यूहना 9

जन्म गै आंधै नै आंख्या गो दान

1 फेर यीसू रा में जावंता टेम जन्म ऊं एक आदै आदमी नै देख्यो। 2 जद यीसू गा चेला यीसू नै केयो, “हे गुरूजी, ओ आदमी आपगै पापा ऊं आंधो पैदा होयो है या आपगै मां बाप गै पापा ऊं।”

3 यीसू उतर दियो, “ना तो इंगै मां बाप पाप करयो है अर ना अण खुद। पण ओ ईंखातर आंधो पैदा होयो कै लोग बिंगै जीवन में परमेसर गै चमत्कार नै देख सकै। 4 मेरै भेजण आळै गा काम ऐ है कै आपां बिंगा काम दिन में ई पूरा करणा जरूरी है क्यूंकै रात आण आळी है झिकै मैं आपां कोई काम कोनी कर सका।” 5 यीसू केयो, “जद मैं संसार में हूं, मैं संसार गी जोती हूं।”

6 इतो केगे यीसू धरती पर थूक्यो अर माटी कर'गे बिंगी आंखयां पर लगा दी। 7 यीसू बिनै केयो, “अब तूं सीलोह गै कुण्ड गै कनै जा अर आपगी आंखयां धो ले,” फेर बण जा'गे आपगी आंखयां धो ली अर अब देखतां होया पाछो आयो (सीलोह गै मतलब है भेजा हुआ)।

8 जद बिंगै पड़ोसी अर झिका बिनै भींख मांगता देख्यो हो केण लागग्या, “मनै तो इयां लागै है कै ओ बो ई है झिको पेलां बेठगे भीख मांगतो हो।” 9 कीं लोगा केयो, “ओ बो ई है,” अर केईया केयो, “ओ बो कोनी पण बिंगै बरगो है जद बण आन्धै आदमी केयो मैं बो ईं हूं।” 10 जद बे बिनै पूछण लागग्या तनै दिखण किंया लागग्यो। 11 बण उतर दियो, “यीसू नाम गो एक आदमी मनै आपगै थूक ऊं माटी गीली कर'गे मेरी आंखयां पर लगाई अर मनै केयो जा'गे सीलोह कुण्ड में धो ले। मैं जा'गे आपगी आंखयां धोई अर मनै दिखण लागग्यो।” 12 फेर लोग बिनै पूछयो, “बो कठै है बण उतर दियो मनै ठा कोनी।”

फरीसियां गै द्वारा चंगाई गी जांच पड़ताल

13 जद लोग बिनै झिको पेला आन्धो हो कीं फरीसियां कनै ले आया। 14 बि दिन यीसू माटी गीली कर'गे बिंगी आंखया खोली ही बो सब्त गो दिन हो। 15 ईंखातर फरीसियां बिनै पूछयो तनै किंया दिखण लागग्यो। बण बानै केयो, बण माटी गीली कर'गे मेरी आंखयां गै लगाई अर फेर मैं धो ली जद मनै दिखण लागग्यो।

16 कीं फरीसी केण लागग्या, “ओ आदमी परमेसर गी ओर ऊं कोनी क्यूंकै ओ सब्त गै दिन गो पालण कोनी करै।” कीं केण लागग्या, “कोई पापी आदमी हिस्या चमत्कार जमाई कोनी कर सकै हो।” ईं तरियां बामै फूट पड़ गइ। 17 फेर बा बी आंधै आदमी झिको ठीक होयो बिनै केयो, “तेरी आंखयां ठीक करण आळा गै बारै में तूं के केवै?” जद बण केयो, “बो एक परमेसर गी बात बताण आळो है।” 18 यहुदी अधिकारी बिंगै मां बाप नै बुला'गे पूछयो जद तांई बि पर बिस्वास कोनी करयो कै बो आदमी आंधो हो अर बिनै आंखया ऊं दिखण लागग्यो। 19 बा बिंगै मां बाप नै बुला'गे पूछयो कै, “ओ थारो बेटो है के?” ओ जामतो ई आंधो पैदा होयो है के? अर अब इनै किंया दिखण लागग्यो है?

20 बिंगै मां बाप उतर दियो, “म्हे तो जाणा हा कै म्हारो बेटो है अर आंधो पैदा होयो हो।” 21 म्हे ओ कोनी जाणा कै ओ अब किंया दिखै अर ना म्हे ओ जाणा कै इंगी आखां कण ठीक करी है। इनै आपनै पूछो, क्यूंकै ओ अब सयाणो है अर आपगै बारै में ओ आप बता सकै है। 22 बिंगै मां बाप आ बात ईंखातर केई क्यूंकै बे यहुदी अधिकारियां ऊं डरता हा क्यूंकै बा'ईं पर पेला ई सहमती बणा ली कै झिको कोई यीसू नै मसी मानै तो बिनै सतसंग घर ऊं बारै काड़ देवांगा। 23 ईं कारण बिंगै मा बाप केयो कै बिनै आपनै पूछ ल्यो क्यूंकै बो सयाणो है।

24 जद बा ठीक होएड़ै आदमी नै दूसरै बुला'गे बिनै केयो, “परमेसर गै सामणै सच्च बोल क्यूंकै म्हे तो जाणा हा कै बो एक पापी आदमी है।” 25 बण उतर दियो कै मैं कोनी जाणू पापी है या कोनी मनै तो इतो ठा है कै पेलां मनै दिखै कोनी हो पण अब मैं देख सकूं हूं। 26 बा बिनै फेर केयो तेरै सागै बण के करयो। तेरी आंखयां किंया खुली। 27 बण बानै केयो, “मैं थानै साची बता दियो है अर थे सुण्यो बी है, अब दुसर क्यूं सुणनो चावो हो कै थे बी बिंगा चेला बणना चावो हो।”

28 ईं पर बा बिनै धमकायो अर केयो तू ई बिंगो चेलो है म्हे तो मूसा गा चेला हा। 29 म्हे जाणा हा कै परमेसर मूसा सागै बात करी ही पण म्हे कोनी जाणा ओ आदमी कठूं आयो हो। 30 बण उतर दियो, “अण मेरी आंखयां ठीक कर दी थे लोग फेर बी कोनी मानो कै ओ कठूं आयो है। आ अचंभे गी बात है। 31 आपां जाणा हा कै परमेसर पापियां गी बात कोनी सुणै पण जे कोई परमेसर नै आदर कर'गे बिंगी इच्छा पूरी करण आळो है बो बिंगी सुणै है। 32 कणी अजे तांई कोनी सुणयो कै कणैई कोई जन्म ऊं आन्धै गी आंखयां खोल दी होवै। 33 जे ओ आदमी परमेसर कनूं कोनी आएड़ो होवारै तो बो कीं कोनी कर सकै हो।” 34 बा बिनै उतर दियो, “तू पाप ऊं पैदा होयो है तनै म्हानै सिखाण गो अधिकार कोनी है। ईं तरियां यहुदी अधिकारियां बिनै सतसंग घर ऊं बारै काड़ दियो।”

आत्मिक आंधो

35 यीसू सुणयो कै बा बिनै सतसंग घर ऊं बारै काड़ दियो है जद यीसू गी मुलाकात बिंगै सागै होई तो बण केयो कै तू परमेसर गै बेटै पर बिस्वास करै है के? 36 बण उतर दियो, “हे गुरूजी बो कुण है कै मैं बि पर बिस्वास करूं।” 37 यीसू बिनै उतर दियो, “तूं बिनै देख लियो है अर बो ई है झिकै गै सागै तू अब बात करण लागरयो है।” 38 बण केयो, “हे गुरूजी मैं बिस्वास करूं हूं अर बिनै प्रणाम करयो।” 39 यीसू केयो, “मैं ईं संसार में फैसलो करण आयो हूं कै बे झिका कोनी देखे बे देखण लाग जावै अर बे झिका देखण लागरया है बे आंधा हो जावै।” 40 कीं फरीसी झिका यीसू गै सागै हा ओ सुणगे यीसू नै केयो, “सच्च में म्हे बी आन्धा हा कै?” 41 यीसू बानै केयो, “थे आंधा होवंता तो परमेसर थारै पाप नै माफ करै देवंतो पण थे तो बोलो हो कै म्हे देखा हा ईंखातर थारा पापा नै परमेसर माफ कोनी कर सकै।”