Bulhikitenaabu kagawutum kalhegenumaayaku
4
Malhegen, Buynumabu bata Emitay, moo buloom salh kaan, di kukaku kûbanumaku, bukan kaaku mbi kulat kâynenaku, ma kusoolhen uynumaw wabuntenem ajamaat, di poop balhikitenerabu bata kumalaku, 2 bammi ma buwaasoorum di tutaru tata bukanaku kagugujoorem kabuntenem bukan, ka uynumaw watayiil ukalum ban. 3 Mata ya kulhikiten êsukay ma ya keeniil, bûyab ajakut, di keeniil poop wah waawu ujakut katokoñ, ban wahaw uwu peh Emitay êwwewom ma mbi bûynenaabu kâmiim malhegenumaayamu, kusal Emitay mata wo, ban di kutokoñ. 4 Mata wahaw peh wa Emitay êwwemmi, ujake katokoñ. Moo, wah wakeel weeliit ulati, mata usalaal jaa Emitay be bata wo, ña nooliyaale utokoñaa'wo. 5 Mata elobay yata Emitay, di poop kalhawaku kata yo, ya kuga wah peh ma ujak katokoñ.Agorooraaw âynenaayaw ata Kristu
6 Ulhikiten jaa wahaw uwu kutiyolaal, mbi uga agorooraaw alhegenumaayaw ata Kristu Jesus, ban kâynenaku katayi mbi kank mata balhikitenerabu bata elobay yalhegenumaayay ya usoolhenem di yo. 7 Be mbi ujaamo ma aatuba usoolhen kûñaaŋenñaaŋen kajakutaaku ka yaaraay kahallenaaku kulhikitenem bukanaku. Moo, ma kâynenaku katayi mbi keeli kank, mbi onken ma uga nanoonan wahaw wa Emitay êkimmi. 8 Mata jagawaju jata ma eniilay epulen wah wakeel, jake, be jagawaju jata ma anaw apulen wahaw wata Emitay, uhaŋ majak. Mata ujake be bata eroŋay yata ajamaat ute di etaamay, di poop yaayu yâreesewuum kajom. 9 Elobay uye, elobay yâynenaayay, moo ejake ma êyneni ma an peh aga yo di êsigiray yatawool. 10 Mata momakiimom ma ûli ûgoroorumem, nûkuuj poop lhînŋa, mata ma ûynemmi Emitay yaroŋaay yapakenem ajamaat peh, be haŋ ma ga be bata bukanaku kâyneyom.
11 Moo, ulob êsukay wahaw uwu, ban nulhikitenii'wo. 12 Aatuba uwaa'bo ma an arembeeli mata ma urommi di aŋil, be mbi uga anaw a bûynenaabu mbi kujiker d'oo, di baloberabu batayi, di bagawerabu batayi, di maama uboolaatem an, di kâynenaku katayi, di poop maama ugam anaw alhegenumaayaw. 13 Moo, mommi ma ukobem d'înje, onken ma ya upisen elobay yata Emitay kayooŋ di êsukay, ma uñaaŋenii'yo, ban nulhikitenii'yo. 14 Be aatuba ûnanno di ugorooraw wa Buynum Bunapaabu buwulem, wammi d'aw na buñaaŋenaabu bata kûboñaku kata Emitay kuloom matayi, presbiteruyi di kuga uŋenaw watayiil d'aw.
15 Moo, onken ma uga to bûyegetabu batayi ma ya uga wahaw uwu wa ilobim di wo, ma êsukay peh mbi kujuk non ma ugoroorem di mo. 16 Nujaamo poop eroŋay yatayi, di poop elobay yata Emitay ya ulhikitenem bukanaku. Onken ma uga wahaw uwu, mata uga wo jaa, mbi ugawi ma upak, di poop bukanaku ka ulhikitenem di buko.