Kalhawaku kata Emitay
2
Moo, di hûcukumahu nîkine eeni na mbi jeen jilhaw Emitay, di jisal yo ma jeen yo jêrejep, di jiwaasiyenoor yo, di jilhaw yo poop be bata bukanaku peh. 2 Di jilhaw yo be bata kîyyaku, di poop bukan kaaku kagam yahaanay yata êsukay, ma mbi ooliyaal ubajaal kâsuumaayaku, nûwaayenaal di etaamay, nunongooraal jak be bata Emitay, nujamooraal poop. 3 Moo, wahaw uwe ujake, mata Emitay yagam apakenaaw atoolaal wo wa êkimmi. 4 Mata yoo êkine ma bukanaku peh kûmir malhegenumaayamu ma mbi kupak. 5 Mata Emitay yanor silh ebaam, di poop anaw anor silh ammi tutaru tata ejamaatay di yo, anaw umu Kristu Jesus, 6 aamom awuum humuumahu hatawool ma ahikul ejamaatay, ma yîs kaan tîriiŋe ma Emitay epaken bukanaku peh. 7 Momakiimom ma înje ijotumim ma iga amakaaw atawool, di poop alhikitenaaw ata elobay yata Emitay ata bukanaku kagawutum jûdew, ma mbi ya iñaaŋeniil elobay yata kâynenaku yalhegenumaayay. Moo, ilee'ma ilobem di mûcal, be malhegenumaayamu nilobem di mo.8 Be nîkine ma tiŋ peh ta yîinaay kemmi, di kulhaw Emitay ma kûñuur uŋenaw wasetum, hubirik balet di buko, bacec poop balet di buko.
Yaaraay kagam bûynenaabu
9 Nîkine poop ma yaaraay mbi ya kulhiimo jak, wañaw waseerutum, wa mbi ugawiill anaw ajuk nâririgen, keetuba kuriiro wal wâamak wâyodineniye, keetuba kûgaal poop upitaw waseeraaw, non ûuru, di peerola, palimo poop wañaw waseeraaw. 10 Be jake ma bulhiimaabu batayiil, buga jagawaju jata wahaw wajakaaw, non ma anñaakan agam bûyegetabu batawool di Emitay agawem. 11 Moo, jake ma yaaraay mbi ya kubeb ma kupato ma kutallhen wahaw walhikiteneyiim di wo. 12 Îkint ma anñaakan alhikiten bukan, palimo poop ma aga annahaan ata yîinaay, be mbi ya kupato. 13 Mata Adoŋ asingum âwweni, ban nkit Eva. 14 Ban poop ntuwa Adoŋ Esatanaay ebuntemmi, be anñaakanaw oo ma ebuntemmi ma alat kûboñaku kata Emitay. 15 Moo, anñaakanaw âynemmi Emitay, ban nâkin ajamaat, ban poop nasoh buruŋabu jak bata Emitay, mbi abaj kâsuumaayaku ma abaj kuŋil.