KAYTAKU KUGABUTAKU KA PAWLU AŊIICUM BE BATA GRÎSIYA YATA
TESALOONIKA
Pawlu nasaap grîsiya yata Tesaloonika
1
Înje Pawlu, ûli di Silvanu, di Timootiw, uŋiiculom kayta'uke be bata kûtiyoli kata grîsiya yata Tesaloonika, yagam yata Emitay, yagam Ampawolaal di Ata Emit atoolaal, aamom Jesus Kristu. 2 Moo, nûkine ma Emitay yagam Ampawolaal, di Ata Emit atoolaal, aamom Jesus Kristu ewuluul kañankiitaku, di poop kâsuumaayaku kata yo.Batalenabu ba mbi bugawi di hûbanumahu
3 Kutiyaay, malhegen ûli ya oon Emitay jêrejep nanoonan matawuul, mata ûli nujuke kaan jake ma uga ume, mata kâynenaku katawuul koku ma jikoobenem, ban poop jâkinooraju ja jîkinoorum joju ma jibaŋenooruwem hukoohuk. 4 Momakiimom ma ûli usalumewuum di sîgrisiyaasu sata Emitay mata kâynenaku katawuul, di poop maama jijummi tir di hûlaamahu, di poop buhiiraabu ba jimuntemmi di bo.
5 Mata wahaw uwu ûyisum kaan, batalenabu bata Emitay bucole, mo ma êysumuum kaan miwuul jijoone jiga bukanaku kata di kâyyaku kata yo, momakiimom ma jêemummi di hûlaama'uhu. 6 Moo, Emitay mbi ega wahaw wacolum, ma ega hûlaamahu hulo di bukanaku kammi ma kûlaamenem di miwuul. 7 Moo, miwuul jammi di hûlaamahu, Emitay mbi ehepulenuul di manor d'ûli na mbi Ata Emit aamom Jesus, âcaalhul hatiya di emitay di kumalaku katawool kata sembaasu, 8 di sambunasu sâluwem be jalesaju jata bukanaku kalatum Emitay, di poop kaaku kalatum kajam di elobay yâsuumaay yata Ata Emit atoolaal aamom Jesus. 9 Mata mbi kulesi ma kûjimeni be nanoonan, ma kulako râagi Bagawerabu Emit, di poop majaaŋaamu mata sembaasu satawool. 10 Malhegen mo ma mbi ga na mbi Ata Emit âkayil ma bukanaku peh katawool kanapaaku kusalool, kaaku poop kâynenoom di kûbinkenool. Miwuul poop mbi jêemi di buko huka'uhu, mata ma jîynemmi elobay yatawool ya uñaaŋenuum.
11 Momakiimom ma ulhawumem Emitay yatoolaal hukoohuk be batawuul, ma egawuul bukanaku kajommi di eroŋay ya êwoolumuum be bata yo; di egawuul ma jiga wahaw peh wajakaaw wa jîkimmi jiga, di êwuñen poop bugoroorabu bata kâynenaku katawuul, 12 ma kañaaŋaku kata Ata Emit atoolaal aamom Jesus, mbi kusali di miwuul, miwuu'poop di jisali matawool, mata kañankiitaku kata Emitay yatoolaal, di Ata Emit aamom Jesus Kristu.