2 Timootiw 1

KAYTAKU KUGABUTAKU KA PAWLU AŊIICUM BE BATA

TIMOOTIW

Pawlu nasaap Timootiw

Înje Pawlu, jagam amakaaw ata Kristu Jesus non ma Emitay êkimmi, ja ebommi ma iñaaŋen mata eroŋay ya yemmi mbi ewul bukanaku mata Kristu Jesus. 2 Înje iŋiiculim kayta'uke be baabu d'aw Timootiw, jagam añoolom a iboolaatum. Moo, nîkine ma Emitay yaamom Ampawolaal, di Ata Emit aamom Kristu Jesus, awuli kabonketaku, di kañankiitaku, di poop kâsuumaayaku katawool.

Pawlu nalob di Timootiw ma asoh lit

3 Înje ya isal Emitay yaamom ya igoroorem be bata yo, di bûyeget basete non ma simpawom sihaan ya sigam. Momakiimom na ilhaweyom tutulay, di busonna, ya iwollho ma isal yo be batayi. 4 Mata ya iwollho mukulamu matayi, moo nîkine ijuki ma mbi hûririgenahu ha eekum heeli huhaŋ to. 5 Ya iwollho poop mata kâynenaku katayi ma kugam kalhegenumaayaku non kata iñaayi ahaan Loyda, di poop kata iñaayi Ewnisi. Moo, nîynene kaan koku d'aw. 6 Momakiimom ma iwolhenumem d'aw ma usoh lit mâseeliyaamu ma Buynum Bunapaabu buwulem, mammi d'aw na igam uŋenaw wûmbaam d'aw ma ilhaw Emitay ma ewuli mo. 7 Mata yoo êwuloriitolaal buynumabu bata bukoohaabu, be ya ewulolaal buynumabu bata sembaasu, di bata jâkinaju, di poop bata jasohooruwaaju.

8 Moo, aatuba upuño kalob mata Ata Emit atoolaal, di poop mata înje jammi ma ikulhim matawool, be mata sembaasu sa Emitay ewulolaam, umunten ma ôomi di hûlaamahu ha emmi di ho mata elobay yâsuumaay yata yo. 9 Mata yoo epakenolaam, ban di êwoololaal ma ugawaal bukanaku kata yo; be ntuwa mata ma ugawaam wah wakeel wajake. Be ega mo mata hunongahu hata yo, di poop mata kañankiitaku kata yo, ma ewulolaa'ko mata Kristu Jesus kata kaŋ niŋanu bala etaamay êwweni. 10 Moo, mowme kûyisi ban jak mata ma apakenaaw atoolaal aamom Kristu Jesus, akaylom be ube di etaamay, ma âbuy sembaasu sata eketay, ma aŋallolaal majaaŋaamu, di eroŋay yâbaworiitaay mata elobay yâsuumaay.

11 Mata Emitay êjotaaliyom ma iga Amakaaw ata Kristu Jesus, di añaaŋenaaw ata elobay yata yo, di poop alhikitenaaw ata elobay yata yo. 12 Momakiimom ma îlaamumem mata wahaw uwu, be ipuñowut mata wo, mata nîmire anaw a îynemmi. Ban poop nîmire kaan, nabaje sembe ma asoh wahaw wa awulommi ii be nata huka'uhu hûbanumahu. 13 Moo, usoh lit elobay yalhegenumaayay ya ilhikitenim, mata yoo egam êmanjumay be batayi. Onken ma usoh kâynenaku, di jâkinaju jammi d'ulaal mata Kristu Jesus. 14 Mata, hurim Buynumabu Bunapaabu bammi d'ulaal, onken ma usoh husaanuma'uhu ha Emitay ewulim.

15 Ban aw nûmire kaan kutiyolaal peh kata Aasiya kulatolatommi; be kaŋ di Phijelu, di poop Ermojenis. 16 Moo, nilhawe Ata Emit, ma awul kañankiitaku katawool bukanaku kata di eluupay yata Onesiphoru, mata kuk kameeŋe ya âkayil bi âtikenom, bapuñowut ma emmi di ekullhay. 17 Mata na ârillom ûde Rooma, napaamulom be kaŋ na ajukommi. 18 Moo, Ata Emit ajamom ma awulool kañankiitaku katawool di huka'uhu hûbanumahu. Ban poop aw nûmire jak non ma aanenommi di bugoroorabu di êsukay yata Ephesu.