सब्त गो प्रभु
6
1 एक बारी बो सब्त गै दिन खेता माखर जाण लागरयो अर बिंगा चेला कणक गी बालां तोड़गे भोर-भोर गै खातां जावै हा।
2 जद बिनै फरीसियां पूछयो, “थे ओ के करण लागरया हो, नेम विधान गै अनुसार सब्त गै दिन इंया करणो ठीक कोनी?”
3 यीसू बानै जबाब दियो, “थे सासतर में पढयो कोनी के राजा दाऊद अर बिंगा साथी जद भूखा हा, तो बां के करयो?
4 बे परमेसर गै तंबु में गेया अर बठै चढाएड़ी रोटियां नै बां सारा खाई, झिकी रोटी नै याजकां नै छोड़गे ओर कोई कोनी खा सकै हो।”
5 अर बण बानै केयो, “मिनख गो बेटो सब्त गै दिन गो बी मालिक है।”
आदमी गै सुकेड़ै हात नै ठीक करणो
6 इंया होयो कै एकर ओर सब्त गै दिन यीसू सतसंग घर में जा'गे परबचन सुणाण लाग्या। बठै एक आदमी हो झिकै गो सजो हात सुकेड़ो हो।
7 सासतरी अर फरीसी यीसू पर नेम-विधान नै तोड़ण गो इल्जाम लगाण गो मोको ढूंढै हा कै देखां ओ सब्त गै दिन ठीक करै है के कोनी?
8 पण बो बांगै मन गी बात जाणै हो ईंखातर बण बि सुकेडै़ हात आळै आदमी नै केयो, “खड़यो हो अर बिचाळै आ” जद बो खड़यो होगे बिचाळै आ'ग्यो।
9 यीसू बानै केयो, “मैं थानै पूछूं कै सब्त गै दिन भलो करणो आच्छो है के बुरो; किनैई बचाणो आच्छो है के मारणो?”
10 जद यीसू च्यारूंमेर बां सगळा कानी देख्यो अर बि आदमी नै केयो, “तेरो सुकेड़ियो हात आ'गे कर” बण हात आ'गे कर दियो तो बिंगो हात बि घड़ी ई ठीक हो'ग्यो।
11 ईं बात ऊं बे रीस बळगे आपसरी में गुसर फूसर करण लागग्या कै इनै आपां किंया फसावां?
बारा खास चेला नै चुणया
12 बां दिनां में यीसू प्हाड़ पर पराथना करण गेयो तो बण सारी रात पराथना में बिता दी।
13 जद दिन उग्यो तो बण आपगै सारा चेला नै बुला'गे बामूं बारा खास चेला चुण लिया। अर बानै खास चेला केयो।
14 बागां नाम ऐ है: समौन झिकै गो दूसरो नाम पतरस है,
15 अर इंगो भाई अन्द्रियास अर याकूब, यूहना अर यूहना गो भाई फिलिप्पुस, बरतुलमे, मत्ती, थोमा, हलफाई गो बेटो याकूब, अर समौन झिकै गो दूसरो नाम जेळोतेस है,
16 अर याकूब गो बेटो यहूदा अर यहूदा इस्करियोति झिकै यीसू नै पकड़ायो हो।
सिक्सा देणो अर ठीक करणो
17 जद यीसू प्हाड़ पर ऊं उतरगे नीचे आयो तो बठै पूरै यहुदियां, यरुसलेम, सूर अर सेदा गा लोग अर बिंगै चेला गी मोटी भीड़ खड़ी ही।
18 बे झिका बांगो परचार सुणन अर बीमारियां ऊं ठीक होण खातर कनै आया। अर झिका में ओपरियां गी कसर ही, बानै ठीक करया।
19 सारा बिंगै हात लगाणो चावा क्यूंकै बामूं निकळण आळी सामरथ सारा नै ठीक करै ही।
आसिस अर सोक गा बचन
20 जद यीसू आपगै चेला कानी देखगे केयो,
“धन्य हो थे झिका गरीब हो,
क्यूंकै थानै बी परमेसर गै राज गी प्रजा गो हक मिलैगो।
21 धन्य हो थे झिका अब भूखा हो,
क्यूंकै सारा धपाइजोगा।
धन्य हो थे झिका अब रोवो,
क्यूंकै थे हंसोगा।
22 धन्य हो थे जद मिनख गै बेटै गै कारण लोग थारै सागै बैर करसी,
अर थानै काड़गे थारी निंदा करसी अर थारो नाम लेणो पसंद कोनी करेगा।
23 बि दिन राजी होगे नाचीयो क्यूंकै थारै खातर सुरग में भोत मोटो फळ है। याद करो कै थानै बुरो केण आळा लोगां गा बाप दादा परमेसर गी बात बोलण आळावां गै सागै बी इंया ई करता आया है।
24 पण थारै उपर भोत बुरो होवैगो झिका अमीर है,
क्यूंकै बां आपगो सुख चेन ले लियो है।
25 थारै उपर भोत बुरो होवैगो झिका अब धापेड़़ा हो
क्यूंकै बे भूख मरसी।
थारै उपर भोत बुरो होवैगो झिका अब हांसों,
क्यूंकै थे रोवोगा अर दुख करोगा।
26 थारै उपर भोत बुरो होवैगो झिका नै सगळा लोग भला केवै,
क्यूंकै बांगै बाप दादा बी झूठा बात बोलण आळावां नै इंया ई केवंता हा।”
दुसमणा ऊं प्रेम राखो
27 “पण मैं थानै केऊं कै थे थारै दुसमणा ऊं बी प्रेम राखो झिका थारूं बैर राखै, बांगो भलो करो।
28 झिका थारो बुरो सोचे है बानै आसिस देवो अर झिका थारी बुराई करै बां खातर पराथना करो।
29 झिका थारै एक गाल पर थपड़ मार देवै तो बि कानी दूसरो गाल बी कर दयो, झिको थारो खेसलो खोसल्य तो बिनै कुड़तो बी राजी होगे दे देवो।
30 झिका थारूं कोई चीज मांगै तो बानै देवो अर झिका थारूं चीज खोस लेवै तो बिनै पाछी ना लेवो।
31 मेरै केण गो मतलब है जिंया थे चावो कै थारै सागै बरताव करै बिंया ई थे बी दूसरा गै सागै बरताव करो।
32 जे कोई थारूं प्रेम राखै अर थे बिंगै सागै ई प्रेम राखो तो के मोटी बात है, क्यूंकै पापी लोग बी इंया ई करै।
33 जे थारो कोई भलो करै अर थे बिंगो ई भलो करो के मोटी बात है क्यूंकै पापी लोग बी इंया ई करै।
34 जे थे किनैई कीं चीज ऊधारी दे दय अर बिंगी पाछी आण गी आस राखो तो के बडाई गी बात है, क्यूंकै पापी लोग बी तो इंया ई करै।
35 थे आपगै दुसमणा ऊं प्रेम राखो बांगी भलाई करो, कोई चीज पाछी ना लेण गी आस राखगे ऊधारी देवो। इंया करणो परमेसर गी नजर में बिंगी उळाद ठेरोगा अर थानै बिंगो मोटो फळ मिलसी, क्यूंकै बो आच्छा-माड़ा सारा पर दया करण आळो है।
36 जिंया थारो पिता परमेसर दया करै बिंया ई थे सारा पर दया करो।”
दोस ना लगाओ
37 “जे थे कीं पर दोस ना लगाओगा तो थारै पर बी कोनी लगाइजै गो, अर ना'ई दूसरै गो बिरोध करो क्यूंकै थारो ई कोनी करीजैगो। दूसरा नै माफ करोगा तो थानै ई माफी मिलसी।
38 किनैई कीं देवोगा तो थानै ई बिंऊं भोत जादा मिलसी क्यूंकै झिकै नाप ऊं थे दियो बि नाप ऊं ई थानै मिलसी।”
39 फेर यीसू बानै मिसाल बतायी कै आंधो आंधै नै रा बताई गो तो बे दोनूं दरडै़ में कोनी पड़सी के?
40 चेलो आपगै गुरूं ऊं मोटो कोनी हो सकै पण झिको पूर्ण होवैगो बो गुरू गै बराबर हो सकै।
41 तनै दूसरै गी आंख में तो फूसको दिखै पण आपगी आंख में पड़यो डोको कोनी दिखै।
42 जद तनै आपगी आंख में लठ कोनी दिखै तो दूसरै नै किंया के सकै कै तेरी आंख गो फूसको काड़ दयूं। अरै कपटी, पेलां आपगी आंख ऊं लठ दूर कर जद दूसरै गी आंख गो फूसको काड़ण खातर थानै साफ दिखेगो।
जिसो दरखत बीस्योई फळ
43 हिस्यो कोई आच्छो दरखत कोनी झिकै गै माड़ो फळ लागै अर ना'ई हिस्यो कोई माड़ो दरखत है झिकै गै आच्छो फळ लागै।
44 आच्छो दरखत आपगै आच्छै फळा ऊं पिछाणिजै क्यूंकै लोग झाड़कां गै कदी अंगुरिया अर बडिया फळ कोनी तोडै़।
45 इंया ई भलो आदमी आपगी भली बातां ऊं अर बुरो आदमी आपगी बुरी बातां ऊं पिछाणिजै। क्यूंकै झिकी बातां बिंगै मन में है बे ई मूं पर आवै।
घर बणाण आळा दो आदमी
46 जद थे मेरो केणो ई कोनी मानो तो फेर क्यामी प्रभु-प्रभु केण लागरया हो।
47 झिको कोई मेरै कनै आवै अर मेरी बात सुणगे मानै बो आदमी बि आदमी बरगो है,
48 झिकै आदमी आपगै घर गी नीम पथर नै डूंगी पट'गे रखी है अर बाड आई पण बिनै हला कोनी सकी क्यूंकै बिंगी नीम मजबूत रखेड़ी ही।
49 पण बो आदमी झिको मेरी बात सुणगे कोनी मानै बो बि बरगो है झिको आपगै घर गी नीम रेत पर खोद'गे रखी। अर बाड ऊं खूर'गे बिंगो घर नास हो'ग्यो।