कंगाल विधवा गो दान
21
1 फेर यीसू धनवान लोगां कानी देख्यो झिका दान पातर में आपगो दान घालण लागरया।
2 बठै ई बां एक गरीब विधवा लुगाई नै दो छोटा सिका घालतां देखी।
3 जद बण केयो, “मैं थानै साची केऊं कै अण विधवा लुगाई परमेसर गी नजरा में दूसरा लोगां ऊं जादा दान दियो है।
4 क्यूंकै सारा लोगां आपगै बोळै धन मूं थोड़ो सो दान करयो है पण अण गरीब विधवा लुगाई बिंगै कनै झिको कीं हो बो दे दियो।”
मिन्दर गै ढाण गी बात
5 जद केई लोग आपसरी में बात करा कै मिन्दर कितै सुणै पथरां अर दान करेड़ी चिजाऊं सजायो है।
6 जद यीसू बानै केयो, “झिकै मिन्दर नै आज थे देखण लागरया हो, कदी हिस्यो टेम आसी ईं मिन्दर नै ढा देसी।”
संकट अर क्ळेस
7 जद बां यीसू नै पूछयो, “हे गुरू, बो दिन कद आवैगो अर बि दिन गी के निसानी हो'सी।”
8 यीसू बानै केयो, चोकस ऊं रेईयो अर किंगी बात में आ'गे भटक ना जाईयो, क्यूंकै भोत लोग मेरै बरगा बणगे थारै कनै आवैगा अर केसी मैं मसी हूं अर दुनियां गो अंत समय आ'ग्यो है। पण थे बांगै लारै ना लागज्याईयो।
9 फेर केयो, “थे लड़ाई अर दंगा होण'गी बात सुणगे घबराईयो ना। क्यूंकै ऐ बातां तो पेलां होवैगी पण बि टेम अंत कोनी होवैगो।”
10 फेर बण केयो कै हरेक जाती अर हरेक देस एक दूसरै गै बिरोध में खड़या होज्येगा।
11 अर मोटा मोटा भूकंप आवैगा, जिग्यां-जिग्यां काळ पड़ैगा अर हरेक महामारी पड़ैगी। अर आकास गूंजण लागज्यगो अर मोटा-मोटा निसान आकास में दिखण लागज्यगा।
12 पण ऐ बातां होण ऊं पेलां लोग थानै मेरा चेला होण खातर पकड़ैगा, दुख देवैगा अर पंचायत में सूंपगे जेळ में बंद करवा देवैगा अर मेरै नाम गै कारण थानै राजा गै सांमणै पेस करेगा।
13 पण बो टेम मेरै बारै में बताण गो मोको होवैगो।
14 जद थे ईं बात गी चिंता ना करियो कै आपणै पर लगाएड़ै दोसा गो जबाब के देवांगा?
15 क्यूंकै बि टेम मैं थानै हिस्यो ग्यान अर समझ दयूंगा कै थारा बिरोधी थारी बात गो जबाब कोनी दे सकैगा।
16 अर थारा मां-बाप, भाई, बन्धु झिका मेरै उपर बिस्वास कोनी करै बे थानै पकडुवावैगा अर थारै मूं केईया नै मरवा दयगा।
17 थारो मेरै पर बिस्वास होण गै कारण सारा लोग थारूं बैर राखण लागज्यगा।
18 पण थारो बाळ ईं बांको कोनी होवैगो।
19 थारी धीरजाई ही थारै प्राण नै बचागे राखेगी।
यरुसलेम गै बिनास गी बात
20 जद थे यरुसलेम नै सेना ऊं घिरेड़ो देखल्यो तो समझ लेईयो कै सहर उजड़णगो टेम आ'ग्यो।
21 बि टेम झिका यहुदियां नगर में रेण आळा लोग प्हाड़ा पर भाज जाईयो अर झिका यरुसलेम नगर में रेवै बे सारा बारै निकळ जाईयो अर झिका बारले पासै रेवै बे नगर गै मा सरण लेण खातर ना जाईयो।
22 क्यूंकै बो दिन पवितर सासतर में लिखेड़ी बातां पूरी होण गै कारण बठै गै लोगां नै सजा देण गो होवैगो।
23 पण तनै इतो बुरो हो'सी बां लुगाईयां पर झिकी बि टेम गरभवती हो'सी या फेर नानै टाबरां नै दूध प्यांती हो'सी, बां लुगाइंया ऊं भाजीजणो कोनी क्यूंकै बि टेम बठै भोत क्ळेस अर परमेसर गी रीस लोगां पर हो'सी।
24 बे तलवारां ऊं बाडिज्यगा अर झिका बच जिसी बानै बंदी बणागे दूसरा देसां में लेजीसी अर यरुसलेम पर राज करण आळै गेर यहुदी लोग बानै कुचलता रेवैगा जद ताईं बांगो टेम पूरो कोनी होज्य'गो।
मिनख गै बेटै गो दुसर आणो
25 जद मिनख गो बेटो दुसर आसी बि टेम सूरज, अर चांद अर तारा में डरावणा निसान दिखैगा अर सारी धरती गै लोगां पर भोत क्ळेस आसी। क्यूंकै बे समुन्दर गै ऊथळ-पुथळ होण ऊं भोत डरज्यगा।
26 संसार पर आण आळै क्ळेस ऊं डरतां लोगां गो जी निकळज्यगो क्यूंकै आकास गी सकतियां हलाइजेगी।
27 जद बे मिनख गै बेटै नै बिंगी सकती अर मेंमा गै सागै बादळा ऊं आंता देखैगा।
28 जद ऐ सगळी बातां होण लागै तो सीधा खड़या होगे आपगो सिर उपर चकियो क्यूंकै बि टेम थारो छुटकारो नेडै़ हो'सी।
अंजीर गै दरखत गी मिसाल
29 फेर बण बानै एक मिसाल देगे समझाया कै अंजीर गै दरखत नै अर दूसरा दरखतां नै देखो,
30 जिंया ई आंगै नूंअ पता या कूंपळ निकळणनै लागज्य तो थानै ठा लागज्य कै अब गरमी गी रूत आण आळी है।
31 ईं तरियां बे सारी बातां थानै होंती दिखण लागज्य तो समझ लेईयो परमेसर गो राज आण आळो है।
32 मैं थानै साची-साची केऊं कै जद तांई ऐ बातां पूरी ना हो'ज्य बि टेम तांई ईं पीढी गै लोगां गो अंत कोनी होवै।
33 आकास अर धरती तो टळ जिसी पण मेरी बातां कदै'ईं टळै कोनी।
जागता रेवो
34 ईंखातर सावधान रेवो कठैई इंया ना होवै कै थारो मन लापरवाई अर नसै में अर ईं जीवन गी चिंतावां ऊं उदास हो'ज्य अर बो दिन फांसी गी तरियां चाणचकै ईं थारै गळै में घलज्य।
35 क्यूंकै बो दिन सारी धरती पर रेण आळा लोगां पर एकैदम ईं आसी।
36 ईंखातर जागता रेवो अर हर टेम पराथना करता रेवो। जिंऊ आण आळै टेम गै क्ळेस ऊं बचण खातर अर मिनख गै बेटै गै सांमणै खड़या होण गै लायक बण सको।
37 बो दिन में मिन्दर में परबचन करतो अर रात नै बारै जा'गे जेतुन प्हाड़ पर रेंतो हो।
38 अर दिन गै पेली सारा लोग परबचन सुणन खातर मिन्दर में बांगै कनै आंता हा।