Kerenniok cĩk ẽgẽẽnyĩ
2
Ẽẽn balna Ẽrõõdĩ alaana erkita cĩ aritianĩ Yesu ẽẽ, Bẽtẽlẽhẽma looca cĩ Yudea. Ĩthõng wathinniowẽy nĩĩkẽ, ivitia eeta gwuak cĩk ẽẽn geenyiak cĩk avvu ĩcĩ tõõn cĩ alibanĩ kõr Yeruthalẽma. 2 Ivitia balna ijinit geenyiaha neekie eet cĩk Yudei entek ne, “Aavĩ doolec wũ balna athĩ ne, arittiay kĩĩ Alaan cĩ Yudei wo ngatdang? Kacĩnna balna cooboc cĩnnĩ tõõna ĩcĩ alibanĩ kõrra, ĩthõng yoko kavvunna kathĩnna ne, kalayyia ĩnõõnõ.”3 Ma balna ngĩ athĩrar alaanĩ Ẽrõõdĩ thõõth coo ketee wo, ikiyyia abarrit thĩnĩn cĩnnẽ õrrõt kĩ eet cĩk Yeruthalẽmĩ vẽlẽk. 4 Ma natẽ, ikiyyia ũtũvvũwa Ẽrõõdĩ makayyiok cĩk paadĩrnyawu kĩ limanniok cĩk Ngiran cĩ Mutha,b ĩthõng ijin ĩnõõgõ ethek ne, “Arittiay Kiristo ngatdang?” 5 Ẽdẽcĩ nẽẽgẽ ĩnõõnõ ethei ne, “Arittiay nẽ Bẽtẽlẽhẽma looca cĩ Yudea, kĩ balna ngĩ ẽhẽẽd eeti cĩ õthõõth molook cĩ Nyekuco athĩ ne,
6 “ ‘Niia Bẽtẽlẽhẽmĩ lõõcĩ cĩ Yudaa,
athii niia cĩ eeni dĩc õrrõt makayyiowẽy ĩcĩk Yudaa.
Aku katĩ eeti cĩ ẽẽn alaan õlõõ cĩ gaalawu cunung wo.
Ẽẽn katĩ nẽ tũwayyioit cĩ eet cĩganĩk cĩk Ĩthraĩlĩ.’ ”c
7 Ngaatĩ õwõdanĩ Ẽrõõdĩ eet cĩk ẽẽn geenyiak cĩk avvu, ĩthõng ijin itin cĩ balna alibacĩ ĩnõõgõ mũnyũnyõcĩ wo. 8 Ma natẽ, itionĩk ĩnõõgõ Bẽtẽlẽhẽma ethei ne, “Õõt da idiimit doolec cĩ dĩcĩ nĩcẽ, ĩthõng mĩ ummudiawu, ivitiawu uduktahangũ, kĩĩ katĩ kũũk kala na buu ĩnõõnõ.”
9 Ma balna ngĩ ĩthĩraritõ geenyiaha neekie thõõth cĩ aduwa alaanĩ Ẽrõõdĩ wo vẽlẽk, ivitia ũtũngtek ĩnõõnõ ngaatĩ õvõyyĩ. Uwuantẽcĩ balna ĩnõõgõ mũnyũnyõcĩ cĩ ẽdẽnya nẽẽgẽ tõõna cĩ alibanĩ kõr ẽẽ, kũũk kĩbĩl nginiwa ĩcĩ balna aavẽ doolec ẽẽ. 10 Ma balna ngĩ acĩn nẽẽgẽ mũnyũnyõc nĩcẽ wo, ivitia ebelbelit nẽẽgẽ õrrõt.
11 Ma baa ngĩ õvvõ nẽẽgẽ ciitha nĩcẽ, ĩcĩnĩt nẽẽgẽ doolec kĩ yaatĩnnĩ Maria natẽ, ngaatĩ akanẽcĩ kuthungti, ĩthõng alaacõ ĩnõõnõ. Ma natẽ, ĩdĩmta anyintiok cĩk ẽẽn daab kĩ mõõcac kĩ mutullu. 12 Ma baa vurtia cĩnnĩ, ikiyyia ĩtĩrĩth Nyekuci eet cĩk ẽẽn geenyiak nĩĩkẽ ngonothintia ethei ne, “Nyĩ amiirenu ovvoyyu ĩcĩ Ẽrõõdĩ naboo.” Ngaatĩ thĩ baa amiirẽnẽ nẽẽgẽ õvõyyĩ gõõla ĩmmanĩ mĩn.
Virẽt cĩ õkkõ Ijiba
13 Ma baa vurtia cĩ ootti eeta cĩk ẽẽn geenyiak ẽẽ, ikiyyia ilibak anjĩlõ cĩ Makayyiokto Yothẽbõ ngonothintia ethek ne, “Tĩnga taman! Viri doolec kĩ yaatĩnnĩ bĩtĩ Ijiba! Avvua natẽ kuumuc gii ngĩ kuduwai na aniitia kõr cĩ katĩ õbõdanẽ, nyatarka ẽrẽpan Ẽrõõdĩ doolec adiim ngĩ aruk ĩnõõnõ.” 14 Ngaatĩ thĩ balna ĩngannĩ Yothẽbõ baalin nĩcẽ noko, ĩthõng iviri doolec kĩ yaatĩnnĩ ũũwĩ Ijiba, 15 nginiwa wũ balna õvvõ aatẽ nẽẽgẽ kuumuc gii baa ngĩ adaak Ẽrõõdĩ. Ngaatĩ aku ẽẽn thõõth dĩdĩ wũ balna aduwa Makayyioiti eta cĩ õthõõth molook cĩ Nyekuco athĩ ne, “Kũtũvũwa na ngẽrnanĩ cannĩ kẽtẽẽha ngatĩvõrĩ Ijiba.”d
Uruk Ẽrõõdĩ lõgõõ cĩk kĩdĩk cĩk maacĩk
16 Ma balna ngĩ ũmũda Ẽrõõdĩ ngatĩ ĩgõõlĩ ĩnõõnõ eeta cĩk ẽẽn geenyiak ẽẽ, ikiyyia avarac õrrõt, ngaatĩ baa aduwacĩ nyĩcẽkẽr cĩgĩnĩk kuruit dõõlĩ cĩk kĩdĩk cĩk maacĩk, cĩk aatĩ Bẽtẽlẽhẽma kĩ cĩk õjõõntĩ Bẽtẽlẽhẽma vẽlẽk, cĩk ẽẽn erkinya cĩgĩk ramma kĩ cĩk ngaanĩ arittiay jõr. Adĩman balna nẽ thõõth wũ baa aduwaai geenyiaha ĩnõõnõ. 17 Ngaatĩ akuni thõõth wũ baa aduwa eeti cĩ õthõõth molook cĩ Nyekuco Jeremiae ngĩ ẽẽn dĩdĩ wũ baa athĩ ne,
18 “Athĩrar eeta ulua cĩ alue ngaay,
õlõõ cĩ gaalawu cĩ Raama
ulua kĩ wuciith cobbi õrrõt,
alu Racẽlĩf dõõlĩ cĩgĩnĩk,
ĩthõng abũrĩ nẽ ngatĩ amanymanyanini,
nyatarka igiiryiay doolia cĩgĩnnẽk ithiicõ mukukuk.”g
Imiirie Yothẽbõ ũũk Natharẽta
19 Ma baa ngĩ adaak Ẽrõõdĩ, ikiyyia ilibak anjĩlõ cĩ Makayyiokto Yothẽbõ ngonothintia balna ngaanĩ aavĩ nẽ Ijiba, 20 ĩthõng ethek ne, “Tĩnga miirõĩ doolec kĩ yaatĩnnĩ bĩtĩ looca ĩcĩ Ĩthraĩlĩ. Adaaitõ eeta wũk balna adiim aruk doolec.”
21 Ngaatĩ ĩngannĩ Yothẽbõ, ĩthõng ũũwĩ doolec kĩ yaatĩnnĩ looca ĩcĩ Ĩthraĩlĩ. 22 Ma balna ngĩ ĩthĩrar nẽ athĩ ne, ĩthĩ ngẽrtĩ Ẽrõõdĩ cĩ athĩ thar Arkilewo alaan cĩ Yudea, ikiyyia õtõngõlẽ nẽ ngatĩ õkõyyĩ looca cĩ Yudea. Wũ baa aku aduwaai ĩnõõnõ Nyekuci thõõth ngonothintia kũũk looca cĩ Galilea. 23 Õõt balna nẽẽgẽ abaaitõ õlõõ cĩ gaalawu ĩcĩ Natharẽtĩ looca cĩ Galilea. Ngaatĩ aku ẽẽn thõõth cĩ Makayyiokto dĩdĩ, wũ baa aduwa eeta cĩk õthõõth molook cĩ Nyekuco athĩ ne, “Avvũ katĩ eeta ĩnõõnõ a ne, et cĩ Natharẽtĩ.”