Ĩtĩman Thĩttanĩ Yesu
(Bẽl Marĩkõ 1:12, 13; Luka 4:1-13)
4
Ma balna, ũũwĩ Ririwacĩ cĩ Dĩhĩmĩ Yesu baatha cĩ õdõõĩ kak kũũk kĩtĩman alaanĩ cĩ ririwanĩn cĩk gertheka ĩnõõnõ. 2 Ma baa vurtia cĩ ẽdẽẽthĩ Yesub ẽlẽ cĩnnĩ athii cĩ aduwẽẽnĩ wathinniok eet ramma kĩ baalinniok eet ramma, ikiyyia adak boobo ĩnõõnõ õrrõt. 3 Ngaatĩ akunĩcẽ alaanĩ cĩ ririwanĩn cĩk gerthek ẽẽ, ĩnõõnõ, ĩthõng ethek ne, “Ma ngĩ eeni niia Ngẽrtĩ Nyekuco, duwak da bĩĩyẽn cĩkkõ kutuwuyyie kĩĩtõ aheenin cĩk avaadiay.”4 Ẽdẽcĩ Yesu ethei ne, “Eheeddi athĩ ne, ‘Athii eeti cĩ arũgĩ ahata cĩ avaadiay dõ, ĩthõng arũgĩ nẽ thoothonniowẽy ĩcĩk avvu kũtũga cĩ Nyekuco.’ ”c
5 Ngaatĩ õtõdĩ alaanĩ cĩ ririwanĩn cĩk gerthek ĩnõõnõ õkõyyĩ ĩcĩ Yeruthalẽmĩ õlõõ cĩ gaalawu ĩcĩ dĩhĩmĩ, ĩthõng aanyĩk ĩnõõnõ kĩbĩl ngatĩ wuuni õrrõt tiddina Ciitha cĩ Nyekuco.d 6 Ĩthõng ethek ĩnõõnõ ne, “Mĩ eeni niia Ngẽrtĩ Nyekuco dĩdĩ, ũracẽ da yoko ngato, nyatarka eheeddi Nyaragawa ĩcĩ Nyekuco athĩ ne,
“ ‘Anyi katĩ Nyekuci anjĩlẽt cĩgĩnĩk kĩrĩcantai aniitia,
odongnyi katĩ nẽẽgẽ aniitia athĩnẽy cĩgĩk,
kĩĩ katĩ kithii cĩ ĩdda bĩĩ thoo cugunik.’ ”e
7 Ẽdẽcĩ Yesu ethei ne, “Eheeddi Nyaragawa ĩcĩ Nyekuco buu athĩ ne, ‘Nyĩ atĩmani Makayyioit Nyekuc cunni!’ ”f
8 Ma naboo natẽ, ũũwĩ alaanĩ cĩ ririwanĩn cĩk gerthek ĩnõõnõ thiira cĩ wuuni õrrõt, ĩthõng eyelek ĩnõõnõ kabicõnĩnẽ kĩ tiirthẽt cĩnĩng vẽlẽk. 9 Ĩthõng ethek ĩnõõnõ ne, “Kaanyi woccia na aniitia loociok cĩkkõ vẽlẽk, katĩ mĩ akateha kuthungti, ĩthõng alawa aneeta.”
10 Ẽdẽcĩ Yesu ethei ne, “Nyẽhẽ ĩcannĩ Thĩttan!g Eheeddi Nyaragawa ĩcĩ Nyekuco athĩ ne, ‘Laa Makayyioit Nyekuc cunni, ĩthõng iticanothiwu ĩnõõnõ dõ.’ ”h
11 Ngaatĩ ũũngnĩcẽ alaanĩ cĩ ririwanĩn cĩk gerthek ẽẽ, Yesu, ĩthõng ivitia ellia anjĩlẽta ĩnõõnõ.
Ithianaĩ Yesu tiic cĩnnĩ
(Bẽl Marĩkõ 1:14-15; Luka 4:14-15)
12 Ma balna ngĩ ĩthĩrar Yesu ngatĩ arĩwõthĩcẽ Yoanẽ Batithta kĩjana, imiirie nẽ ũũk Galilea. 13 Ma balna ngĩ ũtũngek nẽ Natharẽt, ũũk aavu Kaparnauma ngatĩ abakanõy kĩ bũlũc cĩ loociok cĩk Thebuluni kĩ Navtali. 14 Ngaatĩ akuni ẽnnẽ thõõth wũ Nyekuco dĩdĩ, wũ balna aduwa Ĩthaia eeti cĩ õthõõth molook cĩ Nyekuco ngĩ athĩ ne,
15 “Loociowa cĩk Thebuluni kĩ Navtali, cĩk anũ gõõl
cĩ õkkõ bũlũca tõõna ĩcĩ alibanĩ kõr cĩ Yordanĩ,
Galilea lõõcĩ cĩ eet cĩk athii cĩ ẽẽn Yudei!
16 Niigia eeta cĩk attiyyu muwuratõ wo,
icintu niigia lanyĩt cĩ võõrĩ pẽr.
Eeta neekie aatĩ muwura cĩ daaĩtho ẽẽ,
ũtũkũl lanyĩtĩ ĩnõõgõ.”i
17 Ngaatĩ kõr nĩcẽ, ẽtẽraĩ Yesu ngatĩ irionĩcẽ eet ẽthẽcĩ ne, “Udukta niigia gerthetin cunung, nyatarka aavu kabicocĩ cĩ tammutiddino joonui.”
Ũtũvvũ Yesu wobjiak cĩk owu
(Bẽl Marĩkõ 1:16-20; Luka 5:1-11)
18 Õwõ balna kõr ĩmma Yesu titimma cĩ Bũlũc cĩ Galilea. Ma natẽ, ĩcĩn gõtõõnõk ramma Thimõnẽ cĩ athĩ thar õõgĩ Pẽtũrũ, cĩ athĩ gõtõnĩ thar Anderiya. Atdukeei balna nẽẽgẽ nyeritie bũlũcatõ, nyatarka balna ẽẽn nẽẽgẽ eet cĩk agam kulugua. 19 Ngaatĩ ẽthẽcĩ Yesu ĩnõõgõ ne, “Õwõbtahangũ aneeta, ĩthõng katĩ kaanyung na ĩĩtõ eet cĩk agamnyu eeta kĩcĩ agamnyu kulugua.” 20 Ma tamanoko, ũtũngtek nẽẽgẽ nyeritienya cĩgĩk, ĩthõng owobit ĩnõõnõ.
21 Ma baa ngaanĩ õwõ Yesu natẽ noko, ĩcĩn Jemith kĩ Yoanẽ wũk ẽẽn gõtõõnõk, ngĩ adĩmaneei nyeritienya cĩgĩk kovowolatõ kĩ baatĩnnĩ cĩnĩng Thebedeo. Ngaatĩ avaanĩ Yesu ĩnõõgõ buu. 22 Ma tamanoko, ũtũngtek nẽẽgẽ vẽlẽk kĩ baatĩnnĩ buu kovowol, ĩthõng owobit Yesu.
Anyĩk Yesu mooryiak kũbũnta
(Bẽl Luka 6:17-19)
23 Õwõyyĩ balna Yesu looc cĩ Galilea vẽlẽk aliman eet Ciithẽnẽy cĩk Lawintiak,j ĩthõng irion Nyemut cĩ Abũnnak cĩ kabicoc cĩ Nyekuco, ĩthõng naboo anyi eet cĩk ĩmmõrĩ moorithiok cĩk aatĩ mĩn mĩn kũbũnta. 24 Ma balna ikiyyia athanothĩk nyemut cĩnnẽ looc cĩ Thiiria vẽlẽk, ngaatĩ ayahacĩ eeta ĩnõõnõ eet cĩk ĩmmõrĩ moorithiok cĩk aatĩ mĩn mĩn. Eyehiay balna eeta cĩk ẽcẽrẽt eleeti kĩ cĩk ayak ririwanĩn cĩk gerthekl kĩ cĩk uuki nabangkara looc kĩ cĩk alalaniay thoona, ngaatĩ ẽẽlanẽ Yesu ĩnõõgõ vẽlẽk kũbũnta.
25 Õwõb balna ĩnõõnõ meelitini cobbi õrrõt. Avvu balna gwuak looca ĩcĩ Galilea, korookjiowẽy ĩcĩk gaalawu cĩk ẽẽn õmmõtõ cĩk avwũẽ athĩ Dekapolith, ĩthõng ivitia gwuak Yeruthalẽma, Yudea kĩ vatĩk cĩk aatĩ titimma tõõna cĩ Lĩĩl cĩ Yordanĩ.