यूहना 6

पांच हजार लोगा नै जिमाणो

(मत्ती 14:13-21; मरकुस 6:30-44; लूका 9:10-17)

1 इंगै बाद यीसू गलील गी झील गै दूसरी पार उड़ग्यो। गलील झील गो दूसरो नाम तिबिरियास बी है। 2 यीसू बीमारां नै ठीक करण गा चमत्कार देखगे भोत मोटी भीड़ बिंगै कनै आ'गी। 3 यीसू चेला गै सागै ऊंची जिग्या पर जा'गे बैठग्यो। 4 बा दिना में यहुदियां गी फसह गै त्यूंहार कनै हो।

5 जद यीसू चारूंमेर देख्यो कै एक भोत मोटी भीड़ बिंगै कानी आण लागरी है यीसू फिलिप्पुस ऊं पूछयो, “आपां आ सगळा लोगा खातर रोटी कठूं ल्यावांगा?” 6 यीसू आ बात बिनै परखण खातर केई ही क्यूंकै बो तो जाणै हो कै बो अठै के करसी? 7 फिलिप्पुस उतर दियो, “गुरूजी, एक एक नै थोड़ी थोड़ी रोटी खूआण खातर दो सौ दिन गी मजदूरी गै पीसा गी रोटी खरीद गै ल्यावांगा तो बी पूरी कोनी आसी।”

8 बिंगा चेला मूं समौन पतरस गै भाई अन्द्रियास बिनै केयो, 9 “अठै एक छोटो छोरो है। बिंगै कनै जौ गी पांच रोटी अर दो मछलियां है पण इता लोगां खातर बे भोत थोड़ी है।”

10 जद यीसू केयो, “सारा लोगा नै रोटी खाण खातर बिठा देवो,” बि जिग्या पर भोत घास ही, ईंखातर सारा लोग घास पर बेठ ग्या, बठै आदमिया गी गिणती पांच हजार ही। 11 जद यीसू रोटियां ली अर परमेसर गो धन्यवाद कर'गे बाटण खातर आपगै चेला नै दे दी फेर मछलियां लेगे बिंया ई करयो। जिती लोगा नै इच्छा ही बा बिती ई खाई।

12 जद बा लोगा गो पेट भरीज ग्यो तो यीसू आपगै चेलां नै केयो, “झिकी रोटियां गा टुकड़ा बच गया हा बानै भेळा कर ल्यो कै बे खराब ना होवै। 13 फेर चेला रोटियां गै टुकाड़ा नै भेळा करया झिका जौ गी पांच रोटियां ऊं इती रोटी बचगी अर बिऊं बारा टोकरी भरीज गी।”

14 लोगा यीसू गै ईं चमत्कार नै देखगे केण लागग्या साची ओ बो ई परमेसर गी बात बताण आळो है झिकै नै ईं संसार में आणै गो म्हे इंतजार करण लागरया है। 15 यीसू ओ जाणग्यो कै ऐ लोग मनै राजा बणाणो चावै है फेर यीसू एकलो एक ऊंची जिग्या पर उड़ग्यो।

यीसू गो पाणी पर चालणो

(मत्ती 14:22-33; मरकुस 6:45-52)

16 जद आथण होयो तो बिंगा चेलां झील गै किनारै गेया। 17 अन्धेरो बोळो हो'ग्यो फेर बी यीसू बांगै कनै अजे तांई कोनी आयो अर चेला एक नाव में बेठगे कफरनहूम कानी चाल पड़या। 18 आंधी गै कारण झील में पाणी गी लेहरा उठण लागगी। 19 लगभग पाणी गै पांच छ: किलोमीटर जाण गै बाद बा देख्यो कै यीसू पाणी गै उपर चालगे बांगै कानी आण लागरयो है। बे भोत डर गया। 20 पण यीसू बानै केयो, “डरो ना, मैं हूं।” 21 चेला यीसू नै नाव में बिठाण खातर तैयार हो'ग्या, बि टेम नाव बि जिग्या उड़गी जठै बा जाणो हो।

लोगो द्वारा यीसू नै ढूंढणो

22 दूसरै दिन लोगां गी भीड़ झिकी झील गै दूसरी पार रेगी ही जठै ऊं चेला चाल्या हा, बानै ठा हो कै बठै यीसू गा चेला नाव में हा पण यीसू बांगै सागै कोनी गेयो। 23 फेर तिबिरियास नाम एक सेहर ऊं कोई नाव आई। बे बि जिग्या पोंच ग्या जठै परमेसर गो धन्यवाद देण गै बाद प्रभु यीसू लोगा नै रोटी खुवाई ही। 24 जद बण भीड़ देख्यो, बि जिग्या ऊं चेला अर यीसू उड़ग्या तो बे लोग बि नाव में बैठगै यीसू नै ढूंढता कफरनहूम उड़ग्या।

यीसू जीवन गी रोटी

25 झील गै पार जद बे बिनै मिल्या तो पूछयो, हे गुरूजी थे अठै कद आया। 26 यीसू उतर दियो, “मैं थानै साची साची केऊं कै थे चमत्कार देख्यो है ईंखातर थे मनै कोनी डूंडो हो पण ईंखातर कै थे रोटी खा'गे धाप ग्या हा। 27 मैं थानै केऊं हूं कै, ईं संसार में नास होण आळी रोटी खातर मेहनत ना करो पण झिकी रोटी हमेसा रेवै है अर अनन्त जीवन देवै है बि खातर थे मेहनत करो। बा सिरफ मैं परमेसर गो बेटो दे सकूं क्यूंकै बा देण खातर पिता परमेसर केवल मनै अधिकार दियो है।”

28 लोगां बिनै पूछयो, “झिका काम परमेसर चावै है बानै करण खातर म्हे के करां?” 29 यीसू बानै उतर दियो, “परमेसर गो काम ओ है कै झिकै नै बण भेज्यो है बि पर बिस्वास करो।”

30 जद बा बिनै केयो, “तनै परमेसर भेज्यो है ओ म्हे किंया बिस्वास करा तू म्हानै के चमत्कार दिखावैगो। 31 जद म्हारा बडेरा बन उजाड माखर जाण लागरया हा। बानै मन्ना नाम गी रोटी खाण खातर दी क्यूंकै पवितर सासतर में इंया लिखेड़ो है कै परमेसर बानै सुरग ऊं खाण नै रोटी दी।” 32 यीसू बानै केयो, “मैं थानै साची साची केऊं कै सुरग ऊं खाण खातर रोटी थानै मूसा कोनी दी पण मेरै पिता थानै सुरग ऊं साची रोटी देवै है। 33 क्यूंकै परमेसर कानूं आण आळी रोटी आ है झिकी सुरग ऊं उतरगे संसार गै लोगां नै जीवन देवै है।” 34 लोगां बिनै केयो, “हे गुरूजी अब म्हानै बा रोटी दे अर सदा देवंतो रे।” 35 जद यीसू बानै केयो, “मैं ई बा रोटी हूं झिकी जीवन देवै है झिको मेरै कनै आवै है बो कदी भूखो कोनी रेवेगो अर झिको मेरै उपर बिस्वास करै है बिनै कदी तीस कोनी लागै। 36 मैं थानै पेला ई बता दियो कै थे मनै देख लियो है फेर बी थे मेरै पर बिस्वास कोनी करो। 37 हर एक आदमी झिको परमेसर मनै दियो है बो मेरै कनै आवैगो झिको मेरै कनै आवैगो बिनै मैं कदी कोनी काड़ूं। 38 क्यूंकै मैं सुरग ऊं आपगी इच्छा गै अनुसार काम करण कोनी आयो पण मेरै भेजण आळै गी इच्छा पूरी करण आयो हूं। 39 मेरै भेजण आळै गी आ इच्छा है कै झिको कीं बण मनै दियो है बामूं किनई खोऊं ना पण अन्त में न्याय गै दिन है दिन सगळा नै जींवता कर देऊंगां 40 आई मेरै परम पिता गी इच्छा है हर एक आदमी झिको बेटै नै देखे है, बिमै बिस्वास करै है, बो अनन्त जीवन पावेगो अर अन्तिम न्याय गै दिन बिनै जींवतो कर देऊंगा।”

41 ईंखातर यहुदी लोग झिका बिनै डूंडै हा बि पर रीस बळण लागग्या क्यूंकै यीसू केवंतो हो बा रोटी मैं हूं झिकी सुरग ऊं उतरी है। 42 अर बा केयो, “ओ युसुफ गो बेटो यीसू है इंगै मां बाप नै बी आपां जाणा हा फेर ओ किंया केवै है कै मैं सुरग ऊं उतरयो है।” 43 यीसू बानै उतर दियो, “आपसरी में चुगली ना करो।” 44 जद तांई मेरो भेजण आळो किन्ही मेरै कनै आप कोनी ले आवै जद तांई कोई मेरै कनै कोनी आ सकै। 45 परमेसर गी बात बताण आळा आपगै लेखा में लिख्यो है कै परमेसर खुद बा सारा नै सिखायड़ा हो'सी अर झिको कीं पिता ऊं सुणयो अर सीख्यो है बो मेरूं कनै आवै है। 46 इंगो मतलब ओ कोनी कै कणैई मेरै पिता नै देख्यो है सिरफ मैं ईं बिनै देख्यो है। कणैई मेरै पिता नै कोनी देख्यो। केवल मैं ई बिनै देख्यो है क्यूंकै मैं परमेसर कनूं आयो हूं। 47 मैं थानै साची साची केऊं झिको कोई बिस्वास करै है बो अनन्त जीवन पावै है। 48 मैं ई बा रोटी हूं झिकी जीवन देवू हूं। 49 थारै बडेरा बन उजाड में मन्ना खायो हो फेर बी बे मरग्या हा। 50 अब जे कोई सुरग ऊं उतरेड़ी रोटी खावै तो बो कोनी मरै। 51 मैं ई बा जींवती रोटी हूं झिकी सुरग ऊं उतरी हूं जे कोई ई रोटी नै खावै है बो सदा जींवतो रेवेगो अर झिकी रोटी मैं बिनै देऊंगा बा मेरो सरीर है इऊं संसार गा लोग जींवता रेवैगा। 52 फेर यहुदी लोग आपसरी में बैस करण लागग्या, ओ आपगो सरीर आपां नै खाण खातर किंया दे सकै है। 53 ईं पर यीसू बानै केयो मैं थानै साची साची केऊं हूं जद तांई थे मिनख गै बेटै गो सरीर ना खाओ अर बिंगो लोई ना पीओ तो जद तांई थानै जीवन कोनी मिल सकै। 54 झिको मेरो सरीर खावै है अर मेरो लोई पीयै है अर अनन्त जीवन बिंगो है। अनन्त गै दिन में बिनै जींवतो कर देऊंगा। 55 मेरो सरीर सच्ची रोटी है अर मेरो लोई पीण गी सच्ची चीज है। 56 झिको मेरै सरीर नै खावै है अर मेरो लोई पीयै बो मेरै सागै मिलगे रेवै है अर मैं बिंगै सागै। 57 जींवते पिता मनै भेज्यो है अर मैं पिता ऊं ई जींवतो हूं बिंया ई कोई बी मनै खावैगो तो बो मेरै कारण जींवतो रेवेगो। 58 सुरग ऊं उतरी रोटी मैं हूं। आ रोटी थारै बडेरा खाई भिसी रोटी कोनी। बां लोगा बा रोटी खाई अर बे मर गया। पण जे कोई आ रोटी खावैगो बो सदा जींवतो रेवेगो। 59 ऐ बातां बण कफरनहूम गै एक सतसंग घर में उपदेस देवंता टेम केई।

अनन्त जीवन गा बचन

60 यीसू गा भोत सारा चेला आ बात सुणगे केयो, “ऐ बाता भोत करड़ी है। आनै कुण सुणै है।” 61 यीसू नै अपणै आप ई पतो चाल गेयो कै बिंगा चेला ईं बात पर बड़बड़ावै है ईंखातर बण बानै केयो, “ऐ बातां सुणगे मेरै उपर ऊं थारो भरोसो कमजोर हो'ग्यो है के? 62 इयां है तो थे मिनख गै बेटै नै बिंगी पेला रेणै आळी जिग्या सुरग पर चढता देखोगा तो के बोलैगा? 63 आत्मा तो जीवन देण आळी है। आदमियां गी कोसिस कीं काम गी कोनी झिका बचन मैं थानै केया है बे ई आत्मा है अर बा'ईं जीवन देवै है।” 64 पण थारै में केई हिस्या है झिका बिस्वास कोनी करै क्यूंकै यीसू पेला ई जाणो है कै झिका बिस्वास कोनी करै अर बे कुण है मनै पकड़ावैगा। 65 अर यीसू बानै केयो, “जद तांई मेरो पिता मेरै कनै आण गी आग्या ना देवै जद तांई कोई बी मेरै कनै कोनी आ सकै।”

पतरस गो बिस्वास

66 ईं कारण भोत सारा यीसू गा चेला पाछा उड़ग्या अर बा यीसू गै लारै चालणो छोड दियो। 67 फेर यीसू आपगै बारा चेला नै केयो कै, “थे बी जाणो चावो हो कै?” 68 समौन पतरस बिनै उतर दियो है, “हे गुरूजी, म्हे किंगै कनै जावांगा बे बचन तो तेरै कनै झिका अनन्त जीवन देवै है। 69 अब म्हे ओ बिस्वास कर लियो अर जाणा हा तू ई पवितर है झिकै नै परमेसर भेज्यो है।” 70 यीसू बानै उतर दियो, “थानै बारा नै मैं ईं चुण्या है फेर बी थारै माऊं एक सैतान है।” 71 ओ बण समौन इस्करियोति गै बेटै यहूदा गै बारै में केयो है क्यूंकै बो यीसू गै खिलाफ होगे बिनै पकड़ाण आळो हो अर बो ई बिंगै बारा चेला माऊं एक हो।