यूहना 11

लाजर गी मोत

1 बैतनिय्याह गाम गो एक लाजर नाम गो आदमी बीमार हो। ओ बो ईं गाम हो जठै बिंगी भेन मरियम अर मारथा रेवंती ही। 2 मरियम बा लुगाई ही झिकी यीसू गै पगां पर सेंट लगागे आपगै बालां ऊं बिंगा पगां पूंछयो हा। बीमार लाजर इंगो भाई हो। 3 आ दोना भेनां यीसू नै समाचार भेज्यो, हे गुरूजी, झिकै ऊं तू प्रेम करै है, बो बीमार है।

4 ओ सुणगे यीसू केयो, “ओ रोग मरण खातर कोनी ओ परमेसर गी आदर समान खातर है अर ई बीमार ऊं ई परमेसर आपगै बेटै नै बी आदर समान दिरावैगो।” 5 यीसू मारथा अर बिंगी भेन मरियम अर लाजर नै प्रेम करतो हो। 6 फेर बी जद यीसू नै पतो लागग्यो कै लाजर बीमार है तो जठै बो रुक्यो हो बठै दो दिन ओर रुक्यो। 7 फेर यीसू आपगै चेला नै केयो आओ आपां यहुदियां प्रदेस पाछा चाला।

8 ईं पर बिंगै चेला बिनै केयो, “हे गुरूजी केई दिन पेला यहुदी अधिकारियां तेरै पर पथर मारण गी कोसिस करी ही अर तू फेर बठै ई जाण लागरयो है।”

9 यीसू उतर दियो, “दिन में बारा घंटा होवै है। जे कोई आदमी दिन गै चानणै में चालै तो बो ठोकर कोनी खावै क्यूंकै बो संसार गै चानणै में चालै है। 10 जे कोई रात में चालै तो बो ठोकर खावै है क्यूंकै बिमै चानणो कोनी है।”

11 ओ केण गै बाद चेला नै केयो, “आपणो मित्र लाजर सो ग्यो है पण मैं बिनै जगाण खातर जाऊं हूं।”

12 फेर चेला बिनै केयो, “हे गुरूजी, जे बिनै नींद आ'गी है तो बो जाग जावैगो।” 13 यीसू लाजर गी मोत गै बारै में चेला नै केवै हो पण चेला समझा कै नींद गै बारै में केवै है। 14 ईंखातर यीसू चेला नै साफ साफ बतायो कै लाजर मर ग्यो है। 15 मैं खुस हूं कै मैं बठै कोनी हो क्यूंकै जे मैं बठै होवंतो तो लाजर ना मरतो अर थे ओ चमत्कार ना देखता अर ना मेरै उपर बिस्वास करता। 16 फेर थोमा झिको दिदिमोस कुहावंतो हो बण दूसरो चेला नै केयो आओ आपां बी प्रभु गै सागै बठै चाला कै आपां बी बिंगै सागै मर सका।

यीसू गो दूसरै जीणो अर जीवन

17 बठै जा'गे यीसू नै पतो लागग्यो कै लाजर नै कबर में राखया चार दिन हो'ग्या। 18 बैतानिय्याह गाम यरुसलेम ऊं लगभग तीन किलोमीटर दूर हो। 19 भाई गै मरण पर मारथा अर मरियम गो होसलो बधाण खातर कई यहुदी लोग आएड़ा हा। 20 अर मारथा नै पतो लागग्यो कै यीसू आयो है तो बा बिनै मिलण गेई जद मरियम घर में ई रेई।

21 मारथा यीसू नै केयो, “जे तू अठै होवंतो तो मेरो भाई ना मरतो। 22 पण मैं अब बी जाणूं कै तू झिको कीं परमेसर कनूं मांगेगो बो तनै देवैगो।” 23 यीसू बिनै केयो, “तेरो भाई जी उठेगो।” 24 मारथा बिनै केयो, “मैं जाणूं हूं आखरी दिन जी उठण गो टेम आवैगो बि टेम बो जी उठेगो।”

25 यीसू बिनै केयो, “लोगां नै जीमता करण आळो अर अनन्त जीवन देण आळो मैं ईं हूं। 26 अर झिको जींवतो है अर मेरै उपर बिस्वास करै है बो कदी कोनी मरैगो। तू ईं बात पर बिस्वास करै है के?” 27 बण यीसू नै उतर दियो, “हा गुरूजी, मैं बिस्वास करूं हूं कै तू मसी है झिको परमेसर गो बेटो ईं संसार में आण आळो है।”

यीसू रोयो

28-30 यीसू अजे तांई गाम में कोनी पूग्यो हो अजे बठई हो जठै मारथा बिंगै सागै बात करी ही। जद मारथा बेगी बेगी बठूं उड़गी अर आपगी भेन मरियम नै होळे'सी बुला'गे केयो गुरूजी अठै ई है अर तनै बुलावै है। आ बात सुणतांई बा बेगी बेगी यीसू कनै आई। 31 फेर झिका यहुदी बिनै होसलो देण खातर घरै आएडा हा बा मरियम नै बारै जावंता देख ली अर सोचण लागग्या आ कबर पर विलाप करण खातर जावै है ओ सोचगे बिंगै लारै हो'ग्या।

32 मरियम जद बठै पुगी जठै यीसू हो तो बिंगै पगा पड़गी अर केयो जे थे अठै होवंता तो मेरो भाई ना मरतो। 33 यीसू जद बिनै अर बिंगै सागै आएड़ै यहुदियां नै रोवंता देख्या तो बिंगी आत्मा भोत दुखी होगी। 34 यीसू केयो, “थे बिनै कठै रखयो है?” बा बिनै केयो, “आ अर देख ले।” 35 यीसू गी आंखयां में आंसू आग्या। 36 जद यहुदी केण लागग्या देखो बो बिंऊ कितो प्रेम करतो हो। 37 पण बामूं कीं लोगा केयो, “बण आंधा गी आंखयां ठीक कर दी, यीसू कनै लाजर नै ठीक करण गी सकती कोनी हे के?”

लाजर नै जींवतो करयो जाणो

38 जद यीसू आपगै मन में एकर ओर भोत दुखी होयो अर कबर कानी गेयो। बा एक गुफा ही अर बिंगो मूं गै आ'गे एक मोटो पथर लागेड़ो हो। 39 यीसू केयो, “ईं पथर नै आगूं पासै करो। मरेड़ै गी भेन मारथा केयो, हे गुरूजी अब तांई तो बठै गिंध आण लागगी होवैगी क्यूंकै बिनै मरया चार दिन हो'ग्यो।”

40 यीसू बिनै केयो, “मैं तनै केयो है कै जे तू बिस्वास करेगी तो तू परमेसर गी बडाई देखेगी।”

41 जद बा बि पथर नै पासै कर दियो अर यीसू आपगी आंखया उपर कर'गे केयो, “हे पिता मैं थारो धन्यवाद करूं हूं कै थे मेरी सुण ली है।” 42 मैं जाणूं हूं कै थे सदा मेरी सुणो हो पण झिकी भीड़ च्यारूंमेर खडी है बिंगै खातर इंया बोलूं हूं कै सारा झिका अठै खड़या है बिस्वास करै कै थे मनै भेज्यो है।

43 ओ केगे बण ऊंची आवाज में केयो, “हे लाजर बारै आ जा।” 44 बो आदमी झिको मर ग्यो हो, बारै निकळ आयो बिंगा हात पग अजे तांई कफन ऊं बांदेड़ा हा, बिंगो मूं कपड़ा ऊं पळेटेड़ो हो। यीसू लोगां नै केयो इंगो कफन खोल दैयो अर जाण दैयो।

यीसू गै विरुद्ध योजना

45 जद झिका यहुदी लोग मरियम कनै आएड़ा हा अर बिंगो ओ काम देख्यो बामूं भोत सारा बि पर बिस्वास करयो। 46 पण बामूं कीं लोग फरीसियां गै कनै गेया अर झिको यीसू करयो हो बानै बतायो। 47 फेर महा याजक अर फरीसियां यहुदियां गी एक मोटी पंचायत बुलाई अर केयो आपां नै के करणो चईयै ओ आदमी भोत सारा चमत्कार दिखाण लागरयो है। 48 जे आपां बिनै इंया ई करता रेण दियो तो सारा लोग बिनै मसी मान लेवेगा अर रोमी लोग आ'गे आपणै मिन्दर अर देस पर कबजो कर लेवेगा।

49 कैफा नाम गो बि टेम गै महा याजक केयो थे लोग कीं कोनी जाणो। 50 अर आपणै देस गै सारै लोगा नै रोमी सरकार गै हाता ऊं बचाण खातर आपणै खातर एक आदमी गो मरणो आच्छो है। आ बात थानै समझणी चईयै। 51 आ बात बण आपगी ओर ऊं कोनी केई ही पण बो बि टेम गो महा याजक हो बण परमेसर गी बात करी ही कै यीसू लोगा खातर मरैगो। 52 अर केवल यहुदी लोगा खातर कोनी पण सारै संसार गा जिता बी परमेसर गै उपर बिस्वास राखण आळा लोग रेवै है बानै सारा नै भेला करण गै खातर बो मरण आळो है। 53 पण बि दिन ऊं बे यीसू नै मारण गी योजना बणाण लागग्या।

54 ईंखातर यीसू यहुदियां गै बिचाळै सारा गै सामै कोनी घुमयो अर यरुसलेम छोड़गे बन उजाड गै कनै इफ्राईम नगर में जा'गे चेला गै सागै रेण लागरयो। 55 यहुदियां गै फसह गो त्यूंहार आण आळो हो अर भोत सारा लोग आप आपणै गाम ऊं यरुसलेम कानी आवै हा कै बे फसह गै त्यूंहार ऊं पेला अपणै आपनै सुद्ध कर लेवै। 56-57 फेर मुखय याजका अर फरीसियां ओ आदेस दियो कै जे किनैई ठा है कै यीसू अठै है तो आ'गे मनै बतावै कै बिनै पकड़ सका। ईंखातर लोग यीसू नै भालण लागरया हा अर मिन्दर में खड़या होगे आपसरी में केवा हा कै थानै के लागै यीसू ईं त्यूंहार में आवैगो के?