सतर चेला नै सेवा में भेजणा
10
1 एक दिन आ बातां गै बाद में यीसू सतर चेला नै चुणया अर झिकै झिकै गाम में बां आप जाणो, बठै दो दो कर'गे पेलां बानै घाल दिया।
2 यीसू बानै केयो, “खेत पाकेड़ा तो घणाई है पण मजदूर थोड़ा है। ईंखातर खेत गै धणि नै जा'गे बिनती करो कै फसल बाडण खातर मजदूर घालै।”
3 अर देखो, मैं थानै भेड़ां गी तरियां, भेड़िया गै बरगा थारो बिरोध करण आळै लोगां गै बिचाळै भेजूं हूं।
4 ईंखातर थे जांवता आपगै सागै रिपिया, झोळो अर बुंटा गी दूसरी जोड़ी बी सागै ना लेईयो अर ना रा में किसी गो निमस्कार करणै में ज्यादा टेम खराब ना करियो।
5 झिकैई घर में जाओ तो पेलां इंया केवो कै, “ईं घर गो भलो होवै।”
6 बि घर में कोई धरमी भलो आदमी होयो तो बिनै थारी आसिस मिलसी। जे ना होयो तो थारो आसिरवाद थारै कनै पाछो आ'ज्यगो।
7 अर आपगो खाणो पीणो बि घर में होवै अर बि खातर घर घर ना फिरियो। बि घर ऊं लूखि मिसी मिलै बाई खाईयो क्यूंकै दिहाड़ियै नै बिंगी दिहाड़ी मिलणी चईयै।
8 अर जद थे किसै गाम में जाओ अर लोग राजी होगे थानै खाण खातर देवै तो बो ई खाईयो।
9 अर बठै बीमार लोगां नै ठीक करियो अर बानै केवो, “परमेसर गो राज थारै कनै आ'ग्यो।”
10 पण झिकै नगर में थे जाओ अर लोग थारो आदर ना करै तो बांगी गळियां में जा'गे केवो,
11 थारै नगर गी धूड़ अठई झाड़गे जांवां अर आपगा आप ईं जाणो। फेर ई थे जाण लेईयो कै परमेसर गो राज थारै कनै आ'ग्यो।
12 मैं थानै केऊं हूं कै न्याय गै दिन बि नगर गै लोगां गी हालत परमेसर गी सजा पायड़ै सोदोम नगर गै लोगां गी हालत ऊं भोत बुरो हो'सी।
अबिस्वासी नगरां नै धिकार
13 हाय, खुराजीन अर बेतसैदा नगर गा लोगो। झिका सामरथ गा काम थारै पर करया है बे ईं सूर अर सेदा नगरa गै लोगां पर होंता तो बे कद गी बोरी ओढगे अर राख लगागे आपगी गलती खातर पिछतांवंता।
14 पण न्याय गै दिन थारी हालत सूर अर सेदा गै लोगां गी हालत ऊं भोत ई बुरी होवैगी।
15 अर हे कफरनहूम गा लोगो, थे ओ ना सोचो म्हानै आदर ऊं सुरग में चकसी पण थानै तो नरक में गेरीजैगो।
16 फेर चेला नै केयो, “झिको थारी सुणैगो बो मेरी सुणैगो। झिको थानै धिकारैगो बो मनै धिकारैगो झिको मनै ओछो जाणै बो मनै घालण आळै नै ओछो जाणै।”
सतर चेला पाछा आया
17 बे सतर चेला बड़ा राजी होगे पाछा आया अर यीसू नै केण लाग्या, “हे प्रभु, थारै नाम ऊं ओपरी आत्मा म्हारो केणो मानै।”
18 यीसू बानै केयो, “मैं सैतान नै आकास ऊं बिजळी गी तरियां एकदम पड़तो देख्यो।
19 देखो, मैं थानै सांप अर बिछूआं यानी सैतान नै वस में करण गो अर बिरोदियां गी सारी ताकत नै वस में करण गो अधिकार थानै दियो है। कोई बी चीज ऊं थारो नुकसान कोनी होवै।
20 तो बी थे खुस ना होईयो कै ओपरी आत्मा म्हारै वस में हो'गी। पण थे ईं बात पर खुस होईयो कै थारो नाम सुरग में लिखेड़ो है।”
यीसू आनंद करयो
21 बि घड़ी बो पवितर आत्मा गै दिएड़ै आनंद ऊं भरग्यो अर केयो, “हे पिता, सुरग अर धरती गा प्रभु मैं थारो धन्यवाद करूं कै थे आं बातां नै ग्यानी लोगां ऊं अर समझदार लोगां ऊं लकोगे राखी बां लोगां पर परगट करी झिका टाबरां गी तरियां है। क्यूंकै थानै ओ ईं बडिया लागै।
22 मनै मेरै पिता सारो ग्यान अर सामरथ दी है अर पिता गै अलावा बेटै नै कोई कोनी जाणै है अर बेटै गै अलावा पिता नै कोई कोनी जाणै है। पण झिको बेटो परगट करै है बो पिता नै जाणै है।”
23 जद चेला कानी मुड़गे बानै केयो, “धन्य है बे आंखां झिको थे देखण लागरया हो, बे बिनै देखे।
24 क्यूंकै भोत सारा परमेसर गी बात बोलण आळा अर राजांवा आ सोची झिकी बात थे देखो, बानै म्हे देखां, पण देख कोनी सक्या अर थे झिकी सुणो बे ना सुण सक्या।”
दयालु सामरी गी मिसाल
25 जद एक धरम सासतरी खड़यो होयो अर यीसू नै परखण खातर बोल्यो, “हे गुरू, मैं अनन्त जीवन गो बारस होण खातर के करूं?”
26 यीसू बिनै केयो, “मूसा गै नेम-विधान में के लिखेड़ो है, तूं बिनै किंया समझ है?”
27 बण केयो, “तूं आपगै प्रभु परमेसर ऊं आपगै पूरै दिल अर पूरै प्राण अर पूरी ताकत अर पूरै मन ऊं प्रेम कर। अर आपगै पड़ोसी ऊं बी इंया ई प्रेम कर जिंया तूं आपणै आप ऊं प्रेम करै है।”b
28 यीसू बिनै केयो, “तूं ठीक उतर दियो। तूं इंया ई करेगो तो जींवतो रेवेगो।”
29 पण बण अपणै आपनै सई ठेराण खातर पूछयो, “मेरो पड़ोसी कुण है?”
30 यीसू एक मिसाल ऊं बिनै समझायो, “एक आदमी यरुसलेम ऊं यरीहो गाम में जाण लागरयो, रा गै मां डाकुआं बिंगा कपड़ा उतारगे अर कूट'गे अधमरयो कर'गे बठै रेड़ दियो।
31 ‘केई देर बाद बि रा पर एक याजक जाण लागरयो। बण बि आदमी नै देख्यो अर बिऊं कतरा गै पासो फोरगे टप ग्यो।’
32 बिंगै केई देर बाद बठकर लेवी गोत गो एक आदमी जावै हो। बण ई बिऊं नफरत करी अर कतरागे पासो फोरगे टप ग्यो।
33 पण बठाकर'ईं एक सामरी जाती गो आदमी जावै हो बण बिनै देख्यो अर बि पर तरस खायो।
34 बण बिंगै कनै आ'गे बिंगै घावां पर मलम पटी करी। अर आपगै गधै पर बिठागे धरमसाला में लेग्यो। अर बिंगी सेवा करण लागग्यो।
35 दूसरै दिन धरमसाला गै मालिक नै दो चांदी गा सिका देगे केयो, ‘इंगी सेवा करियो अर ज्यादा खरचो तेरै कनूं लागज्य तो पाछो आऊंती बारी देस्यूं।’
36 यीसू बिनै पूछयो, ‘तेरी समझ ऊं बता कै बां तीनां में अधमरयै आदमी गो पड़ोसी कुण हो?’”
37 बण केयो, “बो ई है झिकै बि पर तरस करयो।” जद यीसू बिनै केयो, “जा तूं बी दूसरा गै सागै इंया ई कर।”
मारथा अर मरियम गै घरै यीसू गो जाणो
38 जद बे चालतां-चालतां, बो एक गाम में पूग्या। बठै एक मारथा नाम गी लुगाई ही बा बिनै आपगै घरै ले जा'गे बिंगो आदर मान करयो।
39 बिंगी एक मरियम नाम गी भेन ही। झिकी यीसू गै पगां में बैठी अर बिंगी बातां सुणन लागगी।
40 पण मारथा बिंगी सेवा करती करती थकगी। अर यीसू नै आ'गे केयो, “हे प्रभु, थानै मेरी चिंता कोनी के? मेरी भेन सारो काम मेरूं कराण लागरी है इनै थे केवो कै मनै सारो लगावै।”
41 यीसू बिनै उतर दियो, “मारथा, हे मारथा, तूं भोत काम अर बातां गी चिंता करै अर घबरावै है।
42 पण एक काम गी बात जरूरी ही, झिकी नै मरियम चुणली आ इऊं खोसीजै कोनी।”