मिन्दर गै बिनास गै परमेसर गी बात
24
1 जद यीसू मिन्दर मूं बारै आयो तो बिंगै चेला बिनै मिन्दर गो बणावट दिखाण कनै ले गया।
2 जद यीसू बानै केयो, “ओ मकान थे सीधो खडयो देख्यो। मैं थानै साची केऊं, ईं पर लगाएडी एक एक ईंट पटीज्येगी।”
3 यीसू जद जेतुन प्हाड़ पर बैठ्यो तो चेला बिंगै कनै आ'गे पूछयो, “म्हानै बता, ऐ बातां कद हो'सी? संसार गो अंत कद हो'सी अर थारै आण गै निसान गो म्हानै किंया ठा लागसी?”
4 यीसू उतर दियो, “सावधान रेईयो, थानै कोई भटका ना दे।
5 मैं ओ ईंखातर केऊं, इसा भोत है झिका मेरै नाम में आ'गे केसी, मैं मसी हूं। बे भोत लोगां नै आ'गे भटकावेगा।
6 जद थे लडाईयां गी बातां सुणो तो डरियो ना। इंया तो होवैगो पण ओ अंत कोनी हो'सी।
7 हर एक राज एक दूसरी गै बिरोध में खड़या होज्येगो अर काळ पडेगा अर बुचाळ आवैगा।
8 पण जद लुगाई गै जापै गै टेम झिको बिनै दुख होवै इंया ई दुख सरू होवैगो।
9 बे टेम बे थानै सजा देण खातर पकडावेगा अर मरवावेगा अर सारी जातां गा लोग थारूं बैर करसी क्यूंकै थे मेरा चेला हो।
10 बि टेम भोत सै लोगां गो बिस्वास टूट ज्येगो। बे एक दूसरै नै पकडावेगा अर एक दूसरै नै बैर करेगा।
11 भोत सारा झूठी बात बताण आळा खड्या होज्येगा अर लोगां नै भटकावेगा।
12 क्यूंकै अधरम बड़ज्येगो अर लोगां गो आपसरी गो प्रेम कम होज्येगो।
13 पण झिको आखिर तांई ठिक्यो रेवेगो बिंगो ई उद्धार होवैगो।
14 सुरग गो सुब समाचार सारै संसार में सारी जातियां नै सुणाई ज्यगो जद अंत होज्य'गो।”
बोळे तकडे़ दुख गी सरुवात
15 “ईंखातर जद थे खतरनाक बिनास आळी चिजां झिकी गै बारे में दानिएल परमेसर गी बात बताण आळै बतायो, थे मिन्दर गी पवितर जिग्या में खडयो देखोगा, (झिका पढै बे इनै समझो)
16 जद झिका लोग यहुदी है बे प्हाड़ां पर भाज जाईयो।
17 झिको आपगी छत पर होवै बो कीं लेण नीचे ना उतरै।
18 झिको खेतां में काम करण लागरयो है बो आपगा गाबा लेण पाछो ना आवै।
19 अर झिकी लुगाईयां पेट ऊं होवै अर झिकी छोटे टाबरां नै दूध पियांवंती होवै बा खातर भोत दुख भरया हो'सी।
20 पराथना करो कै थानै पाळे गै टेम अर सब्त गै दिन ना भाजणो पडै़।
21 बि टेम हिसी बिपती आवैगी जद परमेसर धरती बणाई बिऊं लेगे आज तांई कदी कोनी आयी अर ना'ई आवैगी।
22 अर जे परमेसर बा दिनां नै घटावंतो ना तो कोई कोनी बचतो। पण बो आपगै चुणेडे़ लोगां खातर दिन कम करेगो।
23 बा दिनां में जे थानै कोई केवै, देखो मसी अठै है या बठै है तो बिंगो बिस्वास ना करियो।
24 क्यूंकै कपटी मसी अर झूठा बात बताण आळा खड़या होज्येगा कै इसा चमत्कार गा काम दिखावैगा अर चुणेड़ा लोगां नै बी भटका देवैगा।
25 ईंखातर थे याद राखियो, मैं थानै सारो कीं बता दियो।
26 जे थानै कोई केवै, बो बि कमरे में लुकेड़ो है या बन उजाड में है बठै ना जाईयो अर ना'ई बा पर बिस्वास करियो।
27 मैं थानै केऊं जिंया बिजली अंगूणूं लेगे आथूण तांई चमकै बियां ई मिनख गो बेटो परगट होवैगो।
28 जियां गिरजा नै ठा लागै लोथ बठै पडी है बिंया ई थे निसान देखोगा कै मिनख गो बेटो आवै।”
मिनख गै बेटै गो दुसर आणो
29 बा दिना में झिका दुख पड़सी।
“बिंगै बाद हातो हात ई सूरज काळो पड़ज्येगो
अर चांद गी रोसनी कोनी निकळेगी
अर आकास गा तारा पड़ज्येगा
अर आकास गी सारी सकतियां हलाइजेगी।”a
30 बि दिन मिनख गै बेटै गै आण गो निसान आकास में परगट हो'सी। जद धरती गा सारा लोग दुख करेगा। अर बे बिनै सकती अर मेमा सागै सुरग ऊं आवंता देखैगा।b
31 बो ऊंची आवाज में तुरही बजागे आपगै सुरगदूतां नै घालेगो। बे फेर एक कूंट ऊं दूसरी कूंट तांई आपगै चुणेड़ा लोगां नै भेळा करेगा।
अंजीर गै दरखत गी मिसाल
32 अंजीर गै दरखत ऊं सीख ल्यो। जिंया बिंगी डाळी पोली होज्यै अर पता फूटण लागज्यै तो थानै ठा लागज्यै कै गरमी आण आळी है।
33 बिंया ई जद थे सारो कीं होवंता देखोगा तो समझ लेईयो बो टेम कनै आ'ग्यो।
34 मैं थानै साची केऊं जद तांई ऐ सारी बातां पूरी ना होज्यै जद तांई ईं पीढी गो अंत कोनी होवैगो।
35 धरती अर आकास टळ सकै पण मेरी बातां कोनी टळ सकै।
36 बि दिन गै बारे में कोई कोनी जाणै, ना सुरगदूत अर ना खुद बेटो। एकलो परमेसर ई जाणै।
37 जिंया नूह गै दिनां में होयो बिंया ई मिनख गै बेटै गो आणो हो'सी।
38 जिंया जल प्रळय आणूं पेला नूह जहाज पर चडण गै टेम तांई लोग मोज मस्ती में रेवंता अर आपगै सारा काम काज करता।
39 जद जल प्रळय आयी तो बण सारा नै डबो दिया। मिनख गै बेटै गो बी इंया आणो हो'सी।
40 बि टेम खेत में काम करता दो आदमियां मूं एक नै उठाइज्येगो अर एक नै बठै छोडिज्येगो।
41 चकी पीसती दो लुगाईया मूं एक उठाइज्येगी अर एक बठै छोडिज्येगी।
42 थे चोकस रेईयो क्यूंकै थे कोनी जाणो थारो प्रभु कद आसी।
43 जे मालिक नै ठा होवै कै चोर कद आसी तो बो जागतो रेवै अर घर में चोरी कोनी होण दये।
44 ईंखातर थे बी तैयार रेओ, जद थे सोच्यो बी कोनी होवैगो, बि टेम मिनख गो बेटो आज्येगो।
बिस्वास योग्य दास अर बुरो दास
45 एक बिस्वास योग्य नोकर बो ई है झिको आपगै मालिक आपगै नोकरां पर अधिकार दियो है कै बानै टेम पर रोटी दे।
46 जे बो मालिक आगै आपगै नोकर नै काम करतो देखे तो बो बिनै जरूर बिंगो प्रतिफल देगो।
47 मैं थानै साची केऊं, बो बिनै आपगी सारी संपती गो अधिकारी बणासी।
48 पण जे बो दुस्ट दास सोचण लागज्यै कै मेरो मालिक अब कोनी आवै।
49 अर आपगै साथी दासां नै कुटण लागज्यै अर पीण आळा गै सागै खाण पीण लागज्यै।
50 बि दास गो मालिक हिस्यै दिन आवैगो जद बिनै अडीक कोनी होवैगी। अर हिस्यै टेम झिकै नै बो जाणतो ई कोनी हो'सी।
51 जद बो मालिक आ'गे बि दास नै भोत ललकारेगो अर बिंगो भाग दुस्ट लोगां सागै ठेरावेगो। बठै रोणो अर दांतां गो पीसणो होवैगो।