एक सुबेदार गो पक्को बिस्वास
7
1 जद यीसू लोगां नै उपदेस सुणागे पाछा कफरनहूम गाम में आया।
2 तो बठै एक रोमी सुबेदार हो अर बिंगो एक दास झिको बिनै भोत प्यारो हो। बो दास कोई बीमारी ऊं मरण आळो हो
3 जद बण सुबेदार यीसू गै चमत्कारां गै बारै में सुण्यो तो बण यहुदियां गै खास बुजरग लोगां नै यीसू नै बुलाण गी बिनती करण खातर घाल्या कै यीसू आ'गे मेरै दास नै ठीक करै।
4 जद बे बुजरग यीसू गै कनै जा'गे बिनती करण लाग्या कै थे म्हारै सागै चालो अर बि भले सुबेदार गी मदद करो क्यूंकै बो मदद गै लाइक है।
5 बो म्हारी जाती गै लोगां सागै भोत प्रेम राखै अर म्हारै सतसंग घर बणाण में भोत मदद करी है।
6 आ बात सुणगे यीसू बांगै सागै चाल पड़यो अर जद घरूं थोड़ी सी दूर रेग्यो जद सुबेदार आपगै साथियां नै केगे समाचार भेज्यो कै “हे गुरूजी, तकलीफ ना करो, मैं ईं लाइक कोनी कै थे मेरी छत गै नीचे आओ।”
7 अर मैं थारै कनै आण गै लाइक कोनी हूं पण थे बठूं बैठया बैठया बचन कर देवोगा तो मेरो दास ठीक होज्य'गो।
8 मैं बी किंगो दास हूं अर मालिक गै हुकम नै मानण आळो हूं। अर मेरै नीचे बी कई दास है बे मेरै सारै हुकम नै मानै है। ईंखातर थे हुकम देओ अर मेरो दास ठीक हो जावैगो।
9 बिंगी बात सुणगे यीसू भोत हेरान हो'ग्यो अर पाछो फुर'गे लोगां गी मोटी भीड़ नै केयो, “मैं इसराएल देस गै लोगां में इतो पक्को बिस्वास कोनी देख्यो।”
10 जद सुबेदार गा भेजेड़ा साथी बिंगै कनै पाछा आया तो बानै दास ठीक होएड़ो मिल्यो।
विधवा गै मरेडै़ बेटै नै जींवतो करणो
11 यीसू थोड़ा दिनां गै बाद में कफरनहूम गाम ऊं नाइन गाम में जाण लागरयो, अर बिंगै सागै चेला अर लोगां गी भोत भीड़ ही।
12 जिंया ई बो गाम गै कनै पूग्यो तो बठै ऊं कई लोग एक मरेड़ै छोरै नै माटी देण खातर लेगे जावा हा। बो छोरो एक विधवा गो इकलोतो बेटो हो। बिंगै सागै एक भोत बड़ी भीड़ ही।
13 बि विधवा नै रोंती देखगे यीसू नै तरस आ'ग्यो अर बण केयो, “रो ना।”
14 अर बण अर्थी गै हात लगायो तो बे ठम ग्या। जद बण केयो, “अरै जवान, खड़यो हो।”
15 ओ बचन केंतांई बो मरेड़ो छोरो जींवतो हो'ग्यो अर लोगां सागै बातां करण लागग्यो। यीसू बिनै आपगी मां गै सागै घरै घाल दियो।
16 ओ मोटो चमत्कार देखगे सारा घबरा ग्या अर परमेसर गी बडाई कर'गे केण लाग्या कै ओ आपणै बिचाळै म्हान परमेसर गी बात बोलण आळा पैदा होयो है अर परमेसर आपगै लोगां गी सुद्धी ली है।
17 अर यीसू गै ईं चमत्कार गी चरचा सारै यहुदियां परदेस में अर आसै पासै गै सारै देस में फेलगी।
बतिस्मो देण आळै यूहना गो सुआल करणो
18 यीसू गै चमत्कारां गै बारै में यूहना गै चेला बिनै जेळ में जा'गे बतायो।
19 जद यूहना आपगै दो चेला नै बुला'गे बानै केयो, “जाओ अर जा'गे बिनै पूछगे आओ कै आण आळो मसी थे ई हो के अर म्हे ओर किंगी उडीक करां?”
20 जद बां यीसू गै कनै आ'गे बिंगो समाचार बतायो।
21 बि घड़ी बांगै देखता देखता बण भोत सारा लोगां नै अर ओपरी बडे़ड़ा नै अर भोत सारा आंधै लोगां नै ठीक करया।
22 अर यीसू बानै केयो, “झिको थे देख्यो है अर सुण्यो है बो सारो थे जा'गे यूहना नै बता दयो कै म्हे ऐ चमत्कार आपगी आंखयां ऊं देख्या है झिका में आंधा देखे है, लंगड़ा चालै-फिरै है, कोढी ठीक होवै है, बेरा सुणै है, मरेड़ा जींवता होवै है, अर कंगाला नै सुब समाचार सुणाइजै है,
23 धन्य है बे मिनख झिका मेरै उपर बिस्वास करण गै कारण ठोकर कोनी खावै”
24 जद यूहना गा चेला बिंगै कनूं उड़ग्या तो यीसू यूहना गै बारै में बतायो अर लोगां नै केयो कै “थे रेगिस्तान में के देखण गेया? पून ऊं हालतां सरकणा नै के?
25 तो थे के देखण गेया? के मुलाइम कपड़ा पेरेडै़ आदमी नै? पण थे सुणो, मेगां कपड़ा पेरण आळा आदमी मेल माळियां में मोज ऊं रेवै है।
26 तो फेर थे के देखण गेया? किसैई परमेसर गी बात बोलण आळा नै? हां, पण मैं थानै बताऊं कै थे बीयाबान में परमेसर गी बात बोलण आळा ऊं मोटै नै देखण गेया।
27 ओ यूहना बो ई है झिकै गै बारै में पवितर सासतर में लिखेड़ो है, ‘देख, मैं आपगै दूत नै तेरै आ'गे आ'गे घालूं, झिको तेरै आगै तेरो रा सीधो करसी।’
28 मैं थानै केऊं, अब तांई जिता आदमी पैदा होयड़ा है बामै यूहना ऊं मोटो ओर कोई कोनी, पण फेर बी झिको परमेसर गै राज में छोटे ऊं छोटो है बो बिंऊं मोटो है।”
29 अर सारा आम लोग अर चुंगी लेण आळा नै बी यीसू मसी गी बातां नै सुणगे मान लियो कै ऐ सारा परमेसर गी ओर ऊं है क्यूंकै बां पेलां ई यूहना ऊं बतिस्मो ले लियो हो।
30 पण फरीसियां अर धरम सासतरियां परमेसर गी इच्छा नै टाळ दी। बां यूहना ऊं बतिस्मो बी कोनी लियो हो।
31 फेर यीसू केयो, “पण मैं ईं जुग गै लोगां गी तुलना किंगै सागै करूं?”
32 ऐ लोग बां टाबरा बरगा है झिका गुआड़ में खेलै अर आपसरी में ओळमो देवै कै म्हे थारै खातर बंसरी बजाई पण थे नाच्या कोनी अर म्हे थानै आपगो दुखड़ो सुणायो पण थे रोया कोनी।
33 क्यूंकै बतिस्मो देण आळो यूहना ना तो रोटी खावै अर ना दाख गो रस पीवै। पण थे फेर ई बिमै ओपरी गी कसर बताओ।
34 अर मैं झिको मिनख गो बेटो हूं, अर खाऊं-पीऊं हूं तो थे केवो कै ओ तो पेटू अर पियाकड़ है अर चुंगी लेण आळा अर पापिया गो साथी है।
35 कोई बी ग्यान गै बात गी सच्चाई बानै मानण आळा गै बरताव ऊं पतो चालै है।
फरीसी गै घरै पापी लुगाई गा पाप माफ करणा
36 जद एक फरीसी आदमी यीसू नै आपगै घरै भोजन गो नूंतो दियो तो बो भोजन करण बांगै घरै गेयो।
37 बि गाम गी एक पापण लुगाई नै जद ध्यान लागग्यो कै यीसू फरीसी गै घर में आयो है बा एक सुणै भांडै में सेंट लेगे आई।
38 बा पापण लुगाई यीसू गै पगां कनै बेठगे अर रो-रो गै बिंगा पग आपगै आंसुआं ऊं धोण लागगी अर आपगै सिर गै बाळां ऊं पुंछण लागगी, अर पगां गा लाड कोड कर'गे सेंट लगाण लागगी।
39 ओ देखगे फरीसी सोचण लाग्या कै जे ओ कोई परमेसर गी बात बोलण आळा होंतो तो इनै ठा लाग जांतो कै इंगा पग झिकी लुगाई पुंछण लागरी है बा कुण है? बा तो एक पापण लुगाई है।
40 यीसू बि फरीसी गै मन गी बात जाणगे केयो कै, “हे समौन, मैं तनै कीं केणो चाऊं” बो बोल्यो, “केवो गुरूजी,” फेर यीसू बिनै केयो,
41 “एक साऊकार गै दो करजदार हा, एक पांच सो चांदी गा सिका गो अर दूसरो पचास चांदी गा सिका गो।
42 पण जद बे दोनूं करजो कोनी दे सकया तो बण साऊकार बां दोनां पर दया कर'गे कर्ज माफ कर दियो, अब तूं बता कै बांमै बिंऊं जादा प्रेम कुण करसी?”
43 समौन बोल्यो, “मेरी समझ ऊं झिकै गो जादा कर्ज माफ कर दियो बो राखैगो” यीसू केयो, “तूं ठीक समझ्यो है”
44 फेर बण बि पापण लुगाई कानी देखगे समौन नै केयो, “तनै आ लुगाई दिखै है के? मैं तेरै घरै आयो पण तूं मेरा पग धोण खातर पाणी कोनी दियो पण अण लुगाई मेरा पग आपगा आंसुआं ऊं धोगे बाळां ऊं पूंछया है।
45 तूं मेरा कदी इता लाड कोड कोनी करया, पण जद ऊं मैं आयो हूं अण मेरै पगां गा लाड कोड करणा कोनी छोड़या,
46 तूं मेरै सिर पर तेल कोनी लगायो पण अण मेरै पगां पर सेंट लगायो है
47 ईंखातर मैं तनै केऊं इंगा पाप जादा माफ करया है ईं कारण आ जादा प्रेम करै है अर झिकै गा थोड़ा पाप माफ होया बो थोड़ो प्रेम करै है।”
48 अर बण बि लुगाई नै केयो, “जा, बेटी तेरा पाप माफ हो'ग्या।”
49 जद लोग झिका बांगै सागै भोजन करा हा, सारा सोचण लाग्या कै, “ओ कुण है पाप माफ करण आळो।”
50 यीसू बि लुगाई नै केयो, “तेरै बिस्वास तनै बचा दियो, राजी खुसी जा।”