Pawlu nalob mata emiikeelay
6
Bukanaku poop peh kagam emiikeelay kammi di uŋenaw wata bukanaku kakiliim, mbi ya kujam di bukana'uku kakiliim, ma kucookooriil jak, ma aatuba mbi kañaaŋaku kata Emitay, di poop elobay ya ulhikitenem bukanaku erembeeli. 2 Kaaku ka bukanaku kakiliim kugam bûynenaabu, aatuba kusohiil helek mata ma kugam batiyaayabu, be mbi ya kuhaŋ magoroor jak be batayiil, mata bukana'uku ka kugoroorem be batayiil bûynenaabu ka kuboolaatum. Moo, nilhawi ma ulob wahaw uwu, nulhikiten wo poop bukanaku.Pawlu nalob mata husaanumahu
3 Be anaw alhikiten jaa bukanaku elob yaayu yâbutim di yata Ata Emit aamom Jesus Kristu, yaamom ya buruŋabu batoolaal bulhikitenem, 4 anaw umu, anaw agawooruwem, ban âmirut makeel. Mata yâsuumool bûñoosoorabu, di bacecabu bata mata elobay, bâŋarewuum jâsiibuwikooraju, di bûñakoorabu, di jâlobikooraju, di jâynenoorutaju. 5 Di bûŋaruu'poop bûñakoorabu bâbaworiitaabu di tutaru tata bukanaku kaakutum ûyeget, kâloboriitum malhegen, ban ya kunong kaan buruŋabu bata Emitay tiŋatu tata hubajahu.
6 Malhegen buruŋabu bata Emitay tiŋatu tâamak tata hubajahu, be ulaal babajeraal hunong hajake di bo. 7 Mata na ûwuwaam uŋallotaal makeel be ube di etaamay. Moomu poop kaŋ ma ooliitaam uŋaraal miñ makeel mata ube be bo. 8 Momakiimom, ubajaa'jaa wahaw wata huriyahu, di wañaw wa mbi ukokuwaal, nûririgenaal. 9 Be kaaku kâkimmi kusaanumo, ya kulo di kabuntenaku, ma kusohi di ekoliŋenay yata kânongikoor kameeŋe kata bûnuutaabu, kakajenem ajamaat, ma kugawool anep. 10 Mata jâkinaju jata bancaamabu, joo jigam huhaarahu hata majakutaamu peh. Bukan kameeŋe kapanhom poopii, di kubet kâynenaku katayiil, ma kutahooro di hûlaamahu harem noon.
Pawlu nalob Timootiw mata kâynenaku katawool
11 Moo, ma ugam anaw ata Emitay, utey wahaw uwu peh; nuga sembe ma uga anaw acolum, agawem wahaw wa Emitay êkimmi, âynemmi, âkimmi ajamaat, aalim humunten, ban poop nahep bûyeget. 12 Ûkuuj ma ujuumen kâynenaku katayi, ma usoh eroŋay yâbaworiitaay. Mata yo ya Emitay êwoolumim be bata yo, momakiimom ma ûlobummi mata hujuumahu hata kâynenaku katayi kayooŋ di êsukay. 13 Moo, kayooŋ di Emitay yagawem wah peh uroŋ, di poop Kristu Jesus aloom salh mata kâynenaku katawool kayooŋ Ponsiw Pilaatus, nilhawi 14 ma usoh di malhegenumaayamu wahaw wa ilobim aw batilut, be na mbi Ata Emit aamom Jesus Kristu âlaañul. 15 Mata na mbi tata Emitay tîriiŋ, mbi ega ma wahaw uwu uga. Mata yoo egam Emitay yanoray yajommi ma esali, Yahammi Wahaw Peh, yagam Âyyaw ahammi kâyyaku peh, di ega poop Ata Emit ahammi annahaan peh. 16 Ban di ega Emitay yanoray keb yâketoriitum, yammi di majaaŋaamu ta an aaliitum âhug, di ega Emitay ya an âjukortum, ban poop an aaliit ajuu'yo; yakiim êriibiinaay, di sembaasu be nanoonan. Amiin.
17 Oon bukanaku kasaanumom ube di etaamay, keetubi kusookenooro, keetubi kûseekum poop husaanuma'uhu, mata hubajut makeel, be kûseekum Emitay yawulem ajamaat wah peh ma aali âririgen. 18 Ooniil mbi ya kuga jak, ma bugoroorabu batayiil bajakaabu, bulaañ buga husaanumahu hatayiil, di kenken poop ma ya keenen bukan kaaku, ma kuwuliil di wahaw watayiil wa kubaam. 19 Ma mbi keeli kûmeb husaanumahu hatayiil di êyyaay, ma mbi huga hutandahu ha mbi hujuum be kajom, di keeli kubaj eroŋay yalhegenumaayay.
20 Timootiw, usoh jak wahaw wa Emitay ewulim usoh, nujaamo silobasu sajakutaasu sata bûnuutaabu, di poop bûñoosoorabu ba bukan kaaku kûŋarewuum, kaanem kûmire wah peh, ban kûmirut makeel. 21 Mata bukan kaaku mo ma ya kemmi buko kûmire wah peh, poopii di kubet kâynenaku katayiil.
Moo, kañankiitaku kata Emitay, kulako d'aw.