Jilhaw Emitay be bâtooli
3
Moo, kutiyaay, ma îwuñen, neenuul jilhaw Emitay be bâtooli ma elobay yata Ata Emit yeeli ewaasoor cab ma bukanaku kuyaa'yo jak non ma eyabim di tutaru tatawuul. 2 Di jilhaw yo poop ma êpooyoli di bukanaku kajakutum kâlhapitaaku, mata ntuwa bukanaku peh kûynemmi elobay yata Emitay.3 Be Ata Emit oo anaw âynenaayaw, moo mbi awuluul sembe ma apooyuul di Âlhapitaaw. 4 Mata ûli nûynene di Ata Emit di kaan, miwuul magawem di wahaw wa ulobuum, ban poop mbi jenken ma ya jiga wo.
5 Moo, Ata Emit mbi aga di sîsigirasu satawuul ma jinamulen mata jâkinaju jata Emitay, di poop maama Kristu agawem an âlhiŋ.
Anoowan mbi agoroor
6 Kutiyaay, di kañaaŋaku kata Ata Emit aamom Jesus Kristu, noonuul, jîrange kutiyolaal peh kahelekenem, kaleem ma kusoom wahaw wa ulhikitenuum. 7 Mata miwuul jîmire jak maama jeelim jiga non ma ûli ugawem, mata uhelekent di bugoroor na ulakom di tutaru tatawuul. 8 Uriit baabu di an akeel ebeebel, be ya ugoroor tutulay, di busonna di hûlaamahu; ya uga mo, ma aatuba mbi ûlaament an akeel ata di miwuul. 9 Be ntuwa kaan ujoonut uyab wah wakeel wata huri di miwuul, be uga mo ma mbi jeeli jisoollhen bagawerabu bâtooli. 10 Mata na ulakom tanor di miwuul, moo nulobuum oonuul: Anaw alatum bugoroorabu, aatubi ari poop.
11 Moo, jijuu'jaa nulobuum ume, mata nujame kaan bukan kaaku kata di miwuul, ya kuheleken ma kulat bugoroorabu, ban ya sûumiil kunebej di silobasu sa kuleem di so. 12 Momakiimom di kañaaŋaku kata Ata Emit, ûli noone bukana'uku, kubeb ma kugoroor ma keeli kuwulooro kuri.
13 Be miwuul kutiyaay, aatuba jigay kaga jak. 14 Be anaw alat jaa elobay yaŋiiculim di kayta'uke, di jijiker anaw umu jak, ban di jîrangool ma mbi apuño. 15 Be eenutuul jigawool non âsuumoorutaaw atawuul, be di jicecenool non atiyuul.
Elobay yâwuñenumay
16 Moo, Ata Emit akiim kâsuumaayaku, mbi awuluul ko di wahaw peh be nanoonan, ban na alako di miwuul peh.
17 Înje Pawlu ijaalhenuum di baŋiicera'ube ba iŋiicum di uŋenaw wûmbaam; mata ûde êmanjumay yata uytaw peh wa iŋiicem; mo ma iŋiicewom.
18 Moo, kañankiitaku kata Ata Emit atoolaal aamom Jesus Kristu, di kulako di miwuul peh.