गन्दे किसान गी मिसाल
12
1 फेर यीसू बानै एक क्हाणी बोलगे इयां समझाण लाग्या कै, “एकर एक आदमी आपगै खेत में अंगूर गी बेला लगाई। फेर बी खेत गी चारूंमेर बाड बणाई ओर खड्डा खोद'गे अंगूर गो रस निकालण गी जिग्या बणाई। ऊंचो डूंचियो बणागे अंगूरां गो खेत ठेकै पर कीं किसान नै दे दियो अर आप केई दिना खातर दूसरै प्रदेस में उड़ग्यो।
2 जद अंगूर तोडण गो टेम आयो तो किसानो ऊं आपगै खेत गा कीं अंगूर ल्याण खातर एक नोकर भेज्यो।
3 पण किसानां बी नोकर नै पकड़गे कुंटयो अर पुठा खाली हात भजा दियो।
4 फेर एक ओर नोकर नै भेज्यो पण किसानां बिंगै सिर पर मारी अर बिंगी घनी बेजंती करी।
5 फेर मालिक एक ओर नोकर घालयो। पण बिनै किसान जान ऊं मार दियो। इंया मालिक केई नौकरा नै घालतो रेयो। पण केईया नै बा कूटया ओर केईया नै जान ऊं मार दिया।
6 आखिर में खेत गै मालिक कनै भेजन खातर आपगो बेटो ई रेग्यो झिकै ऊं बो भोत प्यार करतो हो। बण बिचार करयो, किसान मेरै बेटै गो जरूर आदर करेगा बेटै गी बात जरूर मानैगा।
7 पण किसानां जद बेटै नै आवता देख्यो तो आपसरी में केण लागग्या ओ खेत गै मालिक गो हकदार है। आओ म्हे इनै जान ऊं मार देवांगा तो सारी जमीन गा मालिक बण जावांगा।
8 ईंखातर बिनै पकड़ गै मार दियो अर बिंगै सरीर नै खेत ऊं बारै फेंक दियो।
9 अब थे सोचो जद खेत गो मालिक आ'गे आगै सागै के करेगो बो आ'गे जान ऊं मार देवैगो ओर आपगो खेत दूसरा नै ठेकै पर देवैगो।
10 थे लोग पवितर सासतर में लिखेड़ी ईं बात नै जाणो हो के? झिकै पथर नै मिसतरिया बिना बरते न्यारो फेंक दियो। बि पथर नै दूसरै लोगा आपगै मकान गो खास पथर बणागे बरतयो।
11 ओ काम परमेसर करयो,
अर आपणै खातर भोत चमत्कारी बात है।”a
12 ईं क्हाणी नै सुणन आळा मुखय याजक, यहुदी नेम सिखाण आळा अर समाज गै मोटै लोगा गै समझ में आग्या कै यीसू आ कहाणी बांगै बिरोध पर दोस लगाण खातर केई है पण बे भीड़ ऊं डरा हां। ईंखातर यीसू नै छोड़गे उड़ग्या।
कैसर नै कर देणो
13 फेर यीसू गो बिरोध करण आळा बांगी बाता में गळती काड़ण खातर केई फरीसी गुट गा ओर केई हेरोदेस गुट गै लोगा नै बांगै कनै भेज्या।
14 बा यीसू गै कनै आ'गे केयो, “गुरूजी म्हे जाणा हा कै थे इमानदार हो। सच्च बोलो हो, लोग थारै बारै में के सोचै ई बात गो फिकर कोनी करो ओर आदमी, आदमी में फरक जमाई कोनी करो हो चाहे कोई कितोई मोटो क्यूं ना होवै हर काम में किंया चालणो इंगै बारै में परमेसर गी मरजी नै इमानदारी ऊं सिखावो हो। ईंखातर थे म्हानै बताओ कै रोम गै राजा कैसर गो करजो चुकाणो सई है या गलत।”
15 म्हे कैसर नै कर देवा के ना? पण यीसू बानै पूछयो थे लोग मनै क्यूं परखो हो? क्यूं मेरी बाता में गलती काड़णी चावो हो? फेर यीसू केयो, “रोमी सरकार गो एक सिको ले आवो मैं थानै बताऊंगा।”
16 बे एक सिको ले आया अर यीसू नै पूछयो, “ईं पर किंगी फोटू है अर किंगो नाम लिखेड़ो है।” बां उतर दियो, “कैसर, कीं फोटू अर नाम है।”
17 फेर यीसू बानै केयो, “झिको कैसर नै देणो है बो कैसर नै दे देवो अर झिको परमेसर नै देणो है बो परमेसर नै दे देवो।” ओ उतर सुण गै बे अचंभी हो'ग्यो।
ब्या अर जी उठणो
18 इंगै बाद संदूकी गुट गै कीं लोगा यीसू गै कनै आ'गे सवाल पूछयो। बे कोनी मानै हा कै सारा मरण गै बाद आखरी टेम में दुबारा जींवता हो'ज्यगा।
19 ईंखातर पूछयो गुरू मूसा ओ नेम बतायो है कै जे आदमी गो भाई ब्या करण गै बाद बिना सन्तान मर जावै है तो बिं आदमी नै आपगै भाई गी पत्नी ऊं बयां कर'गे टाबर पैदा करणो है, बे टाबर बिंगै भाई गा मानीजैगा।
20 जद यीसू एक कहाणी ऊं समझाया कै एकर सात भाई हा। बामू एक जणै गी ब्या हो'ग्यो अर बो बिना उळाद मर ग्यो।
21 बिंगी घरआळी दूसरै भाई गै सागै ब्या करयो पण बो बिना उळाद मर ग्यो।
22 इयां सातूं भाई बे उळाद मरग्या अर आखिर में बा लुगाई बी मरगी।
23 अब बताओ, जद मरेड़ा सारा जीमता होवैगा तो बा लुगाई किंगी घरआळी हो'सी क्यूंकै साता बिंगै सागै ब्या करयो है।
24 यीसू उतर दियो, “थे पवितर सासतर में लिखेड़ी बाता नै कोनी जाणो अर परमेसर गी ताकत नै बी कोनी जाणो, ईं कारण भोत मोटी गळती करो हो।
25 जद मरेड़ा सारा जींवता हो जावेगा तो बे ना तो छोरीया ऊं ब्या करेगा, अर ना छोरियां नै ब्या खातर देवैगा। बे लोग सुरगदूता गी तरियां होवैगा।
26 जद तांई मरेड़ा दुबारै जीवता होण'गी बात है तो, थे मूसा गी लिखेड़ी किताब में पड़यो कोनी है कै बण रेगिस्तान में जगती हरी झाडकी देखी ओर बिनै देखण गेयो परमेसर बिऊं बात कर'गे केयो, मैं अबरहाम गो परमेसर इसहाक गो परमेसर अर याकूब गो परमेसर हूं बांगो परमेसर हूं ओ जद केयो जद ऐ दोनूं भोत पेला मर गेया हां।b
27 परमेसर तो जीमता गो परमेसर है मरेड़ा गो कोनी। इंगो मतलब ओ है कै सदा खातर कोनी मरयां है अर सारा मरण गै बाद जीमता होवैगा ईंखातर ईं पर बिस्वास कोनी करण ऊं थे लोग भोत मोटी गळती करो हो।”
सारा ऊं मोटी आग्या
28 बि टेम ई एक यहुदी नेम सिखाण आळो आयो अर यीसू ऊं बेंस करण लागग्यो अर यीसू बानै आच्छी तरियां उतर देवा हा अर बानै बिंगा उतर आच्छा लागा। ईंखातर बा यीसू नै पूछयो, “म्हारै सारै नेमा मूं खास नेम किस्यो है?”
29 यीसू जबाब दियो, “सारा ऊं खास नेम ओ है इसरएल गा लोगो सुणो आपणो परमेसर झिको मालिक है। बो एक है, बिंगै बिना कोई कोनी।
30 थारै पूरै दिल पूरी आत्मा पूरै मन ओर पूरी ताकत ऊं थे परमेसर झिको मालिक है बिऊं प्यार करो।
31 दूसरो खास नेम ओ है लोगा ऊं इंया प्यार करो जिंया थे अपणै आप सागै करो हो आ दो नेमा ऊं मोटो कोई नेम कोनी।”
32 ओ सुण गै यहुदी नेम सिखाण आळा केयो, गुरूजी थे भोत आच्छो केयो, थे बिलकुल सही केयो है कै एक ई परमेसर है ओर बिंगै बिना दूसरो कोई परमेसर कोनी।
33 बि परमेसर नै पूरै दिल, पूरी समझ अर पूरी ताकत ऊं प्यार करणो है जिंया म्हे अपणै आप ऊं करा है। ओ सारी होंबलिया अर बलिदान ऊं मोटो है।
34 जद यीसू देख्यो कै यहुदी नेम सिखाण आळा नै आच्छी तरियां समझा गै उतर दियो है बा बिनै केयो थे परमेसर नै आपगो राजा, मालिक मानण खातर पूरी तरियां तैयार हो इंगै बाद यीसू ऊं सवाल करण गी हिम्मत कोनी रेई मसी दाऊद ऊं बी मोटो है अर परमेसर गै सागै राज करण आळो है।
मसी किंगो बेटो है?
35 जद यीसू मिन्दर गै आंगण में सिखाण लागरया हा तो बा लोगा नै पूछयो, “यहुदी नेम सिखाण आळां क्यू केवै है कै मसी दाऊद राजा गो बेटो है।
36 पवितर आत्मा दाऊद राजा नै आ बात बताण खातर केयो तेरै परमेसर मेरै प्रभु मालिक नै केयो, बिरोध करण आळा नै हरा गै तेरै पंगा नीचे कर देऊं। जद तांई मेरी दाई ओर बैठगै मेरै सागै राज कर।”
37 फेर यीसू नै समझायो कै दाऊद मसी नै ही आपगो मालिक मानै है। तो फेर मसी सिरफ दाऊद गी पीढी में आण आळो किंया होयो। बो दाऊद ऊं मोटो है। यीसू गी ईं सिक्सा नै भीड़ भोत खुसी गै सागै सुणन लागरी ही।
यहुदी नेम सिखाण आळा ऊं सावधान
38 यीसू फेर केयो यहुदी नेम सिखाण आळा ऊं बचगे रेवो। बे अपणै आपनै खास आदमी गै रूप में दिखाण खातर घुमै है ओर चावै है कै बाजार में लोग बानै निमस्कार करै।
39 पराथना गै भवन में खास जगह पर बैठणो चावै है ओर ब्या या कोई कीं प्रकार गै भोज, नूंतो में ऐ मोटा लोगा गै सागै खास कुरसी पर बैठणो चावै है।
40 झिका गा पती मर गया है बांगी सम्पती धन पर करड़ो नेम बणागे उजाड़ देवै है। दिखावो करण खातर लम्बी पराथना करै है। इसै आदमी नै परमेसर मोटी सजा दयगो।
कंगाल विधवा गो धन
41 बो मिन्दर गी दान पेटी सामै बैठयो देखण लागरयो बठै लोग दान करण लागरया। बठै केई जणा भोत जादा दान देण लागरया।
42 पण एक गरीब विधवा, आई अर दो छोटा सिका घाल्या झिका एक पिसै गै बराबर हा।
43 यीसू चेला नै आपगै कनै बुला गै केयो, “मैं थानै केऊं हूं अण गरीब विधवा मिन्दर में सारा ऊं जादा दान दियो है।
44 सारा लोग आपगै कनै झिको ज्यादा धन हो, बिऊं दियो पण अण गरीब विधवा आपगो सारो कीं दान कर दियो क्यूंकै बिंगै कनै खाण पीण गै खातर झिका पीसा हां बे घाल दिया।”