Anyĩk Yesu et cĩ alalaniay ẽlẽ kũbũna
2
Ma balna vurtia cĩ wathinniok cĩk kĩdĩk,
ikiyyia thĩ balna imiirie Yesu ũũk ĩcĩ kõrõõk cĩ gaalawu cĩ Kaparnaumi,
athĩrar balna eeta athĩ ne,
aavĩ nẽ õlõõ.
2 Ma thĩ balna ivitia ũlũngantiay eeta cĩk meelĩk kĩbbĩtĩt katũk kõdõlanit ngĩtĩvõrĩ,
kithii ngĩtĩ uungnothi.
Ma baa thĩ natẽ ikiyyia ilimanek Yesu ĩnõõgõ thõõth cĩ Nyekuco.
3 Ma natẽ ilibtiak eeta cĩk ẽẽn wec cĩk õdõnga et cĩ awuli batana.
4 Adĩccẽ balna ĩnõõgõ gõõl cĩ õdõlanĩ Yesu,
nyatarka meelitin cobbi ẽẽ,
ĩthõng ivitia otodit nẽẽgẽ ciith,
ĩthõng õõt ĩbooritõ ciith tiddinaa ngatĩ aavẽ Yesu kir.
Ma balna thĩ ngĩ ĩbooritõ nẽẽgẽ ciith vẽlẽk, ivitia itionta nẽẽgẽ et cĩ ĩmmõrĩ ẽẽ, batana kĩdĩĩc kõdõlan looc ngatĩ aavẽ Yesu.
5 Ma thĩ balna mĩ acĩn Yesu leminit cĩnĩng wo,
ikiyyia othoothĩk et cĩ ĩmmõrĩ wo ethek ne,
“Ngẽrnanĩ,
ithiicõ thoothonniowa cĩk gerthek cugunniek ĩcunni.”
6 Aatĩ balna limanniowa gwuak cĩk Ngiran cĩ Mutha loota natẽ,
ĩthõng ahadit nẽẽgẽ dõ eletinẽy cĩgĩk mĩn athĩ ne,
7 “Nyia cĩ õthõõth eeti coo ketee wo?
Ẽẽn coo dacinet kĩ Nyekuc.
Ngẽnẽ gõõ cĩ woccia ẽnyẽẽĩ thoothonniok cĩk gerthek?
Nyekuc dõ cĩ ẽnyẽẽĩ!”
8 Ma balna thĩna ikiyyia aga Yesu muwẽẽnĩt cĩnĩng wo tamanoko,
ĩthõng ijin nẽ ĩnõõgõ ethek ne,
“Ahaddu niigia thoothonniok nĩĩko nyia?
9 Thõõth jang cĩ obokci cĩ kẽnẽcĩ et cĩ ĩmmõrĩ wo ne,
‘Ithiicõ thoothonniowa cugunniek cĩk gerthek ĩcunni,’
kõdẽ cĩ kẽnẽcĩ ne,
‘Tĩnga,
nyũm batan cunnio bĩtõ?’
10 Ĩthõng thĩ,
kĩĩ thẽk agaac niigia ngatĩ ayaĩ Ngẽrtĩ Eetob makathĩt cĩ ẽnyẽẽĩ thoothonniok cĩk gerthek loota ngato.”
Ngaatĩ thĩ aduwacĩ Yesu et nĩcĩ alalaniay ẽlẽ cĩnnẽ ẽẽ, ẽthẽcĩ ne,
11 “Ketheci na aniitia ne,
tĩnga jiena,
nyũm batan cunnio bĩt ĩcolu.”
12 Ma natẽ noko,
ĩtĩnga eeti neccie bẽrẽnĩy ĩcĩk eet vẽlẽk,
ĩthõng ũnyũm batan cĩnnĩ ẽẽ,
ĩthõng ũũk ngatĩvõrĩ.
Utubuan balna thõõth coo eet vẽlẽk. Ĩthõng ivitia ĩdĩhĩthĩt nẽẽgẽ Nyekuc õrrõt ĩĩtõ ne, “Cĩ gõõ nga kĩcĩnta thõõth cĩ õgõõn ketee kũdũt!”
Ũtũvvũ Yesu Levi
13 Ma thĩ balna naboo ikiyyia imiirie Yesu ũũk ĩcĩ titim cĩ Bũlũc cĩ Galilea,
aku balna meelitini cobbi õrrõt alutiai ĩnõõnõ,
ngaatĩ ẽtẽrẽhanĩ nẽ alimanĩ ĩnõõgõ.
14 Ma baa nga õwõ nẽ,
ẽdẽnya Levi ngẽrtĩ Alivewo,
aavĩ loota ngatĩ adũmanĩ eeta mũcũrrũ.
Ngaatĩ thĩ ẽthẽcĩ Yesu ĩnõõnõ ne,
“Wõba aneeta,
kĩĩ katĩ ĩthĩ wobjiait cannĩ!”
Ma thĩ balna natẽ, ĩtĩnga Levi õwõb ĩnõõnõ.
15 Ma balna vurtia cĩ uduktõy Yesu kĩ wobjiak cĩgĩnĩk õlõõ cĩ Levi.
Aduwue balna eeta cĩk alũt mũcũrrũc kĩ eet cĩk ẽẽn gẽrẽthanniok buu natẽ,
nyatarka mẽẽlĩ balna eeta õrrõt cĩk õwõb ĩnõõnõ.
16 Ma balna ngĩ acĩn limanniowa gwuak cĩk Ngiran cĩ Mutha cĩk ẽẽn Varithei,
ngĩ aduwue nẽ kĩ gẽrẽthanniok kĩ eet cĩk alũt mũcũrrũ.
Ivitia ijinit nẽẽgẽ wobjiak cĩgĩnĩk entek ne.
“Nyia kuduktõy nẽ kĩ eet cĩk alũt mũcũrrũ kĩ gẽrẽthanniok wo?”d
17 Ma baa mĩ athĩrar Yesu thõõth coo wo,
uduwak nẽ ĩnõõgõ ethek ne,
“Athii eeti cĩ abũnna cĩ adiim akĩĩm,
ĩthõng thĩ,
et cĩ ĩmmõrĩ dõ cĩ adiim ĩnõõnõ.
Athii balna na cĩ kakuni, nyatarka eet cĩk edeemi thoothonniok kakuni na, nyatarka eet cĩk gerthek.”
Jinẽnĩt cĩ thõõth cĩ kẽdẽthĩ eleeti daintia
18 Ẽdẽẽth balna wobjiaha cĩk Yoanẽ Batithta kĩ eet cĩk ẽẽn Varithei eleeti daintia.
Ma baa kõr ĩmma ivitia eeta gwuak ijinit Yesu entek ne,
“Nyia wobjiaha cĩk Yoanẽ kĩ wobjiak cĩk Varithei kedethitõ eleeti cĩgĩk daintia wo,e
ĩthõng thĩ, aavutõ wobjiaha cugunniek ĩnĩnga ẽdẽẽth eleeti wo?”
19 Ẽdẽcĩ Yesu ĩnõõgõ ethei ne,
“Athii gõõnõgĩ nyẽtẽranit cĩ maacĩ wo cĩ ẽdẽẽth eleeti daintia,
katĩ mĩ nga arũmẽ nẽ kĩ ĩnõõgõ? Athii nẽẽgẽ cĩ ẽdẽẽth eleeti cĩgĩk katĩ ngĩ arũmẽ nẽ kĩ ĩnõõgõ.
20 Ĩthõng thĩ, aku katĩ kõr ĩmma cĩ adĩmẽnĩ nyẽtẽranti cĩ maacĩ ĩcĩnĩng, ĩthõng katĩ edeethito nẽẽgẽ eleeti kõr nĩcẽ.
21 “Athii eeti ĩmma cĩ woccia awubei cẽrẽm cĩ jõr cẽrẽma cĩ atangany tõ.
Ma ngĩ uwubek,
ẽrrẽc katĩ cẽrẽm cĩ jõr cĩ atanganya,
ĩthõng ĩtooryi katĩ recinetĩ neccie kĩĩ maka.
22 Ĩthõng athii eeti cĩ woccia adũddei mẽrtẽ cĩ jõr buruwa cĩ ũnũũk tõ,f
mĩ ũtũdũdek,
upuan kẽnnẽ katĩ mertia buruwi nĩcẽ kathaanẽ kũũk twua kirik.
Abũnna ngatĩ adũddei nẽ mẽrtẽ cĩ jõr buruwa cĩ jõr.”
Makayyioit cĩ Kõr cĩ Yuwuthono
23 Aavĩ balna Kõr ĩmma cĩ Yuwuthono,
cĩ irioĩ Yesu kĩ wobjiak cĩgĩnĩk abaakci manẽẽnĩy ĩcĩk labinu.
Ma balna wueeta cĩnĩng wo,
abacuyyia wobjiaha cĩgĩnnẽk koo labĩ õõgĩ.
24 Ma natẽ ivitia ijinit Varithei gwuak Yesu,
entek ne,
“Cĩn da,
nyia kĩdĩmanit wobjiaha cugunniek koo gii cĩ angiranni Kõrra cĩ Yuwuthono wo?”
25 Ẽdẽcĩ kẽnnẽ Yesu a ne,
“Nga wõnõ ebelit niigia thõõth wũ balna adiimi alaanĩ Davideg dainit,
kĩ eet cĩgĩnĩk kõr wũ balna adaĩ ĩnõõgõ boobo?
26 Aavu balna Davide,h
ĩthõng ittio Ciith cĩ Nyekucoi wathinniowẽy wũk balna ẽnnẽ Abiatharĩ paadĩr cobbi.
Ĩthõng ũũk uduk dainit cĩ agatanẽ vẽlẽk,
cĩ baalia aduk paadĩrnya dõ, ĩthõng ikiyyia nẽ aanyĩk ĩmma eet wũk balna arũmẽ kĩ ĩnõõnõ.”