Luka 1

Nyemut cĩ Abũnna cĩ

Luka

Yelinit cĩ Nyaraga cĩ Luka

Ĩtĩmanit eeta cĩk meelĩk ngatĩ ẽhẽẽdĩ thoothonniok wũk balna atican Yesu kõrgẽna cĩnac. 2 Ẽẽn thoothiowa wũk balna ẽhẽẽd nẽẽgẽ nyemut wũ balna aduwacet ageeta eeta wũk balna acĩn thoothonniok cĩk Yesu kẽbẽrẽnĩy cĩgĩk kir. 3 Ngaatĩ kẽrẽpanẽ na buu thoothonniok cĩkkõ jurrung, karahanẽ ĩcĩ owu. Ĩnõõnõ thĩ yoko cĩ kehedici na aniitia buu jurrung wo. Makayyioit Theopiloth, 4 kẽkẽbaci na aniitia thõõth coo, kĩĩ katĩ gaa niia thoothonniok cĩkkõ jurrung, ngĩ balna ilimantothihi aniitia dĩdĩ.

Uduwuay tuwuanẽtĩ cĩ Yoanẽ Batithta

5 Ẽẽn balna Ẽrõõdĩ alaan cĩ Yudea, aavĩ balna paadĩrĩ cĩ athĩ Thakariya cĩ tatũk cĩ paadĩrnya cĩk Abija. Athĩ balna ngaa cĩ Thakariya thar cĩgĩnĩk Elithabeta, cĩ tatũk cĩ Aarõnĩ. 6 Ẽẽn balna Thakariya kĩ Elithabeta eet cĩk callĩk õrrõt nguuma cĩ Nyekuco, ĩthõng balna atarnanĩ Nyekuci ĩnõõgõ õrrõt, nyatarka õwõb nẽẽgẽ Ngiran cĩ Makayyiokto. 7 Ĩthõng thĩ, amũdaai kẽnnẽ balna abĩlĩ Elithabeta kolli dõõlĩ, ĩthõng atanganyitõ nẽẽgẽ rammatuguan õrrõt.

8 Ma kõr ĩmma, aticanni balna Thakariya kĩ tatũk cĩnnĩ cĩ paadĩrnyawu Ciitha cĩ Nyekuco. 9 Ĩthõng vowotha ĩcĩ paadĩrnyawu, amĩcĩ baa nẽẽgẽ lirlir, kĩĩ keberiay Thakariya kõr nĩcẽ, ĩthõng ũũk avaad nẽ mõõcac Ciitha cĩ Nyekuco. 10 Ĩthõng balna itina ĩcĩ avaadinie mõõcacĩ wo, alayyie balna meelitini ngatĩvõrĩ.

11 Ma tamanoko, ilibak anjĩlõ cĩ Makayyiokto ĩnõõnõ kikiyyia kĩbĩl ĩcĩ athiit cĩ athio ngatĩ todongintio cĩ abĩlnĩ paadĩrĩ ngatĩ avaadinie mõõcacĩ wo. 12 Ma balna mĩ acĩn Thakariya anjĩlõ wo, ĩthĩ nẽ tõryiak, ĩthõng abarrit nĩĩco noko. 13 Ethei kẽnnẽ anjĩlõ neccie ĩnõõnõ ne, “Thakariya, nyĩ ongolinanĩ! Ĩthĩrar Nyekuci lawinit cunni. Anyakcie katĩ ngaa cunnie Elithabeta, ĩthõng ũtũwa katĩ ngeruni. Ĩthõng ma ngĩ utuwuay, kateek ĩnõõnõ thar cĩk athĩ Yoanẽ. 14 Anyi katĩ tuwuanẽtĩ cĩnnẽ bẽlbẽllũ, ĩthõng katĩ ebelbelit eeta cĩk meelĩk buu, nyatarka tuwuanẽt cĩnnĩ, 15 nyatarka ẽẽn katĩ nẽ et cĩ tiiri õrrõt bẽrẽnĩy cĩk Nyekuc Makayyioit. Ĩthõng athii nẽ cĩ awũd mẽrtẽ. Ẽẽn katĩ nẽ et cĩ aavĩ Ririwacĩ cĩ Dĩhĩmĩ ĩcĩnnĩ tirianta ĩcĩnnĩ. 16 Õbõdanĩ katĩ nẽ eet cĩk meelĩk looca cĩ Ĩthraĩlĩ koboddia ĩcĩ Makayyioit Nyekuc cĩnĩng. 17 Uwuantẽcĩ katĩ nẽ Makayyioit ririwaca kĩ tiirthẽta kĩ balna Elija. Aganĩth katĩ nẽ baajigi kĩ dõõlĩ cĩgĩk, ĩthõng ayaha eet wũk athii cĩ ẽlẽmĩ Nyekuc koboddia muwẽẽnta ĩcĩ eet cĩk edeemi thoothonniok gõõla ĩcĩ abũnna. Kĩĩ kaanyĩk eet kereyyia gõõl cĩ akuni Makayyioiti.”

18 Ajin kẽnnẽ Thakariya anjĩlõ ennei ne, “Aku woccia thẽk katĩ thõõth coo ẽẽn dĩdĩ? Katanganyca nõõnõ naaga kĩ ngaa cannĩ.”

19 Ma natẽ, ẽdẽc anjĩlõ ĩnõõnõ ethek ne, “Athĩnna aneeta Gabũrẽllẽ, ticciannioit cĩ Nyekuco. Kitioniay balna na kikiyyia kuduwai aniitia nyemut cĩ abũnna coo. 20 Ĩthõng yoko mĩ athii cĩ elemi niia thõõth cĩ kaduwaci na wo, athii katĩ niia cĩ othoothi, ĩĩthõng gii ngĩ ikiyyia ĩthĩ thõõth cĩ kothoothi na wo dĩdĩ.”

21 Ẽrẽ balna eeta Thakariya ngatĩvõrĩ. Ĩthõng atubuanni balna nẽẽgẽ õrrõt ngatĩ avĩyanĩ nẽ Ciitha cĩ Nyekuco kuumuc. 22 Ma balna mĩ ẽẽkta nẽ ngĩtĩvõrĩ, athii kẽnnẽ cĩ õthõõthĩ, ngaatĩ thĩ balna aku õthõõthĩcẽ nẽ eet athĩnẽy kaganoko, kĩ eeti cĩ adĩĩtĩ kĩĩna. Ma natẽ noko, agaacõ eeta ĩĩtõ ne, ĩcĩn yoko ketee Thakariya gimma cĩ aku ĩcĩ Nyekuco Ciitha cĩ Nyekuco.

23 Ma balna ngĩ edeciay itini cĩ tiic cĩnnĩ, ikiyyia imiirie nẽ ũũk õlõõ. 24 Ma balna vurtia cĩ thoothonniok cĩkkõ, ikiyyia Elithabeta anyaawõy, ĩthõng aavu õlõõtõtõ cĩnnĩ nyĩĩlõwẽ tur ĩthĩnga ẽhẽẽt õkkõ ngamanĩ. 25 Ma natẽ, ikiyyia õthõõth Elithabeta ĩthĩ ne, “Ẽẽla Makayyioiti aneeta. Eyeleca nẽ aneeta bũnnathĩt cĩnnĩ wathinniowẽy ĩcĩkkõ. Ĩdĩm nẽ ngawani wũ gõõ nannĩ, ĩthõng athii katĩ eeta cĩ arannia aneeta naboo.”

Uduwa anjĩlõ tuwuanẽt cĩ Yesu

26 Ma balna ngĩ ĩĩtõ nyĩĩlõwẽ tõrkõnõm cĩk anyaini Elithabeta, ikiyyia itionĩk Nyekuci anjĩlõ Gabũrẽllẽ, kõrõõk cĩ gaalawu cĩ Natharẽtĩ looca cĩ Galilea, 27 kũũk kũrũbothĩk bũweec ĩmma cĩ athĩ Maria cĩ baa nga kataguthõ kĩ et ĩmma cĩ balna othoothi Yothẽbõ, cĩ balna ẽẽn nẽ tionnioit cĩ kõrõõk cĩ Davide. 28 Ngaatĩ õkõyyĩ anjĩlõ Gabũrẽllẽ, ĩĩthõng kõdõlan Maria, ĩthõng ĩthaa ĩnõõnõ ethek ne, “Kĩthayyi na aniitia doo cĩ agatanni Makayyioiti õrrõt wo! Aavĩ Makayyioiti Nyekuci ĩcunni.”

29 Athĩrar Maria thõõth coo noko, ĩthõng ukulek jien ĩthĩ ne, athĩ woccia eeti coo ne, kĩthĩ ne? 30 Ngaatĩ thĩ, aduwacĩ anjĩlõ ĩnõõnõ ẽthẽcĩ ne, “Maria, nyĩ ongollie, amĩnanni aniitia Nyekuci, 31 anyakcie katĩ niia, ĩthõng itirria logoo cĩ maacĩ, ĩthõng katĩ akatewu ĩnõõnõ thar cĩk athĩ Yesu. 32 Aku katĩ ẽẽn nẽ et cobbi õrrõt, cĩ katĩ avvẽ a ne, Ngẽrtĩ Nyekuc cĩ Ijiar vẽlẽk. Aku katĩ anyi Makayyioiti Nyekuci ĩnõõnõ kĩĩ Alaan, kĩ balna baatĩnnẽ Davide. 33 Ẽẽn katĩ nẽ alaan kabicoca cĩ Yokobĩ kũdũt. Athii katĩ kabicocĩ cĩnnẽ cĩ edeciay.”

34 Ma natẽ, ijin Maria anjĩlõ ethek ne, “Kanyakcie woccia katĩ kuu? Keeni na doo cĩ nganĩ kataguthia kĩ et ĩmma wo.”

35 Ẽdẽcĩ anjĩlõ ĩnõõnõ ethei ne, “Akuneci katĩ Ririwacĩ cĩ Dĩhĩmĩ aniitia, ĩthõng katĩ umuti tiirthẽtĩ cĩ Nyekuc cĩ Ijiar vẽlẽk. Ma vurtia cĩnnĩ, aku katĩ ũũkca niia logoo cĩ maacĩ cĩ katĩ avvẽ thara cĩgĩnnẽk athĩ ne, Ngẽrtĩ Nyekuco. 36 Anyaawõy yoko tionnioiti cunnie Elithabeta wũ atangany nẽ õrrõt, ĩĩtõ nyĩĩlõwẽ cĩk anyaini nẽ tõrkõnõm. Elithabeta wũ abĩlĩ wũ athii cĩ ariti, õkkõ katĩ ayak nẽ buu doolec. 37 Athii gii cĩ amaacĩ Nyekuc tõ.”

38 Ma balna ngĩ athĩrar Maria thõõth coo wo, õthõõth ĩthĩ ne, “Keeni na ticciannioit cĩ Makayyiokto, anyĩk thĩ thẽk kaavu kĩcĩ aduwa niia wo.” Ngaatĩ amiirẽnẽ anjĩlõ neccie.

Ũũk ĩcĩn Maria Elithabeta

39 Ma wathinniok nĩĩkẽ noko, ĩdĩmanothĩk Maria, ĩthõng iyik tamanoko ũũk ĩcĩ kõrõõk cĩ gaalawu cĩ aavĩ thiiryiowẽy ĩcĩk Yudea, 40 ngaatĩ õkkõ iithiowĩ kõrõõk cĩ Thakariya, ĩthõng ĩthaa Elithabeta. 41 Ma balna mĩ athĩrar Elithabeta thawinet cĩ Maria wo, õmmõtĩ kẽnnẽ doolec kẽẽngatõ cĩnnĩ, ĩthõng ittio Ririwacĩ cĩ Dĩhĩmĩ thĩnĩn cĩnnĩ kĩbbĩt. 42 Ma natẽ, othoothĩk Elithabeta Maria talintia ethek ne, “Agatanni aniitia Nyekuci õrrõt kõrgẽna cĩ ngaanu vẽlẽk, ĩthõng agatanẽ doolec cĩ katĩ ũũkca niia wo buu! 43 Nyia woccia gõõ kẽhẽrõnaha wanĩco yaatĩ Makayyioit cannĩ wo? 44 Viyyio ngĩ ĩthayya niia aneeta, õngõth kẽnnẽ doolec cannie kẽẽngatõ talintia. 45 Agatanni aniitia Makayyioiti, nyatarka elemi niia ngatĩ athĩknẽ thõõth cĩ katĩ adĩmaneci nẽnẽ.”

Tẽgẽl cĩ Maria cĩ dĩhĩthẽntõ

46 Ma natẽ, ẽbẽlõĩ Maria ĩthĩ ne,

“Abuluth thĩnĩn cannie Makayyioit,

47 ĩthõng ẽbẽlbẽl aneeta ririwacĩ,

nyatarka Nyekuc Ellioit cannĩ,

48 nyatarka athunnia nẽ aneeta

ticciannioit cĩnnĩ cĩ athimatĩthĩ.

Utuvvuyyia katĩ gõõ eeta erkinyiay entea ne,

ngaa cĩ agatan Nyekuci.

49 Nyatarka ĩdĩmanea Nyekuci Tiiryioiti

thoothonniok cĩk tiirtik õrrõt.

Callẽ thara cĩgĩnnẽk.

50 Õkkõ tamati cĩnnẽ ĩcĩ eet

cĩk ongollie ĩnõõnõ erkinya kĩ erkinya.

51 Ĩdĩman balna nẽ thoothonniok cĩk abũnna õrrõt attia cĩnnĩ.

Athaan nẽ eet cĩk ayak muwẽẽntiok cĩk ẽngẽrẽnĩ.

52 Itingka nẽ alaanẽt taabĩtẽy cĩgĩk,

ĩthõng thĩ, ẽẽl eet cĩk athimatĩthĩ.

53 Anyĩk nẽ eet cĩk adak boobo kaal cĩk abũnna,

ĩthõng thĩ, itingka eet cĩk ẽẽn balliok

kõõt athĩnẽy kaganoko.

54 Ẽẽl nẽ ticciannioit cĩnnĩ Ĩthraĩl,

ĩthõng ahada ngatĩ amannĩcẽ.

55 Abraham kĩ dõõlĩ cĩk dõõlĩ cĩgĩnĩk erkinya vẽlẽk

kĩ balna ngĩ aduwaai nẽ baajigiet cĩgaac.”

56 Ũrũmtẽ balna Maria kĩ Elithabeta nyĩĩlõwẽ iyyio ngaatĩ amiirẽnẽ õkõyyĩ õlõõ.

Itirriay Yoanẽ Batithta

57 Ma balna ngĩ ũtũbantothĩk wathinniowa cĩk uukcianẽ Elithabeta, ikiyyia ũtũwa nẽ doolec cĩ maacĩ. 58 Ma baa ngĩ athĩrar tionniowa kĩ eet cĩk abakanõy kĩ ĩnõõnõ wo, thõõth cĩ ẽyẽlẽcĩ Makayyioiti ĩnõõnõ thimati cobbi õrrõt wo, ivitia ebelbelit nẽẽgẽ vẽlẽk kĩ ĩnõõnõ õrrõt.

59 Ma balna ngĩ ũwũpanĩt wathinniowa cĩk uukcianẽ doolec ĩĩtõ turgi, ivitia nẽẽgẽ ngatĩ abũũranini ẽlẽ cĩ dooleco, ĩthõng idiimitõ akattiek thar cĩk doolecak baatĩnnĩ Thakariya, 60 ĩthõng thĩ, ẽdẽcĩ kẽnnẽ yaatĩnnẽ athĩ ne, “Athii tõ, athĩ thar cĩgĩnĩk Yoanẽ.”

61 Ẽdẽcĩ naboo eeta athĩ ne, “Athii eeti ĩmma tionniowẽy cuguk cĩ ayak thar nĩĩkẽ tõ.”

62 Ngaatĩ õthõõthĩcẽ eeta neekie Thakariya athĩnẽy, kĩĩ katĩ kuduwa thar cĩk woccia akanothi doolec. 63 Ikiyyia ijin Thakariya eet kaanycĩk ĩnõõnõ nyaraga, ngaatĩ ẽhẽẽdĩcẽ nyaraga athĩ ne, “Athĩ thar cĩk doolecak Yoanẽ.” Utubuantẽ balna eeta thõõtha ĩcoo õrrõt. 64 Ma thĩ natẽ noko tamanoko, ithianaĩ Thakariya õthõõth jurrung ngaatĩ adĩhĩthĩ nẽ Nyekuc.

65 Atdirlangan balna thõõth coo eet cĩk õjõõntĩ kĩ kõrõõk cĩnnĩ õrrõt, ĩthõng ẽkẽb eeta thõõth coo looca cĩ Yudea vẽlẽk. 66 Anaat balna thẽk eeta cĩk athĩrar thõõth coo õrrõt athĩ ne, “Logoo woccia katĩ cĩ aku ẽẽn nyia coo lõgõth?” Ajinõy balna eeta noko, nyatarka balna aga nẽẽgẽ ngatĩ aavĩ Makayyioiti kĩ ĩnõõnõ.

Tẽgẽl cĩ Thakariya

67 Ma natẽ, ikiyyia balna Ririwacĩ cĩ Dĩhĩmĩ kĩbbĩt Thakariya baatĩ dooleco, kĩĩ katĩ kõthõõth nẽ thõõth cĩ Nyekuco. Athĩ nẽ ne,

68 “Anycĩk kĩdĩhĩthẽ Makayyioiti Nyekuci cĩ Ĩthraĩlĩ,

nyatarka ikiyyia õõga nẽ eet cĩgĩnĩk.

69 Anyet nẽ ageeta Ellioit cĩnnĩ cĩ tiiri õrrõt,

cĩ aku kabicoca cĩ Davide ticciannioit cĩnnĩ,

70 kĩ balna ngĩ aduwa nẽ eetĩnẽy cĩgĩnĩk

ĩcĩk õthõõth molook cĩ Nyekucowũk balna callĩk baa lõõla.

71 Ẽẽlaneet katĩ nẽ athĩnẽy cĩk mĩrõk cĩgaac

kĩ eet cĩk aaburneccet ageeta.

72 Ĩthõng eyelek balna nẽ tamati õõ baangietĩ cĩgaac,

ĩthõng ahada balna ngẽrẽmngẽrẽm wũnnĩ wũ callĩ,

73 kĩ balna mĩ õkõnganei nẽ baangiet cĩnac Abraham athĩ ne,

74 ẽẽlaneet katĩ ageeta athĩnẽy cĩk mĩrõk cĩgaac,

ĩthõng anyet kiticantothĩk ĩnõõnõ jurrung kithii tongolinti,

75 ngatĩ keeginnie callẽ, ĩthõng kũbũnta

nguuma cĩnnĩ wathinniowẽy ĩcĩgac vẽlẽk.

76 Ĩthõng thĩ, niinia doolec cannie wo, avvuyyi katĩ eeta ennecci ne,

eeni niia et cĩ othoothi molook cĩ Nyekuc cĩ Ijiar vẽlẽk,

nyatarka uwuantẽcẽ katĩ niia Makayyioit

õkkõ adĩmanẽccẽ ĩnõõnõ gõõla.

77 Alimaneei katĩ niia eet cĩgĩnĩk avuthit cĩ elianĩt cĩnnĩ

gõõla ĩcĩ enyeeinie thoothonniowa cĩk gerthek cĩgĩk,

78 nyatarka amannĩcet katĩ Nyekuci ageeta,

ngatĩ itionacet nẽ ageeta talanyõn cĩ aku tammuatiddina,

79 kikiyyia kũtũkũl eet cĩk aatĩ muwuratõ

kĩ cĩk aatĩ ria cĩ daaĩtho,

ĩthõng eyelehet ageeta avuthit cĩ kõwõyyĩ ganõna cĩ kaatẽ jurrung.”

80 Ngaatĩ alĩnnanĩ doolec, kuumuc kayak ririwac cĩ tiiri thĩnĩna cĩnnĩ, ĩthõng ũũk aavu ngatĩvõrĩ looca ĩcĩ õdõõĩ kak kuumuc, kĩĩ itin wũ balna itioninie nẽ õkõyyĩ eetĩnẽy ĩcĩk Ĩthraĩlĩ.