Pawlu nalob mata bûynenaabu
5
Aatuba ya ûlhus yîinaay kahallemmi, be mbi ya ulob di buko sûum non simpayi. Kaaku karommi di êsuubañiilay, nulob di buko non kutiyi. 2 Yaaraay kahallemmi, nulob di buko non siñaayi; kaaku karommi di êsuubañiilay, nulob di buko non kûliini, di buynum bajake.3 Bûkutuwaataabu kagam yaaraay, kaakutum bukan ka mbi kucookooriil, nucookooriil. 4 Be âkutuwaataaw akeel abaa'jaa aŋil, be mante ebajulankenay yatawool, jake ma buko kuga bukanaku kûtiyaaraku ka mbi kucookoorool non ma âynena agawem an abajoom. Mata mo ma Emitay êkimmi. 5 Mata anñaakanaw agam âkutuwaataaw alhegenumaayaw aakutum an a mbi acookoorool, ya aga bûyegetabu batawool di Emitay, ma ya alhaw yo situtula, di busonna. 6 Be aahu anongoorem keb mata mâsuumaamu mata eniilay yatawool, palimo oo aketut, be omu ma akeem. 7 Moo, onken ma uga non ma ilobim, ma an aatuba mbi awatateni. 8 Mata anaw alat jaa kacookoor bukanool, ban kagam bukanaku kata yanŋool, nalate kâynenaku katawool; ban bukanaku kâynentum Emitay, kukoye d'oo.
9 Moo, mbi uŋiic keb uñaaŋaw wata yaaraay kagam bûkutuwaataabu ka ujaañaw watayiil ûrimmi ujaañaw bukanaku êhaaji, kasoñuwemmi hanor bamiñaa. 10 Be âkutuwaataaw umu, jake ma aga anaw agawem jak, ayarum kuñoolool jak, ya awalen emaasooraay yanŋool, nacookoor bukanaku kâynemmi Emitay, ya aanen kûsukateenaku, ban poop wah peh naga wo jak.
11 Be aatuba uga dô uñaaŋaw wata kaaku karommi di êsuubañiilay, mata na mbi hunongahu hata bûsoñaabu hûriiŋul, di kubet Kristu ma kusoño, 12 ma kubaj kûbajumiñaku di Emitay mata ma kuhuusuum kâynenaku ka kusoom. 13 Ban poop, ya kulat burokabu ma ya kureesoor di siluupasu, ban di kumeeŋ elob, ma ya kuga eloboolob di kuloo'yo, be di saasu sa keetubi kulobeen. 14 Momakiimom ma înje îkinummi ma kaaku kagam êsuubañiilay kulaañ joon kusoño, ma kubaj kuŋil, di kucookoor poop siluupasu satayiil, ma aatubi mbi anaw âsuumutolaam abaj tiŋatu ta mbi âlobikoorum matoolaal. 15 Mata bukan kaaku kata di buko, kûtiiwe ban Kristu, ma kusoolhen Esatanaay. 16 Moo, anñaakan akeel agam âynenaaw aak jaa yanŋool anñaakan aahu a apañoorool akeem, jake ma oo aanenool. Mata aga mo jaa, nayiiliyen grîsiya, ma grîsiya mbi ejooŋoor keb di bukaaku kaakutum bukan ka mbi keeneniil.
Pawlu nalob mata presbiteruyi
17 Be presbiteruyi kasoom jak bugoroorabu bata jañaaŋenaju jata elobay yata Emitay, di poop jalhikitenaju jata bukanaku elobay yata Emitay, kujoone ma kuncaami ñagaba. 18 Mata Baŋiicerabu Bâñoyyaabu beene: “Aatuba ukok butumabu bata êmuunay yammi di bugoroorabu bata jâmabulaju jata trîigu.” Di bêenul poop: “Agoroora najoone di bancaamabu batawool.” 19 Moo, aatuba ôonul aawo elob ya an aloom aya di presbiteru akeel, mante yoo bajameri di utumaw wata bukan egaba, be mante êhaaji kâmiim mata yo. 20 Be presbiteruyi kammi ma kûgayikoorem, ûlhusiil kayooŋ di êsukay ma mbi bukanaku kujuk, di kûkoli kaga mo poop.
21 Moo, kayooŋ di Emitay, di Kristu Jesus, di poop kumalaakaku kata yo kajotim, nîkine eeni onken ma uga non ma ilobim, bapuñowut an, bagawut poop ejuu'di buul. 22 Be aatuba uhaken kaga kaŋen di an ma ugawool annahaanaw di kaŋenaku kata Emitay. Aatuba ôomi di kûbajumiñ kata an. Uga poop bûyegetabu batayi jak.
23 Moo, aatuba mbi ya usiben mumelamu keb, be mbi ya ujaken jinŋet mata eyongay yatayi, mata ma ûjuutoorem keb.