Yahaanay yata grîsiya
3
Hurima'uhe, hurimahu halhegenumaayahu: Anaw âkimmi aga presbiteru, najote bugoroorabu bajakum. 2 Be presbiteru, mbi aga anaw aatumbi awaŋureri di makeel, naga anaw ayaam anñaakan anor, naga anaw alhegenumaayaw, naga anaw asoom hûkuwahu hatawool jak, naga anaw ata bûyegetabu, naga anaw awalenem emaasooraay yanŋool, ban nâseeli poop jalhikitenaju jata bukanaku. 3 Presbiteru mumulet bi aga anaw âkaliyem, atukaga poop anaw âhaahum, be mbi aga anaw aalim humunten, âkintum bacec, atukaga poop anaw âkimmi bancaam noon. 4 Naga anaw aalim asoh eluupay yatawool jak, ma kuñoolool mbi ya kujam d'oo jak. 5 Mata anaw aaliit jaa asoh eluupay yatawool, bu mbi aali asoh grîsiya yata Emitay? 6 Moo, anaw a mbi aga presbiteru, jake ma aga anaw a kâynenaku katawool kankum, ka mbi agawooro, nalo di hûjimenahu non ma diyaabu egam. 7 Mbi aga poop anaw a bukanaku kagawutum bûynana kulobem jak matawool, ma aatuba mbi arembeeli, nalo di hûmbaalumahu hata diyaabu.Yahaan yaayu kagam diyaakunu
8 Moomu poop kaŋ ma diyaakunuyi mbi kuga bukanaku kalhegenumaayaku, ketukaga bukanaku kata kûlelempaku kugaba, ketukaga bukanaku kâkaliyem, ketukaga poop bukanaku kâkimmi bancaam noon. 9 Mbi kuga bukanaku kasoom malhegenumaayamu tir mata kâynenaku katayiil di hunongoor hasete. 10 Be bala keen kugawi diyaakunu, mbi kujikeri para jak, ga jaa noon kujukuti di makeel makojuwe, nkit di kusoh bugoroora'ubu.
11 Kupañooriil poop mbi kuga yaaraay kalhegenumaayaku, kaatumbi kulob kôji be bata bukan kaaku. Be mbi kuga yaaraay kasoom ûyegetaw watayiil jak, ban di kuga bukanaku kâynenaayaku di wahaw peh. 12 Diyaakunu mbi aga anaw ata anñaakan anor, ban naga poop anaw a mbi aali asoh kuñoolool jak, di poop bukan kaaku kammi di eluupay yatawool. 13 Mata diyaakunuyi kagawem bugoroorabu batayiil jak, bukanaku ya kulob jak matayiil, ya keeli poop kurumen ma kulob mata kâynenaku katayiil di Kristu Jesus.
Pawlu nasalhen Timootiw mata Jesus
14 Malhegen îkint ma ipiyo kâkayil bi ijuki, be niŋiiculi kayta'uke; 15 ma îkayaaliwuloot jaa, nûmir maama mbi ucookoor bukanaku kata di eluupay yata Emitay, kagam grîsiya yaroŋaay yata Emitay, yagam kâjajaku, di poop hutandahu halhegenumaayahu. 16 Moo, bajut kamantiir, mata huhaanaahu hata kâynenaku katoolaal hâamak:
“Mata Kristu oo alammi aga ajamaataw,
Buynumabu bata Emitay di bulob jak matawool;
kumalaakaku di kujukool,
bukanaku kagawutum jûdew, di kulobi matawool;
bukanaku poop peh kata âmbasuk peh, di kûynenool;
ban naŋari be di kâyyaku kata hatiya di emitay.”