यीसू गै पगा पर तेल ढोलणो
12
1 फसह गै त्यूंहार ऊं छ दिन पेला यीसू बैतनिय्याह गाम ऊं चाल पड़यो। बठै लाजर रेवंतो हो झिकै नै यीसू मरेड़ा मूं जींवतो करयो हो।
2 बठै यीसू गै आदर गै खातर आथण गी रोटी तैयार करी अर मारथा रोटी घाल दय है अर लाजर बी बांगै सागै रोटी खाण बेठ ग्यो।
3 जद मरियम जटामांसी ऊं बणाएड़ी आदै किले गी भोत मेंगी सेंट यीसू गै पगा पर लगायो अर आपगै बाळा ऊं बिंगा पग पूंछया जद बि सेंट गी सुरम सारै घरै में होगी।
4 जद बिंगै चेला मूं एक यहूदा इस्करियोति झिको बिनै धोखो देण आळो हो।
5 बण केयो ईं सेंट गो मोल लगभग एक साल गी मजदूरी गै बराबर है इनै बेचगे पीसा कंगाला नै देणा चईयै।
6 बण आ बात ईंखातर कोनी केई ही कै बो कंगाला गी चिंता करतो हो पण बो तो खुद चोर हो अर पीसा गी थैली बिंगै कनै रेवंती ही अर बिमै झिको कीं डालतो बिमुं कीं चोरी ऊं काड़ लेवंतो हो।
7 यीसू केयो, “बिनै तंग ना करो क्यूंकै बण मेरो सरीर दफन करण ऊं पेला सेंट लगागे तैयार करयो है।
8 क्यूंकै कंगाल तो थारै सागै सदा रेवैगा पण मैं थारै सागै सदा कोनी रेऊंगा।”
9 जद फसह गो त्यूंहार मानण खातर आएड़ा यहुदी लोग जाण गेया कै यीसू बैतनिय्याह गाम में है। ईंखातर बठै ग्या अर एकलै यीसू नै कोनी पण झिकै लाजर नै बण मरेडै़ नै जींवतो करयो हो बिनै बी देखण आया हा।
10 ईंखातर मुख्य याजकां लाजर नै बी मारण गी योजना बणाई ही।
11 क्यूंकै बिंगै कारण भोत सारा यहुदी लोग आपगै अधिकारियां नै छोड़गे यीसू पर बिस्वास करण लागग्या हा।
यरुसलेम में जीत गै जाणो
12 फेर दूसरै दिन फसह गो त्यूंहार मनाण आएड़ा भोत लोग सुणयो कै यीसू यरुसलेम में आण लागरयो है।
13 ईंखातर बा खजूर गी डालिया लेगे मिलण खातर चाल पड़या अर ऊंची आवाज में बोलण लागरया,
“होसना!”
“धन्य है बो झिको प्रभु गै नाम ऊं आवै है!”
“बो झिको इसराएल गो राजा है!”
14 जद यीसू नै एक गधै गो बच्चों दिखयो अर बो बि पर बेठगे जाण लागग्यो अर परमेसर गै बचन में जिंया लिख्यो हो बो पूरो होया, जिंया कै पवितर सासतर में लिख्यो है कै,
15 “यरुसलेम गा लोगो, ना डरो।
पण देखो थारो राजा गदियै गै बच्चै
पर बेठगे थारै सामणै आण लागरयो है।”
16 जद ऐ बात चेला गै कीं समझ ना आई पण यीसू गै जी उठण गै बाद जद पिता परमेसर गै कनै सुरग में उड़ग्यो जद बानै याद आयो अर समझयो कै ऐ बात बिंगै बारै में लिखेड़ी ही। लोग इंया कर'गे परमेसर गै बचन में झिको लिख्यो हो बिनै पूरो करयो हो।
17 जद यीसू लाजर नै कबर मूं बुला'गे मरेड़ा मूं जींवतो करयो हो जद भीड़ मूं झिका बिंगै सागै बठै हा, बा बिंगै करेडै़ चमत्कार गै बारै में दूसरा नै बतायो।
18 ईं कारण लोग बिऊं बाता करण नै आया हा क्यूंकै बा सुणयो है कै बण ओ चमत्कार करयो है।
19 जद फरीसी आपस में केण लागग्या, “सोचो थे लोग कीं कोनी कर सकया, देखो सारा लोग बिंगै लारै हो'ग्या है।”
20 फसह गै त्यूंहार में झिका आराधना करण आया हा बामै कीं लोग गेर यहुदी हा।
21 बे गलील प्रदेस बेतसैदा गाम में रेण आळै फिलिप्पुस कनै गेया अर बिनै बिनती करी महोदय, म्हे यीसू गो दरसण करणो चाआ हां।
22 फेर फिलिप्पुस अन्द्रियास नै आ'गे बतायो अर फेर अन्द्रियास अर फिलिप्पुस यीसू कनै आ'गे केयो।
23 यीसू बानै उतर दियो, मिनख गै बेटै नै आदर मिलण गो टेम आ'ग्यो।
24 मैं तनै साची केऊं कै जद तांई कणक गो दाणो धरती गै मां जा'गे मर कोनी जावै जद तांईं बो एकलो रेवै है। जद बो मर जावै है तो भोत सारा दाणा नै जन्म देवै है बिंया ई जद मैं मरूंगा तो भोत लोगा नै अनन्त जीवन मिलैगो।
25 झिको कोई आपगै प्राण नै प्यारो जाणै है बिनै अनन्त जीवन कोनी मिलैगो पण झिको ईं संसार में आपगै प्राणा ऊं बोळो प्रेम मेरै उपर राखै है बिनै अनन्त जीवन मिलैगो।
26 जे कोई मेरी सेवा करै तो बो मेरै लारै हो जावै अर जठै मैं हूं बठै मेरो सेवक बी होवैगो। जे कोई मेरी सेवा करै तो पिता बिंगो आदर करेगो।
करूस गी मोत गो इसारो
27 अब मेरो जी धबराण लागरयो है। मैं के केऊं, “हे पिता, मनै दुख गी ईं घड़ी ऊं बचा, मैं ओ केयो कोनी सकूं, क्यूंकै ओ दुख सेण खातर मैं ईं संसार में आयो हूं।
28 हे पिता थे किता म्हान हो कै लोगां नै दिखाओ। जद परमेसर सुरग ऊं बोल्यो अर लोगां नै सुणीज्यो कै पेला बी दिखा दियो है कै मैं कितो म्हान हूं अर फेर बी दिखाऊंगा।”
29 जद बठै खड़या लोग सुणै हा, बा केयो कै बादळ गरजयो है। दूसरा केयो, कोई सुरगदूत बिनै बोल्यो है।
30 जद यीसू केयो, “आ आवाज मेरै खातर कोनी पण थारै फाएदे खातर है।
31 अब ईं संसार गै लोगा गो न्याय करण गो टेम आ'ग्यो है अर अब संसार गै लोगां गै उपर राज करण आळी सैतान गी सकती नै परमेसर नास करेगो।
32 जद मनै मारण खातर धरती ऊं करूस पर चढायो जावैगो तो मेरै उपर बिस्वास राखण आळा सारै लोगा नै मैं आपगै कनै ले आऊंगा।”
33 बो ओ बताणो चावै है कै मैं हिसी मोत मरूंगा।
34 ईं पर लोग बिनै केयो, “परमेसर गै बचन ऊं मानै ठा लागै है कै मसी कदी कोनी मरैगो। फेर तू क्यामी केवै है के मिनख गै बेटै नै मारण खातर करूस पर चढायो जाणो जरूरी है तो फेर ओ मिनख गो बेटो कुण है?”
35 यीसू बानै केयो, “मैं थारै खातर एक जोती हूं अर अब थोड़ी देर तांई मैं थारै सागै रेण आळो हूं। बिंगै बाद थे अंधकार में चालण जिसा बण जाऊंगा अर झिको अंधकार में चालै है। बो कोनी जाणै कै किनै जावै है। ईंखातर जद तांई मैं थारै सागै हूं जद तांई थे जोती में चालण आळा बणो।
36 जद तांई जोती थारै सागै है बिमै बिस्वास राखो कै थे लोग जोती गी संतान हो सको।” यीसू इतो केगे उड़ग्यो अर बांगी आंख्यो ऊं आ'गे दूर रेयो।
यहुदियां गो अबिस्वास में बण्यो रेणो
37 बण बांगै सामै इता चमत्कार दिखाया तो बी बा बि पर बिस्वास कोनी करयो।
38 ओ सारो कीं बि तरियां यसयाह परमेसर गी बात बताण आळो गै किताब में लिखेड़ो हो,
“प्रभु म्हारै संदेस पर कुण बिस्वास करयो है
अर प्रभु गी सकती कण देखी है?”
39 ईं कारण बे बिस्वास कोनी कर सकया क्यूंकै यसयाह फेर केयो हो,
40 परमेसर बांगी आंखयां आंधी कर दी
अर बांगो मन कठोर कर दियो।
ईंखातर बांगी आंखयां देख कोनी सकै
अर बांगा दिल समझ कोनी सकै
अर मैं बानै ठीक करूं पण बे मेरी ओर आ कोनी सकै।
41 यसयाह ओ ईंखातर केयो हो कै बण यीसू मसी गी मेमां देखी ही अर बिंगै बारै में बात बी केई ही।
42 फेर बी यहुदी अधिकारियां मूं भोत लोग बि पर बिस्वास करयो। बे फरीसियों ऊं डरता हा। ईंखातर बां खुले तोर पर घोसणा कोनी करी क्यूंकै बानै डर हो कै कठैई म्हानै सतसंग घर ऊं बारै ना काड़ दय।
43 बानै आदमियां गो आदर परमेसर गै आदर ऊं ज्यादा आच्छो लागतो हो।
44 यीसू ऊंची आवाज में केयो झिको मेरै पर बिस्वास करै है बो मेरै पर ई कोनी पण मेरै भेजण आळा पर बी बिस्वास करै है।
45 झिको मनै देखे है मेरै घालण आळै नै बी देखे है।
46 मैं संसार में जोती गै रूप में आयो कै हर बो आदमी झिको मेरै पर बिस्वास राखै है अंधकार में ना रेवै।
47 जे कोई मेरी बातां सुणगे बांगो पालण कोनी करै तो मैं बिनै गुनहगार कोनी बणाऊं क्यूंकै मैं संसार नै गुनहगार बणगे फैसलो करण कोनी आयो पण संसार नै मुकती देण खातर आयो।
48 झिको मनै अर मेरी बाता नै तुछ मानै बिंगो फैसलो करण आळा मेरो बचन झिकै गो उपदेस मैं थानै दियो है। परमेसर लोगां गो फैसलो करण गै दिन मेरो बचन बांगो फैसलो करेगो।
49 क्यूंकै मैं आपगै कनूं कोनी केयो पण पिता झिकै मनै भेज्यो है अर उपदेस दियो है कै मैं के केणो है अर मैं के बताणो है।
50 मैं जाणूं हूं कै बिंगी आग्या अनन्त जीवन देण आळी है। ईंखातर मैं झिको बोलूं हूं बो जिंया पिता मनै केयो है बिंया ई बोलूं हूं।