KAYTAKU KÛTIYAARAKU KA PAWLU AŊIICUM BE BATA
TIMOOTIW
Hûcukumahu hata kayta'uke
Timootiw oo añool Pawlu ata di kâynenaku kata Jesus, agam âynenaaw ata di grîsiya yata Listra (Bag 16:1-2), aganom annahaanaw alakom di grîsiya yata Ephesu. Oo ajaajuwaw âkoohim jinŋet, ban omu ma âjuutum di eyongay, be ya aga bûyegetabu batawool di wahaw wata Emitay (Phip 2:19-22). Oo anaw a ya kureboorum di Pawlu ma kukay be di bâsuk bameeŋe, oo poop aanenoom ma aŋiic uyit waawu be bata sîgrisiyaasu.
Di uyta'uwe wa Pawlu aŋiicum ûhaajiyaaw uke kugam kûtiyaaraku be bata yahaanay yata sîgrisiyaasu kaamom Timootiw koo di Tiitu. Nownu sîgrisiyaasu ya sîmebooreen di siluupasu sata bûynenaabu. Bûynenaabu kameeŋe kata no kâmeboorem di êsukay yanoray, ya kubaj bispu, aaneyim poop presbiteru agam annahaanaw atayiil. Be Timootiw oo aganom annahaanaw aahu atayiil anamuleneyiim mata bugoroorabu bata Emitay. Pawlu nanamulen Timootiw wah wameeŋe wata mata buruŋabu bata Emitay, non mata wahaw wagawutum walhegenumaayaw walhikiteneyiim mata buruŋabu bata Emitay, di mata bukanaku kaalim kujoti ma kuga yahaanay yata sîgrisiyaasu, di mata jâkinaju jata bancaamabu noon, di mata jasohaju jata jak buhallenaabu di bûkutuwaataabu di poop maama mbi oo Timootiw asoh jak bûyegetabu batawool.