aguthtuth eet looca cĩ Rũma vẽlẽk kõõt kẽkẽbtẽ.
2 Ẽẽn balna coo teheedinet cĩ owu cĩ ekebinie eeta, balna erkinya cĩk ẽnnẽ Kurinothi gaalinit cĩ looc cĩ Thiiria.
3 Ngaatĩ õvõyyĩ eeta vẽlẽk korookjiowẽy ĩcĩk gaalawu cĩgĩk mĩn mĩn kõõt keteheddie kẽkẽbtẽ.
4 Ĩthõng balna ĩtĩnga Yothẽbõ buu õlõõ cĩ gaalawu Natharẽta looca cĩ Galilea,
ĩthõng ũũk Bẽtẽlẽhẽma looca cĩ Yudea,
nyatarka balna ẽẽn nẽ et cĩ tatũk cĩ Davide. Ẽẽn balna Bẽtẽlẽhẽmĩ kõrõõk cĩ gaalawu cĩ Davide.
5 Iriok balna nẽ kĩ Maria,
bũweec wũ balna adiim nẽ katĩ kĩĩ ngaa cĩnnĩ.
Amũdaai kẽnnẽ balna ĩdĩngdĩng Maria wathinniowẽy nĩĩkẽ õrrõt.
6 Ma balna ngĩ õdõlanit nẽẽgẽ Bẽtẽlẽhẽm,
ivitia ũtũbantothĩk wathinniowa cĩk ũũkcanẽ Maria doolec,
7 ngaatĩ ũũkcanẽ nẽ doolec cĩ maacĩ cĩ ẽẽn abuu,
ĩthõng ũmmũrmũran cẽrẽma,
ĩthõng aanyĩk ĩnõõnõ katangu kovowola ĩcĩ aatẽ kartẽ cĩk ẽgẽwĩ kaala, nyatarka balna kothii ciith cĩ oginnie nẽẽgẽ natẽ.
Upwannak anjĩlõ cĩ Nyekuco tũwayyiok
8 Ĩthõng balna aatĩ tũwayyiowa gwuak baalin nĩcẽ ngatĩvõrĩ looca nĩcẽ cĩk ũwwa athaa cĩgĩk.
9 Ma baalin nĩcẽ,
upwannak anjĩlõ cĩ Makayyiokto ĩnõõgõ,
ĩthõng atalany bulẽnĩtĩ cĩ Makayyiokto kũtũkũl ĩnõõgõ ngaatĩ ongolini nẽẽgẽ õrrõt.
10 Ma natẽ,
othoothĩk anjĩlõ ĩnõõgõ ethek ne,
“Nyĩ ongolinangũ,
kayahacung na agiitia nyemut cĩ abũnna õrrõt,
cĩ katĩ anyi eet vẽlẽk kebelbelit looca.
11 Kõr coo itirriay Ellioiti cunung Bẽtẽlẽhẽma,
õlõõ cĩ gaalawu ĩcĩ Davide,
ĩnõõnõ Kiristob Makayyioit.
12 Yelinit thĩ katĩ cĩ õvvõ agawu ĩnõõnõ coo,
amũdothicu katĩ niigia ĩnõõnõ abunge ceremuanĩy,
ĩthõng õõngĩ kovowola ĩcĩtõ.”
13 Ma naboo tamanoko,
uppuaniay meelitini cobbi õrrõt cĩ anjĩletu tammuatiddina,
ĩthõng ũrũbtak nẽẽgẽ anjĩlõ cĩ owu, ĩthõng ebelliek Nyekuc tẽgẽl ĩĩtõ ne,
14 “Bulẽnĩt kĩ Nyekuc tammuatiddina,
ĩthõng bũnnathĩt kĩ eet cĩk atalĩ nẽ loota ngato.”
15 Ma balna ngĩ imiiryie anjĩlẽta neekie õõt tammuatiddina,
othoothitõ thĩ baa tũwayyiowa nẽẽgẽ dõ ĩĩtõ ne,
“Kõõt da Bẽtẽlẽhẽma, kĩĩ katĩ kĩcĩnĩt thõõth cĩ aduwacet Makayyioiti wo.”
16 Ngaatĩ ayihi,
ĩthõng kõõt kumuddiothĩk Maria kĩ Yothẽbõ, ĩthõng ĩcĩnĩt logoo cĩ dĩcĩ õõngĩ kovowolatõ ĩcĩtõ.
17 Ma balna ngĩ ĩcĩnĩt nẽẽgẽ logoo cĩ dĩcĩ ẽẽ,
vẽlẽk, imiiryie õõt athaantĩk eet nyemut wũ balna aduwaai anjĩlõ ĩnõõgõ.
18 Ĩthõng balna utubuan thõõth coo eet cĩk balna athĩrar nyemut cĩ aduwaai tũwayyiowa ĩnõõgõ õrrõt wo.
19 Ĩthõng thĩ, balna athũnnĩ Maria thoothonniok cĩkkõ vẽlẽk thĩnĩna cĩnnĩ kuumuc.
20 Ngaatĩ amiirẽnẽ tũwayyiowa õvõyyĩ ĩcĩ olu adĩhĩthĩ Nyekuc,
ĩthõng ubuluthit ĩnõõnõ,
nyatarka thoothonniok cĩk athĩrar nẽẽgẽ,
ĩthõng ĩcĩnĩt bẽrẽnĩy cĩgĩk,
kĩ balna ngĩ aduwaai anjĩlõ ĩnõõgõ.
Akattiothĩk Yesu thara Ciitha cĩ Nyekuco
21 Ma balna ngĩ ũwũpanĩt wathinniowa cĩk ẽẽn turgi,
ikiyyia ũbũũranẽ doolec ẽlẽ,
ĩthõng akattiothĩk thara cĩk athĩ Yesu thar wũk balna akaneei anjĩlõ balna nganĩ kanyawõy Maria.
22 Ma balna ngĩ õdõlanit wathinniowa cĩk tũũnyẽnẽt cĩ Maria thõõtha ĩcĩ Ngiranc cĩ Mutha,d
ootti Maria kĩ Yothẽbõ Yesu Yeruthalẽma kũũk kaanyĩwothĩk Makayyioit Ciitha cĩ Nyekuco,
23 cĩ aduwa Ngiranĩ cĩ Makayyiokto athĩ ne,
“Anycĩk katĩ gõõ doolec cĩ ẽẽn abuu cĩ maacĩ kaanyĩwothĩk Makayyioit.”e
24 Ĩthõng õõt ĩdĩmta nẽẽgẽ anyinit cĩ aduwa Ngiranĩ cĩ Makayyiokto athĩ ne,
“Anycĩk katĩ gõõ ballonya cĩk ẽẽn ramma,
kõdẽ kurrienya cĩk ẽẽn ramma.”f
Ĩdĩhĩth Thimionĩ Makayyioit
25 Aavĩ balna eeti ĩmma cĩ athĩ Thimion Yeruthalẽma cĩ balna ongollie Nyekuc,
ĩthõng ala ĩnõõnõ õrrõt kũdũt.
Ẽrẽ balna nẽ elinit cĩ Ĩthraĩlĩ,
ĩthõng balna aavĩ Ririwacĩ cĩ Dĩhĩmĩ ĩcĩnnĩ.
26 Aduwaai Ririwacĩ cĩ Dĩhĩmĩ ĩnõõnõ ethei ne,
athii katĩ nẽ cĩ adaaĩ ma nganĩ kĩcĩn Ruguthioit Kiristo wũ balna ẽbẽra Makayyioiti.
27 Anyĩk Ririwacĩ cĩ Dĩhĩmĩ Thimion kũũk reerunga cĩ Ciith cĩ Nyekuco ĩcĩtõ,
ĩthõng ootti Maria kĩ Yothẽbõ doolec Yesu natẽ, ĩthõng ĩdĩmanit nẽẽgẽ kaal cĩk adiim Ngiranĩ cĩ Mutha.
28 Ma natẽ,
õdõng Thimionĩ doolec noko,
ĩthõng ĩdĩhĩth Nyekuc ĩthĩ ne,
29 “Makayyioit Tiiryioit,
anya thĩ aneeta ticciannioit cunni wo,
kadaak jurrung kĩ balna ngĩ aduwa niinia,
30 nyatarka kĩcĩna elinit cunni bẽrẽnĩy cĩganĩk kir.
31 Elianĩt cĩ adĩmaneei niia kĩcĩnĩt eeta vẽlẽk.
32 Ẽẽn nẽ lanyĩt cĩ alanyĩt eetĩnẽy ĩcĩk athii cĩ ẽẽn Yudei,
ĩthõng ẽẽn nẽ bulẽnĩt cĩ eet cugunik cĩk Ĩthraĩlĩ.”
33 Atdirlangan balna thõõth cĩ aduwuay, nyatarka doolec wo Maria kĩ Yothẽbõ õrrõt.
34 Ngaatĩ agatanĩ Thimionĩ ĩnõõgõ,
ĩthõng ethek Maria yaatĩ dooleco ne,
“Ẽẽn katĩ logoo cio et cĩ anyi eet õõgĩ kitiathõ,
ĩthõng ayahak õõgĩ bũnnathĩt Ĩthraĩla.
Ẽẽn katĩ nẽ yelinit cĩ katĩ abũrĩ eeta cĩk meelĩk õrrõt,
35 kĩĩ katĩ kedenyiay muwẽẽnĩtĩ cĩ thinneti cĩk meelĩk.
Ĩthõng acuwan katĩ nyetubat thĩnĩn cunni buu.”
36 Ĩthõng balna naboo aavĩ ngaa ĩmma cĩ ẽẽn et cĩ õthõõth molook cĩ Nyekuco,
cĩ athĩ Ana cĩ balna ẽẽn bũwẽnyĩ Vannuẽlẽ cĩ tatũk cĩ Athẽrĩ.
Atangany balna nẽ õrrõt, ĩthõng balna thẽk ũrũmtẽ nẽ kĩ maac erkinya tũrgẽrẽm kaganoko ngaatĩ adaaknĩ maac cĩnnẽ,
37 ĩthõng ikiyyia ĩthĩ nẽ ngaa cĩ bõyyĩ kuumuc kõdõlanit erkinya cĩgĩnnẽk eet wec kĩ wec.
Aavĩ nẽ kũdũt alayyie Ciitha cĩ Nyekuco,
ĩthõng ẽdẽẽth ẽlẽ daintiag wathinniok õõgĩ,
ĩthõng alawõy.
38 Ma kõr nĩcẽ,
ikiyyia ũmũdak nẽ buu Yothẽbõ kĩ Maria,
ĩthõng ethek Nyekuc ne,
ibalallẽ, nyatarka aduwaai balna nẽ thõõth cĩ dooleco eet cĩk balna ẽrẽ elianĩt cĩ Yeruthalẽmĩ.
39 Ma balna ngĩ edecciak Yothẽbõ kĩ Maria avuthit cĩ adĩmanĩ Ngiran cĩ Makayyiokto,
ĩtĩngathõ imiiryie õõt ĩcĩ kõrõõk cĩ gaalawu cĩ Natharẽtĩ looca cĩ Galilea.
40 Ngaatĩ alĩnnanĩ doolec kĩĩ maka.
Ĩthõng balna aavĩ gẽẽnyĩthĩ kĩ bũnnathĩt cĩ Nyekuco ĩcĩnnĩ.
Yesu Ciitha cĩ Nyekuco
41 Erkinya vẽlẽk,
õvvõ baatĩ Yesu kĩ yaatĩnnĩ Yeruthalẽma Kõrra cobbi cĩ Ngothio.h
42 Ma balna ngĩ ĩtĩlĩtha Yesu kĩĩtõ erkinya cĩgĩnnẽk õmmõtõ kĩ ramma,
õõt nẽẽgẽ kõrra cobbi kĩ gõõ dõõkĩthĩ.
43 Ma balna ngĩ edeciay peyianĩ neccie,
imiiryie Maria kĩ Yothẽbõ õõt ĩcĩ olu.
Monogo da ũtũngothĩk Yesu Yeruthalẽma athii yaatĩnnẽ kĩ baatĩnnĩ cĩ agawĩ.
44 Ahad kẽnnẽ nẽẽgẽ athĩ ne,
utuwantẽ thẽk yoko Yesu kĩ gõõnõgĩ.
Ma baa jiatĩn nĩcẽ,
ivitia iyiethia nẽẽgẽ ĩnõõnõ. Ngaatĩ õvvõ adiimi tionniowẽy kĩ goonoginiy.
45 Ma balna ngĩ athii cĩ arũbanĩ nẽẽgẽ ĩnõõnõ wo,
imiiryie õõt idiimitõ Yeruthalẽma.
46 Ma baa vurtia cĩ wathinniok iyyio,
õõt nẽẽgẽ umuddia ĩnõõnõ reerunga cĩ Ciith cĩ Nyekuco ĩcĩtõ kõrgẽna cĩ limanniowu,
ngĩ athĩrar nẽ ĩnõõgõ, ĩthõng ijin ĩnõõgõ thoothonniok.
47 Ĩthõng balna utubuan eet vẽlẽk gẽẽnyĩthĩ cĩnnẽ, kĩ gõõl cĩ atajanĩ nẽ thoothiok cĩk ajin eeta ĩnõõnõ.
48 Ma balna ngĩ acĩn baatĩnnẽ kĩ yaatĩnnĩ ĩnõõnõ wo,
ikiyyia itdirlangan thõõth coo thinneti cĩgĩk õrrõt,
ngaatĩ ẽthẽcĩ yaatĩnnẽ ĩnõõnõ ne,
“Ngẽrnanĩ,
adĩmannet woccia ketee nyia?
Cĩn nõõnõ aneeta kĩ baaba cunni ngatĩ komothina, nyatarka kadiimnyi aniitia.”
49 Ẽdẽcĩ kẽnnẽ Yesu ĩnõõgõ ethei ne,
“Ẽrẽppannangũ da nyia?
Athii cĩ agayyu niigia ngatĩ woccia kaavẽ na Ciitha cĩ Baangĩ?”
50 Ĩthõng thĩ, athii balna kẽnnẽ nẽẽgẽ cĩ aga thõõth cĩ aduwa nẽ ẽẽ.