गुआळिया अर भेड़ा गो मिसाल
10
1 फेर यीसू केयो, “मैं साची साची केऊं जे कोई भेड़ा गै बाडै़ में जाणो होवै तो बारनै गै माखर जाणो चईयै पण जे कोई ओर रा ऊं चठ़ गै जावै है तो बो चोर अर डाकूं है।
2 पण झिको भेड़ां गो गुआळियो है बो बारनै गै माखर ई जावै है
3 अर भेड़ा गो चोकीदार बिंगै खातर बारनो खोल देवै है अर बो भेड़ा गो नाम लेगे बुलावै है अर भेड़ा बिंगी आवाज सुणगे बिनै पिछाण लेवै है अर बो बानै चराण खातर बारै ले जावै है।
4 जद बो आपगी भेड़ा नै बारै ले जावै है तो बो बांगै आ'गे चालै है अर सारी भेड़ा बिंगै लारै लारै चालै है क्यूंकै बे बिंगी आवाज पिछाण है।
5 भेड़ा कोई अणजाण गी आवाज सुणगे बारै कोनी आवै बे बिऊं दूर भाजै ज्य क्यूंकै बे बिंगी आवाज कोनी पिछाणै।”
6 यीसू बानै आ एक मिसाल दी पण बे कोनी समझ पाया।
यीसू आच्छो गुआळियो
7 ईंखातर यीसू बानै फेर केयो, “मैं थानै साची साची केऊं भेड़ा गो बारनो मैं हूं।
8 अर मेरै ऊं पेला जिता झूठा गुआळिया आया बे सारा चोर अर डाकू हा। ईंखातर मेरी भेड़ा बांगी आवाज कोनी सुनी।
9 मैं बारनो हूं। जे कोई मेरै द्वारा अन्दर जावैगो तो बो मुकती पावेगो अर बो अन्दर आ सकैगो अर बारै बी जा सकैगो। अर झिकी बिनै जरूरत है बो बिनै मिलैगो।
10 चोर केवल चोरी करण, अर मारणै अर खत्म करण खातर ई आवै है पण मैं जीवन देण खातर आयो हूं। मैं झिको जीवन देऊं हूं बो भरपूर अर आच्छो है।
11 आच्छो गुआळियो मैं हूं। आच्छो गुआळियो आपगी भेड़ा नै बचाण खातर आपगी जान बी दे देवै है।
12 झिको गुआळियो पीसा लेगे भेड़ा गी रुखाळी करै है बो ना तो गुआळियो है अर ना बांगो मालिक है। बे जंगली भेड़िऐ नै आवंता देखगे, भेड़ा नै छोड़गे भाज जावै है अर जंगली भेड़ियो बानै पकड़गे अर इनै बिनै कर देवै है।
13 पण झिको पीसा लेगे भेड़ा गी देखभाल करै है बो आच्छो गुआळियो कोनी है अर बो भेड़ा नै आपगी कोनी समझै।
14-15 पण भेड़ा गी आच्छी देखभाल करण आळो गुआळियो मैं ईं हूं। जिंया मेरो पिता मनै जाणै बिंया मैं बी आपगी भेड़ा नै जाणू हूं अर मेरी भेड़ा नै बचाण खातर में आपगी जान बी दे देऊं हूं।
16 मेरी ओर बी भेड़ा है झिकी ईं भेड़ा गै बाडै़ में कोनी बानै बी ईं बाडै़ में लेगे आणो जरूरी है। बे मेरी आवाज सुणेगी अर ईं बाडै़ में आ'गे एक ई भेड़ा गो माल अर एक ई गुआळियो हो'सी।
17 मैं आपगी जान देऊं हूं कै मैं फेर ऊं जींवतो हो जाऊं, ईंखातर मेरो बाप मेरूं प्रेम राखै है।
18 मेरी जान कोई लेवै कोनी पण मैं अपणै आप इनै आपगी इच्छा ऊं बिनै देऊं हूं। मेरै कनै इनै देण गो अधिकार है अर पाछी लेण गो बी अधिकार है। ओ आदेस मेरै पिता परमेसर दियो है।”
19 आ बाता गै कारण यहुदियां में एकर फेर फूट पड़गी।
20 बामूं भोत सारा केण लागग्या इमै भूत है अर ओ पागल है। आपां नै बिंगी बात सुनणी नई चईयै।
21 दूसरा केण लागग्या कोई भूत किंगी आंख कोनी खोल सकै अर ऐ बाता कोई हिस्यो आदमी कोनी कर सकै झिकै में भूत होवै।
यहुदियां गो अबिस्वास
22 फेर यरुसलेम में समरपण गो त्यूंहार हो। ऐ ठण्ड गा दिन हा।
23 यीसू मिन्दर में सुलेमान गै बरामदा में घुमण लगग्या हा।
24 जद यहुदियां बिनै घेर लियो अर केयो, “तू म्हानै कद तांई बेम में राखैगो, जे तू मसी है तो साफ साफ बता दे।”
25 यीसू बानै उतर दियो कै, “मैं पेला ईं थानै के दियो है कै मैं बो ई हूं। पण थे लोग मेरै केण पर बिस्वास कोनी करो अर मेरै पिता गै देएड़ै अधिकार ऊं झिकै चमत्कारा गो काम करूं हूं बे ई मेरी गवाई देवै है कै मैं बो ई हूं।
26 क्यूंकै थे मेरी भेड़ा मूं कोनी हो ईंखातर थे लोग बिस्वास कोनी करो।
27 मेरी भेड़ा मेरी आवाज पिछाण है अर बानै मैं पिछाणु हूं अर बे मेरै लारै चालै है।
28 मैं बानै अनन्त जीवन देऊं हूं। परमेसर बांगै पापा गी सजा कोनी देवैगो। मेरै रेवड़ मूं बानै कोई ओर ले कोनी सकैगो।
29 मेरै पिता झिकै भेड़ा मनै दी है बो सारा ऊं मोटो है। अर मैं पिता कनूं बानै कोई खोस कोनी सकै।
30 मेरो पिता अर मैं एक ई हा।”
31 फेर यहुदियां यीसू नै मारण खातर पथर चकया।
32 यीसू बानै केयो, “पिता गी सकती ऊं मैं तनै किता आच्छा आच्छा काम दिखाया है। बामूं किसै काम खातर मनै पथर मारो हो।”
33 यहुदियां बिनै उतर दियो, “कोई भले काम खातर म्हे तेरै पथर कोनी मारा पण तू झिको केवै है बिऊं तू परमेसर गो अपमान करै है तू एक आदमी होगे अपणै आपनै परमेसर बतावै है।”
34 यीसू उतर दियो कै थारै पवितर सासतर में कोनी लिखेड़ो कै, “मैं केयो थे सारा ईस्वर हो?”
35-36 म्हानै ठा है कै परमेसर गै बचन में झिकै लिखेड़ो है कदी झूठ कोनी होवै अर झिका लोगा नै परमेसर गो बचन दियो गेयो बानै बण ईस्वर केयो अर पिता परमेसर बांगै काम गै खातर मनै पवितर कर'गे संसार में भेज्यो है। ईंखातर मैं केयो, “मैं परमेसर गो बेटो हूं।” अर जद मैं इंया केऊं हूं तो थे क्यूं बोलो हो कै मैं परमेसर गो अपमान करूं हूं।
37 जे मैं मेरै बाप गा काम कोनी करूं तो मेरो बिस्वास ना करो।
38 पण जे मैं पिता गो काम करूं हूं तो चायै थे मेरै उपर बिस्वास ना बी करो, पण मैं झिका चमत्कार गा काम करया है बा पर तो बिस्वास करो। जद थे जाणोगा अर समझेगा कै पिता मेरै में है अर मैं पिता में हूं।
39 जद यहुदियां बिनै बन्दी बणाण गी कोसिस करी पण बे बिनै पकड़ ना सकया अर बो बांगै हात ऊं निकलग्यो।