KAYTAKU KUGABUTAKU KA PAWLU AŊIICUM BE BATA
TIMOOTIW
Hûcukumahu hata kayta'uke
Ûde kaytaku kûbanumaku ka Pawlu aŋiicum be bata Timootiw. Nownu annahaanaw aaneyim Neeru âlhapitum noon oo aganom âyyaw di etaamay yata Rooma, ña ya abuu'no bûynenaabu. Nownu Pawlu oo ma awalhenim'ban di ekullhay yata Rooma da kukullhom, ban ujaañaw upiyowut nkit di kukullhool joon, moo deeli kaan di êsukay yata Trowas (1 Tim 4:13). Na agam omu di ekullhay ma akobem di eketay, ña naŋiicumuu'dô kûcecenaku lhay be bata añoolool ata di kâynenaku aamom Timootiw. Ma aanool, alhikiten elobay yata Emitay bukanaku kagam kalhegenumaayaku kaalim poop kulhikiten bukan kaaku, di êsukay yata Ephesu (2 Tim 2:2). Pawlu buko di kupaalool ya kucookoor poop ûngungaw ban ya kunon'wo ma keeli kubaj kuri, etaŋ yaayu ya awalen bugoroora'ubu ma kuga ûyegetaw watayiil peh di bugoroorabu peh bata jañaaŋenaju jata elobay yata Emitay (Bag 18:3-5). Di kayta'uke (2 Tim 2:3-6) nâanul Timootiw aga to hûkuwahu hatawool di hûtiikahu ha oomaam di ho di buruŋabu bata Emitay, ma aanool aga jaa umu, Emitay mbi ewulool wahaw wata huriyahu. Ban Pawlu nâkin poop ma Timootiw aga non êpitik yâwajulim yabaam wahaw wajakaaw bi ata yo âgoroorum (2 Tim 2:21). Nâyis poop kaan hûlaamahu hôhareesewuum (1 Tim 3:1). Ban naanool poop anken di balhikitenerabu balhegenumaayabu bata elobay yata Emitay (2 Tim 3:14-17).
Be Pawlu, palimo ma alakonom di hûlaamahu be âkoliit eketay mata nâmire di kaan Emitay yoyu d'oo ma yeeliye ewulool sembaasu (2 Tim 4:17). Moo, ûmirutaal mante Timootiw nakaykayum be Rooma bala Pawlu abuji. (Ebr 13:23) di êyis di kaan, Timootiw nakullhikullhim poop ban nawallheni. Di uytaw wapiyaaw di îyis poop kaan oo agam âtekenaaw ata êgrisiyaay yata Ephesu, be na piyom, ban di kubujool.