Irion Yoanẽ Batithta
(Bẽl Marĩkõ 1:1-8; Luka 3:1-18; Yoanẽ 1:19-28)
3
Ma balna wathinniowẽy nĩĩkẽ, ikiyyia irion Yoanẽ Batithta baatha cĩ õdõõĩ kak looca cĩ Yudea, 2 irion nẽ athĩ ne, “Ũtũngtek niigia gerthetin cunung, ĩthõng oboddiawu kĩ Nyekuc, nyatarka aavu kabicocĩ cĩnnẽ cĩ tammutiddino joonui.” 3 Yoanẽ Batithta wũ baa õthõõth Ĩthaiaa eeti cĩ õthõõth molook cĩ Nyekuco athĩ ne,“Ẽgẽrẽny moloowĩ cĩ et ĩmma baatha cĩ õdõõĩ kak,
athĩ ne, ‘Ĩdĩmantek niigia gõõl cĩ Makayyiokto,
anycĩk gõõl cĩnnĩ kĩĩ mũrra.’ ”b
4 Ahimit balna Yoanẽ ceremua cĩk adĩmaniay ĩmmanẽy ĩcĩk nyaakalak, ĩthõng ẽcẽb nyẽkẽdẽngõ cĩ ẽẽn ruccenit thuguma cĩnnĩ, ĩthõng ẽẽn dainti cĩnnẽ girroca kĩ lotec. 5 Ngaatĩ baa alũnganianĩ eeta cĩk Yeruthalẽmĩ kĩ cĩk looc cĩ Yudea kĩ cĩk õjõõntĩ kĩ Lĩĩl cĩ Yordanĩ avvunẽcẽ Yoanẽ, 6 ĩthõng uduktiak ĩnõõnõ gerthetin cĩnĩng, ngaatĩ agamẽcĩ nẽ ĩnõõgõ batithimoc Lĩĩla cĩ Yordanĩ.
7 Ma balna ngĩ acĩn nẽ eet cĩk Varithei kĩ Thadutheid cĩk meelĩk ngatĩ avvunni nginiwa cĩ agamẽcĩ Yoanẽ eet batithimo wo, ikiyyia uduwak nẽ ĩnõõgõ ethek ne, “Niigia eeta cĩk gerthek cĩk ogoonnu kĩ kũwaanya wo, ngẽnẽ cĩ aduwaccung athĩ ne, ivirit niigia ukwẽẽnĩt cĩ katĩ aku wo? 8 Ĩthõng thĩna, iticanit thoothonniok cĩk ẽyẽla athĩ ne, ũtũngtewu niigia gerthetin cunung dĩdĩ, 9 nyĩ ahaddu enneccu eleeti cuguk ne, ‘Kayakca nẽnnẽ naaga baangiet cĩnang Abraham.’ Kaduwacunga, ũũlĩ Nyekuci ngatĩ ũũkcĩ bĩĩyẽn cĩkkõ kĩĩ dõõlĩ cĩk Abrahamĩ. 10 Ĩthõng yoko, atadothĩk mẽlẽẽĩ kegeroca cĩ keenu vẽlẽk. Engedothii katĩ kẽẽt cĩ athii cĩ aari nyegerua cĩk abũnna tuu, ĩthõng utdukothĩk guyyiatõ.
11 “Kagamecung na batithimo maamĩy, kĩĩ katĩ eyelia ngatĩ ũtũngtewu niigia thoothonniok cuguk cĩk gerthek, ĩthõng oboddiawu kĩ Nyekuc. Ĩthõng thĩ, aku katĩ eeti ĩmma vurtia ĩcannĩ cĩ ijiarya nẽ aneeta, ẽẽn et cĩ athii woccia na cĩ kuuli ngatĩ kõlõngõdẽ nakavacĩt cĩgĩnĩk. Agamecung katĩ nẽ batithimo Ririwaca cĩ Dĩhĩmĩ kĩ guyyia. 12 Ayak nẽ dũwũc cĩ anyintio attia cĩnnĩ. Aany katĩ nẽ labĩ kilongona, ĩthõng arĩk dehera, ĩthõng ũtũũth kaviroke guyyia cĩ athii cĩ adĩĩtĩ.”
Agam Yesu Batithimo
(Bẽl Marĩkõ 1:9-11; Luka 3:21-22)
13 Ma balna itin nĩcẽ ĩnganna balna Yesu looca cĩ Galilea kõdõlan Lĩĩl cĩ Yordanĩ, kĩĩ katĩ koccia kũũk kagamek Yoanẽ ĩnõõnõ batithimo. 14 Ĩthõng kẽnnẽ adiim ngĩ abĩlnĩ Yoanẽ ĩnõõnõ ethei ne, “Aniitia cĩ woyyia agameca aneeta batithimo, akuni kẽnnẽ niia ĩcĩnanĩ?”
15 Ẽdẽcĩ Yesu ethei ne, “Anyĩk nõõnõ kõr coo kaavu kĩyokowo, kĩĩ katĩ kĩdĩmanit thoothonniok vẽlẽk cĩk adiim Nyekuci ageeta kĩdĩmanit.” Ngaatĩ ẽlẽmĩ Yoanẽ.