यीसू गो यरुसलेम में जाणो
21
1 यीसू अर बिंगा चेला जद यरुसलेम कनै जेतुन प्हाड़ गै बैतफेगो पूग्या तो यीसू आपगै दो चेलां नै ओ आदेस देगे भेज दिया कै,
2 ईं सामले गाम में जाओ। बठै जाण तांई थानै एक गधी बांदेड़ी मिलैगी। बिंगै कनै बिंगो बच्चों होवैगो। बानै मेरै कनै लिआओ।
3 जे कोई थानै कीं केवै तो थे के दियो प्रभु नै इंगी लोड है। बेगो ई पाछी पुगादयगो।
4 ओ परमेसर गी बात बताण आळा गो बचन पूरो होण खातर इंया होयो कै,
5 यरुसलेम गा लोगों, देखो थारो राजा थारै कनै आण लागरयो है। बो दीन अर एक गधी गै बच्चै पर सवार है।
6 जद चेला जा'गे बिंया ई करयो जिंया यीसू केयो।
7 बे गधी अर बिंगै बच्चै नै ल्याया। अर बि पर आपगी चादर घाल दी क्यूंकै यीसू बि पर बैठणो है।
8 भीड़ गै लोगां आपगा पोतियां रा पर बिछा दिया अर केई लोगां दरखतां गी डाळिया बाड़ बाडगे रा में बिछा दी।
9 अर सारा लोग केवां,
“प्रभु गी जय जयकार होवै,
धन्य है दाऊद गो बेटो झिको प्रभु गै नाम ऊं आवै।
प्रभु झिको सुरग में विराजमान है बिंगी जय जयकार होवै।”a
10 जद बो यरुसलेम में बड़यो तो सारै नगर में रोळो मचग्यो, ओ कुण है?
11 लोगां इंया जबाब दियो, बो गलील गै नासरत गो परमेसर गी बात बताण आळो यीसू है।
यीसू मिन्दर में
12 जद यीसू मिन्दर गै आंगणे में आयो तो बठै लोगां गी लगाएडी दूकाना देखी। जद बण सारै दूकानदारा नै भजा दिया। अर सारा गी दूकाना खिण्डा दी।
13 बो बानै केण लागग्यो, सासतर इंया केवै, “ओ मेरो पराथना गो घर है।b पण थे इनै डाकुओं गो अड्डो बणा राखयो है।”c
14 मिन्दर में केई आंधा, लंगड़ा बि कनै आया बण बानै ठीक कर दिया।
15 जद मुख्य याजकां अर यहुदी नेम सिखाण आळा बिंगै चमत्कार गा काम देख्या अर लोगां गी ऊंची आवाज में सुण्यो कै प्रभु गी जय जयकार होवै। दाऊद गो बेटो धन्य है।
16 जद बानै रीस आ'गी अर बा पूछयो, “तू सुणै है कै के केण लागरया है?” यीसू बानै केयो, “सुणण लागरयो है।” थे सासतर में इंया कोनी पड्यो कै,
“थे टाबरां अर दूध पीण आळा टाबरा ऊं
बडाई करवाई है।”d
17 फेर बानै बठै ई छोड़गे यरुसलेम नगर ऊं बारै बेतनियाह उड़ग्यो अर रात नै बठै ई रेयो।
बिना फळ गै अंजीर गो दरखत
18 अगले दिन दिनगे दिनगे नगर ऊं पाछो आण लागरयो तो बिनै भूख लागी।
19 रा में बण एक अंजीर गो दरखत देख्यो अर बिंगै कनै गयो, पण बिंगै एक ई अंजीर कोनी लागेड़ो दिख्यो। जद बण केयो, “तेरै कदी फळ ना लागै। अर बो दरखत जद ई सूख ग्यो।”
20 जद चेला ओ देखगे हेरान हो'ग्या अर पूछयो, “ओ दरखत इतो बेगो किंया सुख ग्यो।”
21 यीसू उतर दियो कै, “मैं थानै साची केऊं कै जे थारै में बिस्वास है अर मन में बेम कोनी राखो तो झिको मैं ईं दरखत सागै करयो है बिंया ई थे जे ईं प्हाड़ नै के दयो, उठ अर समुन्दर में पड़ जा तो बिंया होवैगो।
22 थे पराथना में झिको कीं बिस्वास ऊं मांगो बो थानै मिल ज्येगो।”
यीसू गै अधिकार पर सवाल
23 जद यीसू मिन्दर में परचार करण लागरयो तो मुख्य याजक अर यहुदी बुडा लोगां बिंगै कनै आ'गे पूछयो, “हिसी बातां तू किंगै हक ऊं करै। ओ हक तनै कण दियो है।”
24 यीसू बानै उतर दियो, “मैं थानै एक बात पूछूं, जे थे जबाब देओगा मैं थानै बताऊंगा कै मनै ओ हक कण दियो है।
25 यूहना गो बतिस्मो कठूं होयो? परमेसर कानूं या मिनख गै कानूं।” जद बे आपसरी में बात कर'गे केण लागग्या, जे आपां के दियो, परमेसर कानूं होयो तो ओ पूछेगो तो थे बिस्वास क्यूं कोनी करयो?
26 जे के दियो कै मिनख गै कानूं तो लोग आपां नै मारैगा क्यूंकै बो एक परमेसर गी बात बताण आळो हो।
27 जद बा केयो, “म्हानै ठा कोनी।” जद यीसू केयो, “फेर मैं थानै कोनी बताऊं, मैं ओ काम किंगै अधिकार ऊं करूं।”
दो बेटां गी मिसाल
28 थे इंगै बारै में के सोचो? एक आदमी गै दो बेटा हा। बण मोटै बेटै नै केयो, “आज अंगूरां गा बाग में जा'गे काम कर।”
29 बेटै केयो, “मैं कोनी जाऊं।” पण बाद में पछताओ कर'गे उड़ग्यो।
30 फेर बण छोटियो बेटै कनै जा'गे बिंया ई केयो। बण केयो, “पिता, मैं जाऊं।” पण बो गेयो कोनी।
31 थे बताओ, आ दोनां मूं पिता गो केणो कण मान्यो। बा केयो मोटोडे़ बेटै। यीसू केयो, “मैं थानै साची केऊं, चुंगी लेण आळा अर वेसिया लुगाईयां परमेसर गै राज में थारूं पेली जासी।”
32 मैं ईंखातर केण लागरयो हूं, “क्यूंकै बतिस्मो देण आळै यूहना थानै सई रा बताण आयो, पण थे बि पर बिस्वास कोनी करयो। पण चुंगी लेण आळा अर वेसिया लुगाईयां बि पर बिस्वास करयो। थे बानै देखगे मन कोनी बदळ्यो अर ना'ई बिस्वास करयो।”
बुरे किसान गी मिसाल
33 “एक ओर मिसाल सुणो। एक जमिन्दार हो। बण अंगूरां गो बाग लगायो अर बिंगै च्यारूंमेर बाड़ लगा दी अर रस काड़ण खातर एक कुण्ड बणायो अर ऊंचो डूंचियो रुखाळी खातर बणायो। फेर बाग नै ठेकै पर देगे प्रदेस उड़ग्यो।
34 जद अंगूर तोडण गो टेम आयो तो बाग गै मालिक आपगै दासा नै बाग ऊं पांती ल्याण घाल्या।
35-36 पण किसानां बानै कूट मारगे भजा दिया। फेर बण आपगै केई ओर दासा नै घाल्या, पण बांगै सागै बिंया ई करयो। केईयां नै कूटया, किनैई मार दिया अर किनैई पथर मारया।
37 फेर आपगै बेटै नै बाग में भेज्यो। बण सोचयो, मेरै बेटै गो आदर मान करसी।
38 पण किसानां बेटै नै देखगे आपसरी में केण लागग्या, ओ तो बिंगो वारिस है। आपां इनै मार दया तो बाग आपणो होज्यी।
39 जद बे बिनै घीसगे बारै लेग्या अर मार दियो।
40 अब थे बताओ जद बाग गो मालिक आवैगो तो बो किसानां सागै के करेगो?”
41 बा केयो, “बे दुस्ट लोग। ईंखातर बो बानै माडी मोत मारेगो अर बाग गो ठेको दूसरा नै दे दयगो झिको इमानदार होवैगा। बे बिनै टेम पर फळ दयगा।”
42 यीसू केयो, “थे सासतर गो बो बचन कोनी पड़यो।”
“झिकै पथर नै राज मिस्तिरियां बेकार समझयो
बो ई कूंट गो सारा ऊं आच्छो पथर बण गयो।
इसो प्रभु करयो,
झिको म्हारी नजरां में आच्छो है।”e
43 ईंखातर मैं थानै केऊं कै परमेसर गो राज थारूं ले लियो जावैगो अर बो बानै दियो जावैगो झिका बिनै टेम पर फळ दयगो।
44 झिको ईं पथर पर पडेगो बो टोटा टोटा होज्येगो। अर जे ओ पथर कीं पर पडेगो तो बिनै पीस देयेगो।
45 जद मुख्य याजकां अर फरीसियां आ मिसाल सुणी तो बे जाणग्या कै म्हारै खातर केण लागरया है।
46 जद बे बिनै पकडण गी कोसिस करण लागग्या पण बे लोगा ऊं डरा क्यूंकै लोग यीसू नै परमेसर गी बात बताण आळो माना।