8
1 पण यीसू जेतुन दरखत गै प्हाड़ पर उड़ग्यो।
2 दिनगे दिनगे बो फेर मिन्दर में आयो अर सारा लोग बिंगै कनै आया। ईंखातर बो बानै बेठगै उपदेस देण लागग्यो।
3 जद यहुदी धरम सासतरी अर फरीसी लोग बेबीचार करण आळी एक लुगाई नै पकड़गे बिनै सारा गै सामणै खडी करी,
4 अर यीसू नै केयो, “हे गुरूजी आ लुगाई बेबीचार करती पकड़ीजी है।
5 मूसा गो नेम म्हानै ओ बतावै है कै हिसी लुगाई नै तो पथरा ऊं मारणी चईयै थे इंगै बारै में के केवो हो?”
6 बा बानै फसाण खातर आ बात केई क्यूंकै बे चावै हा म्हानै कोई गळती मिलै पण यीसू नीचे झुकगे जमीन पर उंगली ऊं कीं लिखण लागग्यो।
7 क्यूंकै बे यीसू नै बारी बारी पूछण लागरया हा, ईंखातर यीसू सीधो खड़यो हो गेयो अर बानै केयो, “थारूं माऊं झिकै कदी पाप कोनी करयो बो पेलो पथर मारै।”
8 ओ केगे यीसू दुबारा झुकगे जमीन पर लिखण लागरयो।
9 जद लोगो ओ सुणयो तो सारा ऊं पेला बुड़ा अर बांगै बाद में जुआन एक एक कर'गे बठूं उड़ग्या। बठै बा लुगाई एकली यीसू गै सामै खडी रेई।
10 यीसू खड़यो होयो अर बि लुगाई नै केयो, “हे बेटी, बे सारा लोग अठुं उड़ग्या कै पण कणी तेरै पर दोस कोनी लगायो।”
11 लुगाई बोली, “हे प्रभु, कणी दोस कोनी लगायो।” यीसू केयो, “मैं बी तेरै पर दोस कोनी लगाऊं, जा अर फेर कदी पाप ना करी।”
यीसू जगत गी जोती
12 फेर यीसू लोगां नै केयो, “संसार गी जोती मैं हूं झिको मेरै लारै चालेगो बो अन्धेरै में कोनी रेवेगो, पण जीवन देण आळी जोती पावेगो।”
13 ईं बात पर फरीसियां बिनै केयो, “तू आपगी गवाई आप देवै है ईंखातर तेरी गवाई ठीक कोनी।”
14 यीसू बानै उतर दियो, “जे मैं आपगी गवाई आप कानूं देऊं तो बी मेरी गवाई ठीक है क्यूंकै मैं जाणूं हूं कै मैं कठूं आयो हूं अर कठै जाऊं, पण थे लोग नै ओ कोनी जाणो कै मैं कठूं आयो हूं अर कठै जाऊं।
15 थे दुनिया गै जियां न्याय करो हो, मैं किंगोई न्याय कोनी करूं।
16 जे मैं न्याय करूं बी तो मेरो न्याय सच्चो हो'सी क्यूंकै मैं एकलो न्याय कोनी करूं पण परमेसर पिता झिकै मनै भेज्यो हो बो अर मैं मिलगे न्याय करा हां
17 थारै नेमा में लिखेड़ो है कै दो जणा गी गवाई ठीक होवै है।
18 मैं आपगी गवाई आप देऊं अर मेरी गवाई पिता परमेसर बी देवै झिकै मनै घाल्यो है।”
19 बा बिनै केयो, “तेरो पिता कठै है?” अर यीसू मसी केयो, “थे मनै बी कोनी जाणो अर मेरै पिता नै बी कोनी जाणो। जे मनै जाणता तो थे मेरै पिता नै बी जाणता।”
20 मिन्दर में उपदेस देवंता होया दान पात्र गै कनै बण ऐ बाता केई पण बिनै कणी कोनी पकड़यो क्यूंकै दुख झेलगे मरण गो टेम अजे तांई कोनी आयो हो।
21 यीसू बानै एकर फेर केयो मैं उड़ जावूंगा थे लोग मनै डूंडोगा अर थे आपगै ई पापा में मर ज्योगा, जठै मैं जाऊं बठै थे कोनी आ सको।
22 फेर यहुदी अधिकारी आपसरी में केण लागग्या कै बो अपणै आपनै मार देणो चावै है क्यूंकै बण केयो, “थे बठै कोनी आ सको जठै मैं जाऊं।”
23 बण बानै केयो, “थे लोग नीचे ऊं हो पण मैं परमेसर पिता गै कनूं उपर ऊं आयो हूं। थे दुनिया गी ओर ऊं आएड़ा लोग हो। मैं दुनिया गी ओर ऊं कोनी आयो।
24 ईंखातर मैं थानै केऊं कै थे आपगै पापा में मरोगा। परमेसर गै बचन में इंया लिखेड़ो है कै जे थे बिस्वास ना करोगा कै मैं बो ई हूं तो थे आपगै पापा में मरोगा।”
25 फेर बा यीसू नै पूछयो, “तू कुण है।” यीसू बानै उतर दियो, “बोई हूं जिंया मैं सुरू में थानै केवंतो आऊं हूं।”
26 थारै बारै में मनै भोत कीं केणो अर न्याय करणो है पण मनै भेजण आळो सच्चो है अर झिको कीं बण मनै केयो है बो ई संसार नै केऊं हूं।
27 बे ओ कोनी जाण सकया कै बो पिता परमेसर गै बारै में केवै है।
28 फेर यीसू केयो, “जद थे मिनख गै बेटै नै करूस पर चढाओगा तो थे जाणोगा कै मैं बोई हूं झिको हूं अर अपणै आप कीं कोनी करूं पण पिता परमेसर झिको कीं मनै सिखायो है बोई मैं बोलूं हूं।
29 अर झिकै मनै भेज्यो है मेरै सागै है बण मनै कदी एकलो कोनी छोड़यो क्यूंकै मैं सदा बो करूं झिको बिनै आच्छो लागै।”
30 यीसू जद ऐ बाता केवै हो तो भोत सारै लोगा बिंगी बातां पर बिस्वास करयो।
सच्च थानै आजाद करसी
31 यहुदी लोग झिका यीसू गी बातां पर बिस्वास राखता हा यीसू बानै केयो, “जे थे मेरा बचन नै मानोगा तो सचमुच मेरा चेला बणोगा।”
32 अर सच्चाई नै जाणल्योगा अर बो सच्चो परमेसर थानै गुलामी में बंदेड़ा नै छुड़ा ल्यगो।
33 जद बा लोगा बिनै केयो, “म्हे तो अबरहाम गै वंस में पैदा होया हा अर कदी किंगैई गुलाम कोनी होया फेर तू ओ किंया केवै है गुलामी ऊं छुड़ा लेवूंगा।”
34 यीसू बानै उतर दियो, “मैं थानै सच्च सच्च केऊं हूं कै झिको कोई पाप करै हो बो पाप गै वस में है।
35 कोई गुलाम सदा परिवार गै सागै कोनी रे सकै पण बेटो सदा थारै सागै रे सकै है।
36 ईंखातर बेटो थानै छुड़ा दयगो सचमुच थे पाप गै वस माऊं छूट जाओगा।
37 मैं जाणूं हूं कै थे अबरहाम गै वस माऊं हो तो ई थे मनै मारणो चावो हो क्यूंकै मेरो बचन झिको मैं थानै सिखाऊं बिनै थे मानो कोनी।
38 मैं बो ई केऊं हूं झिको कीं मेरै पिता मनै दिखायो है अर थे बो कीं करो हो झिको थारै पिता ऊं सुणयो हो।”
39 बा बिनै उतर दियो कै म्हे अबरहाम गै वंस गा है। यीसू बानै केयो, “जे थे लोग अबरहाम गै वंस गा होवंता तो झिको अबरहाम करयो हो बो थे बी करता।
40 झिको साच्चो बचन में परमेसर कनूं सुणयो है बो ई थानै बताऊं हूं पण थे अब मनै मार देणो चावो हो, अबरहाम कदी इयां कोनी करयो हो।
41 पण थे आपगै असली पिता गो काम करो हो फेर बा यीसू नै केयो म्हे गळत सम्बद ऊं पैदा कोनी होया अर म्हारो एक ई पिता है अर बो परमेसर है।”
42 यीसू बानै उतर दियो, “जे परमेसर थारो पिता होवंतो तो थे मनै प्रेम करता क्यूंकै मैं परमेसर कनूं आयो हूं अर अब मैं अठै हूं मैं आपगी मरजी ऊं कोनी आयो पण बण ई परमेसर मनै भेज्यो है।
43 मैं झिको कीं केऊं हूं बिनै थे क्यूं कोनी समझो क्यूंकै थे मेरो बचन मानण खातर तैयार कोनी।
44 थे थारै पिता सैतान गी संतान हो अर थे थारै पिता गी इच्छा पर चालणो चावो हो। बो तो सुरूं ईं हत्यारो है अर सदा बण परमेसर गै सच्चै बचन गो बिरोध करयो है क्यूंकै बिमै कोई सच्च कोनी है बो झूठ बोलै है क्यूंकै झूठ बोलणौ बिंगी आदत है अर बो झूठ बोलण आळा गो बाप है।
45 मैं परमेसर गो सच्चो बचन ही बोलूं हूं। ईंखातर थे मेरो बिस्वास कोनी करो।
46 थारै माऊं कोई बी मनै पापी कोनी बणा सकै। मैं सच्ची बोलूं हूं ईंखातर थानै मेरै पर बिस्वास करणो चईयै।
47 झिको आदमी परमेसर गो है बो परमेसर गो बचन सुणगे बिंगो पालण करै है थे परमेसर गो बचन सुणगे बिंगो पालण कोनी करो क्यूंकै थे परमेसर गा कोनी।”
यीसू अर अबरहाम
48 ओ सुणगे यहुदी लोगा बिनै केयो कै म्हे ठीक कोनी केयो कै तू सामरी जिस्यो है अर तेरै में भूत है।
49 यीसू उतर दियो, “मेरै में कोई भूत कोनी पण मैं आपगै पिता परमेसर गो आदर करूं हूं अर थे मेरो आदर कोनी करो।
50 मैं आपगो आदर कोनी चाऊं पण एक तो है झिको चावै है कै लोग मेरो आदर करै अर बो सगळा गो न्याय करण आळो हो।
51 मैं थानै साची साची केऊं कै जे कोई मेरै बचन नै मानैगो तो बो कदी कोनी मरैगो।”
52 यहुदी लोगा बिनै केयो कै म्हे जाणग्या हा कै तेरै में ओपरी बडेड़ी है क्यूंकै अबरहाम अर परमेसर गी बात बताण आळा कद गा मरग्या हा पण तू केवै है कै जे कोई मेरै बचन नै मानैगो तो बो कदी कोनी मरै।
53 तू म्हारै बडेरा अबरहाम ऊं मोटो कोनी झिको मर ग्यो अर परमेसर गी बात बताण आळा बी मरग्या फेर तूं के केयो है? तू है कुण?
54 यीसू उतर दियो, “जे मैं आपगो समान चाऊं तो बो आदर कीं कोनी पण मेरो पिता परमेसर झिकै नै थे थारो परमेसर मानो है बो ई मेरो समान करै है।
55 थे तो बिनै कोनी जाण्यो पण मैं बिनै जाणूं हूं जे मैं केऊं कै मैं बिनै कोनी जाणूं तो मैं थारी तरियां झूठो मानीजूगा पण मैं बिनै जाणूं अर बिंगै बचन नै मानूं हूं।
56 मेरै धरती पर आण गै दिन गी आसा रखगे थारो पिता अबरहाम भोत खुस हो। अर बण देख्यो अर खुस होयो।”