4
Moo, kayooŋ di Emitay, di Kristu Jesus, a mbi aga batalenabu bukanaku karommi, di kaaku kakeem, na mbi âkayil di kâyyaku katawool, 2 onken ma uñaaŋen êsukay elobay yata Emitay, palimo dôo rîituwe, be mante dôo rîitowut, onken ma uñaaŋenii'yo, nuwaŋiil, nuceceniil, nûnikeniil, nulhikiteniil poop di bûyeget bahepe. 3 Mata mbi tîriiŋ na mbi bukanaku kulat kajam elobay yalhegenumaayay, ma sûumiil kajam elobay yâsuumeyiim kajam. Mata mbi ya kûpaamul bulhikitenaabu lhay, ka mbi ya kulhikiteniil wahaw wa mbi ûjaŋayaw watayiil ujam, di sûumiil. 4 Mata mbi kulat kajam elobay yalhegenumaayay, ma kuhaŋ mâkin kajam kûñaaŋenñaaŋen. 5 Be aw aatuba uhaken di wahoowah, numunten poop di hûlaamahu, ma onken ma uga bugoroorabu bata añaaŋenaaw ata elobay yâsuumaay, ma uga bugoroorabu peh ba êwoolim bi uga.Pawlu nalob mata eketay yatawool
6 Be înje, tûmbaam tîriiŋe ban ma ikay, ma hûsimahu hûmbaam hûyuwi non hata encaam yawaasenumi. 7 Be nitiike hutiikahu hajakum, moo nîriiŋe tiŋatu ta mbi îriiŋeen, be ibetut kâynenaku kûmbaam. 8 Moo, mowme ênkuuhaay yata bûgaalabu yata bugalabu bûmbaam bata ma igoroorum jak, bobakobem d'înje, baamom ba Ata Emit agam atalenaaw alhegenumaayaw mbi awulom di huka'uhu. Be ntuwa înje keb mbi iyaa'bo, be, be di bukaaku poop kammi ma kukobem, ma sûumiim huka'uhu ha mbi âlaañumul.
9 Be uga sembe ma ûkayil be ube ma ujukooraal. 10 Mata Demas, mâsuumaamu mata etaama'uye, mugawoo'ban ma abetom ma akay be Tesaloonika. Kresenti, oo nakaye ban be Galaasiya; Tiitu poop, nakaye be Dalmasiya. 11 Ma Lukas, oo ma ammi keb ute d'înje. Be na mbi oon ûkayil, nûkayil di Markus, mata mbi aanenom di bugoroorabu. 12 Mata Tikiku, înje ma iboñoom be di êsukay yata Ephesu. 13 Be na mbi oon ûkayil, nuŋallom humantaahu hûmbaam di eluupay yata Karpu, nuŋallom poop uytaw wûmbaam di êsukay yata Trowadi, be mbi uhaŋ ma ga bûyegetabu batayi di waawu wata ubaŋaw.
14 Alesandri ahaañem, nagawom kôji noon; be Ata Emit, mbi ancaamool wahaw wa agam. 15 Be mbi ujaamuwool, mata nâkuukuum noon, ma akajen elobay ya uñaaŋenaalem.
16 Ban na yahaanay kata êsukay kugawommi batalenabu kâtiyaar, an akeel alakowut to a mbi âamiyorom, be di kuteyom buko peh. Be nîkine ma Emitay etuba erinkiil. 17 Be Ata Emit nâami d'înje ma awulom sembaasu ma ilob elobay yatawool, ma bukanaku kagawutum jûdew kujam yo jak, ban nahikulom poop di utumaw wata sîŋaŋasu. 18 Moo, Ata Emit poop, mbi ârangom wahaw peh wajakutaaw ma aŋarom di kâsuumaayaku be di kâyyaku katawool hatiya di emitay. Kañaaŋaku katawool di kusali be nanoonan. Amiin.
Jasaapaju jîwuñenumaju
19 Nusaapom Prisila, koo di apañoorool Akila, di poop bukanaku kata di eluupay yata Onesiphoru. 20 Erastu nayoogulo Kôrintu, Troophimu, niwalhulool di êsukay yata Miletu ma âjuutum. 21 Be uga sembe ma ûkayil bala kûwaagenaku kûriiŋul. Ewbulu, di Pudenti, di Linu, di Klawdiya, di poop kutiyolaal kaaku, kusaapuli.
22 Moo, Ata Emit, nalako di buynumabu batayi.
Kâsuumaayaku poop di kulako d'aw.