यीसू अर बिंगा भाई
7
1 आ बातां गै बाद यीसू गलील प्रदेस गै गाम गाम में जावंता रेया। बो यहुदियां प्रदेस गै गाम में जाणो कोनी चावै हो क्यूंकै यहुदी अधिकारी बिनै मारण गी योजना बणाण लागरया हा।
2 यहुदियां गो झोपडीया गा त्यूंहार आण आळो हो।
3 ईंखातर बिंगै भाईया बिनै केयो थानै आ जिग्या छोड़गे यहुदियां जाणो चईयै कै बठै बी तेरा चेलां तेरै कामा नै देख सकै।
4 कोई बी आदमी झिको लोगां गै बिचाळै आपगो नाम ऊंचो करणो चावै है बो आपगै काम नै लको कोनी सकै क्यूंकै ऐ सारा काम करण लागरयो है। आंगो पूरी दुनिया नै पतो लागणो चईयै।
5 क्यूंकै बिंगा भाई बी बि पर बिस्वास कोनी करता हा।
6 यीसू बानै केयो, “मेरै खातर सई टेम कोनी आयो पण थारै खातर सारो टेम सई है।
7 संसार गा लोग थारूं बैर कोनी कर सकै पण बे मेरूं बैर करै है, क्यूंकै मैं बांगै बारै में बोलतो रेऊं हूं कै बांगा काम गन्दा है।
8 थे लोग त्यूंहार में जाओ, मैं अब ईं त्यूंहार में कोनी जाऊं क्यूंकै अजे तांई मेरो सई टेम कोनी आयो।”
9 बो बानै ऐ बातां केगे बठै ई गलील में रेग्यो।
10 जद बिंगा भाई त्यूंहार में गयो तो बो बी उड़ग्यो पण किन्ही ना बता गै उड़ग्यो।
11 यहुदियां अधिकारियां त्यूंहार में बिनै ओ केगे भालण लागग्या कै बो कठै है।
12 त्यूंहार में भोत सारी भीड़ ही, बे लोग यीसू गै बारै में होळै होळै आपसरी में बातां करां, बो भलो आदमी है अर कोई केवै बो आच्छो कोनी, बो लोगा नै भरमावै है।
13 कोई बी बिंगै बारै में खुलगे बात कोनी करै हो क्यूंकै बे लोग यहुदी अधिकारियां ऊं डरता हा।
त्यूंहार में यीसू गो उपदेस
14 जद त्यूंहार आदो बीत ग्यो हो जद यीसू मिन्दर में आ'ग्यो अर उपदेस देणो सुरू कर दियो।
15 जद यहुदी अधिकारियां बिंगी सिक्सा नै सुणगे अचंभो करयो अर केयो, ओ आदमी कदी म्हारी धारमिक पाठसाला में कोनी आयो, फेर बी इनै इतो ग्यान किंया होयो।
16 यीसू बानै केयो, “झिको उपदेस मैं देवूं हूं बो मेरो उपदेस कोनी पण बिंगै कनू आयो है, झिकै मनै भेज्यो है।”
17 जे कोई साची परमेसर गी आग्या गो पालण करणो चावै तो, बो ईं उपदेस गै बारै में जाण जावैगो कै बो परमेसर गी ओर ऊं है या मेरी ओर ऊं केऊं हूं।
18 झिको आपगै मन ऊं कीं केवै है बो आपगी बडाई करै है पण झिको आपगै भेजण आळै गी बडाई चावै है बो सच्चो है अर बिमै झूठ कोनी।
19 मूसा थानै परमेसर गा नेम दिया है। फेर बी थे बानै मान्या कोनी। अर थे मनै मारण गी कोसिस करण लागरया हो।
20 लोगां उतर दिया कै तेरै में ओपरी सवार है, म्हे तनै मारणो कोनी चावा।
21 यीसू बानै उतर दियो, “सब्त गै दिन मैं एक ई चमत्कार करयो हो अर ईंखातर थे लोग चमक गेया है के?”
22 अर मूसा थानै खतनै गी आग्या दी है ईंखातर सब्त गै दिन बी जे थारै बेटै गो खतनै गै दिन आयो तो थे खतनो करो हो, मैं साची बताऊं तो खतनो मूसा गी ओर ऊं कोनी ओ तो म्हारै बडेरा गी ओर ऊं चालतो आवै हो।
23 मूसा गो देऐडे़ नेम गो पालण करण खातर सब्त गो दिन जे थे खतनो कर सको हो तो फेर मैं ईं आदमी नै पूरी रीति ऊं सब्त गै दिन ठीक कर दियो तो थे मेरै पर रीस क्यों करो?
24 थे मूह देखे न्याय ना करो पण सच्च अर झूठ नै समझगे न्याय करो।
के यीसू ई मसी है?
25 फेर यरुसलेम में रेण आळै लोगा माऊं कीं जणा केयो, “ओ पक्को बो ई आदमी है झिकेनै मारण गी कोसिस करी जावै है।
26 पण देखो, बो सारै लोग गै बिचाळै बोलण लागरयो है बे लोगां बिनै कीं कोनी केवै है कै यहुदी अधिकारियां सच्च में जाण लियो कै बो मसी है के?
27 पण ओ मसी कोनी हो सकै क्यूंकै आपां जाणा हा कै बो कठै गो हो। जद सच्चो मसी आवैगो तो कोई कोनी जाण सकै कै बो कठूं आवैगो।”
28 जद यीसू मिन्दर में उपदेस देण लागरयो हो बण ऊंची आवाज में केयो सच्ची थे जाणो हो कै मैं कुण हूं अर कठूं आयो हूं। पण मैं खुद गै अधिकार ऊं कोनी आयो झिकै मनै भेज्यो है बो सच्चो परमेसर है बिनै थे कोनी जाणो।
29 मैं बिनै जाणूं हूं क्यूंकै मैं बिंगी ओर ऊं आयो हूं ओर बण मनै भेज्यो है।
30 ईं पर बा बिनै पकड़णो चायो पण फेर बी पकड़ण खातर कणैई आ'गे हात कोनी करयो क्यूंकै अजे तांई बिंगै पकड़िजणै गो सई टेम कोनी आयो हो।
31 पण भीड़ माऊं भोत लोगा बि पर बिस्वास करयो अर केण लागग्या कै बो इयूं भोत चमत्कार कोनी दिखा सकै झिका अण दिखाया है। ईंखातर ओ ई मसी होवैगो।
यीसू नै पकड़ण गी कोसिस
32 भीड़ में लोग यीसू गै बारै चुपचाप बात करण लागरया हां ओ सुणगे फरीसियां अर मुख्य याजकां बिनै बन्दी बणाण खातर मिन्दर गै पेरेदार नै भेज्या।
33 फेर यीसू केयो कै, “थारै सागै थोड़ै टेम अर रेऊंगा अर फेर मैं पाछो बिंगै कनै उड़ जाऊंगा झिकै मनै भेज्यो हो।
34 थे मनै डूंडोगा पण कोनी डूंड सकोगा अर जठै मैं होऊंगा बठै थे कोनी आ सको।”
35 जद यहुदी अधिकारियां आपसरी में केण लागग्या ओ कठै जावैगो कै आपां इनै मिल कोनी सका। के ओ आपणो देस छोड़गे दूसरै सैहरा में रेण आळै यहुदी लोग अर गेर यहुदीयो गै बिचाळै जा'गे बानै बी उपदेस देवैगो?
36 आ के बात है झिकी बण केई कै थे मनै डूंडेगा पण मैं थानै लादू कोनी अर जठै मैं होऊंगा बठै थे कोनी आ सकोगा।
37 त्यूंहार गो आखरी दिन खास हो। यीसू खड़यो होगे ऊंची आवाज में केयो जे कोई तीसो है तो मेरै कनै आवै मैं झिको देऊं हूं बिनै पीओ।
38 पवितर सासतर में इयां लिख्यो है कै झिको मेरै पर बिस्वास करेगो बिनै मैं अनन्त जीवन देण आळी पाणी गी नदिया बगण लाग ज्यगी।
39 यीसू पवितर आत्मा गै बारै में ओ बचन केयो क्यूंकै झिको यीसू पर बिस्वास करै है बानै सारा नै पवितर आत्मा मिलण आळी ही। अब तांई पवितर आत्मा कोनी दी गेई ही क्यूंकै परमेसर गी ओर ऊं यीसू नै आदर समानa मिलण गै बाद ईं दी जावैगी।
40 भीड़ माऊं कीं लोग जद ओ सुण्यो तो बे केण लागग्या सच्च में ओ आदमी परमेसर गी बात बताण आळो है। झिकै गो परमेसर वायदो करयो हो।
41 अर कीं लोगा केयो ओ मसी है अर कीं लोगा केयो मसी गलील ऊं कोनी आवैगो इंया हो सकै है के?
42 क्यूंकै पवितर सासतर में लिखेड़ो है कै मसी दाऊद राजा गै वंस में अर दाऊद गै ई बेतलहम गाम में पैदा होवैगो।
43 ईं बात गै कारण लोगा गै बिचाळै फूट पड़ी।
44 बामूं कीं लोग बिनै पकड़णो चावा हा पण कणैई हात आ'गे कोनी करयो।
यहुदी अगुआ गो बिस्वास ना करणो
45 ईंखातर मिन्दर गै पेरादारा मुख्य याजकां अर फरीसियां कनै पुठा आग्या अर बां बानै पूछयो थे बिनै पकड़गे क्यूं कोनी ल्याया।
46 मिन्दर गै पेरेदारा उतर दियो, बो आदमी इती आच्छी आच्छी बाता सिखावै है अजे तांई कणैई हिसी बातां कोनी सिखाई। ईंखातर म्हे बिनै पकड़ कोनी सक्या।
47 फरीसियां बानै उतर दियो म्हानै लागै है कै बण थानै बी भरमा दियो।
48 यहुदी अधिकारियां अर फरीसियां माऊं कणैई बां पर बिस्वास कोनी करयो।
49 पण झिकै लोगा नै परमेसर गै नेमा गै बारै में कीं ठा कोनी बे बि पर बिस्वास राखै है। ईंखातर परमेसर बानै सराप देवैगो।
50 निकुदेमुस नै झिको पेला बिंगै कनै आयो बामूं एक हो बण केयो,
51 “आपणो नेम जद तांई किनैई दोसी कोनी मानै जद तांई बिंगी सुण ना लेवै अर बिंगो पतो ना लगा लेवै है कै बण के करयो है।”