2 Timootiw 3

Kukaku kûbanumaku

Timootiw, ûmir kaan di kukaku kûbanumaku hûlaamahu hôhareesewuum, 2 mata bukanaku mbi kuhaŋ nanongoor keb matayiil, di kungoŋuten, di kure hubirik, di kugawooro, di kuga bukanaku kâlobikoorem, di kuga bukanaku kâjamoriitum di kubajayiil, di kuga bukanaku kâsuumutum kaga jak, ban keetubi kûkin kunongoor mata Emitay. 3 Di kuga bukanaku kâkinoriitum bukan, kâñankiitoriitum bukan, kasoosenem bukan, di kûhaah bukan, di kules bukan, ban poop sûumoriitiil wah wajake. 4 Di kuga bukanaku kaŋoonem bukan, di kûjamaati, di kuga poop bukanaku kagawooruwem. Ban mbi ya kulat kajam wahaw wata Emitay, ma kuhaŋ mâkin mâsuumaamu mata etaama'uye. 5 Ban poop mbi ya kuga non di buruŋabu bata Emitay kemmi, be ban mbi kulat sembaasu sata bo. Moo, ûrangi bukana'uku. 6 Ban kaaku kata di buko, ya kunebej di siluupasu ma kubunten yaaraay ka ûyegetaw watayiil ulelum, ma siniilasu satayiil ya sigawiil kuga wahaw peh wajakutaaw, ma ya kulo di kûbajumiñaku. 7 Ban yaaraa'uyu ya kûkin ma kûmir wah, be ban kûbajoriit kanamulenaku kalhegenumaayaku. 8 Non ma Janis, koo di Jambres, ya kuhuusuum taate Moyses, moomu poop kaŋ ma bukana'uku kuhuusulem malhegenumaayamu ma keetukanamulen, di kukajen kâynenaku katayiil. 9 Bukana'uku hunongahu hatayiil hûriiŋoriit takeel, mata ya kûmanjuneni mata bûnuutaabu batayiil non ma Janis, koo di Jambres kuganom.

Pawlu nasal Timootiw

10 Be aw nûmire jak balhikitenerabu bûmbaam, di bagawerabu bûmbaam, di banongerabu bûmbaam, di kâynenaku kûmbaam, di maama imuntenem di bukan, di maama îkinem an, di maama ijummi tir di buruŋabu, 11 di poop maama bukanaku kutiikommi ma kûlaamenom. Aw nûmire wahaw peh wa kugawommi di êsukay yata Antiyokiya, di yata Ikooniw, di poop yata Listra, ma kûlaamenom bo, be Ata Emit namelhenom. 12 Malhegen bukanaku peh kâkimmi kuga jak non ma Kristu Jesus âkimmi, mbi bukanaku kûlaameniil. 13 Mata bukanaku kâlhapitaaku, ban di kugugujoor, mbi kuhaŋ mâgawikoor ma ya kubunten bukanaku, be bukan kaaku poop, mbi kubunteniil. 14 Moo, Timootiw, onken ma usoh wahaw wa ulhikitemmi ban, waamom wa ûynemmi, mata aw nûmire jak anaw alhikiteniwom. 15 Mata aw di aŋilaw, nûmiraaliye Baŋiicerabu Bâñoyyaabu, baalim buwuli majaalhaamu ma upak, mata ma ûynemmi Kristu Jesus. 16 Mata Baŋiicerabu Bâñoyyaabu peh, Emitay êbaahubom bukanaku, moo bujake be jalhikitenaju, di jawaŋaju, di jacecenaju, di poop jayaraju jalhegenumaayaju jata bukanaku; 17 ma mbi anaw ata Emitay, aga anaw alhegenumaayaw, âwoosim kaga bugoroor peh jak.