KAYTAKU KA PAWLU AŊIICUM BE BATA
TIITU
Pawlu nasaap Tiitu
1
Tiitu, înje Pawlu iŋiiculom kayta'uke be baabu d'aw. Înje jaamom jagam agorooraaw ata Emitay, jagam amakaaw ata Jesus Kristu, jaboñim ma eenen bukanaku ka Emitay ejotum, ma enkunen kâynenaku katayiil, nigawiil poop kûmir malhegenumaayamu mammi di buruŋabu batoolaal; 2 mata jakobaju ja ukobaalem di jo jata eroŋay yâbaworiitaay, yaamom ya Emitay yâcaloriitaay emmi mbi ewul bukanaku, bala etaamay êwweni. 3 Be na tîrimmi, di ewulom elobay yata yo ma iñaaŋen bukanaku non ma yoo yagam Apakenaaw atoolaal eloom.4 Moo, aw Tiitu, jagam añoolom alhegenumaayaw ata di kâynenaku ka ubomaam; nîkine ma Emitay yaamom Ampawolaal, di Kristu Jesus agam Apakenaaw atoolaal, awuli kañankiitaku, di poop kâsuumaayaku.
Yahaanay yata Grîsiya
5 Malhegen înje iwalhim di êsukay yata Kreeta, ma mbi ooli uhempeleŋ wahaw wa mbi ugaweeni. Moo, di êsukoosuk, nujot presbiteruyi non ma ilobim. 6 Be presbiteru, jake ma aga anaw a bukanaku keetubi ya kuwataten, ban na aga anaw ayaam anñaakan anor, kuñoolool di kuga kuŋilaku kagam bûynenaabu kaatumbi kujami mata kâgawikoor, ban poop di kûsuum kûlob. 7 Mata presbiteru, oo agam annahaanaw ata eluupay yata Emitay, moo jake ma aga anaw a bukanaku keetubi kuwataten, mumulet bi aga anaw agawooruwem, aatubi aga anaw ahulutum hubirik, aatubi aga anaw âkaliyem, aatubi aga anaw âhaahum an, ban poop aatubi aga anaw âkimmi bancaam noon. 8 Be mbi aga anaw awalenem emaasooraay yanŋool, naga anaw âkimmi wahaw wajakaaw, naga anaw acolum, naga anaw alhegenumaayaw, naga anaw anapum, ban naga poop anaw asohoorom. 9 Ban nasoh lit elobay yata Emitay yalhegenumaayay ma aga non ma eloom, ma mbi aali aanen bukanaku ma ankuneniil di eloba'uyu elhegenumaayay, naali poop ahaat bukanaku kâkintoom.
10 Mata bukan kaaku lhay koku to kahiiguloorem, ma ya kulob silobasu sajakutaasu, ban ya kubunten kupaaliil. Bukana'uku, kameeŋe kata di buko, bukanaku kâcaalhumulom di buruŋabu bata jûdewwi. 11 Moo, jake ma ugawiil kupato, mata koku ma kûguulhem di siluupasu, ma ya kulhikiten bukanaku wahaw wajakutaaw wâpuñunenim mata ma kûkimmi kubaj bancaamabu. 12 Momakiimom ma âmiilankenaaw aahu ata bo Kreeta âkooŋummi ma âanul: “Bukanaku kata Kreeta kuhiihiikubil, di kules, di kuŋaam, ban poop di kûŋeki.”
13 Malhegen âmiilankenaaw umu nakooŋe; moo ûlhusiil di sembe ma mbi keeli kusoh kâynenaku di malhegenumaayamu, 14 ma aatuba kûynen kûñaaŋenñaaŋen kata jûdewwi, di poop kûboñaku kata ejamaatay kalatum malhegenumaayamu. 15 Malhegen wahaw peh ya uset be bata bukanaku kasetaaku; be bukanaku kasetutum, ban kûynent, wah kaŋ peh ûsetoriit di buko. Mata ûyegetaw watayiil, di sîsigirasu satayiil sosu ma sisemmi. 16 Mata ya kêenul kûmire Emitay, be ban ya kulat yo mata wahaw wa kugawem, mata ya kulat kajam di yo. Moo, ma kugam bukanaku kasemmi kayooŋ di Emitay, keeliit kuga bugoroor peh bajake.