Asellooraaw alhegenumaayaw ata Kristu Jesus
2
Añoolom, ujuum tir di kañankiitaku ka ubajaam mata Kristu Jesus. 2 Moo, wahaw wa ujammi wa ilhikitemmi kayooŋ bukan kameeŋe, ulhikiten wo poop bukanaku kâynenaayaku, kaalim poop kulhikiten wo bukan kaaku.3 Ban ma ugam asellooraaw alhegenumaayaw ata Kristu Jesus, umunten ma ôomi di hûlaamahu ha emmi di ho. 4 Mata asellooraaw ammi di bugoroorabu bata huselloorowutaahu, ya âkin aga annahaanaw atawool ma âririgen d'oo, ban poop âgaworiit wahaw wa an agawutum aselloora agawem. 5 Moomu poop kaŋ ma âkuuja âyaboriitum bûgaalen oo bacoohent jak non ma kûujem. 6 Awañaaw poop awammi, najoone aga anaw a mbi ayab bûtiyaar di wahaw wa awammi. 7 Moo, uga bûyegetabu batayi di wahaw wa ilobim, mata Ata Emit mbi awuli kanamulenaku di wah peh.
8 Uwollho mata Jesus Kristu ata di êbajoorumay yata David, alhaalellim di kuketaaku non ma elobay yâsuumaay eloom ya iñaaŋenem. 9 Mata, mata jañaaŋenaju jata eloba'uyu yâsuumaay, jojakiimom ma êemummi ume di ekullhay, poopii di kugenkumom kuseelaku non an âlhapite nigawe, be elobay yata Emitay elee'ma egenkim. 10 Momakiimom nîmuntenum mata bukanaku ka Emitay ejotum, ma buko poop mbi keeli kubaj kapakaku kammi di Kristu Jesus, di poop majaaŋaamu mâbaworiitaamu.
11 Moo, eloba'uye ejoone ma êyneni:
“Uketaa'jaa ulaal d'oo, mbi uroŋaa'poop d'oo.
12 Ujuumaa'jaa tir, mbi ulakuwaal poop di manor d'oo di kâyyaku katawool.
Ulataawoo'jaa, oo poop mbi alatolaal.
13 Ugawutaa'jaa bukanaku kâynenaayaku, be oo anaw âynenaayaw,
mata mumulet bi alatooro.”
Agorooraaw alhegenumaayaw
14 Moo, uwolheniil elobay uyu, nulobiil poop salh kayooŋ di Emitay, ma ooniil kujaamo bûñoosoorabu bata silobasu sajakutaasu, mata ya bukajen bukanaku ka mbi kujam bo. 15 Nuga sembe ma mbi uga agorooraaw a Emitay êririgenem d'oo, nuga poop anaw agoroorem jak abajutum makeel maalim mugawool apuño, aalim añaaŋen jak elobay yata malhegenumaayamu. 16 Nujaamo poop silobasu sajakutaasu sata ube di etaamay, mata bukanaku kâamiyem di so, ya sigawiil kûrangi Emitay. 17 Mata wahaw wa kulobem, ya uwaasoor non yaak yagawem reeñareeñ. Bukana'uku, Imenew, koo di Philetu, kata di buko. 18 Kôkacaam di buruŋabu bata malhegenumaayamu, ma ya kêenul jalhaalaaju jata di kuketaaku jihullhe ban, ma kûguulh kâynenaku kata bukan kaaku. 19 Be Emitay yoyu ma ejuumemmi hutandahu haaliitum hûyikijeni, ban di ŋiici dô eloba'uye: “Ata Emit nâmire bukanaku katawool.” Di ŋiici dô poop kaan: “An peh âwoolem Ata Emit, mbi ârang kûbajumiñaku.”
20 Mata di eluupay yagam yâamak, lâkuworiit dô keb muraataamu mata ûuru, di mata praata, be ya lâko dô poop maamu mapalhim, di maamu mateepim. Ma maamu mbi mugoroorumi tiŋatu tajakaatu, maamu be tiŋatu ta jakutum jak. 21 Moo, anaw acookoor jaa bûyegetabu batawool ma ajaamuwoor wahaw uwu wajakutaaw, mbi aga non muraataa'umu mata ûuru magoroorumeyim tiŋatu tajakaatu, mabandoorim bi anaw akiimom âgoroorum bugoroor peh bajakaabu.
22 Nujaamo hûnongikoorahu hata hujaajowutaahu, ma ya uga wahaw wajakaaw, nusoh kâynenaku, nûkin ajamaat, nuga poop kâsuumaayaku di bukanaku peh kâwoolem Ata Emit di ûyeget wasete. 23 Nûrangi poop bûñoosoorabu bata bûnuutaabu bata di bukanaku ka sûumeyiim keb bûñakoorabu. 24 Mata agorooraaw ata Ata Emitay, mumulet bi aga anaw ata silob, be mbi aga anaw âkimmi an peh, aalim jalhikiten bukanaku elobay yata Emitay, naalim humunten, 25 ban poop ya acecen sûum bukanaku kâsuumutoom, di kaan ma mbi Emitay egawiil kuwatatenooro, di kumaj poop malhegenumaayamu mata yo. 26 Ma mbi ûyegetaw watayiil uga haa, di kûcaalhul di ekoliŋenay yata diyaabu, yammi ma egenkiim ma egawiil ya kuga non ma yoo êkimmi.