Âlhapitaaw mbi âkayil
2
Kutiyaay, moo, mata bûlaañulabu bata Ata Emit atoolaal aamom Jesus Kristu ma nki upamaal d'oo, nilhawuul eenuul, 2 aatuba ûyegetaw watawuul uga gûulhaguulh, aatuba jiwolho poop mata kûboñ kakeel, palimo elob yakeel, palimo kayit kakeel kanaamoore di waawu wâtooli, kaloom di kaan Hukahu hata Ata Emit hûriiŋe. 3 Aatuba jiwaa'bo poop ma an abuntenureruul. Mata huka'uhu heetubi hûriiŋ, bukanaku koo bâtiiwowut Emitay, ban nkit anaw umu âlhapitaaw najuki, aamom añuurim be di sambun sâbaworiit. 4 Mata anaw umu mbi atiik wah peh waaneyim Emitay, di poop wah peh wâbinkeneyim; poopii nanebej di eluupay yata Emitay ma aleeho dô ma âanul oo Emitay.5 Kama jiwolhowut di kaan, înje moo ya ilobuum na ulakuwaam tanor? 6 Moo, jîmire wahaw wamindenoom, ma aatuba ajuki mowme. Be na mbi hukahu hûriiŋ, âlhapitaaw umu mbi ajuki. 7 Malhegen mâlhapitamu matawool mâñoorom momu ban ma mugoroorem; moo, omu ma akobem na mbi anaw amindenoom âcaalheni to. 8 Ban âlhapitaaw umu mbi ajuki, ña Ata Emit aamom Jesus Kristu, mbi abujumool huyiihahu ha mbi hûcaalhumul di butumabu batawool, ma akajenumool di majaaŋaamu ma mbi âkayil di mo. 9 Moo, âlhapitaaw umu mbi âkayil di sembaasu sata Esatanaay, ban mbi aga sîmanjumasu, di miñamu lhay mata sembaasu, magawutum malhegen. 10 Mbi aga wah wameeŋe wajakutaaw âbuntenum bukanaku ka mbi kunep, mata ma kulatum jâkinaju jalhegenumaayaju ja mbi jipakeniil. 11 Momakiimom ma Emitay êboñumuliim sembaasu sata etilimbenay ma sigawiil kûynen di mûcalamu, 12 ma mbi buko peh kulesi, mata ma kulatum kâynen malhegenumaayamu, ma kuhaŋ mâkin kûbajumiñaku.
Jisoh jak kâynenaku
13 Moo, kutiyaay, ûli mbi ya usal Emitay nanoonan matawuul, mata ma Ata Emit âkinuum. Mata Emitay ejotuum noo di hûcukumahu di sembaasu sata Buynum Bunapaabu, ma jiga bukanaku kanapaaku, ma mbi jeeli jipak mata kâynenaku kalhegenumaayaku ka jeekum. 14 Mata mo ma Emitay êwoolumuum hurim elobay yâsuumaay ya uñaaŋenuum, ma mbi jeeli jêemi di majaaŋaamu mata Ata Emit atoolaal, aamom Jesus Kristu. 15 Moo, kutiyaay, jijuum tir ma jisoh wahaw wa ûli ulhikitenuum di baloberabu bâtooli, di poop waawu wa uŋiiculuum di uytaw.