मत्ती 13

बीज बीजण आळै गी मिसाल

(मरकुस 4:1-9; लूका 8:4-8)

1 बि दिन यीसू घर छोडगे झील गै किनारै बेठगे उपदेस देण लागरयो हो। 2 लोग बिंगै च्यारूंमेर भेळा हो'ग्या जद बो एक किस्ती में चडगे बैठग्यो अर सारा लोग किनारै पर खड्या रेया। 3 बण बानै मिसाल ऊं भोत सारी बातां बताई। बण केयो, “एक किसान बीज बीजण गेयो। 4 बीजता टेम केई रा गै किनारै पडग्या, बानै जानवरां चुग लिया। 5 केई पक्की जिग्यां पर पडग्या। बठै बे ऊग तो गेया। 6 पण सूरज गो तावडो लागतांई जड डूंगी ना जाण गै कारण बे बळग्या। 7 केई बीज झाडका में पडग्या। जद बे उगग्या बानै झाडका दबा लिया। 8 पण केई बीज आच्छी जमीन पर पडया, बे उगगे केई सौ गुणा, केई साठ गुणा अर केई तीस गुणा फळ ल्याया। 9 झिको सुणनो चावै बो सुणले।”

मिसाल गो मतलब

(मरकुस 4:10; लूका 8:9, 10)

10 फेर बिंगै चेला बि कनै आ'गे पूछयो, “थे बातां करता टेम मिसाल क्यामी बताओ।” 11 बण उतर दियो, “सुरग गै राज गी भेद भरी बातां जानण गो हक सिरफ थानै ई देयड़ो है बानै कोनी देईड़ो। 12 मेरी बात सुणन आळा कनै भोत सारो ग्यान ओर आज्येगो अर झिका मेरी बात कोनी सुणै बे झिको कीं जाणै बो ई भूल ज्येगा।” 13 ईंखातर मैं बांगै सागै मिसाल ऊं बात करूं,

“क्यूंकै बे देखे तो है पण बानै दिखै कोनी।

बे सुणे तो है पण बानै ना सुणिज्यै अर ना समझ आवै।”

14 यसयाह परमेसर गी बात बताण आळो इंया लिखै,

“थे सुणेगा अर सुणता रेवोगा पण थारी समझ में कोनी आवैगो।

थे देखता बी होवोगा पण थारी समझ कोनी आवैगो।

15 क्यूंकै आंगो मन गळत बाता ऊं भरिज्येगो।

आ आपगा कान बंद कर राख्या है

अर आंख बी बंद कर राखी है झिकै ऊं बे ना कीं देख सकै

अर ना कीं सुण सकै। पण बे आपगै मन ऊं कदी ना समझ सकै।

अर बे कदी मेरै कानी मुडगे आवैगा

अर मैं बानै चंगा करूंगा।”

16 पण धन्य है थारी आंख कै बा देखे अर धन्य है थारा कान झिका सुणन लागरया है। 17 मैं थानै साची केऊं कै भोत सारा परमेसर गी बात बताण आळा अर धरमी लोग झिकी बातां नै देखणी चावां बे थे देखण लागरयो हो। पण बे कोनी देख सकया। अर झिकी बातां नै थे सुणण लागरयो हो बानै बे सुण कोनी सकया।

बीज बीजण आळै गी मिसाल गो सार

(मरकुस 4:13-20; लूका 8:11-15)

18 अब थे बीज बीजण आळै गी मिसाल गो अरथ सुणो। 19 रा में पडेड़ा बीज बे है, झिका परमेसर गै राज गी बात सुणी पण बि पर गोर कोनी करी अर दुस्ट सैतान झिकी बात बण सुणी बिनै समझण गी सोच नै बंद कर दी। 20 पक्की जमीन पर पडे़ड़ो बीज बे लोग हा झिका परमेसर गै राज गी बात सुणी अर बिनै भोत खुसी ऊं मान बी ली। 21 पण इतो जादा बिस्वास कोनी करयो। जद बिंगै जीवन में बचन गै कारण थोड़ी सी मुसकिल आयी तो बो डगमगाग्यो। 22 झाडका में गिरेडा बीज बे लोग है झिका संसार गै लोभ लालच अर चिंता में पड़गै दबज्य अर बे बिस्वास ऊं लारै हटज्यै। 23 आच्छी जमीन पर पडेड़ा बे लोग है झिका परमेसर गै राज गी बात नै सुणी अर समझ गै बि पर चाल्या। अर बे बीज सौ गुणा, साठ गुणा अर तीस गुणा फळ ल्याया।

कणक अर घास गी क्हाणी

24 फेर यीसू बानै ओर एक मिसाल बताई कै सुरग गो राज बि आदमी बरगो है झिकै आपगै खेत में आच्छो बीज बिज्यो है। 25 जद लोग सूत्या तो बिंगो दुसमण आ'गे बि खेत गै मां घास गो बीज खिण्डाज्यै। 26 जद कणक मोटी होयी तो बिमै घास बी दिखण लागग्यो। 27 फेर खेत गा माळी आ'गे मालिक नै बतायो कै थे तो आच्छो बीज बिज्यो फेर ओ कठूं आ'ग्यो? 28 जद मालिक बानै केयो ओ दुसमण गो काम है। जद बण केयो थे केओ तो म्हे इमै खोदी करदेयां। 29 पण मालिक केयो, जे अब थे खोदी करोगा तो सागै कणक बाढ दयोगा। 30 फसल पाकण तांई इनै सागै ई बधण दयो। जद कणक बाडण गो टेम आवैगो मैं भंडारा नै केऊंगा पेला घास गी पुळी बाळण खातर न्यारी बांध ल्यो अर कणक नै खळे में न्यारी भेळी कर ल्यो।

राई गै बीज गी मिसाल

(मरकुस 4:30-32; लूका 13:18, 19)

31 यीसू बानै ओर केई मिसाल बताई कै सुरग गो राज राई गै दाणै बरगो है। झिकै नै कणी आपगै खेत में बिज्यो। 32 ओ बीज भोत छोटो होवै पण उगगे मोटो बूंटो बणज्यै अर पंछी आ'गे बिंगै डालियां पर बैठण लाग्जै।

खमीर गी मिसाल

(लूका 13:20, 21)

33 फेर बण केयो सुरग गो राज खमीर बरगो है। झिकै नै एक लुगाई तीन सैर आटे में रळा गै रख दियो। अर होळै होळै सारो खमीर बणग्यो।

34 यीसू ऐ सारी बातां मिसाल ऊं बताई। बो मिसाल बिना कोई बात कोनी करतो। 35 ईंखातर परमेसर गी बात बताण आळा द्वारा केयेड़ी बातां पूरी होवै।

“मैं मिसाळ गै द्वारा थारूं बात करूंगा

अर धरती बणण ऊं पेला झिकी बातां लुकेड़ी है बानै थारै सामणै ल्यावूंगा।”

कणक अर घास गी क्हाणी गो सार

36 फेर यीसू बि भीड़ नै भेजगे घरै आ'ग्यो। जद बिंगै चेलां बिनै पूछयो कै खेत अर घास आळी मिसाल गो मतलब म्हानै बता। 37 यीसू उतर दियो, “झिको आच्छो बीज बिज्यो बो मिनख गो बेटो है। 38 अर खेत ओ संसार है, आच्छा बीज सुरग राज गो वारिस है अर घास बे लोग है झिका सैतान है। 39 अर घास गो बीज बीजण आळो दुसमण सैतान है। बाडण गो टेम ईं संसार गो अंत है अर बाडण आळा सुरगदूत है। 40 बिंया ई जिंया घास भेळी कर'गे आग में बाळ दी बिंया ई संसार गै अंत में होवैगो। 41 मिनख गो बेटो आपगै सुरगदूतां नै घालगे अर बिंगै राज ऊं सारा पापियां अर बांगै लोगां नै झिका पाप करण खातर तैयार करै। 42 बानै भेळा कर'गे नरक गी आग में बाळ देसी। जठै दांतां गो पीसणो अर रोणो ईं रोणो हो'सी। 43 जद धरमी लोग आपगै पिता परमेसर गै राज में सूरज गी तरियां चमकेगा झिको सुणनो चावै बो सुणल्ये।”

धन अर मोती गी मिसाल

44 “सुरग गो राज खेत में दबेडे़ धन बरगो है झिको कोई आदमी नै लादज्य तो बो पाछो बिनै दाब ज्य अर बो इतो राजी होवै कै बण आपगो सारो कीं भेजगे बो खेत मोल ले'ल्य। 45 सुरग गो राज इसै बोपारी बरगो है झिको आच्छा मोतियां गी खोज में रेवै। 46 जद बिनै आच्छा मोती लादज्य तो आपगो सारो कीं बेचगे बि मोती नै खरीदल्यै।

जाळ गी मिसाल

47 सुरग गो राज मछली पकडण आळै जाळ बरगो है झिकै में न्यारी न्यारी भांतगी मछली पकडिज्यै। 48 जद जाळ भरिज्यै तो बिमुं आच्छी आच्छी मछलियां काड़गे टोकरियां में घाल ल्ये। अर बेकार मछलियां नै फेंक दे। 49-50 संसार गै अंत में इंया ई होवैगो। सुरगदूत आवैगा अर पापी लोगां नै धरमिया ऊं न्यारा करसी अर बानै भडकती आग में झोंक देसी। बठै रोणो अर दांतां गो पीसणो हो'सी। 51 यीसू चेला नै पूछयो, थारी समझ में कीं आवै है के? बा केयो हां। 52 यीसू आपगै चेला नै केयो, हर एक बिस्वासी झिको नेम विधान अर परमेसर गै राज नै जाणै है बो एक घरेलू मालिक बरगो है झिको आपगै भण्डार ऊं नुई अर पुराणी सारी चिजां बारै काडै़।”

नासरत में यीसू गो अनादर

(मरकुस 6:1-6; लूका 4:16-30)

53 जद आ मिसाल केगे बठूं चाल पड्यो। 54 अर आपगै गाम में आ'ग्यो। फेर बण यहुदियां गै सतसंग घर में उपदेस देणो सरू करयो। जद सारा हेरान होगे पूछण लागग्या कै इनै इसी बुद्धी अर ग्यान गी सकती कठूं मिली है। 55 ओ बि लकडी आळै मिस्तिरी गो छोरो कोनी के? इंगी मा गो नाम मरियम है। याकूब, युसुफ, समौन अर यहूदा इंगा भाई है। 56 इंगी सारी भेना आपणै अठै ई रेवै है। फेर ओ सारो कीं कठूं सीख्यो है। 57 फेर बा बिनै मान्यो कोनी। यीसू बानै केयो, “कोई परमेसर गी बात बताण आळै गो बिंगै गाम गा अर घर गा आदर कोनी करै।” 58 ईंखातर बांगै कम बिस्वास गै कारण बण बठै जादा चमत्कार कोनी करया।