Hurimahu hajakaahu be bata an poopool
2
Be, aw ulhikiten bukanaku jak non ma elobay yata Emitay eloom. 2 Yîinaay kahallenaaku, nulhikiteniil ma mbi kuga bukanaku kalhegenumaayaku, kasoom jak kûkuwaku katayiil, kâmiim malhegenumaayamu, kasoom kâynenaku jak, kâkimmi ajamaat, ban di keeli humunten. 3 Yaaraay kahallenaaku poop, nulhikiteniil ma kuga jak non ma an ammi di buruŋabu bata Emitay agawem. Ma keetubi kucal kuwul an, keetubi kûkali poop bunuk, be mbi ya kulhikiten bukanaku wahaw wajakaaw. 4 Di kulhikitem poop yaaraay karommi di esiilay, ma kucookoor kupañooriil, di poop kuñooliil, 5 ma mbi kuga yaaraay kalhegenumaayaku, kasoom kûkuwaku katayiil jak, kacookoorem jak siluupasu satayiil, kâsummi bukan, ban poop ya kujam di kupañooriil, ma aatuba mbi elobay yata Emitay erembeeli.6 Kaaku poop kagam ejaajuway nulob di buko ma kuga ûyegetaw watayiil jak. 7 Be aw mbi uga anaw a mbi ya kujiker d'oo di wah peh. Nuga poop anaw alhegenumaayaw, a bukanaku keetubi kuwataten mata balhikitenerabu batayi. 8 Mbi ya ulob sûum, ma an aatuba mbi awatateni, ma bûsuumutaabu batoolaal keetuba mbi kubaj wahaw wa mbi kulob be batoolaal, ña di kupuño.
9 Nulob poop di kaaku kagam emiikeelay, ma kujam di bukanaku kakiliim ma kugawiil kûririgen di buko; aatuba kulaañenikooriil, 10 aatuba kûkuut miñ makeel, be mbi ya kuga wahaw wa mbi ûyis kaan buko bukanaku kalhegenumaayaku, ma wahaw peh wajakaaw wa kugawem, mbi uga ma elobay yata Emitay yagam Apakenaaw atoolaal mbi esali.
11 Mata Emitay êyiise kañankiitaku kata yo an peh, kapakenem an, 12 di kugawolaal ma ulataal wahaw wajakutaaw, di poop kâgawikooraku, ma mbi ooliyaal usohaal ûyegetaw watoolaal jak di etaama'uye, nugawaal poop bukanaku kacolum kagawem non ma yoo êkimmi. 13 Mata ulaal makobaalem di hukahu hâsuumaahu hakobeyim di ho, ha majaaŋaamu mata Emitay yâmakaay, yagam apakenaaw, aamom Kristu Jesus, mbi mujuki; 14 aamom awuum eniilay yatawool be batoolaal ma ahikulolaal di majakutaamu poomo, ma âbuyoorolaal di Emitay be batawool, nagawolaal poop ma ugawaal bukanaku kâwojulim be batawool, ka mbi kuga ûyegetaw watayiil di bugoroorabu bajakaabu.
15 Ulobiil wahaw uwu, nulhikitenii'wo, nuwaŋii'poop di sembe. Be aatuba uwaa'bo ma an arembeeli.