नासरत में यीसू गो आदर समान
6
1 फेर बठूं निकळ गै यीसू आपगै गाम आग्या।
2 सबत गै दिन बे आराधना भवन में लोगा नै बचन सिखाण लागग्या। बठै सुणन आळा लोग हेरान होवां कै ईं कनै इतो ग्यान कठूं आयो कै अर कठूं ईं कनै चमत्कार करण गी ताकत आई है।
3 ओ तो बढईं है। मरियम गो बेटो तो है अर याकूब, योसे, यहूदा अर सीमोन गो भाई तो है। इंगी भेना नै तो आपां जाणा हा। ईंखातर बानै भोत बुरो लागग्यो अर बा यीसू पर बिस्वास कोनी करयो।
4 यीसू बानै केयो, “परमेसर गी बात बताण आळै पर बिंगो गाम, रिस्तेदार अर बिंगै घर आळा कदी बिस्वास कोनी करै।”
5 बठै बा कोई सामरथ गा काम कोनी करया क्यूंकै लोगा बा पर बिस्वास कोनी करयो। थोड़े सै बीमार लोगा नै ठीक करया।
6 यीसू हेरान हो'ग्या कै बांगै गाम आळा बा पर बिस्वास कोनी करयो। फेर यीसू परमेसर गो बचन सिखाणता होया गाम गाम में फिरता रेया।
बारै खास चेला गो भेजणो
7 बा आपगै बारै चेला नै बुला'गे बानै ओपरियां काड़ण गो अधिकार देगे अर दो दो कर'गे गामां में भेज्या।
8 यीसू बानै केयो, “थे थारै सागै एक लाठी गै सिवा कीं ना लेईयो, ना तो झोलो, ना'ई रोटी अर ना'ई बटुओ।
9 जूती पेर गै ई जाईयो अर एक ई फालतू कुड़तो सागै ना लेईयो।
10 जद थे किसयी गाम में जाओ तो एक ई घर में रेईयो जद तांई बठू पाछा ना चालो।
11 जद थानै कोई किस्य गाम गा रेण गी जिग्या ना देवै अर परमेसर गो बचन कोई ना सुणै तो थे थारै पगा गी धूल बांगै सामै झाड़ गै चाल पडीयो। ओ करणो ईं बात गी निसानी हो'सी कै परमेसर गी सजा गा जिमेदार बे आप लोग हो'सी।”
12 फेर चेला जा'गे परचार करयो कै आपगो मन बदळ गै परमेसर गै रा पर चालणो सीखी।
13 इंगै अलावा बा लोगा मूं ओपरियां काड़ी अर कीं बीमार लोगा गै सिर पर तेल लगागे बानै ठीक करया।
यूहना बतिस्मो देण आळै नै मारयो जाणो
14 यीसू गी चरचा फेलण गै कारण राजा हेरोदेस बिंगी चरचा सुणी। केई लोग तो केवा कै, “यीसू बतिस्मो देण आळो यूहना है अर दुसर जीमतो हो'ग्यो। ईंखातर ई यीसू चमत्कार करै है।
15 केई केवा यीसू एलियाह परमेसर गी बात बताण आळो है अर केई केवा ओ तो एलियाह बरगो ई हो झिको भोत पेलां रेंतो हो।”
16 ओ सुण गै राजा हेरोदेस केयो कै, “झिकै यूहना गो सिर कलम करवायो बो पाछो जीग्यो के?”
17 हेरोदेस राजा यूहना नै जेळ में बद करां दियो हेरोदेस ओ आदेस हेरोदियास केण पर दिओ हेरोदियास आपगै भाई फिलिप्पुस गी पत्नी हेरोदियास सागै ब्या करेड़ो।
18 क्यूंकै यूहना हेरोदेस नै केणतो कै इयां आपगै भाई गी पत्नी सागै ब्या करणो परमेसर गै नेम गै विरुद्ध है।
19 ईंखातर हेरोदियास बिऊं बैर राखती अर बा चावै ई कै इनै मरवा दयू।
20 पण हेरोदेस यूहना नै धरमी आदमी अर पवितर आदमी मानतो अर बिंगी संभाळ करतो। बो बिंगी बाता सुण गै भोत डरतो पण बाता बडे आनंद ऊं सुणतो।
21 यूहना ऊं बदलो लेण गो मोको हेरोदियास नै जद मिल्यो जद हेरोदेस आपगै जन्म दिन पर आपगै मोटै अफसरा, सेनापतिया अर जनता में मोटै-मोटै लोगा नै भोज दियो।
22 ईं भोज में हेरोदियास गी बेटी नाच गै हेरोदेस अर भोज में बुलाएड़ा लोगा नै खुस करया ईंखातर राजा लडकी नै केयो झिको कीं तूं आज मांगेगी मैं तनै दयूंगा।
23 क्यूंकै राजा सोगन खाई कै जे तूं मेरो आदो राज पाट ई मांगै गी तो मैं तनै आज दयूंगा।
24 जद बण बारै आ'गे आपगी मां हेरोदियास नै पूछयो कै, “मैं के मागूं?” बिंगी मां केयो, “तूं यूहना बतिस्मो देण आळै गो सिर मांग ले।”
25 जद बा दबादब राजा कनै जा'गे केयो, “मनै अबी यूहना गो सिर एक थाली में ल्यागे दयो।”
26 ओ सुण गै राजा हेरोदेस नै बडो दुख होयो पण भोज में आण आळै मेहमानै गै सामै झिकी सोगन खाई बिंगै कारण बो मना कोनी कर सक्यो।
27 ईंखातर राजा एक सैनिक नै यूहना गो सिर काट गै ल्याण खातर केयो। बो जेळ में जा'गे यूहना गो सिर बाड़ ल्याओ।
28 बण सिर बि छोरी नै दियो अर बण छोरी आपगी मा नै दियो।
29 जद यूहना गै चेला नै ठा लागग्यो तो बे आ'गे बिंगै सरीर नै ले जा'गे एक कबर में रख दिओ।
खास चेला गो पाछो आणो अर एकला रेणो
30 यीसू गै खास चेला पाछा आ'गे यीसू कनै बेठगै झिको कीं बा गामां में करयो अर लोगा नै सिखायो बिंगै बारै में बतायो।
31 बठै भोत लोग आंता-जांता रेवा ईंखातर बा चेला नै रोटी खाण नै ईं सास कोनी मिलतो ईंखातर यीसू बानै केयो थे मेरै सागै न्यारी जिग्या में जा'गे थोडो आराम कर ल्यो।
32 जद बे एक किस्ती पर चड़गे सुनसान जिग्या कानी चाल पड़या।
33 पण केई लोगा बानै किस्ती पर चड़ता टेम पिछाण लिआ। फेर केई नगर ऊं भेला होगे भाज्या अर यीसू अर बांगै चेला ऊं पेली किनारै पर जा पूग्या।
34 जीया यीसू किनारै पर पूग गै किस्ती ऊं उतरया तो बा लोगा गी एक मोटी भीड़ देखी। यीसू नै बि भीड़ पर बडी दया आई क्यूंकै बे बिना गुआळियै गी भेड़ा बरगा लाग्या हा। ईंखातर बानै बे परमेसर गी बाता बताण लागग्या।
35 जद देर होण लागी तो यीसू गै चेला बानै आ'गे केयो, “आ सुनसान जिग्या है अर भोत मोडो हो'ग्यो है।
36 लोगा नै अब जाण दयो जिऊं नेडै़ गाम में जा'गे आपगै खाण-पीण गो बदोबस्त कर सकै।”
37 पण यीसू बानै केयो, “थे ई आनै कीं खाण नै दयो?” चेला केयो, “आनै खूआण खातर इतै पीसा गी जरूरत पडै़गी जितो एक मजदूर आठ मिनां काम कर'गे कमा सकै ओ किंया होवैगो?”
38 यीसू बानै केयो, “जा'गे पतो करो थारै कनै किती रोटियां है।” बा जा'गे पतो करयो कै म्हारै कनै पांच रोटी अर दो मछलिया है।
39 यीसू बानै केयो, “सारै लोगा नै घास पर झुण्ड बणा गै बिठा दयो।”
40 जद लोग सो सो अर पचास गा झुण्ड बणा गै बेठ ग्या।
41 यीसू पांच रोटी अर दो मछलिया लेगे अर आकास कानी कर'गे परमेसर गो धन्यावाद करयो अर रोटियां नै तोड़ गै लोगा नै परोसण खातर चेला नै देण लागग्या। अर बा लोगा ऐ बांट दी।
42-43 जद सारा धाप ग्या तो चेला बचेडी रोटियां गी बारा टोकरियां भरली।
44 बि दिन लुगाईयां अर टाबरा गै अलावा बठै पांच हजार आदमिया भोजन करयो।
यीसू गो पाणी पर चालणो
45 इंगै तुरंत बाद में यीसू आपगै चेला नै आगै किस्ती पर बिठागे गलील झील गै पार बेतसैदा गाम में भेज दिआ। अर फेर भीड़ पाछी आप आपगै गाम में भेज दी।
46 भीड़ ऊं विदा लेगे यीसू आप पराथना करण खातर एक प्हाड़ी पर उड़ग्या।
47 जद आथण होण लागगी जद तांई किस्ती झील गै बिचाळै पूग गी। अर यीसू पहाडी पर एकला ईं हा।
48 बां चेला नै बडी मेहनत ऊं किस्ती चलाणता देख्या। क्यूंकै पून बांगै सामली चालै ही। अर दिन गै पेली यीसू पाणी पर चाल गै बांगै कनै गेया। बे चेला ऊं आ'गे निकळ आळा ही हा।
49 पण चेला यीसू नै पाणी पर चालता देखागे सोच्यो कै ओ भूत है अर बे चिलाण लागग्या।
50 क्यूंकै जद बां सारा बानै देख्यो तो बे घबरा ग्या। पण यीसू बानै तुरंत केयो, “हिम्मत राखो। मैं ई हूं डरो ना।”
51 फेर यीसू बांगी किस्ती पर चढ ग्यो अर हवा रुकगी। ओ देखगे चेला हेरान हो'ग्या।
52 पांच रोटियां गै चमत्कार नै देखण गै बाद में ई चेला समझ कोनी पाया कै यीसू कनै किती ताकत है क्यूंकै बे कठोर दिल गा हा।
गनसरेत में बीमारा नै ठीक करणो
53 फेर झील पार कर'गे गनसरेत प्रांत कनै पूग्या अर किस्ती नै किनारै पर लगाई
54 जिंया ई यीसू अर बिंगा चेला किस्ती पर ऊं उतरया तो बठै गै लोगा बानै पिछाण लिया।
55 अर लोग भाज भाज गै गामां मूं बीमार लोगा नै मांची पर घाल घाल गै ल्याण लागग्या जठै बा सुण्यो कै यीसू बठै है।
56 जठै कठैई यीसू गेया, चायै बो गाम हो, चायै बो सैहर हो बठै लोग बीमार लोगा नै ले जा'गे बजारा में सुणा दिया जठू यीसू नै जाणो हो बठै लोग गिडगिडागे केण लागग्या कै थे म्हानै थारै कपडै गै पलै गै ई हात लगा लेण दयो। अर जिताई लोग बांगै हात लगावा सारा ठीक होये आवा।