यीसू गी दासियां
8
1 बिंगै बाद में बे गाम गाम में परमेसर गै राज गी खुस खबरी सुणावंता फिरण लागग्या।
2 बिंगै सागै बारा चेला अर केई लुगाईयां ही झिकिंयां नै ओपरी अर बीमारियां ऊं ठीक करी। बामै एक गो नाम मरियम हो झिकी मगद गाम गी ही बिनै मगदळीनी बी केंता, बिमुं यीसू सात ओपरियां काड़ी।
3 अर हेरोदेस राजा गै अन्न गो भण्डारी खोजै गी बहु योअन्ना, सुसन्नाह अर केई लुगाईयां ओर बी बांगै सागै ही झिकी आपगै धन ऊं यीसू अर बिंगै चेला गी सेवा करती।
बीज गी मिसाल
4 जद गाम-गाम ऊं लोगां गी भीड़ बिंगै कनै आण लागरी जद बण बानै एक मिसाल बताई:
5 “एक किसान आपगै खेत में बीज बीजण गेयो। बीजता टेम कीं बीज रा गै किनारै पड़ग्या झिका लोगां गै पगां ऊं दबग्या, अर जिनावरां चुग लिया।
6 केई बीज पक्की जमीन में पड़ग्या अर बे उग्या तो हा पण पाणी ना लागण गै कारण सूकग्या।
7 केई बीज झाड़कां में पड़ग्या अर बे उग्या अर मोटा होया पण झाड़कां बानै दबा लिया।
8 केई बीज आच्छी जिग्यां पर पड़या झिका उगगे सो गुणा फळ ल्याया।” इतो केगे बो जोर ऊं बोल्यो, “झिका गै कान है बे सुणल्यो।”
मिसाल गो मकसद
9 बांगै चेला पूछयो, “गुरूजी ईं मिसाल गो मतलब के है?”
10 बण केयो, “थानै परमेसर गै राज गै भेद गी समझ दी है पण दूसरा नै इंगी समझ मिसाल ऊं देईजै कै बे देखता थकां बी कोनी देख सकै अर सुंणतां थकां बी कोनी समझ सकै।”a
बीज गी मिसाल गो मतलब
11 ईं मिसाल गो मतलब है बीज परमेसर गा बचन है।
12 रा गै किनारै पड़या बीज बे लोग है झिका बचन नै सुण्यो पण सैतान आ'गे बांगै मन ऊं चुग लेग्यो, क्यूंकै सैतान कोनी चावै कै लोग बचन पर बिस्वास कर'गे मुकती पाल्यै।
13 पक्की जिग्यां पड़या बीज बे लोग है झिका खुसी ऊं बचन सुणै है पण डूंगी जड़ ना होण गै कारण थोड़ी देर तांईं बिस्वास राखै पण समस्या आण ऊं बे बिस्वास नै छोड़ देवै है।
14 झाड़कां में पड़या बीज बे लोग है झिका बचन सुणै पण आ'गे जा'गे जीणै गी चिंता अर सुख आराम अर धन में दबज्य है। अर आ'गे कोनी बढ सकै है
15 पण आच्छी जिग्यां में पड़या बीज बे लोग है झिका सच्चै अर आच्छै दिल ऊं बचन सुणगे अर बिंगै उपर अमल कर'गे धीरज ऊं आच्छो फळ ल्यावै है।
दियै गी मिसाल
16 कोई दियै नै जगागे ढकै कोनी अर ना'ई बिनै मांची नीचे मेलै, पण बिनै सांमै आळै में मेलै कै मा आण आळै नै चानणो रेवै।
17 ईंखातर सारी लुकेड़ी बातां सांमणै ल्याई जावैगी अर सारी गुप्त बातां सांमणै आवैगी।
18 ईंखातर झिकी बात थे सुणो बि पर चोकसी ऊं ध्यान लगाओ झिका मेरी सीख नै मानण खातर तैयार है बानै ओर जादा समझाईजैगो पण झिका सुणनो कोनी चावै है पण थोड़ा भोत झिका समझै है बांगी समझ बी खतम हो जावैगी।
यीसू गी मां अर भाई
19 बिंगी मां अर भाई बठै आया पण बोळी भीड़ गै कारण बिंगै कनै कोनी पूगसक्या।
20 कणई आ'गे केयो कै, “थारी मां अर भाई बारै खड़या है अर थारूं मिलणो चावै।”
21 ओ सुणगे बण केयो, “मेरी मां अर भाई ऐ लोग है झिका परमेसर गो बचन सुणगे मानै।”
आंधी नै थामी
22 फेर एक दिन यीसू अर बिंगा चेला किस्ती पर चढ़या अर बण चेला नै केयो, “चालो झील गै परली पार चालां जद बे चाल पड़या।”
23 पण जद किस्ती चालण लागरी तो यीसू नै नींद आ'गी। बि टेम झील में तूफान आ'ग्यो अर किस्ती में पाणी भरीजण लागग्यो अर बे डूबण लागग्या।
24 जद चेला यीसू नै जगा गै केयो, “हे स्वामी, हे स्वामी, म्हे डूबण लागरया।” जद यीसू खड़यो होगे आन्धी अर पाणी गी लेहरां नै ललकारी, तो बे ठमगी अर सारा गो जी में जी आ'ग्यो।
25 जद बण चेला नै केयो, “थारो भरोसो किनै गेयो?” बे सारा डरग्या अर हेरान होगे केण लागग्या कै, “ओ किसो आदमी है? झिकै गो हुक्म आन्धी अर पाणी मानै।”
ओपरी बडे़ड़ै आदमी नै ठीक करणो
26 फेर बे झील गै परली पार गिरासेनिया इलाका में आया झिको गलील झील गै सांमै हो।
27-31 जद बो किनारै पर उतरयो तो बानै ओपरी बड़ेड़ो आदमी मिल्यो झिको ऊघाड़ो अर मूसाणा में रेंतो अर लोग बिनै सांकळां ऊं बांदता पण बो सांकळां तोड़ देंतो अर ओपरी गी कसर बिनै बीयाबान में भजाऐ फिरती। यीसू ओपरी नै बिमुं निकळ जाण गो केयो जद बो यीसू नै देखगे जोर ऊं करळावण लागग्यो अर पगां में पड़'गे केण लागग्यो, “हे परम प्रधान परमेसर गा बेटा मेरूं तनै के काम, मनै तंग ना कर?” यीसू बिनै पूछयो, “तेरो नाम के है?” बण केयो, “पळटण, मैं एक कोनी भोत हां।” ओपरियां यीसू नै केण लागी, “म्हानै नरक में ना घाल।”
32 बठै प्हाड़ पर सूअरां गो मोटो रेवड़ चरै हो, ईंखातर बां यीसू नै बिनती करी, “म्हानै बामै बाड़ दे” तो यीसू बानै हुकम दे दियो।
33 अर सारी ओपरियां केंतांई सूअरां में बड़गी अर एकैदमई सारा सूअर झील में जा पड़या अर मरग्या।
34 बांगा गुआळिया, ओ देखगे गाम कानी भाज्या अर गामै जा'गे सारी बात बताई।
35 गाम गा लोग भेळा होगे देखण आया अर यीसू गै कनै ओपरी बड़ेड़ै आदमी नै कपड़ा पेरेड़ा अर आराम ऊं बैठयो देख्यो तो बे डरग्या।
36 अर गुआळिया बानै सारो कीं बतायो कै किंया बो ठीक होयो।
37 जद गिरासेनिया नगर गा लोग यीसू ऊं बिनती करण लागग्या कै अठुं उड़ज्या। जद बो बठूं आपगी किस्ती में जाण लागग्यो।
38 बि टेम झिको आदमी ओपरिया ऊं ठीक होयो, बो यीसू ऊं बिनती करण लागग्यो, “मनै थारै सागै ले चालो,” पण यीसू बिनै केयो कै,
39 “आपगै घरै उड़ज्या अर जा'गे लोगां नै बता कै परमेसर मेरै पर भोत मोटो चमत्कार करयो है अर बो जा'गे गामै परचार करण लागग्यो, यीसू मेरै पर चमत्कार करयो है।”
40 जद यीसू बठूं पाछो आ'ग्यो अर लोग बड़ै कोडां ऊं बिनै मिल्या क्यूंकै सारा लोग बिनै अडिकै हा।
याईर गी मरेड़ी बेटी अर एक रोगण लुगाई
41 जद याईर नाम गो एक आदमी झिको यहुदी सतसंग घर गो मुखिया हो यीसू गै पगां में पड़'गे केण लागग्यो, “मेरै घरै चालो।”
42 क्यूंकै बिंगी बारा साल गी बेटी मरण आळी ही जद बो अर यीसू जाण लाग्या तो एक मोटी भीड़ बिंगै सागै चाल पड़ी।
43 बि भीड़ में एक लुगाई इसी ही झिकी गै बारा साला ऊं कळै गी बीमारी ही अर बण सारो धन ईलाज खातर डाक्टरां नै दे दियो पण बीमारी ठीक कोनी होई।
44 बण होळै सी लारूं आ'गे यीसू गै कूड़तिय गै पलै गै हात लगायो अर हातो हात बिंगी कळ गी बीमारी जांती रे'ईं।
45 यीसू लारै मूड़या अर केयो, “मेरै हात कण लगायो है” पण सारा नटग्या। पतरस केयो, “हे स्वामी, भीड़ थानै च्यारूंमेर ऊं घेर राख्यो है, अर थारै उपर गिरण लागरी है।”
46 पण यीसू केयो, “मैं जाणग्यो मेरै माऊं बीमारी ठीक करण गी सता निकळी है।”
47 जद बण लुगाई सोच्यो मैं लुक कोनी सकूं ईंखातर बा डरती कांपती यीसू कनै आई अर पगां पड़'गे सारी कहाणी बता दी कै मैं किंया ठीक होई।
48 यीसू बिनै केयो, “जा बेटी, तेरै बिस्वास तनै ठीक करी है। चेन ऊं जा”
49 जद बो बिनै ओ केण लागरयो तो सतसंग घर गै मुखियै गै घर ऊं कणैई आ'गे केयो, “गुरूजी नै फोड़ा ना घाल, तेरी बेटी मरगी।”
50 ओ सुणगे यीसू मुखिया नै केयो “डर ना बिस्वास राख, बा ठीक हो'ज्यगी।”
51 यीसू बिंगै घरै आयो अर घर में पतरस, यूहना, याकूब अर छोरी गै मां बाप गै सिवा किनैई मां कोनी आण दिया।
52 सारा घर में रोण लागरया। यीसू बानै केयो, “रोवो ना, आ मरी कोनी सुती है।”
53 लोग छोरी नै मरेड़ी सोचगे यीसू गी मजाक करण लागग्या।
54 जद बण छोरी गो हात पकड़गे केयो, “हे बेटी, खड़ी होज्या।”
55-56 जद बा बि टेम ई जींवती हो'गी अर खड़ी हो'गी, बिंगा मां बाप हेरान हो'ग्या। जद यीसू बानै केयो, “इनै खाण खातर कीं देवों पण आ बात किनैई बताईयो ना।”