Bagawerabu bata âynenaaw
3
Bûynenaabu, nulob di buko ma mbi ya kujam di bukanaku kaakum etaamay, di poop yahaanay yaayu. Mbi ya kujam di buko, di kenken poop ma ya kuga wahaw peh wajakaaw; 2 aatuba kûlobikoor an, aatuba kulaah poop an, be mbi kuga bukanaku kahepum bukan, kacookoorem an peh. 3 Mata ulaal poop kâtiyaar bûnuutaabu bulakolakom d'ulaal, nugawaal bukanaku kâjamoriitum an, nugawaal bukanaku kajakutaaku, nugawaal emiikeelay yata wahaw peh wajakutaaw, di mâsuumikooramu mata di etaama'uye; nugawaal poop bukanaku kâlhapitaaku, kâsibuwem bukan, ma bukanaku ya kubirik d'ulaal, ulaal poop nubirikaal di bukaaku. 4 Be na Emitay yagam Apakenaaw atoolaal êyisum ejamaatay peh mâsuumamu mata yo, di jâkinaju jata yo, 5 ña di epakenolaal, be ntuwa mata wah wajake wa ugawaam, be mata kañankiitaku kata yo, mo ma ekulhenumolaam, ban di egawolaal ma ubajulankenaali ma etiinoorolaal, urim Buynum Bunapaabu. 6 Mata yoo ewalewalemmi noon Buynum Bunapaabu d'ulaal mata Jesus Kristu agam apakenaaw atoolaal, 7 ma mbi ooliyaal ugawaal bukanaku kacolum kayooŋ di Emitay, mata kañankiitaku kata yo, mata ma ûseekumaam eroŋay yâbaworiitaay ya mbi ubajaal.8 Moo, eloba'uye, elobay yâynenaayay, jake ma onken ma uloo'yo di malhegenumaayamu be bata bukanaku kâynemmi Emitay, ma mbi keeli kuga ûyegetaw watayiil di wahaw wajakaaw. Mata wahaw uwu wowajakum, ban di ûsuum be bata ajamaat. 9 Be ujaamuwoor bûñoosoorabu bata bûnuutaabu, di bata uñaaŋaw wata bukanaku kapiyaaku, di bacecabu, di poop bûñoosoorabu bata mata kûboñaku kata Emitay, mata bubajut makeemakeel. 10 Be nokoor jaa non anaw omu to agawem ma êsukay êgiitoor, ulob d'oo ñeemo ñagaba, be alat jaa, nuwalhoo'bo diyoonool. 11 Mata, nûmiraale kaan anaw agam non umu, ntuwa an acole, mata omu di kûbajumiñaku; moo, yîse kaan oo natahooruwe ban di majakutaamu.
Hurimahu hûbanumahu
12 Na mbi ibolli Artemas, be mante Tikiku, nuga sembe ma ûkayul ma nki ujukooraal di êsukay yata Nikopolis, mata bo ba inongem di bo kaan, mbi ilako hûyookahu. 13 Be nuga di sembe ma mbi oonen Zenas aamom alhikitenaaw ata kûboñaku kata Emitay, di Apolu, ma makeel metuba mumankiyiil mata ma kemmi ma kureesoorem di bâsukabu. 14 Momakiimom ma jâkummi, ma bukanaku katoolaal keetubi kûŋekiwum, be mbi kuga to ûyegetaw watayiil di ugorooraw wajakaaw, ma mbi keeli kubaj wahaw wa kûkimmi, di keenen poop kaaku kabajutum.
15 Moo, bukanaku kammi ute d'înje kusaapuli, nusaap poo kutiyolaal kaboolaatolaam ka ubomaam kâynen.
Kañankiitaku kata Emitay di kulako di miwuul peh.